Olsem Wanem Mifala I Impoten

Tingbaot se praes blong ol sol i bigwan tumas long ae blong God (luk long D&C 18:9–10).

Mi mi impoten wetem tabu misin blong miwan, we bae mi wokhad blong fulfilim.

Ol Valiu Eksperiens we Yu Mas Mekem

Komplitim ol tri valiu eksperiens ia we yu mas mekem. Mekem papa, mama o wan lida blong yu i saenem mo i putum deit long wanwan long olgeta afta we yu finisim olgeta.

Yu wan gel blong Papa blong Heven, we i save yu mo i lavem yu. Ridim Ol Sam 8:4–6; Jeremaea 1:5; Jon 13:34; Doctrine and Covenants 18:10; Abraham 3:22–23; mo Joseph Smith—History 1:1–20. Raetem long jenol blong yu olsem wanem ol skripja ia oli tijim yu se Papa long Heven i save yu, i lavem yu, mo i luksave yu.
Lanem olsem wanem ol petriakel blesing oli impoten taem yu stadi abaot olgeta insaed long Stap Tru long Fet mo long ol toktok blong konfrens we i jes pas nomo. Faenemaot from wanem nao oli stap givim ol petriakel blesing ia mo huia nao i save givim. Toktok raon wetem wan papa o mama o wan Jos lida long olsem wanem blong rere blong kasem wan petriakel blesing mo olsem wanem i save tijim yu se yu yu impoten mo huia yu mo kam wan gaed truaot long laef blong yu. Sapos yu no kasem blesing blong yu yet, rere blong yu kasem.
Ridim Doctrine and Covenants 18:10 mo 121:45. Mekem evri samting we yu save mekem blong leftemap tingting blong ol narawan mo mekem olgeta oli filim se oli impoten. Evri dei, blong tu (2) wik, lukaotem ol gudfala kwaliti mo gudfala fasin blong ol narawan. Talemaot long olgeta o raetem ol samting ia i go long olgeta. Long jenol blong yu, raetem wanem nao yu bin lanem abaot olsem wanem wanwan i impoten mo olsem wanem nao tras blong yuwan i gro taem yu leftemap tingting blong ol narawan.

Sam Moa Valiu Eksperiens

Komplitim tri moa valiu eksperiens. Yu save jusum folem ol tingting we i stap ia o raetem tu (2) blong yuwan nomo. Papa, mama o wan lida blong yu i mas givim raet blong yu wok long ol eksperiens ia we yuwan yu raetem bifo yu save stat blong wok long olgeta. Mekem papa, mama o wan lida blong yu i saenem mo i putum deit long wanwan long olgeta afta we yu finisim olgeta.

Yu stap rere naoia blong fulfilim wan spesel misin long wol ia. Ridim Doctrine and Covenants 88:119. Insaed long jenol blong yu, mekem wan lis blong ol hop mo ol drim blong yu long saed blong fiuja hom, famle mo edukesen blong yu, mo sam moa impoten samting we yu wantem mekem long laef blong yu, mo tu hemia blong kam wan waef mo wan mama. Nao rekodem wan plan we bae i helpem yu blong mekem ol gol ia oli kam tru. Serem plan ia wetem wan memba blong famle, wan lida, o wan fren
Tekem pat long wan danis, toktok, miusik o drama long skul, long komiuniti blong yu, o long jos. Olsem wanem nao, taem yu bin tekem pat long aktiviti ia, i bin mekem filing blong yu abaot yuwan i kam antap mo yu gat tras long yuwan? Rekodem ol tingting blong yu long jenol blong yu.
Taem yu tekem pat long famle histri, yu kam blong save huia yu mo olsem wanem yu yu impoten. Visitim ol famle memba blong yu blong lanem evri infomesen we yu save lanem abaot famle histri blong yu. Afta, fulumap wan bubu jat blong famle blong yu mo mekem wan lis blong ol tempol odinens we oli bin mekem finis blong wanwan man mo woman long bubu jat ia.
Papa long Heven i givim ol spesel presen long yumi. Ridim 1 Korin 12:4–12; 13; Moronae 7:12–13; 10:8–18; mo Doctrine and Covenants 46:11–26. Askem wan memba blong famle, wan Yang Woman lida, mo wan fren blong raetem daon ol gudfala kwaliti we Lod i bin givim long yu. Listim ol presen blong yu long jenol blong yu, mo raetem olsem wanem nao yu save gohed blong developem olgeta presen ia mo yusum olgeta blong sevem ol famle blong yu mo ol narawan.

Ol Valiu Eksperiens blong Miwan

Valiu Projek

Afta we yu komplitim ol sikis valiu eksperiens blong olsem wanem mifala i impoten, mekem wan projek we bae i helpem yu blong praktisim wanem nao yu bin lanem. Hemia bae i wan impoten wok we bae i tekem yu samples ten aoa blong yu komplitim. Wetem prea, lukaotem Tabu Spirit blong i lidim yu blong jusum wan projek we i gat mining long hem.

Mekem papa, mama o wan lida i givim raet long projek blong yu bifo yu statem. Raetem wan evaluesen afta yu finis. I gat sam tingting blong wan valiu projek we i stap daon ia.

Yu gat wan spesel misin we i kam long God blong mekem wok long wol mo yu bin kasem blesing wetem ol talen blong mekem misin ia. Taem yu komplitim wan long ol projek ia, bae yu witnesem valiu mo wok blong ol narawan mo tu bae yu luk paoa we yu save gat long ol laef blong ol narawan. Talemaot tankgyu blong yu long olgeta we yu wok wetem, mo rekodem ol eksperiens blong yu long jenol blong yu.

Putum tugeta histri blong yuwan o blong famle blong yu, mo yusum ol toktok long jenol, ol pikja, mo sam nara impoten pepa blong mekem histri ia.
Serem wan long ol presen blong yu taem yu tijim wan long wan topik blong skul, miusik, wan spot o wan skil blong art.
Mekem wan projek blong mekem laef blong wan we i stap long nid i kam antap moa.
Lidim o tekem pat insaed long wan yut kwaea, wan plei, wan talen so, o wan art so we oli putumaot.
Lanem wan skil we plante man oli wantem we i save helpem yu long wan fiuja wok blong yu.

Projek blong mi hem i:

Plan blong mi blong tekemaot projek ia hem i:

I givim Raet

Deit we yu ting se bae yu finisim projek

Evaluesen blong mi long saed blong projek ia hem i (putum olsem wanem yu bin filim, mo olsem wanem save blong yu abaot olsem wanem wanwan man o woman i impoten, i bin kam antap):

Papa, mama o lida i saen

Deit:

Ol aoa we mi spendem