Sot Toktok blong Ol Yang Woman

Stamba Tingting blong Progres blong Miwan

Program blong Progres blong Miwan bae i helpem fet blong yu long Jisas Kraes mo testemoni blong yu abaot Jisas Kraes i kam moa strong taem yu stap lanem ol tijing blong Hem mo yusum olgeta oltaem long laef blong yu. Bae i helpem tugeta, famle blong yu naoia mo fiuja famle blong yu, blong i kam moa strong. Bae hem i helpem yu blong rere blong mekem mo kipim ol tabu kavenan mo kasem ol odinens blong tempol. Mo bae i mekem yu rere blong kam wan stret fetful, memba blong Jos blong Jisas Kraes blong Ol Lata-dei Sent.

Program blong Progres blong Miwan i yusum ol eit valiu blong Ol Yang Woman blong helpem yu blong andastanem moa gud se yu yu huia, from wanem nao yu stap long wol, mo wanem nao yu mas mekem olsem wan gel blong God blong mekem yu yu rere long dei ia we bae yu go long tempol blong mekem ol tabu kavenan. Bae i helpem yu blong rere long ol fiuja wok blong yu olsem wan fetful woman, waef, mama, mo lida insaed long kingdom blong God. Taem yu tekem pat long Program blong Progres blong Miwan, hem i tijim yu blong mekem ol komitmen, wok blong mekem olgeta komitmen ia oli kam tru, mo blong ripotem progres blong yu long papa o mama o long wan lida. Ol paten we bae yu yusum taem yu wok long Progres blong Miwan—olsem prea, skripja stadi, seves, mo kipim wan jenol—bae oli kam ol wanwan fasin blong yu evri dei. Ol fasin ia bae oli mekem testemoni blong yu i kam moa strong mo bae i helpem yu blong lan mo kam antap truaot long laef blong yu.

Ol Samting we Yu Mas Mekem

Blong komplitim program blong Progres blong Miwan, bae yu nidim blong:

Go long sakramen miting oltaem (taem i posibol).
Laef folem ol standet olsem we oli stap insaed long buk ia Blong Ol Yut Oli Kam Strong.
Komplitim ol valiu eksperiens mo wan valiu projek blong wanwan long ol eit valiu.
Kipim wan jenol blong yuwan.
Go long seminari o tekem pat long independen stadi (taem i gat).
Ridim Buk blong Momon oltaem.
Rekodem testemoni blong yu abaot Sevya Jisas Kraes.

Afta we yu finisim olgeta samting ia we yu mas mekem, bae yu kwalifae blong kasem Rekonisen Olsem Wan Yangfala Woman afta we bisop o branj presiden blong yu i mekem wan intaviu blong faenemaot se yu klin inaf.

Blong Statem

Yu save stat wok long program blong Progres blong Miwan taem yu gat 12 yia o long taem blong baptaes blong yu sapos yu gat bitwin 12 mo 18 yia. Ol yang woman we oli no ol memba blong Jos blong Jisas Kraes blong Ol Lata-dei Sent oli welkam tu blong oli save tekem pat.

Taem yu stat, bae yu kasem wan toj nekles wetem toj logo blong Ol Yang Woman long hem. Taem yu werem nekles ia hem i soemaot komitmen blong yu blong holem laet ia blong yu i stap antap mo stanap from trutok mo fasin blong stap stret mo gud.

Invaetem papa mo mama blong yu blong helpem yu blong planem mo komplitim program blong Progres blong Miwan. Taem yu serem ol eksperiens ia wetem olgeta, hem i save mekem rilesensip blong yu wetem olgeta i kam strong moa. Mama blong yu o wan nara gudfala woman i save wok long Progres blong Miwan wetem yu, mo tugeta, yutufala i save kasem Rekonisen Olsem Wan Yangfala Woman. Yu mas tekem ol eksperiens mo ol projek folem ol situesen blong yuwan, ol intres, mo ol nid blong yu, be faswan, yu mas kasem raet blong papa o mama, wan Yang Woman lida, o wan narafala adalt.

Progres blong Miwan i save kam pat blong ol gudfala samting we yu stap mekem long hom, skul, seminari, mo long komuniti. Yusum indeks blong ol topik we i stap biaen long en blong buk ia blong faenem ol stret topik we yu gat intres long hem mo blong lanem olsem wanem yu save yusum olsem pat blong Progres blong Miwan. Tingbaot blong yu mas presem yuwan from evri gudfala samting we yu mekem evri dei. “Tru long ol smol mo ol samting we oli no strong, ol bigfala samting i kam blong hapen” (Alma 37:6).

Ol Gaedlaen

Bae yu komplitim sikis eksperiens (tri we oli jusum finis, mo nara tri we bae yu nomo yu jusum) mo wan projek blong ten aoa long wanwan long ol seven valiu blong Ol Yang Woman. Blong valiu blong klin fasin, bae yu komplitim fo eksperiens we yu mas mekem mo projek we yu mas mekem blong ridim Buk blong Momon. Yu save statem wetem eni valiu mo wok long eni oda we yu wantem.

Taem yu komplitim wan valiu eksperiens o wan valiu projek, luklukbak long hem wetem papa, mama, wan lida o wan nara adalt. Mekem man o woman ia i saenem nem blong hem long eksperiens ia we yu jes komplitim long buk blong Progres blong Miwan. Kipim wan rekod blong progres blong yu long Rekod Pepa blong Progres blong Miwan (luk long pej 77).

Ol Valiu Eksperiens

I gud blong yu komplitim ol eksperiens long wan valiu we oli bin jusum finis bifo yu statem olgeta we yuwan yu bin jusum long valiu ia.
Wetem ol valiu eksperiens we yu bin jusum, yu save raetem kasem tu valiu eksperiens blong yuwan long wanwan valiu o yu save jenisim olgeta we i stap, blong oli go stret wetem ol intres blong yuwan, ol gol, o ol situesen we yu stap long hem. Bifo yu statem ol eksperiens ia, papa mo mama o wan lida blong Ol Yang Woman i mas givim raet from ol samting ia fastaem.

Ol Valiu Projek

Komplitim ol eksperiens we oli talem se bae yu mas mekem long wanwan valiu bifo yu statem projek long valiu ia, be wetem valiu blong klin fasin i no semmak. Yu save stat blong ridim Buk blong Momon long eni taem.
Mekem papa o mama, wan lida, o wan nara adalt i givim raet long wanwan valiu projek bifo yu statem.
Yu save invaetem ol narafalawan blong oli helpem yu wetem ol valiu projek blong yu, be yu mas spendem ten aoa o moa long taem blong yu long wanwan projek.

Spid mo Rekonisen

Yu save wok long spid we yu wantem, be oltaem yu mas wok long wan eksperiens o wan projek. Yu mas mekem olgeta ia:
- Komplitim wan eksperiens long wan manis mo wan projek long evri sikis manis (tu projek long wan yia).
- Go oltaem long sakramen miting mo tekem pat long seminari (long ples we i gat).
- Mit wetem wan memba blong bisoprik blong yu evri yia blong toktok raon long sakses blong yu long Progres blong Miwan, ol hadwok blong yu blong laef folem ol standet we i stap insaed long Blong Ol Yut Oli Kam Strong, mo eni nara kwestin we yu gat.
Taem yu komplitim evri eksperiens mo projek long wan valiu, lida blong yu bae i luksave sakses blong yu long wan miting blong Ol Yang woman mo bae i givim long yu wan stika we bae yu save putum long pej blong Valiu Ajivmen blong Progres blong Miwan long buk ia (luk long pej 78) mo wan riben blong yu putum insaed long ol skripja blong yu.
Bae yu gat janis blong serem ol sakses blong yu long wan selebresen blong Bes blong Ol Yang Woman we oli holem evri yia blong Progres blong Miwan.
Sakses blong yu long Progres blong Miwan bae oli luksave tu, taem yu kasem ol setifiket long Bihaev, Maea Med, mo Lorel taem yu stap muv long wan klas i go long narawan.

Taem Yu Komplitim Progres blong Miwan

Taem yu komplitim evri valiu eksperiens mo projek long Progres blong Miwan, rekodem testemoni blong yu abaot Sevya Jisas Kraes long pej 79. Luklukbak long seksen blong “Rekonisen Olsem Wan Yangfala Woman” long buk ia wetem wan papa o mama, wan lida, o wan nara adalt (pej 76). Afta setemap wan taem blong yu intaviu wetem bisop blong yu blong hem i save saenem rekomendesen long pej 82 mo arenjem blong oli prisentem setifiket mo medol blong yu long Rekonisen Olsem Wan Yangfala Woman.
Hem i gud blong yu wok long Progres blong Miwan blong yu taem yu stap long Yang Woman, iven afta we yu kasem Rekonisen Olsem Wan Yangfala Woman. Ol tingting long olsem wanem blong yu progres oli stap long seksen blong “Wanem Nao Mi Save Mekem Taem Mi Komplitim Progres blong Miwan?” (pej 83). Luklukbak long hemia wetem wan papa o mama, wan lida, o wan nara adalt. Bae yu wantem blong jus blong kasem wan smol medol blong Ona Bi blong hangem long nekles blong yu wetem medol blong yu, o yu save statem ful program ia bakegen. Oli leftemap tingting blong yu tu blong helpem ol nara yang woman wetem Progres blong Miwan blong olgeta. Taem yu stap gohed wetem progres blong yu, bae yu stap long rod blong go long tempol mo developem ol kwaliti we bae oli helpem yu truaot long laef blong yu.