Ang Misyonaryo nga mga Panaw ni Apostol Pablo

Gaza Si Felipe nagsangyaw kabahin ni Kristo ug mibunyag sa usa ka Etiopiahanon nga eunoco sa iyang pagpaingon sa Gaza (Buh. 8:26–39).

Jerusalem Tan-awa ang mapa 12 alang sa mga panghitabo sa Jerusalem.

Joppe Si Pedro nakadawat og usa ka panan-awon nga ang Dios nagtugot sa gasa sa paghinulsol ngadto sa mga Hentil (Buh. 10; 11:5–18). Si Pedro mipabangon ni Tabita gikan sa mga patay (Buh. 9:36–42).

Samaria Si Felipe nangalagad didto sa Samaria (Buh. 8:5–13), ug sa kaulahian sila si Pedro ug Juan mitudlo dinhi (Buh. 8:14–25). Human sila mitugyan sa gasa sa Espiritu Santo, si Simon ang tigsalamangka mitinguha sa pagpalit niini nga gasa gikan kanila (Buh. 8:9–24).

Cesarea Dinhi, human ang usa ka anghel nangalagad sa usa ka senturyon nga ginganlan og Cornelio, si Pedro mitugot kaniya nga mabunyagan (Buh. 10). Dinhi si Pablo mihimo sa iyang pagpanalipod sa atubangan ni Agripa (Buh. 25–26; tan-awa usab sa JS—K 1:24–25).

Damasco Si Jesus mipakita ngadto ni Saulo (Buh. 9:1–7). Human si Ananias mipahiuli sa panan-aw ni Saulo, si Saulo gibunyagan ug misugod sa iyang pangalagad (Buh. 9:10–27).

Antioquia (sa Siria) Dinhi ang mga tinun-an unang gitawag nga mga Kristiyanos (Buh. 11:26). Si Agabo nanagna og kagutom (Buh. 11:27–28). Dako nga panagbangi mitunga sa Antioquia kabahin sa pagtuli (Buh. 14:26–28; 15:1–9). Sa Antioquia si Pablo misugod sa iyang ikaduhang misyon uban nila ni Silas, Bernabe, ug Judas Barsabas (Buh. 15:22, 30, 35).

Tarso Ang lungsod nga pinuy-anan ni Pablo; si Pablo gipadala dinhi sa mga Kaigsoonan aron pagpanalipod sa iyang kinabuhi (Buh. 9:29–30).

Cipro Human gipanggukod, pipila ka mga Santos miikyas ngadto niini nga isla (Buh. 11:19). Si Pablo mipanaw lahus sa Cipro sa iyang una nga misyonaryo nga panaw (Buh. 13:4–5), ingon sa gibuhat nila ni Bernabe ug Marcos sa kaulahian (Buh. 15:39).

Pafos Si Pablo mitunglo sa usa ka salamangkero dinhi (Buh. 13:6–11).

Derbe Sila si Pablo ug Bernabe misangyaw sa ebanghelyo niini nga dakbayan (Buh. 14:6–7, 20–21).

Listra Sa diha nga si Pablo miayo sa usa ka bakol, siya ug si Bernabe gipasidunggan isip mga dios. Si Pablo gibato ug gituohan nga patay apan naulian ug mipadayon sa pagsangyaw (Buh. 14:6–21). Pinuy-anan ni Timoteo (Buh. 16:1–3).

Iconio Sa ilang una nga misyon, sila si Pablo ug Bernabe misangyaw dinhi ug gihulga nga batoon (Buh. 13:51–14:7).

Laodicea ug Colosas Ang Laodicea usa sa mga sanga sa Simbahan nga giduaw ni Pablo ug gigikanan sa sulat nga nadawat (Col. 4:16). Kini usab usa sa pito ka mga dakbayan nga gitala diha sa basahon sa Pinadayag (ang uban mao ang Efeso, Esmirna, Pergamo, Tiatira, Sardis, ug Filadelfia; tan-awa sa Pin. 1:11). Ang Colosas nahimutang 18 ka mga kilometro ngadto sa silangan sa Laodicea. Si Pablo misulat sa mga Santos nga nagpuyo dinhi.

Antioquia (sa Pisidia) Sa ilang unang misyon, sila si Pablo ug Bernabe mitudlo sa mga Judeo nga si Kristo gikan sa kaliwat ni David. Si Pablo mihalad sa ebanghelyo sa Israel, dayon ngadto sa mga Hentil. Sila si Pablo ug Bernabe gigukod ug gipapahawa (Buh. 13:14–50).

Mileto Samtang dinhi sa iyang ikatulo nga misyon, si Pablo mipasidaan sa mga anciano sa Simbahan nga “mabangis nga mga lobo” mosulod sa panon (Buh. 20:29–31).

Patmos Si Juan usa ka binilanggo niini nga isla sa diha nga iyang nadawat ang mga panan-awon nga karon gilangkob sa basahon sa Pinadayag (Pin. 1:9).

Efeso Si Apolos misangyaw dinhi nga may gahum (Buh. 18:24–28). Si Pablo, sa iyang ikatulo nga misyon, mitudlo sa Efeso sulod sa duha ka mga tuig, nagkabig og daghang mga katawhan (Buh. 19:10, 18). Dinhi siya mitugyan sa gasa sa Espiritu Santo pinaagi sa pagpandong sa mga kamot (Buh. 19:1–7) ug mipahigayon og daghang mga milagro, lakip ang pagpapahawa sa dautan nga mga espiritu (Buh. 19:8–21). Dinhi ang mga nagsimba ni Artemisa nakahimo og kaguliyang batok kang Pablo (Buh. 19:22–41). Kabahin sa basahon sa Pinadayag gipahinungod ngadto sa Simbahan sa Efeso (Pin. 1:11).

Troas Samtang si Pablo dinhi sa iyang ikaduha nga misyonaryo nga panaw, siya nakakita og panan-awon sa usa ka tawo sa Macedonia nga nangayo og tabang (Buh. 16:9–12). Samtang dinhi sa iyang ikatulo nga misyon, si Pablo mipabangon ni Eutico gikan sa mga patay (Buh. 20:6–12).

Filipo Sila si Pablo, Silas, ug Timoteo mikabig sa usa ka babaye nga ginganlan og Lidia, mipapahawa og dautan nga espiritu, ug gibunalan (Buh. 16:11–23). Sila nakadawat og balaanon nga tabang aron makaikyas sa bilanggoan (Buh. 16:23–26).

Atenas Si Pablo, samtang diha sa iyang ikaduha nga misyon sa Atenas, misangyaw diha sa Bungtod sa Marte (Areopago) kabahin sa “dios nga wala hiilhi” (Buh. 17:22–34).

Corinto Si Pablo miadto sa Corinto sa iyang ikaduha nga misyon, diin siya mipuyo uban nila ni Aquila ug Priscilla. Siya misangyaw dinhi ug mibunyag og daghang mga katawhan (Buh. 18:1–18). Gikan sa Corinto, si Pablo misulat sa iyang epistola ngadto sa mga taga-Roma.

Tesalonica Si Pablo misangyaw dinhi sa panahon sa iyang ikaduhang misyonaryo nga panaw. Ang iyang pundok sa misyonaryo mibiya paingon sa Berea human ang mga Judeo mihulga sa ilang kaluwasan (Buh. 17:1–10).

Berea Sila si Pablo, Silas, ug Timoteo nakakita og halangdon nga mga kalag aron tudloan sa panahon sa ikaduhang misyonaryo nga panaw ni Pablo. Ang mga Judeo gikan sa Tesalonica misunod ug migukod kanila (Buh. 17:10–13).

Macedonia Si Pablo mitudlo dinhi sa iyang ikaduha ug ikatulo nga mga panaw (Buh. 16:9–40; 19:21). Si Pablo midayeg sa pagkamanggihatagon sa mga Santos sa Macedonia, kinsa mihatag kaniya ug sa kabus nga mga Santos sa Jerusalem (Roma 15:26; 2 Cor. 8:1–5; 11:9).

Melita Si Pablo nalunod niini nga isla sa iyang pagpaingon sa Roma (Buh. 26:32; 27:1, 41–44). Siya wala maunsa sa usa ka pinaakan sa bitin ug miayo og daghan kinsa nangasakit sa Melita (Buh. 28:1–9).

Roma Si Pablo misangyaw dinhi sulod sa duha ka mga tuig ubos sa pagkabilanggo sa kaugalingong panimalay (Buh. 28:16–31). Siya usab misulat og mga epistola, o mga sulat, ngadto sa mga taga-Efeso, mga taga-Filipos, ug mga taga-Colosas ug nila ni Timoteo ug Felimon samtang gibilanggo didto sa Roma. Si Pedro misulat sa iyang unang epistola gikan sa “Babelon” diin malagmit mao ang Roma, dili dugay human sa mga panggukod ni Nero sa mga Kristiyanos sa A.D. 64. Kini sa kinatibuk-an gituohan nga sila si Pedro ug Pablo gimartir dinhi.