1 Iwe non ewe fansoun mwirin ngang, Nifai, ua fen kekino non ewe Ngun, me kuna meinisin ekkei mettoch, ua niwin ngeni ewe imw mangaku imwen semei we.

2 Iwe non ewe fansoun ua kuna pwi kewe, iwe ra anini fengen nefiner usun ekkewe mettoch minne semei we a fen apasa ngeni ir.

3 Pun i a ennetin apasa chommong mettoch mi auchea ngeni ir, minne ra weires ar repwe weweiti, tiwenon chok ika emon aramas epwe eis ngeni ewe Samon; iwe pokiten a pochokun non netiper, ina minne rese nengeni ewe Samon usun met mi murino ar repwe fori.

4 Iwe iei ngang, Nifai, ua netipengaw pokiten pochokunen netiper, iwe pwan, pokiten ekkewe mettoch minne ua fen kuna, iwe ua sinei pwe repwe wesewesen fisita pokiten watten fofforungawen ekkewe noun aramas.

5 Iwe non ewe fansoun ua ureno pokiten ai kewe riaffoun, pun ua nuku pwe ai kewe riaffou ra napanap seni meinisin, pokiten ewe kiteterinon nei kewe aramas, pun ua fen kuna turutiwer.

6 Iwe non ewe fansoun mwirin ua angei pochokun ua kapas ngeni pwi kewe, ua mochen sinei senir ewe popun ar kewe anini fengen.

7 Iwe ra apasa: Nengeni, am ause tongeni weweiti ekkewe kapas minne semach we a apasa usun ewe wesewesen panan ewe ira olif, me pwan usun ekkewe chon Gentile.

8 Iwe ua apasa ngeni ir: Oua fen tingorei ewe Samon?

9 Iwe ra apasa ngeniei: Am ause mwo; pun ewe Samon ese mwo pwar ngeni kem och sokkun mettoch.

10 Nengeni, ua apasa ngeni ir: Pwata epwe iei usun pwe ami ouse aneasochisi ekkewe annuk an ewe Samon? Pwata epwe iei usun pwe ami oupwe mano, pokiten pochokunen netipemi?

11 Ouse chechemeni ekkewe mettoch minne ewe Samon a apasa?—Ika ousap apochokunano netipemi, me tingor non nuku, me nuku pwe oupwe angei, fiti nikitu non aneasochisin ai kewe annuk, ennet ekkei mettoch repwe pwano ngeni kemi.

12 Nengeni, ua apasa ngenikemi, pwe ewe imwen Israel a wewengeni efoch ira olif, seni ewe Ngunun ewe Samon minne a nonnom non semach we; iwe nengeni sise kupukup seni ewe imwen Israel, iwe met esap kich ew panen ewe imwen Israel?

13 Iwe iei, ewe mettoch minne semach we a ekieki usun ewe kapachenongen ekkewe wesewesen panen ira me ren unusochun ekkewe chon Gentile, pwe, ina non ekkewe fansoun soponon, nupwen mwirimwirich kewe repwe kisitiw non nuku, ewer, ren ewe ukukun chommong ier, iwe chommong tappin aramas mwirin ewe Messiah epwe pwano non pekin inis ngeni ekkewe noun aramas, iwe ewe unusochun ewe kapas allimen ewe Messiah epwe feito ngeni ekkewe chon Gentile, iwe seni ekkewe chon Gentile ngeni nussun mwirimwirich kewe.

14 Iwe atun ena ran nussun mwirimwirich kewe repwene sinei pwe ir seni ewe imwen Israel, me ir ekkewe aramas pwon noun ewe Samon; iwe repwe sinei me repwe angei ewe mirit usun ar kewe neuo, iwe pwan angei ewe miritin ewe kapas allimen ar we Chon Angasano, minne a afanafan ngeni semer kewe seni i; ina minne, repwe angei ewe miritin ar we Chon Angasano me ekkewe wesewesen kinikinin an we nongonong mi ennet, pwe repwe sinei ifa usun ar repwe feito ngeni i me manau.

15 Iwe atun ena ran resap chiwen pwapwa me ngeni ar kapasen mwareiti ngeni ar we Kot esemuch, ar fau me ar amanau? Ewer, atun ena ran, resap angei ewe pochokun me aninisin inis seni ewe ennetin popun ira? Ewer, resap feito ngeni ewe ennetin mwicheichen Kot?

16 Nengeni, ua apasa ngeni kemi, Ewer; repwe achechem sefan me nein ewe imwen Israel; repwene kapachenong, pokiten ir ra ew popunapen panen ewe ira olif, ngeni ewe ennetin ira olif.

17 Iwe iei met semach we a ekieki, iwe i a ekieki pwe esap fis tori mwirin repwe toropas fetan me ren ekkewe chon Gentile; iwe a ekieki pwe epwe feito non ena nikinik seni ekkewe chon Gentile, pwe ewe Samon epwe pwarano an we manaman ngeni ekkewe chon Gentile, pokiten i esap katiw me ren ekkewe chon Jew, ika me ren ewe imwen Israel.

18 Ina minne, semach we ese chok kapas usun mwirimwirich kewe, nge pwan usun meinisin chon ewe imwen Israel, a wenengeni ewe pwon mi pin minne epwe pwonueta non ekkewe fansoun soponon; ewe pwon mi pin minne ewe Samon a fori ngeni semach we Abraham, a apasa: Me ren mwirimwirum meinisin einangen ewe fonufan repwene feioch.

19 Iwe non ewe fansoun ngang, Nifai, ua kapas chommong ngeni ir usun ekkei mettoch; ewer, ua kapas ngeni ir usun ewe niwinsefaniton ekkewe chon Jew non ekkewe fansoun soponon.

20 Iwe ua awewe ngeni ir ekkewe kapasen Isaiah, ewe a kapas usun ewe niwinsefaniton ekkewe chon Jew, ika ewe imwen Israel; iwe mwirin repwe niwinsefan resap chiwen nofit ngeni ekkoch aramas, resap pwan chiwen toropas fetan. Iwe non ewe fansoun ua apasa chommong kapas ngeni pwi kewe, iwe ra kinamweino me ra atipetekisoner me mwen ewe Samon.

21 Iwe non ewe fansoun ra kapas sefan ngeniei, ra apasa: Met wewen ei mettoch minne semach we a kuna non ew tan? Met wewen ewe ira minne i a kuna?

22 Iwe ua apasa ngeni ir: Ina esisinen ewe iran manau.

23 Iwe ra apasa ngeniei: Met wewen ewe wokun mecha minne semach we a kuna, ewe a weneno ngeni ewe ira?

24 Iwe ua apasa ngeni ir pwe ina ewe kapasen Kot; iwe ika ion epwe aneasochis ngeni ewe kapasen Kot, me kamwochunuk ngeni, resap tongeni mano non ngun; iwe pwan ekkewe sossot me ekkewe nikappich mi ngetenget an ewe chon ungeni rese tongeni nemenireno me ochunnereno, an epwe emmwenireno ngeni kiteter.

25 Ina minne, ngang, Nifai, ua peser pwe repwe ausening ngeni ewe kapasen ewe Samon; ewer, ua peser fiti unusen ekkewe pochokunen ngunui, me fiti unusen ai tufichin mwokutukut minne a wor rei, pwe repwe tongeni ausening ngeni ewe kapasen Kot me chechemeni ar repwe aneasochisi an kewe annuk fansoun meinisin non mettoch meinisin.

26 Iwe ra apasa ngeniei: Met wewen ewe chonupupun konik minne semach we a kuna?

27 Iwe ua apasa ngenir pwe ewe konik minne semei we a kuna a ew nimengaw; iwe a fokkun napanap ukukun an ekiek a nemenemeno ren ekkoch mettoch ina popun ese kuna nimengawen ewe konik.

28 Iwe ua apasa ngeni ir pwe a ew pwang mi anoninen, minne a aimu feseni ekkewe aramas mi ngaw seni ewe iran manau, me pwan seni ekkewe sounengin Kot.

29 Iwe ua apasa ngeni ir pwe ina ew esisinen ena anoninenin hell, minne ewe chon nang a apasa ngeniei a monneta ngeni ekkewe aramas mi ngaw.

30 Iwe ua apasa ngeni ir pwe semem we a pwan kuna pwe ewe kapungun Kot a pwan aimu feseni ekkewe aramas mi ngaw seni ekkewe mi tupwon; iwe saraman a usun ewe saramen ew ekkei mi ngetenget, minne a feita ngeni Kot feinfeino chok me esemuch, me ese wor soponon.

31 Iwe ra apasa ngeniei: Ei mettoch a wewen pwe ewe ariaffoun ewe inis non ekkewe ranin sossot, ika a wewen ewe soponon nikinikin ewe ngun mwirin ewe manon ewe inisin futuk, ika a kapas usun ekkewe mettoch minne ir pekin ei manau?

32 Iwe non ewe fansoun ua apasa ngenir pwe a asisinen ekkewe mettoch ra pekin ei manau me pekin ngun; pun ewe ran epwe feito pwe repwe tongeni kapung ren ar kewe angang, ewer, pwan mwo ekkewe angang minne ra fori seni ewe pekin inis non ar kewe ranin sossot.

33 Ina minne, ika repwe mano non ar kewe fofforungaw repwe pwan katuruno, usun ekkewe mettoch minne ra pekin ngun, minne ra wewe ngeni wenechar; ina minne, repwe tonong uta me mwen Kot, pwe repwe kapung ren ar kewe angang; iwe ika ar kewe angang mi fen nimengaw iwe ir mi chok nimengaw; iwe ika repwe nimengaw iwe resap tongeni nonnom non ewe muun Kot; ika ina, ewe muun Kot epwe pwan nimengaw.

34 Nge nengeni, ua apasa ngeni kemi, ewe muun Kot ese nimengaw, iwe ese tongeni wor mettoch mi nimengaw epwe tonong non ewe muun Kot; ina minne mi auchea epwe wor ew nenien nimengaw epwe monneta ngeni ena minne mi nimengaw.

35 Iwe mi wor ew neni a monneta, ewer, pwan ena anoninenin hell minne ua kapas usun, iwe ewe tefin i ewe chon amonnatan; ina minne ewe soponon nikinikin ekkewe ngunun aramas a nonnom non ewe muun Kot, ika epwe katuruu pokiten ena kapung minne ua kapas usun.

36 Ina minne, ekkewe aramas mi ngaw rese katiw me ren ekkewe mi tupwon, me pwan seni ena iran manau, minne ewe uwan a fokkun auchea me unusen murino seni meinisin ekkoch foun ira; ewer, me ina ewe unusen auchean me nein ekkewe niffangen Kot. Iwe a iei usun ai kapas ngeni pwi kewe. Amen.