Foto Bib yo

Foto Bib yo

Foto Bib yo

Entwodiksyon
Foto sa yo sou sit enpòtan yo montre peyi kote Jezi te mache a, kote pwofèt biblik yo te viv ak anseye, ak kote anpil evènman nan ekriti yo te pase.
Rezime
Kat anba a montre lokasyon foto yo ki nan seksyon sa a. Nan paj apre yo, chak foto nimewote akonpaye pa yon deskripsyon brèf sou lye a. Apresa yo bay lis evènman ekriti enpòtan yo pou zòn sa a, ansanm avèk referans ekriti yo pou nou ka konnen ki kote pou nou jwenn plis bagay pou nou li sou evènman sa yo.
1. Rivyè Nil la ak Ejip
Vejetasyon ki grandi sou tout rivaj rivyè Nil la. Nan yon kote konsa, manman Moyiz te kache pitit gason l lan ki te tibebe a. Pi lwen, nou wè zòn dezè yo ki kouvri pi fò nan Ejip la.
2. Mòn Sinayi (Orèb) ak Dezè Sinayi a
Gen plizyè sit posib pou Mòn Sinayi a. Youn nan kote tradisyonèl yo se Jebèl Mousa. (Mòn Moyiz la), nou wè la a.
3. Dezè Jideyen an
Dezè Jideyen an chita nan Lès Jerizalèm epi li desann ale nan Lanmè Mòt la.
4. Kadès-baneya
Sa se yon vizyon sou direksyon nòdès gran vale ki nan dezè a (ki rele wadi tou) kote Kadès-baneya ye a. Kouran ki koule la pandan sezon lapli a fè l tounen yon kote byen mouye ki bay fwi nan dezè Zin nan.
5. Tonb Patriyach yo
Batiman sa a, youn nan konstriksyon ki gen plis renome nan Tè Sen an, se Wa Ewòd ki te konstwi l nan Ebwon nan menm plas tradisyonèl kavo Makpela a, kote Abraram te achte l kòm yon plas pou yon simityè familyal (Jen. 23).
6. Peyi Kolin Jideya
Peyi kolin Jide a gen anviwon 56 kilomèt nan longè ak 27 kilomèt nan lajè. Majorite tè a plen wòch epi l difisil pou kiltive. Gen kèk vale ki sitiye ant kolin yo kote tè a pi pwodiktif la. Ansyen Izrayelit yo te abite nan kolin sa yo, epi yo te itilize yo kòm pwoteksyon kont anvayisè.
7. Bètleyèm
Foto sa a montre kolin wòch ak teritwa bèje sou devan, avèk vil modèn Bètleyèm nan ki nan fon.
8. Jerizalèm
Sou direksyon nò anlè Jerizalèm. Nan mitan foto a nou wè yon moniman Mizilman ki kouvri avèk yon tèt won annò, ki rele Dom Wòch la. Nan ansyen tan an, Juif yo te adore nan tanp ki te nan kote sa a. Miray yo ki tou pre Dom Wòch la antoure ansyen vil Jerizalèm nan. Vale Kidwon an chita sou bò dwat mi an. Mòn Olivye a pi lwen sou bò dwat la, men li pa nan imaj la. Nan nò, lòtbò Dom Wòch la, se anplasman posib Gòlgota, oubyen Kalvè a.
9. Tanp Ewòd la
Foto sa a montre yon modèl tanp Ewòd la (sou yon echèl 1:50) jan yo te panse l te ye an 67 apre Jezikri. Andedan miray ki antoure tanp lan, gen sanktyè ki gen Sen Dèsen an, plas sen an, ak twa gran lakou.
10. Machpye Tanp lan
Zòn tanp lan te divize fè plizyè lakou, epi lakou deyò yo te kanpe sou teren ki pi ba yo. Adoratè yo te antre nan diferan pòt, ansanm avèk pòt ki mennen anwo yo sou machpye ki soti nan lakou deyò yo epi apre nan lakou andedan yo. Anpil milye moun te monte machpye sa yo pandan lontan, Pitit Gason Bondye a tou. Lè lame Tit la te detwi tanp lan an 70 apre Jezikri, machpye yo te kouvri avèk debri. Kèk akeyològ te dekouvri yo nan ane 1970 yo pandan debleyaj yon pati nan ansyen vil Jerizalèm nan.
11. Mòn Olivye a
Vi sa a etann sou lès Mòn Olivye a. Batiman ki devan nan imaj la make yon anplasman posib pou Jaden Jetsemane an. Nan dat 24 oktòb 1841, Èldè Orson Hyde nan Kolèj Douz Apot yo te monte sou Mòn Olivye a epi l te ofri yon priyè konsekrasyon pwofetik pou retou pitit Abraram yo ak konstriksyon tanp lan.
12. Jaden Jetsemane
Foto ansyen pye olivye sa a te fèt nan yon sit tradisyonèl Jaden Jetsemane an. Sovè a te priye tou pre kote sa a lè L te fin kite chanmòt la nan nuit yo te trayi L la.
13. Gòlgota
Falèz wòch sa a, ki sanble avèk yon zo tèt epi li dirèk dirèk deyò Pòtay Damas Jerizalèm nan (Jan 19:17, 20), li posib pou se plas Gòlgota a, kote Krisifiksyon an te fèt la.
14. Tonm nan Jaden an
Lye posib pou tonm nan jaden an Jozèf Arimate te posede a. Gen anpil pwofèt modèn ki panse kò Sovè a te depoze nan tonb sa a yo montre la a.
15. Jeriko
Foto sa a montre vejetasyon ki nan Jeriko nan tan kounyea. Nan tan lontan li te yon vil ki te antoure avèk miray nan vale Rivyè Jouden an, 252 mèt pi ba nivo lanmè a. Li se yon zòn agrikòl rich kote pye palmis dat ak jaden zoranj fè rak an abondans. Mòn tradisyonèl tantasyon an nan fon foto a (Mat. 4:1–11).
16. Chilo
Nan vi ki bay sou lwès sa a, a, rès ansyen vil Chilo a jis akote sant imaj la sou bò goch la.
17. Sichèm
Ansyen sit Sichèm nan. Nan premye plan an, nou gen Mòn Garizim, epi dèyè li, gen Mòn Ebal. Sichèm sitiye ant de montay sa yo.
18. Dotan nan Samari
Plizyè bit mòn ak vale karakterize Dotan. Se yon bon tè pou fè patiraj bèt. Lè Izrayelit yo te tabli nan peyi a, Se Manase ki te resevwa rejyon sa a.
19. Sezare ak Laplèn Charon pou ale nan Kamèl
Vi ki etann nan direksyon nò sou lòtbò ansyen pò Sezare ak Laplèn Charon an. An menm tan an, anlè foto a, nou wè chèn mòn Kamèl yo.
20. Jopa
Direksyon nòdwès lòtbò pòt antre vil Jopa a.
21. Vale Jizreyèl
Vi ki etann nan direksyon sidwès sou tèt Mòn Tabò a nan direksyon yon pati nan vale Jizreyèl la, ki rekonèt sou non Plèn Esdrayelon tou. Malgre moun te souvan panse ke Vale Jizreyèl la se yon gwo vale, an reyalite se yon seri vale ki konekte Laplèn Ako a avèk Vale Jouden an ak rejyon Lanmè Galile a. Paregzanp, Vale Megido a nan pòsyon lwès vale sa a. Vale Jizreyèl la sete wout prensipal ki travèse Tè Sen an ant Lanmè Mèditerane sou bò lwès ak Vale Jouden an nan lès.
22. Mòn Tabò
Nan direksyon nòdwès pou al Mòn Tabò. Tè plat ki antoure Mòn Tabò a fè pati Vale Jizreyèl la. Nazarèt chita sou kolin ki tou pre Mon Tabò yo.
23. Lanmè Galile a ak Mòn Beyatitid yo
Vi ki etann sou direksyon sidwès apati kwen nòdwès Lanmè Galile a, ki se yon lak dlo dous. Kolin nan mitan an se sit tradisyonèl Mòn Beyatitid yo. Kapènawòm sou bò goch la, deyò foto a. Tiberyas pi lwen nan sid bò rivaj lwès la.
24. Kapènawòm
Kapènawòm, ki sitiye sou rivaj nò Lanmè Galile a, sete katye jeneral ministè galileyen Jezi a (Mat. 9:1–2; Mak 2:1–5). Yon katye jeneral lapèch ak komès enpòtan ki te gen anpil siksè, sete abitasyon Janti yo ansanm avèk Juif yo. Popilasyon pandan premye syèk la pwobableman pa t janm depase 1.000 moun. Kapènawòm te sitiye sou kafou wout komèsyal enpòtan yo, avèk tè fètil ki te antoure li. Sòlda women yo te konstwi batiman douch ak depo nan kote sa a. Malgre anpil mirak ki te fèt nan kote sa a, jeneralman pèp la te rejte ministè Sovè a. Se poutèt sa Jezi te modi vil la (Mat. 11:20, 23–24). Apre kèk tan, Kapènawòm te tonbe an dekadans epi l rete san moun.
25. Rivyè Jouden
Rivyè Jouden an kòmanse nan nò lanmè Galile a, li koule ladan l, epi l kontinye nan sid pou ale nan Lanmè Mòt la. Yo te pran foto sa a tou pre devèsman rivyè a sou Lanmè Galile a.
26. Sezare Filipi
Sezare Filipi sitiye nan pye Mòn Èmon an. Kouran sa a se youn nan tèt dlo Rivyè Jouden yo. Ewòd Filip, ki te dirije zòn sa a, te bati yon vil nan kote sa a pou onore Seza (anperè li a) ak tèt pa l; anvan sa, vil la te rele Panyas epi jodi a li rele Banyas epitou Sezare Filipi.
27. Nazarèt
Foto vil modèn Nazarèt sa a te fèt sou direksyon sid. Nan epòk biblik la, Nazarèt te yon ti vilaj.
28. Dan
Ansyen vil Dan nan te rele Leshèm (Joz. 19:47) oubyen Layis (Jij 18:7, 14) anvan Izrayelit yo te kaptire tè a. Kouran dlo yo ki nan kote sa a ansanm avèk kouran dlo nan Sezare Filipi yo se sous prensipal Rivyè Jouden an. Se sit Tanp Jewobowam nan yo montre la a.
29. Atèn
Foto sa a, yo te pran bò Ayewopaj la (Kolin Mas), montre Akwopolis Atèn nan. Atèn sete ansyen kapital Grèk Atika a, epi nan epòk Nouvo Testaman an li te nan pwovens Women ki te rele Akayi a. Yo te nonmen l nan onè deyès payen Grèk ki te rele Atèn. Nan epòk Nouvo Testaman an, Atèn te deja pèdi majorite nan grandè li ak glwa li, men, li te toujou gen estati ak moniman anpil fodye ak deyès, ansanm avèk “Bondye Enkoni an” (Tra. 17:23).
30. Korent
Korent sete vil prensipal pwovens Women Akayi a. Li te sitiye sou pwent tè ki konekte Peloponesus avèk prinsipal tè Grès la, posesyon ki gen plaj nan kote lès tankou nan kote lwès la. Se te yon vil sou pò a ki te gen richès ak enfliyans.
31. Efèz
Debri teyat Grèk Efèz yo, kote Apot Pòl te preche a. Pandan epòk Nouvo Testaman an, Efèz te gen gran renome nan mitan mond popilè a akoz tanp mayifik li yo ki te bati pou onore deyès paganis Women an, Dyana. An debri kounyeya, yon fwa, Efèz te kapital pwovens Women Azi a epi l te yon gwo katye general pou komès. Endistri ajantri vil la te devlope yon kòmès rantab nan vann imaj Dyana.
32. Il Patmòs
Patmòs, yon zile nan Lanmè Eje a kote yo te bani Jan (Apok. 1:9). Daprè tradisyon an, li te travay nan kote sa a nan endistri mab yo.