Tabu Fasin

Yufala i save kam joen long laef blong God … Yufala i mas traehad blong mekem fasin blong yufala i kam gud moa; gat fasin blong bilif, ale soemaot long fasin we i stret; mekem ol fasin we i stret, ale soemaot we yufala i gat save; kasem save ya finis, ale soemaot we yufala i save blokem samting we yufala i no wantem; afta soem we yufala i save holem wok longtaem; taem yufala i gat paoa ya, soemaot long fasin ya we yufala i stap mekem wanem we God i wantem; mo taem yufala i mekem finis, soemaot we yufala i lavem brata blong yufala; mo afta, soemaot we yufala i lavem olgeta man. (luk long Seken Pita 1:4–7).

Mi bin kasem ol tabu fasin, we bae mi traehad blong developem.

Ol Valiu Eksperiens we Yu Mas Mekem

Komplitim tri valiu eksperiens ia we yu mas mekem. Mekem papa, mama o wan lida blong yu i saenem mo i putum deit long wanwan long olgeta afta we yu finisim olgeta.

1. Wanem nao sam long ol tabu fasin blong wan gel blong God? Ridim “Famle: Wan Ofisol Toktok I Go long Wol” (luk long pej 101); Seken Pita 1; Alma 7:23–24; mo Doctrine and Covenants 121:45. Long ol toktok blong yuwan, listim ol tabu fasin we oli bin toktok raon long hem long riding blong yu. Tingbaot olsem wanem yu save faenemaot mo developem wanwan long ol kwaliti ia. Rekodem ol tingting blong yu insaed long jenol blong yu.

2. Olsem wan yang woman yu bin kasem blesing wetem ol tabu fasin blong kam wan woman. Kam antap long save blong yu abaot fasin blong stap olsem wan woman mo glad tumas long wei ia we yu stap olsem wan woman. Ridim Ol Proveb 31:10–31 mo tu (2) toktok we i abaot fasin blong stap olsem wan woman we oli givim long wan konfrens we i stap insaed long ol magasin blong Jos. Luklukbak long wanem nao “Famle: Wan Ofisiol Toktok I Go long Wol” (luk long pej 101) i tokbaot long saed blong fasin blong stap olsem wan waef mo wan mama. Afta askem mama blong yu o wan nara mama we yu laekem, wanem nao hem i ting se oli impoten fasin blong stap olsem wan mama. Listim ol fasin ia long jenol blong yu. Afta jusum wan long ol fasin ia mo traehad blong developem. Afta tu (2) wik ripotem sakses blong yu long wan papa, mama o wan lida.

3. Mekem laef long hom blong yu i kam moa gud. Blong tu wik, mekem wan spesel hadwok blong mekem rilesensip blong yu wetem wan famle memba i kam strong moa taem yu soem lav tru long ol aksen blong yu. No tokbaot hem, o toktok nogud long hem, mo lukaotem ol gudfala kwaliti we i stap long famle memba ia. Raetem sam smol toktok blong leftemap tingting, prea from famle memba ia, faenem ol defren wei blong helpem hem, mo talemaot lav blong yu long hem. Serem ol eksperiens blong yu ia mo ol tabu kwaliti we yu bin faenemaot ia wetem famle memba ia o wetem wan papa, mama o lida.

Sam Moa Valiu Eksperiens

Komplitim tri moa valiu eksperiens. Yu save jusum folem ol tingting we i stap ia o raetem tu (2) blong yuwan nomo. Papa, mama o wan lida blong yu i mas givim raet blong yu wok long ol eksperiens ia we yuwan yu raetem bifo yu save stat blong wok long olgeta. Mekem papa, mama o wan lida blong yu i saenem mo i putum deit long wanwan long olgeta afta we yu finisim olgeta.

4. Lanem baehat ol sakramen prea we i stap insaed long Doctrine and Covenants 20:77, 79. Long taem blong sakramen, lisin gud long ol prea mo tingbaot wanem nao hem i minim blong yu tekem long yu, nem blong Jisas Kraes, mo olsem wanem nao, taem yu mekem olsem ia, i lidim ol aksen mo tingting blong yu. Praktisim fasin blong stap biaen long ol kavenan blong baptaes blong yu. Stat blong mekem wan samting evri dei blong luksave mo developem moa ol tabu fasin blong yu mo blong i helpem yu blong tingbaot Lod Jisas Kraes oltaem. Afta tu (2) wik, rekodem eksperiens blong yu insaed long jenol blong yu.

5. Fasin blong obei hem i wan fasin blong Sevya. Traehad blong lisin moa long papa mo mama blong yu. Ridim Luk 2:40–51 mo Jon 6:38. Developem wan paten blong stap obei taem yu stap mekem wan spesel hadwok blong tritim papa mo mama blong yu wetem respek mo kaen fasin mo mekem wanem nao papa mo mama i askem yu blong mekem, be i no blong tufala i stap ripitim samting ia long yu. Afta tu (2) wik, rekodem long jenol blong yu, olsem wanem taem yu stap obei moa i bin helpem yu blong wantem blong gohed blong stap mekem olsem, mo olsem wanem i bin helpem yu blong andastanem tabu fasin mo ol tabu rol blong ol papa mo mama.

6. Developem ol tabu kwaliti blong yu. Ridim Matiu 5:9; Jon 15:12; Galesia 5:22–23; Kolosi 3:12–17; Fas Jon 4:21; mo Moronae 7:44–48. Lanem baehat ves we yu laekem moa long ol skripja ia. Faenem ol tabu kwaliti ia we oli raetem i stap long ol skripja ia mo listim olgeta long jenol blong yu. Jusum wan kwaliti, mo blong tu (2) wik, traehad blong mekem i kam pat blong evri dei laef blong yu. Rekodem progres mo ol eksperiens blong yu long jenol blong yu.

7. Lanem mining blong toktok ia man blong mekem pis. Afta faenem mo ridim faef (5) skripja we i tij abaot ol man blong mekem pis. Kam wan eksampol blong man blong mekem pis long hom blong yu mo long skul blong yu taem yu stop blong tokbaot ol narawan, stop blong komplen, o toktok nogud long o abaot ol narawan. Prea evri moning mo naet long Papa long Heven blong i helpem yu blong yu mekem olsem ia. Afta tu (2) wik, raetem long jenol blong yu ol niu fasin ia we yu wantem blong developem, mo olsem wanem taem yu stap olsem wan man blong mekem pis hem i pat blong tabu fasin blong yu, mo olsem wanem bae yu gohed blong stap wan man blong mekem pis.

Ol Valiu Eksperiens blong Miwan

Valiu Projek

Afta we yu komplitim ol sikis valiu eksperiens blong tabu fasin, krietem wan projek we bae i helpem yu blong praktisim wanem yu bin lanem. Hemia bae i wan impoten hadwok we bae i tekem yu samples ten aoa blong yu komplitim. Wetem prea, lukaotem Tabu Spirit blong i lidim yu blong jusum wan projek we i gat mining long hem.

Mekem papa, mama o wan lida i givim raet long projek blong yu bifo yu statem. Raetem wan evaluesen afta yu finis. I gat sam tingting blong wan valiu projek we i stap daon ia.

• Developem wan skil we yu save yusum long fiuja hom blong yu, olsem kuk, somap, fiksim ol samting, oganaes, o flasem wan haos. Tijim wanwan skil ia long wan nara man, mo eksplenem olsem wanem blong stanemap wan haos blong oda (luk long D&C 109:8) hem i wan long ol tabu rol blong yu.

• Givim seves, blong wan longfala taem, long wan we i stap long nid, olsem wan yangfala mama, wan man o woman o pikinini we i handikap, o wan olfala man o woman. Rekodem long jenol blong yu olsem wanem seves blong yu ia i bin helpem yu blong luksave tabu fasin long yuwan mo long ol narawan.

• Listim ol tabu fasin mo ol rol blong ol woman ia olsem we oli tijim i stap insaed long “Famle: Wan Ofisol Toktok I Go long Wol” (luk long pej 101), mo mekem wan projek we bae i helpem yu blong save moa long wan long ol rol ia.

• Yusum wan art o wan samting blong mekem long han, we yu bin lanem, mo mekem wan samting blong fiuja hom blong yu. Rekodem long jenol blong yu olsem taem yu krietem samting hem i pat blong tabu fasin blong yu mo olsem wanem taem yu serem wanem yu stap krietem i bin blesem ol narawan.

• Blong wok long pis wetem ol narafala man hem i wan tabu fasin (luk long D&C 38:27). Mekem wan projek we bae i sapotem yuniti long ol famle blong yu, skul blong yu, o komuniti blong yu. Rekodem long jenol blong yu olsem wanem yu save mekem wan jenis taem yu wok long yuniti wetem ol narawan.

Projek blong mi hem i:

Plan blong mi blong tekemaot projek ia hem i:

I givim raet

Deit we yu ting se bae yu finisim projek

Evaluesen blong mi long saed blong projek ia hem i (putum olsem wanem yu bin filim, mo olsem wanem save blong yu abaot tabu fasin i bin kam antap):

Papa, mama o lida i saen

Deit:

Ol aoa we mi spendem