1 ’E i teienei, e pāpa’i au, ’o Nephi, i ni’a i teie nei mau ’api, i te ’ā’amu nō tā’u ra mau ’ohipa, ’e tā’u ra fa’aterera’a, ’e tā’u ra ’ohipa tāvinira’a ; nō reira, nō te pāpa’ira’a i tā’u ra ’ā’amu, e mea ti’a iā’u ’ia paraparau ato’a i te mau mea nō ni’a i tō’u metua tāne, ’e nō ni’a ato’a i tō’u ra mau tua’ana.

2 Inaha ho’i, i muri a’era, ’ia fa’aoti a’era tō’u metua tāne i te parau mai i te mau parau nō ni’a i tāna ra moemoeā, ’e i te fa’aitoitora’a ho’i ia rāua ’ia rahi tō rāua ha’apa’o maita’i, ’ua parau atu ra ’oia ia rāua nō ni’a i te mau ’āti Iuda—

3 ’Oia ho’i, i muri iho i tō rātou ha’amoura’ahia, ’oia ho’i tō taua ’oire rahi ra o Ierusalema, ’e te hōpoi-tītī-ra’a-hia e rave rahi i Babulonia ra, ’ia au i te tau mau o te Fatu ra, e ho’i fa’ahou mai rātou, ’oia ïa, e fa’aho’ihia mai i rāpae i te tītīra’a ; ’e i muri iho i tō rātou fa’aho’ira’ahia mai i rāpae i te tītīra’a, e fāri’i fa’ahou rātou i te fenua nō tō rātou ra ’āi’a.

4 ’Oia ïa, ’ia tae i te ono hānere matahiti i muri a’e i te taime i fa’aru’e ai tō’u metua tāne i Ierusalema, e fa’ati’a ai te Fatu te Atua i te hō’ē peropheta i rotopū i te mau ’āti Iuda—’oia ïa, i te hō’ē Mesia, ’oia ho’i, i te hō’ē Fa’aora nō tō te ao nei.

5 ’E ’ua parau ato’a ’oia nō ni’a i te mau peropheta, ’e te pae rahi ’o tei fa’a’ite pāpū mai i teie mau mea nō ni’a i teie Mesia, i parauhia e ana ra, ’oia ho’i teie Tāra’ehara nō tō te ao nei.

6 Nō reira, i mo’e na ’e i hi’a na te mau ta’ata ato’a, ’e e vai noa rātou mai te reira te huru ē a muri noa atu, maori rā ’ia ti’aturi rātou i teie nei Tāra’ehara.

7 ’E ’ua parau ato’a ’oia nō ni’a i te hō’ē peropheta ’o tē haere mai nā mua i te Mesia, nō te fa’aineine i te ’ē’a o te Fatu—

8 ’Oia ïa, e haere ato’a ’oia nā roto i te mēdēbara, i te pi’ira’a atu ē : ’A fa’aineine ’outou i te ’ē’a o te Fatu, ’e ’a fa’atītī’aifaro i tōna mau haere’a ; tē ti’a nei ho’i te hō’ē i rotopū ia ’outou na, e ’aore ’outou i ’ite iāna ; ’e e mana rahi a’e tōna i to’u, e ’aore ho’i e au iā’u ’ia tātara i te tāpe’a nō tōna ra tāma’a. E rave rahi ho’i te parau tā tō’u metua tāne i parau nō ni’a i teie nei mea.

9 ’E ’ua parau mai tō’u metua tāne ē, e bāpetizo ’oia i Betebara, i terā pae mai i Ioridana ; ’e ’ua parau ato’a mai ho’i ’oia ē, e bāpetizo ’oia i te pape ; ’e nāna ho’i te Mesia e bāpetizo i te pape.

10 ’E i muri iho i tōna bāpetizora’a i te Mesia i te pape, e ’ite ’oia ē e fa’a’ite atu ho’i ’oia ē, ’ua bāpetizo ’oia i te ’Ārenio a te Atua, ’o tē hōpoi ’ē atu i te mau hara a tō te ao nei.

11 ’E i muri a’era, i muri iho i te paraura’a ’o tō’u metua tāne i taua mau parau ra, ’ua parau atu ra ’oia i tō’u mau tua’ana nō ni’a i te ’evanelia ’o tē a’ohia atu i rotopū i te mau ’āti Iuda, ’e nō ni’a ato’a i tō te mau ’āti Iuda topara’a i roto i te ti’aturi ’ore. ’E i muri iho i tō rātou taparahira’a i te Mesia, ’o tē tae mai, ’e i muri iho i tōna taparahira’ahia, e ti’afa’ahou mai ai ’oia mai te pohe mai ra, ’e e fa’a’ite atu ’oia iāna iho nā roto i te Vārua Maita’i i te mau ’Ētene.

12 ’Oia ïa, ’ua parau tō’u metua tāne e rave rahi mau parau nō ni’a i te mau ’Ētene, ’e nō ni’a ato’a i te ’utuāfare o ’Īserā’ela, ’e e fa’aauhia rātou i te hō’ē tumu rā’au ’ōlive, ’o tē tāpū-’ē-hia tōna mau ’āma’a ’e ’o tē ha’apurarahia nā roto i te ao ato’a nei.

13 Nō reira, ’ua parau ’oia ē, e mea ti’a roa ia tātou pā’āto’a ’ia arata’ihia ma te ’ā’au hō’ē i te fenua i fafauhia ra, ’ia tupu te parau a te Fatu ē, e ha’apurarahia tātou nā roto i te ao ato’a nei.

14 ’E i muri iho i te ha’apurarara’ahia te ’utuāfare o ’Īserā’ela, e ha’aputuputu-fa’ahou-hia mai rātou ; ’oia ïa, i muri iho i tō te mau ’Ētene fāri’ira’a i te ’īra’a nō te ’Evanelia, e poihia te mau ’āma’a mau o te tumu rā’au ’ōlive, ’oia ho’i te mau toe’a o te ’utuāfare o ’Īserā’ela, ’oia ïa, e fāri’i rātou i te ’ite nō ni’a i te Mesia mau ra, tō rātou Fatu ’e tō rātou Tāra’ehara.

15 ’E i nā reira ho’i tō’u metua tāne i te tohu ’e i te parau atu i tō’u nā tua’ana ; ’e e rave rahi atu ā ho’i mau mea o tā’u i ’ore i pāpa’i i roto i teie nei buka ; nō te mea ’ua pāpa’i au e rave rahi ’o tē ti’a iā’u ’ia pāpa’i i roto i te tahi buka nā’u ra.

16 ’E teie mau mea ato’a ’o tā’u i parau, ’ua ravehia ïa ’a pārahi ai tō’u metua tāne i roto i te ti’ahapa, i te peho nō Lemuela.

17 ’E i muri a’era, i muri iho i tō’u, ’o Nephi, fa’aro’ora’a i te mau parau ato’a a tō’u ra metua tāne, nō ni’a i te mau mea tāna i ’ite i roto i te hō’ē ’ōrama, ’e te mau mea ho’i tāna i parau nā roto i te mana o te Vārua Maita’i ; ’oia te mana i roa’a iāna nā roto i te fa’aro’o i te Tamaiti a te Atua—e te Tamaiti a te Atua ra, ’o te Mesia ïa ’o tē tae mai—’Ua hina’aro ato’a vau, ’o Nephi, ’ia ’ite mata, ’e ’ia fa’aro’o, ’e ’ia ’ite ho’i i taua mau mea ra, nā roto i te mana o te Vārua Maita’i, ’oia ho’i te hōro’a a te Atua i te feiā pā’āto’a e ’imi māite iāna, mai tei te mau tau tahito ra, ’e mai tei te tau ato’a e fa’a’ite mai ai ’oia iāna iho i te tamari’i a te ta’ata nei.

18 Hō’ē ā ho’i tōna huru i nanahi, i teie nei mahana, ē a muri noa atu ; ’e ’ua fa’aineinehia te ’ē’a nō te mau ta’ata ato’a mai te ha’amatara’a mai ā o te ao nei, mai te mea e tātarahapa ’e e haere mai rātou iāna ra.

19 ’O ’oia ho’i tē ’imi māite ra, e ’itea ïa ; ’e e fa’a’itehia te mau parau ’aro a te Atua ia rātou, nā roto i te mana o te Vārua Maita’i, i teie nei mau tau, mai tei te mau tau tahito ato’a ra ho’i ; ’e mai tō te mau tau tahito ra, ’oia ato’a tō te mau tau e haere mai nei ; nō reira, te ’ē’a o te Fatu ’o te hō’ē ïa haere’a mure ’ore.

20 Nō reira, ’a ha’amana’o, e te ta’ata ē, e ha’avāhia ’oe i te mau mea ato’a tā ’oe e rave ra.

21 Nō reira, mai te mea i ’imi ’oe i te rave i te parauti’a ’ore i te mau mahana nō tō ’oe tau tāmatara’a, ’ua vi’ivi’i ïa ’oe i mua i te ha’avāra’a a te Atua ; ’e ’aita ho’i e mea vi’ivi’i e ti’a ’ia pārahi i pīha’i iho i te Atua ; nō reira, ’ia ti’avaruhia ’oe ē a muri noa atu e ti’a ai.

22 ’E nā te Vārua Maita’i ho’i i hōro’a mai i te mana iā’u ’ia parau atu i teie nei mau mea ma te huna ’ore.