Fapi Kenggin Likʼngin e Mich
ko Fare Galasia Ku Yesus Kristus ni Fan ko Gidiiʼen Got ko Tin Tomur e Rran

1 Ba mich u wunʼmad ni bay Got, ni Chitmangiy ni Machalbog, nge Fak ni Jesus Kristus, nge Fare Kan ni Thothup.

2 Ba mich u wunʼmad ni bay ni gechig nag e gidii ni bachan e denen rorad, ma gathi bachan Adam ni thab e motochiyal.

3 Ba mich u wanʼmad ni bachan e Bayul ni pi Kristus, ma gubin e gidii ma rayog ni ngar pateged e yafos ni manemus u daken e motochiyal ni unfol riy ni gubin nge machiben e Gospel.

4 Ba mich u wanʼmad ni tin ni mʼon i kenggin likʼngin machiben e Gospel e: bin taʼareb, Nge mich u wunʼiy somol ni Jesus Kristus; bin lʼagruw, Ngan kalngan; bin dalip, Taufe u maren nge mʼay machan e pi denen; bin aningeg, Taʼpaay nga daken lolgey ngan piʼe tawaʼath ko Kan Thothup.

5 Ba mich u wanʼmad ni gidii e thingari yib e pong rokʼ Got ngakʼ u daken e pi profet ni wol rogon ni kan midil nag, ngan tay paʼay nga daken lolgey, ni piʼin ni bay matowrad, ni nge machib nag e Gospel nge pi gaming nge rogon e motochiyal ni bay.

6 Ba mich u wanʼmad ni taʼab gamʼing e yibe rin ko Galasia ni Kakrom nge tin chiney, pong ngaehol, pi apostal, pi profet, pi pastor, pi sensey, pi evangelist, nge ku boch ra-rogon e ngongolen e galasia.

7 Ba mich u wanʼmad ni kan pii e tawaath u balowthey, tini yibe yog ni bay buch, thin rok Got ni be yib, changar ni be thilthil, fasagey ko liliy, nge rogon i pilpilyeg e thin u balowthey, nge ku boch banʼen.

8 Ba mich u wanʼmad ni Bible ni kan pilyeg ni ba matʼaw e thin rokʼ Got; ma kub mich u wanʼmad ni Babiyor ku Mormon e thin rokʼ Got.

9 Ba mich u wanʼmad gubin e pinʼen ni yib rok Got ni i weliy, nge gubin ni ke yib ne ke weliy e chiney, ma ba mich u wanʼmad ni bay i weliy boch ni thʼab i gaʼ falngin nge boch ni rib gaʼ fan banen ni gamʼingin Gilʼilungun Got.

10 Ba mich u wanʼmad rib riyulʼ ni bay ni ulunguy piyu Israel ma bay ni fulweg nga yalen fa Ragag i Ganong; ma Zion (fa bin Beʼech e Yerusalem) e bay ni toy nga daken e nam nu Mariken; me kristus e bay suwey e Fayleng; ma Fayleng e bay ki beʼech me suguy e maluplup ni paradis.

11 Gamad be yog nib puf matʼawon e liyor ngak Got ni gubin ma rayog rok ni wod rogon ni be yiluy laniyanʼ mad ngomad, nge kuʼer ngak gubin e gidii ni taareb rogon matawrod, yad rorad ko rogon e liyor rorad ko pinen ara rogon fa gin ni ngar liyor gad ngay.

12 Ba mich u wanʼmad ni kan dugliy ni ke mil famad nga tan paʼ e pi pilung, nge pi presedent, nge pi tasuwon, nge pi mite thin ni nguʼun fol muun taʼ farad mini kol ayuwen e motochiyal.

13 Ba mich u wanʼmad ni nguʼug yulʼyul gad, mad muʼug weliyed e tin nib yalen, nge tin tamilang, muʼug gol gad, muʼug matʼaw niged gamad, nguʼug rinʼed e tin nib felʼ ngakʼ urngin e gidii; thingar gogned ni nguʼug folgad ko tini chiyliy Paul—Ere ba mich u wanʼ mad gubin, banʼen ma gamad be athpeg gubin banen, kagu yunʼuyed boor banʼen, ma athap romad e yigiyog ni gu yunʼuyed gubin banʼen nib felʼ. Faʼanra bay banen nib tamilang gamʼingin, ma ba felʼ matʼawon fa manging, ni felʼ bugwan, ma aram e pinenʼ ni gamad be gay.