ບົດທີ 12
ນີໄຟເຫັນພາບນິມິດກ່ຽວກັບແຜ່ນດິນແຫ່ງຄຳສັນຍາ; ຄວາມຊອບທຳ, ຄວາມຊົ່ວຮ້າຍ, ແລະ ການຕົກຂອງຜູ້ອາໄສເຫລົ່ານັ້ນ; ການສະເດັດມາຂອງພຣະເມສານ້ອຍຂອງພຣະເຈົ້າໃນບັນດາພວກເຂົາ; ວິທີທີ່ສານຸສິດສິບສອງຄົນກັບອັກຄະສາວົກສິບສອງຈະຕັດສິນອິດສະຣາເອນ; ຄວາມໜ້າລັງກຽດ ແລະ ສົກກະປົກຂອງຜູ້ທີ່ເສື່ອມໂຊມຢູ່ໃນຄວາມບໍ່ເຊື່ອຖື. ປະມານ 600–592 ປີ ກ່ອນ ຄ.ສ.
1 ແລະ ເຫດການໄດ້ບັງເກີດຂຶ້ນຄື ທູດໄດ້ກ່າວກັບຂ້າພະເຈົ້າວ່າ: ເບິ່ງເຖີດ, ແລະ ຈົ່ງເບິ່ງລູກຫລານຂອງເຈົ້າ ແລະ ລູກຫລານຂອງພວກອ້າຍຂອງເຈົ້ານຳອີກ. ແລະ ຂ້າພະເຈົ້າໄດ້ຫລຽວເບິ່ງ ແລະ ໄດ້ເຫັນ ແຜ່ນດິນແຫ່ງຄຳສັນຍາ; ແລະ ຂ້າພະເຈົ້າໄດ້ເຫັນຝູງຊົນ, ແທ້ຈິງແລ້ວ, ແມ່ນແຕ່ຄືກັບວ່າ ເປັນຄົນຈຳນວນຫລວງຫລາຍຄືກັນກັບເມັດຊາຍໃນທະເລ.
2 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ເຫັນຝູງຊົນມາເຕົ້າໂຮມເພື່ອສູ້ຮົບກັນ; ແລະ ຕໍ່ສູ້ຊຶ່ງກັນແລະກັນ; ແລະ ຂ້າພະເຈົ້າໄດ້ເຫັນ ສົງຄາມ, ແລະ ຂ່າວລືເລື່ອງສົງຄາມ, ແລະ ການຂ້າຟັນກັນຢ່າງໜັກດ້ວຍດາບໃນບັນດາຜູ້ຄົນຂອງຂ້າພະເຈົ້າ.
3 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ເຫັນຫລາຍລຸ້ນຄົນຜ່ານໄປ, ຫລັງຈາກສົງຄາມ ແລະ ການຂັດແຍ້ງກັນໃນແຜ່ນດິນຜ່ານໄປ; ແລະ ຂ້າພະເຈົ້າໄດ້ເຫັນຫລາຍຫົວເມືອງ, ແທ້ຈິງແລ້ວ, ຈົນວ່າຂ້າພະເຈົ້ານັບບໍ່ຖ້ວນ.
4 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ເຫັນ ໝອກແຫ່ງ ຄວາມມືດຢູ່ໃນແຜ່ນດິນແຫ່ງຄຳສັນຍາ; ແລະ ຂ້າພະເຈົ້າໄດ້ເຫັນແສງຟ້າແມບ, ແລະ ຂ້າພະເຈົ້າໄດ້ຍິນສຽງຟ້າຮ້ອງ, ແລະ ແຜ່ນດິນໄຫວ, ແລະ ສຽງກຶກກ້ອງນາໆປະການ; ແລະ ຂ້າພະເຈົ້າໄດ້ເຫັນແຜ່ນດິນ ແລະ ກ້ອນຫີນ, ເປັນຮອຍແຍກ; ແລະ ຂ້າພະເຈົ້າໄດ້ເຫັນພູເຂົາພັງທະລາຍແຕກເປັນຫລາຍຊິ້ນສ່ວນ; ແລະ ຂ້າພະເຈົ້າໄດ້ເຫັນທົ່ງພຽງຂອງແຜ່ນດິນໂລກ, ແຍກອອກຈາກກັນ; ແລະ ຂ້າພະເຈົ້າໄດ້ເຫັນຫລາຍຫົວເມືອງ ຈົມລົງ; ແລະ ຂ້າພະເຈົ້າໄດ້ເຫັນຫລາຍຫົວເມືອງຖືກໄຟເຜົາຜານ; ແລະ ຂ້າພະເຈົ້າໄດ້ເຫັນຫລາຍຫົວເມືອງພັງລົງສູ່ແຜ່ນດິນໂລກ, ເພາະຄວາມສັ່ນສະເທືອນຂອງໂລກ.
5 ແລະ ເຫດການໄດ້ບັງເກີດຂຶ້ນຄື ຫລັງຈາກທີ່ຂ້າພະເຈົ້າໄດ້ເຫັນສິ່ງເຫລົ່ານີ້ແລ້ວ, ຂ້າພະເຈົ້າໄດ້ເຫັນ ອາຍແຫ່ງຄວາມມືດຜ່ານພົ້ນໄປຈາກໜ້າດິນ; ແລະ ຈົ່ງເບິ່ງ, ຂ້າພະເຈົ້າໄດ້ເຫັນຝູງຊົນຢ່າງຫລວງຫລາຍຜູ້ທີ່ບໍ່ໄດ້ຕົກລົງໄປຍ້ອນການພິພາກສາອັນຍິ່ງໃຫຍ່ ແລະ ໜ້າຢ້ານກົວຂອງພຣະຜູ້ເປັນເຈົ້າ.
6 ແລະ ຂ້າພະເຈົ້າໄດ້ເຫັນຟ້າສະຫວັນເປີດ, ແລະ ພຣະເມສານ້ອຍຂອງພຣະເຈົ້າສະເດັດລົງມາຈາກສະຫວັນ; ແລະ ພຣະອົງສະເດັດລົງມາປະກົດຕົວຕໍ່ພວກເຂົາ.
7 ແລະ ຂ້າພະເຈົ້າໄດ້ເຫັນ ແລະ ເປັນພະຍານອີກວ່າ ພຣະວິນຍານບໍລິສຸດໄດ້ສະເດັດລົງມາຫາຄົນ ສິບສອງຄົນນັ້ນອີກ; ແລະ ພວກເຂົາໄດ້ຮັບການແຕ່ງຕັ້ງໂດຍພຣະເຈົ້າ ແລະ ຖືກຄັດເລືອກ.
8 ແລະ ທູດໄດ້ກ່າວກັບຂ້າພະເຈົ້າ, ມີຄວາມວ່າ: ຈົ່ງເບິ່ງສານຸສິດສິບສອງຄົນຂອງພຣະເມສານ້ອຍ, ຜູ້ທີ່ໄດ້ຖືກເລືອກໃຫ້ມາປະຕິບັດແກ່ລູກຫລານຂອງເຈົ້າ.
9 ແລະ ພຣະອົງໄດ້ກ່າວກັບຂ້າພະເຈົ້າວ່າ: ເຈົ້າຈື່ ອັກຄະສາວົກສິບສອງຄົນຂອງພຣະເມສານ້ອຍໄດ້ບໍ? ຈົ່ງເບິ່ງ ພວກເພິ່ນຄືຜູ້ທີ່ຈະມາ ຕັດສິນຝູງຊົນສິບສອງເຜົ່າຂອງອິດສະຣາເອນ; ດັ່ງນັ້ນ, ຜູ້ປະຕິບັດສາດສະໜາກິດ ສິບສອງຄົນຊຶ່ງເປັນລູກຫລານຂອງເຈົ້າ ຈະຖືກຕັດສິນໂດຍພວກເພິ່ນເຫລົ່ານັ້ນ; ເພາະພວກເພິ່ນເປັນເຊື້ອສາຍອິດສະຣາເອນ.
10 ແລະ ຜູ້ປະຕິບັດສາດສະໜາກິດສິບສອງຄົນ ຊຶ່ງເຈົ້າເຫັນຢູ່ນີ້ຈະມາຕັດສິນລູກຫລານຂອງເຈົ້າ. ແລະ ຈົ່ງເບິ່ງ, ຄົນເຫລົ່ານີ້ເປັນຄົນຊອບທຳຕະຫລອດໄປ; ເພາະເນື່ອງຈາກສັດທາຂອງພວກເພິ່ນທີ່ມີຕໍ່ພຣະເມສານ້ອຍຂອງພຣະເຈົ້າ ອາພອນຂອງພວກເພິ່ນຈຶ່ງຖືກເຮັດໃຫ້ຂາວສະອາດໃນໂລຫິດຂອງພຣະອົງ.
11 ແລະ ທູດໄດ້ກ່າວກັບຂ້າພະເຈົ້າວ່າ: ເບິ່ງເຖີດ! ແລະ ຂ້າພະເຈົ້າໄດ້ເບິ່ງ, ແລະ ໄດ້ເຫັນຜູ້ຄົນ ສາມລຸ້ນຄົນຜ່ານໄປດ້ວຍຄວາມຊອບທຳ; ແລະ ອາພອນຂອງຄົນເຫລົ່ານັ້ນຂາວຄືກັບຂອງພຣະເມສານ້ອຍຂອງພຣະເຈົ້າ. ແລະ ທູດໄດ້ກ່າວກັບຂ້າພະເຈົ້າວ່າ: ອາພອນເຫລົ່ານີ້ຖືກເຮັດໃຫ້ຂາວສະອາດໃນໂລຫິດຂອງພຣະເມສານ້ອຍຍ້ອນວ່າພວກເຂົາມີສັດທາໃນພຣະອົງ.
12 ແລະ ຂ້າພະເຈົ້ານີໄຟໄດ້ເຫັນຄົນລຸ້ນ ທີສີ່ຈຳນວນຫລວງຫລາຍ ຜູ້ທີ່ໄດ້ລ່ວງລັບໄປໃນຄວາມຊອບທຳ.
13 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ເຫັນຝູງຊົນຢ່າງຫລວງຫລາຍຢູ່ໃນໂລກເຕົ້າໂຮມກັນ.
14 ແລະ ທູດໄດ້ກ່າວກັບຂ້າພະເຈົ້າວ່າ: ຈົ່ງເບິ່ງລູກຫລານຂອງເຈົ້າ, ແລະ ລູກຫລານຂອງພວກອ້າຍຂອງເຈົ້ານຳອີກ.
15 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ຫລຽວເບິ່ງ ແລະ ເຫັນຜູ້ຄົນທີ່ເປັນລູກຫລານຂອງຂ້າພະເຈົ້າເຕົ້າໂຮມກັນເປັນກຸ່ມກ້ອນເພື່ອ ຕໍ່ຕ້ານລູກຫລານຂອງພວກອ້າຍຂອງຂ້າພະເຈົ້າ; ແລະ ຄົນເຫລົ່ານັ້ນມາເຕົ້າໂຮມເພື່ອສູ້ຮົບກັນ.
16 ແລະ ທູດໄດ້ກ່າວກັບຂ້າພະເຈົ້າ, ມີຄວາມວ່າ: ຈົ່ງເບິ່ງອ່າງນ້ຳ ສົກກະປົກ ຊຶ່ງບິດາຂອງເຈົ້າໄດ້ເຫັນ; ແທ້ຈິງແລ້ວ, ແມ່ນ ແມ່ນ້ຳຊຶ່ງເຈົ້າເວົ້າເຖິງ; ແລະ ຄວາມເລິກຂອງມັນນັ້ນຄືຄວາມເລິກຂອງ ນະລົກ.
17 ແລະ ໝອກແຫ່ງຄວາມມືດຄືການລໍ້ລວງຂອງມານທີ່ເຮັດໃຫ້ຕາ ບອດ ແລະ ເຮັດໃຫ້ໃຈຂອງລູກຫລານມະນຸດແຂງກະດ້າງ ແລະ ນຳພາພວກເຂົາໄປໃນ ເສັ້ນທາງອັນກວ້າງຂວາງ, ເພື່ອພວກເຂົາຈະຕາຍ ແລະ ຫາຍສາບສູນໄປ.
18 ແລະ ອາຄານໃຫຍ່ ແລະ ກວ້າງ ຊຶ່ງບິດາຂອງເຈົ້າໄດ້ເຫັນນັ້ນຄືຄວາມ ຄິດຝັນອັນບໍ່ມີປະໂຫຍດ ແລະ ຄວາມທະນົງໃຈຂອງລູກຫລານມະນຸດ. ແລະ ເຫວເລິກອັນກວ້າງໃຫຍ່ ແລະ ໜ້າຢ້ານກົວແຍກພວກເຂົາອອກຈາກກັນ; ແທ້ຈິງແລ້ວ, ແມ່ນພຣະຄຳແຫ່ງ ຄວາມຍຸດຕິທຳຂອງພຣະເຈົ້າຜູ້ສະຖິດນິລັນດອນ ແລະ ພຣະເມຊີອາຜູ້ເປັນພຣະເມສານ້ອຍຂອງພຣະເຈົ້າ, ຜູ້ທີ່ພຣະວິນຍານບໍລິສຸດເປັນພະຍານນັບຕັ້ງແຕ່ການເລີ່ມຕົ້ນຂອງໂລກຈົນເຖິງເວລານີ້, ແລະ ຈາກເວລານີ້ໄປຈົນຕະຫລອດການ.
19 ແລະ ໃນຂະນະທີ່ທູດກຳລັງກ່າວຂໍ້ຄວາມນີ້ຢູ່, ຂ້າພະເຈົ້າໄດ້ຫລຽວເບິ່ງ ແລະ ໄດ້ເຫັນລູກຫລານຂອງພວກອ້າຍຂອງຂ້າພະເຈົ້າຕໍ່ສູ້ກັບລູກຫລານຂອງຂ້າພະເຈົ້າຕາມຄຳເວົ້າຂອງທູດອົງນັ້ນ; ເພາະວ່າຄວາມທະນົງໃຈຂອງລູກຫລານຂອງຂ້າພະເຈົ້າ ແລະ ການລໍ້ລວງຂອງມານ, ຂ້າພະເຈົ້າໄດ້ເຫັນລູກຫລານຂອງພວກອ້າຍຂອງຂ້າພະເຈົ້າ ຊະນະຜູ້ຄົນທີ່ເປັນລູກຫລານຂອງຂ້າພະເຈົ້າ.
20 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ເຫັນ ແລະ ໄດ້ເບິ່ງລູກຫລານຂອງພວກອ້າຍຂອງຂ້າພະເຈົ້າວ່າ ພວກເຂົາຊະນະລູກຫລານຂອງຂ້າພະເຈົ້າ; ແລະ ພວກເຂົາເປັນຈຳນວນຫລວງຫລາຍໄດ້ອອກໄປທົ່ວຜືນແຜ່ນດິນ.
21 ແລະ ຂ້າພະເຈົ້າໄດ້ເຫັນພວກເຂົາເປັນຈຳນວນຫລວງຫລາຍມາເຕົ້າໂຮມກັນ; ແລະ ຂ້າພະເຈົ້າໄດ້ເຫັນ ສົງຄາມ ແລະ ຂ່າວລືເລື່ອງສົງຄາມໃນບັນດາພວກເຂົາ; ແລະ ໃນສົງຄາມ ແລະ ຂ່າວລືເລື່ອງສົງຄາມນັ້ນ ຂ້າພະເຈົ້າໄດ້ເຫັນຫລາຍລຸ້ນຄົນຜ່ານໄປ.
22 ແລະ ທູດໄດ້ກ່າວກັບຂ້າພະເຈົ້າວ່າ: ຈົ່ງເບິ່ງຄົນເຫລົ່ານີ້ຈະ ເສື່ອມໂຊມຢູ່ໃນຄວາມບໍ່ເຊື່ອຖື.
23 ແລະ ເຫດການໄດ້ບັງເກີດຂຶ້ນຄື ຂ້າພະເຈົ້າໄດ້ເຫັນວ່າ, ຫລັງຈາກທີ່ພວກເຂົາເສື່ອມໂຊມຢູ່ໃນຄວາມບໍ່ເຊື່ອຖືແລ້ວ, ແລະ ພວກເຂົາກໍໄດ້ກາຍເປັນຄົນ ຜິວຄ້ຳ ແລະ ໜ້າລັງກຽດ ແລະ ສົກກະປົກເຕັມໄປດ້ວຍ ຄວາມກຽດຄ້ານ ແລະ ຄວາມໜ້າກຽດຊັງທຸກຢ່າງ.