1 ’E i teienei, i muri a’era, ’ia fa’aoti a’era vau, ’o Nephi, i tā’u mau parau i tō’u ra nā tua’ana, inaha, ’ua parau mai ra rāua iā’u : ’Ua fa’a’ite mai ’oe ia māua i te mau mea teimaha, hau atu i tei ti’a ia māua ’ia fa’a’oroma’i.

2 ’E i muri a’era, ’ua parau atu ra vau ia rāua, ’ua ’ite au ē, ’ua parau atu vau i te mau mea teimaha i te feiā parauti’a ’ore, mai te au i te parau mau ; ’e ’ua fa’ati’a rā vau i te feiā parauti’a, ’e ’ua fa’a’ite pāpū atu ho’i au ē, e fa’ateiteihia rātou i te mahana hope’a ra ; nō reira, tē mana’o ra te feiā hara ē, e mea teimaha te parau mau, nō te mea nā te reira e ha’aputapū ia rātou i roto roa i tō rātou ’ā’au.

3 ’E i teienei e tō’u nā tua’ana, ’āhiri ē mea parauti’a ’ōrua ’e ’ua hina’aro ’ōrua ’ia fa’aro’o i te parau mau, ’e ’ia ha’apa’o i te reira, ’ia ti’a ia ’ōrua ’ia haere ma te parauti’a i mua i te Atua, e ’ore ïa ’ōrua e amuamu nō te parau mau, i te nā-’ō-ra’a mai ē : ’Ua parau mai ’oe i te mau mea teimaha ia māua nei.

4 ’E i muri a’era, ’ua a’o atu ra vau, ’o Nephi, i tō’u ra nā tua’ana, ma te itoito rahi, ’ia ha’apa’o i te mau fa’auera’a a te Fatu.

5 ’E i muri a’era, ’ua fa’aha’eha’a rāua ia rāua iho i mua i te Fatu ; ’e nō reira ho’i ’ua fāri’i ihora vau i te ’oa’oa ’e te ti’aturira’a rahi nō rāua, penei a’e ’o te haere rāua nā te ’ē’a o te parauti’a.

6 I teienei, ’ua parauhia ’e ’ua ravehia ho’i teie mau mea ato’a ’a pārahi ai tō’u metua tāne i te ti’ahapa i te peho ’o tāna i ma’iri i te i’oa ra ’o Lemuela.

7 ’E i muri a’era, ’ua rave ihora vau, ’o Nephi, i te hō’ē o te mau tamāhine a Isema’ela ’ei vahine fa’aipoipo nā’u ; ’e ’ua rave ato’a tō’u mau taea’e i te mau tamāhine a Isema’ela ’ei vahine fa’aipoipo nā rātou, ’e ’ua rave ato’a Zorama i te tamāhine matahiapo a Isema’ela ’ei vahine fa’aipoipo nāna.

8 ’E ’ua nā reira tō’u metua tāne i te fa’atupu i te mau fa’auera’a ato’a a te Fatu ’o tei hōro’ahia mai iāna ra. ’E ’oia ato’a, ’ua ha’amaita’i-roa-hia vau, ’o Nephi, e te Fatu.

9 ’E i muri a’era, ’ua parau mai ra te reo o te Fatu i tō’u metua tāne i te ru’i, ’e ’ua fa’aue mai ra iāna, ’ia reva ’oia i te mēdēbara ’ia ao a’era.

10 ’E i muri a’era, ’a ti’a ai tō’u metua tāne i ni’a i te po’ipo’i ’e ’a haere atu ai ’oia i te ’ūputa o te ti’ahapa, ’ua ’ite atu ra ’oia ma te māere rahi i te hō’ē pōpō menemene i ni’a i te repo ; e mea fa’ahiahia roa tōna hāmanira’a, ’e ’ua hāmanihia ho’i i te veo maita’i roa. ’E i roto i taua pōpō ra tē vai ra e piti nira, ’ua fa’a’ite mai te hō’ē i te ’ē’a e ti’a ’ia haerehia e mātou i roto i te mēdēbara ra.

11 ’E i muri a’era, ’ua ha’aputuputu ihora mātou i te mau mea ato’a tā mātou e hōpoi i te mēdēbara ra, ’e te toe’a ho’i o tā mātou mau mā’a, ’o tā te Fatu i hōro’a mai ia mātou ra ; ’e ’ua rave ato’a ho’i mātou i te mau huru huero ato’a ’o tē ti’a ia mātou ’ia hōpoi atu i te mēdēbara.

12 ’E i muri a’era, ’ua rave ihora mātou i tō mātou mau ti’ahapa ’e ’ua haere atu ra i te mēdēbara, i terā pae mai o te ’ānāvai ra o Lamana.

13 ’E i muri a’era, ’ua haere atu ra mātou nō te ārea e maha mahana te maoro i te pae ’apato’a-’apato’a hiti’a o te rā, ’e ’ua fa’ati’a fa’ahou ihora mātou i tō mātou mau ti’ahapa ; ’e ’ua ma’iri ihora mātou i te i’oa o taua vāhi ra ’o Sahazera.

14 ’E i muri a’era, ’ua rave ihora mātou i tā mātou mau fana ’e tā mātou mau te’a, ’e ’ua haere atu ra i te mēdēbara nō te taparahi i te ’ānimara ’ei mā’a nā tō mātou mau ’utuāfare ; ’e i muri iho i tō mātou taparahira’a i te ’ānimara ’ei mā’a nā tō mātou mau ’utuāfare, ’ua ho’i fa’ahou atu ra mātou i tō mātou mau ’utuāfare i roto i te mēdēbara, i te vāhi nō Sahazera. ’E ’ua haere fa’ahou atu mātou i roto i te mēdēbara, ma te pe’e fa’ahou i taua iho ’ē’a ra, ’e ma te haere nā te mau vāhi hotu rahi o te mēdēbara, nā te mau hiti fenua tāpiri i te miti ’Ute’ute ra.

15 ’E i muri a’era, ’ua tere atu ra mātou nō te ārea e rave rahi mahana te maoro, ma te taparahi i te ’ānimara nā te pae ’ē’a ’ei mā’a, ’e ’ua fa’a’ohipa mātou i tā mātou ra mau fana, ’e tā mātou mau te’a, ’e tā mātou mau ’ōfa’i, ’e tā mātou mau ma’a.

16 ’E ’ua pe’e mātou i te mau arata’ira’a a te pōpō, ’o tei arata’i ia mātou nā te vāhi hotu rahi o te mēdēbara ra.

17 ’E i muri iho i tō mātou terera’a nō te ārea e rave rahi mahana te maoro, ’ua fa’ati’a ihora mātou i tō mātou mau ti’ahapa nō te hō’ē area taime te maoro, ’ia ti’a ia mātou ’ia ha’amāha i tō mātou rohirohi ’e ’ia ’imi i te mā’a nā tō mātou mau ’utuāfare.

18 ’E i muri a’era, ’ua haere atu ra vau, ’o Nephi, e taparahi i te ’ānimara ’ei mā’a, inaha, ’ua fati ihora tā’u fana tei hāmanihia i te ’āuri maita’i roa ; ’e i muri iho i te fatira’a tā’u fana, inaha, ’ua riri ihora tō’u nā tua’ana iā’u, nō te mea ’ua ’ino tā’u fana, ’e nō te mea ho’i ’aore i roa’a tā mātou mā’a.

19 ’E i muri a’era, ’ua ho’i mai ra mātou i tō mātou mau ’utuāfare ma te mā’a ’ore, ’e nō te rohirohi i tō rātou tere i pohe ai rātou i te po’ia.

20 ’E i muri a’era, ’ua amuamu rahi roa ihora Lamana rāua ’o Lemuela ’e te mau tamari’i tamāroa a Isema’ela, nō tō rātou mau ’ati ’e tō rātou mau ’oto i te mēdēbara ; ’e ’ua ha’amata ato’a tō’u metua tāne i te amuamu i te Fatu i tōna Atua ; ’oia ïa, ’ua ’oto rahi rātou ato’a, ’oia ’ua amuamu rātou i te Fatu.

21 ’E i muri a’era, ’ua ’ati-ato’a-hia vau, ’o Nephi, ’e tō’u nā tua’ana ato’a nō te fatira’a o tā’u fana, ’e nō te paruparura’a o tā rāua fana, e ’ati rahi tō mātou, ’oia ïa, ’aita tā mātou mā’a e noa’a.

22 ’E i muri a’era, ’ua parau atu ra vau, ’o Nephi, i te mau parau e rave rahi i tō’u nā tua’ana, nō te mea ’ua fa’a’eta’eta fa’ahou rāua i tō rāua ’ā’au, ’e ’ua amuamu ho’i rāua i te Fatu tō rāua ra Atua.

23 ’E i muri a’era, ’ua hāmani ihora vau, ’o Nephi, i te tahi fana rā’au, ’e te tahi te’a nō roto i te hō’ē rā’au ’āfaro ; ’e ’ua rave ihora vau i te fana, ’e te te’a, ’e te mā’a ’e te mau ’ōfa’i. ’E ’ua parau atu ra vau i tō’u metua tāne : E haere au i hea ’ia roa’a mai te mā’a ?

24 ’E i muri a’era, ’ua ani atu ra ’oia i te Fatu, ’e ’ua fa’aha’eha’a ho’i rātou ia rātou iho nō tā’u ra mau parau ; nō te mea e rave rahi te mau mea tā’u i parau atu ia rātou ma te pūai o tō’u ra vārua.

25 ’E i muri a’era, ’ua tae mai ra te reo o te Fatu i tō’u metua tāne ; ’e ’ua fa’aha’eha’a-mau-hia ’oia nō tōna ra amuamura’a i te Fatu, ’e nō reira ho’i ’ua fa’aha’eha’ahia ’oia i raro ma te ’oto rahi.

26 ’E i muri a’era, ’ua parau mai ra te reo o te Fatu iāna : ’A hi’o na i te pōpō, ’e ’a hi’o na i te mau mea i pāpa’ihia ra.

27 ’E i muri a’era, ’a ’ite ai tō’u metua tāne i te mau mea i pāpa’ihia i ni’a iho i te pōpō, ’ua mata’u ihora ’oia ’e ’ua rurutaina rahi ihora, ’e tō’u ato’a nā tua’ana ’e te mau tamari’i tamāroa a Isema’ela ’e tā mātou mau vahine ato’a ho’i.

28 ’E i muri a’era, ’ua ’ite atu ra vau, ’o Nephi, i nā nira fa’atoro i roto i te pōpō, ’e ’ua tere te reira mai te au i tō mātou fa’aro’o ’e te itoito, ’e te ti’aturi i te reira.

29 ’E ’ua pāpa’i-ato’a-hia te tahi pāpa’ira’a ’āpī i ni’a iho, e mea ’ōhie roa ’ia tai’ohia, ’e tē fa’a’ite pāpū ra te reira ia mātou i te mau ’ē’a o te Fatu ; ’e ’ua pāpa’ihia ’e ’ua tauihia ho’i te reira i terā taime ’e i terā taime, mai te au i tō mātou fa’aro’o ’e te ha’apa’o maita’i i te reira. ’E nō reira e ’ite ai tātou ē nā roto i te mau rāve’a iti e fa’atupu ai te Fatu i te mau mea rahi.

30 ’E i muri a’era, ’ua haere atu ra vau, ’o Nephi, i ni’a i te tupua’i mou’a, mai te au i te mau arata’ira’a i fa’a’itehia i ni’a iho i te pōpō ra.

31 ’E i muri a’era, ’ua taparahi ihora vau i te mau ’ānimara taehae, ’e ’ua roa’a mai iā’u te mā’a nā tō mātou mau ’utuāfare.

32 ’E i muri a’era, ’ua ho’i atu ra vau i tō mātou mau ti’ahapa, ma te hōpoi atu i te mau ’ānimara tā’u i taparahi ; ’e i teienei, i tō rātou ’itera’a mai ē ’ua roa’a iā’u te mā’a, ’ua rahi roa tō rātou ’oa’oa ! ’E i muri a’era, ’ua fa’aha’eha’a rātou ia rātou iho i mua i te Fatu, ’e ’ua ha’amaita’i atu ra iāna.

33 ’E i muri a’era, ’ua haere fa’ahou atu ra mātou i tō mātou tere, e haere atu ra mātou fātata roa mai te ’ē’a i haerehia i te mātāmua ra ; ’e i muri iho i tō mātou haerera’a nō te ārea e rave rahi mahana te maoro, ’ua fa’ati’a fa’ahou ihora mātou i tō mātou mau ti’ahapa, ’ia ti’a ia mātou ’ia pārahi ri’i nō te hō’ē ārea taime te maoro.

34 ’E i muri a’era, ’ua pohe ihora Isema’ela, ’e ’ua tanuhia ihora ’oia i te vāhi i parauhia ’o Nahoma.

35 ’E i muri a’era, ’ua ’oto rahi ihora te mau tamāhine a Isema’ela nō te pohera’a tō rātou metua tāne, ’e nō tō rātou mau ’ati ho’i i te mēdēbara ra, ’e ’ua amuamu mai ra rātou i tō’u metua tāne nō te mea ’ua arata’i ’oia ia rātou i rāpae i te fenua ra nō Ierusalema, i te nā-’ō-ra’a mai ē : ’Ua pohe tō mātou metua tāne ; ’oia ïa, ’e ’ua rahi ho’i tō mātou haere-’ē-noa-ra’a i te mēdēbara nei, ’e ’ua rahi ho’i tō mātou mau ’ati, te po’ia, te po’ihā, ’e te rohirohi ; ’e ’ia oti teie mau ’ati ato’a ra, e pohe roa mātou i te mēdēbara nei nō te po’ia.

36 ’E ’ua nā reira rātou i te amuamu mai i tō’u metua tāne ’e iā’u ato’a nei ho’i ; ’e ’ua hina’aro rātou i te ho’i fa’ahou atu i Ierusalema.

37 ’E ’ua parau atu ra Lamana ia Lemuela ’e i te mau tamari’i tamāroa ato’a a Isema’ela : Inaha, e taparahi tātou i tō māua metua tāne, ’e tō māua teina ia Nephi, ’o ’oia i rave noa i te mana ’ia riro ’ei fa’atere ’e ’ei ’orometua nō mātou nei, ’oia ho’i, tōna nā tua’ana.

38 I teienei, tē parau ra ’oia ē, ’ua paraparau mai te Fatu iāna, ’e ’ua ha’api’i ato’a mai te mau melahi iāna. Inaha rā, ’ua ’ite tātou ē, ’ua ha’avare mai ’oia ia tātou ; tē parau mai nei ’oia i taua mau mea ra, ’e nā roto i tāna mau rāve’a ha’avare i rave ai ’oia i te mau mea e rave rahi nō te ha’avare ia tātou, i te mana’ora’a ē, e arata’i paha ’oia ia tātou i te hō’ē mēdēbara ta’a ’ē ; ’e i muri iho i tōna arata’i-’ē-ra’a atu ia tātou, ’ua mana’o ’oia ’ia fa’ariro iāna iho ’ei ari’i ’e ’ei tāvana i ni’a ia tātou, ’ia rave mai ’oia ia tātou mai te au i tōna iho hina’aro ’e tōna iho mana’o. ’E i nā reira tō’u tua’ana ra ’o Lamana i te fa’ati’arepu i tō rātou ’ā’au ’ia riri.

39 ’E i muri a’era, tei pīha’i iho te Fatu ia māua, ’oia ïa, ’ua tae mai ra te reo o te Fatu ’e ’ua parau mai ho’i i te mau parau e rave rahi ia rātou, ’e ’ua ’avau pūai mai ra ho’i ia rātou ; ’e i muri a’e i tō rātou ’avaura’ahia mai e te reo o te Fatu ra, ’ua fa’a’ore ihora rātou i tō rātou riri, ’e ’ua tātarahapa ihora i tā rātou mau hara, ’e nō reira ho’i ’ua ha’amaita’i fa’ahou mai ra te Fatu ia mātou i te mā’a, ’ia ’ore mātou ’ia pohe.