1 Iwe iei non ewe fansoun mwirin ngang, Nifai, ua osopwano ai kapas ngeni pwi kewe, nengeni ra apasa ngeniei: Ka apasa ngenikem ekkewe mettoch mi weires, nap seni ukukun am tufichin engino ngeni.

2 Iwe non ewe fansoun ua apasa ngeni ir pwe ua sinei pwe ua fen apasa ekkewe mettoch mi weires ngeni ekkewe aramas mi ngaw, usun ewe ennet; iwe ekkewe mi tupwon ua epichereno, me pwarata pwe repwe seikita non ewe ranin soponon; ina minne, emon mi tipis a ekieki pwe ewe ennet mi weires, pun a pokur tori wesewesen nukanaper.

3 Iwe iei ami pwi, ika ami mi tupwon me ami mi mochen aneasochis ngeni ewe ennet, me rongorong ngeni, pwe oupwe tongeni fetan wenechar me mwen Kot, iwe ousap ngunungun pokiten ewe ennet, me apasa: Ka apasa ekkewe mettoch mi weires ngenikem.

4 Iwe non ewe fansoun ngang, Nifai, ua pesei pwi kewe, fiti unusen nikitu, pwe repwe aneasochisi ekkewe annukun ewe Samon.

5 Iwe non ewe fansoun ra etipetekisoner me mwen ewe Samon; ina minne a wor ai pwapwa me watten apinukunuk fan iter, pwe repwe tongeni fetan non ekkewe aanen wenechar.

6 Iei, ekkei mettoch meinisin a fen wes porousan me ra fis nupwen semei we a nonnom non ew imw mangaku non ewe nemonun chuk minne i a eita ngeni Lemuel.

7 Iwe non ewe fansoun ngang, Nifai, ua angei emon me nein ekkewe fopun noun Ishmael pwe punuwei; me pwan, pwi kewe ra angei ekkewe fopun noun Ishmael pwe punuwer, me pwan Soram a angei ewe finnichi noun Ishmael pwe punuwan.

8 Iwe iei semei we a apwonueta meinisin ekkewe annuk an ewe Samon minne ra fen kawor ngeni. Iwe pwan, ngang, Nifai, ua fen fokkun feioch me ren ewe Samon.

9 Iwe non ewe fansoun mongungun ewe Samon a kapas ngeni semei we fansoun nepwin, me annuku ngeni i pwe non ewe soran i epwe sainong non ewe fonu pon.

10 Iwe non ewe fansoun nupwen semei we a pwata non ewe sosoran, me feino ngeni ewe asamen ewe imw mangaku, ren an fokkun mairu a kuna efou por mi kukumos a fokkun murino fofforun won ewe puun; me a seni brass mi nimenimoch. Iwe me non ewe foun por a wor ruofoch autun mecha; iwe ewe efoch a itingeni ewe aan ngeni ia am aupwe feino ia non ewe fonu pon.

11 Iwe non ewe fansoun am aua ioifengeni met chok mettoch am aupwe uweanong non ewe fonu pon, me meinisin nussunon am kewe pisek minne ewe Samon a fen ngenikem; iwe am aua wou foun sokopaten ira meinisin pwe am aupwe tongeni ne uweienong ngeni ewe fonu pon.

12 Iwe non ewe fansoun am aua angei imwem kewe imw mangaku me feino ngeni ewe fonu pon, won epekin ewe chonupupu Leiman.

13 Iwe non ewe fansoun am aua sai ren ukukun ruanu ran, arap ngeni ew aanen emmwen eor-otiweor, iwe am aua aueta sefan imwem kewe imw mangaku; iwe am aua eita ngeni ewe neni ewe it itan Saser.

14 Iwe non ewe fansoun am aua angei nöum kewe nikappich me nöum kewe foun nikappich, me feino ngeni ewe fonu pon ren am aupwe ni man pwe mwongon am kewe famini; iwe mwirin am aua ni man pwe mwongon am kewe famini am aua niwin sefan ngeni am kewe famini non ewe fonu pon, ngeni ewe neni Saser. Iwe am aua feino sefan non ewe fonu pon, tapweeno non ewe chok pwan awenewenenen emmwen, aua chok nom non ekkewe kinikinin mi fokkun uwaoch me non ewe fonu pon mi fokkun uwa, minne ra nom non ekkewe kia arap ngeni ewe Setipar.

15 Iwe non ewe fansoun am aua fen sai ren ewe ukukun chommong ran, aua ninni man ren mwongo non am feffetan, ren nöum kewe nikappich me nöum kewe foun nikappich me am kewe fau me nöum kewe aunun.

16 Iwe am aua fiti ekkewe emmwen an ewe foun por, minne a emmweni keminong non ekkewe kinikinin mi uwaoch me non ewe fonu pon.

17 Iwe mwirin am aua fen sai ren ewe ukukun chommong ran, am aua aueta imwem kewe imw mangaku ren ukukun ekkoch fansoun, pwe am aupwe tongeni asosoi inisim me kut mwongo faniten am kewe famini.

18 Iwe non ewe fansoun nupwen ngang, Nifai, ua feino pwe upwe ninni mwongo, nengeni, ua kupi nei we nikappich, minne a for seni mecha mi auchea; iwe mwirin ua kupi nei we nikappich, nengeni, pwi kewe ra song rei pokiten tanon nei we nikappich, pun am ause chiwen kut mwongo.

19 Iwe non ewe fansoun am aua niwin nge ese wor mwongo fan iten am kewe famini, iwe pokiten ra fokkun apwangapwang chapur, pokiten am we sai, ra riaffou chapur ren ar mochenin mwongo.

20 Iwe non ewe fansoun Leiman me Lemuel me noun Ishmael kewe anuon ra poputa ne ngunungun chapur, pokiten ar kewe riaffou me weires non ewe fonu pon; iwe semei we a pwan poputa ne ngunungunu ewe Samon an Kot; ewer, iwe ra fokkun netipengaw, ra pwan mwo ngunungunu ewe Samon.

21 Iei non ewe fansoun ngang, Nifai, ua fen riaffou ren pwi kewe pokiten tanon nei we nikappich, iwe pokiten nour kewe nikappich a turuno senir kewe, a poputa ne fokkun weires, ewer, ina minne am ause tongeni kut mwongo.

22 Iwe non ewe fansoun ngang, Nifai, ua kapas chommong ngeni pwi kewe, pokiten ra pwan apochokunasefani netiper, pwan tori ar ngunungunu ewe Samon ar Kot.

23 Iwe non ewe fansoun ngang, Nifai, ua fori efoch nikappich seni ira, me seni efoch ira mi wenechar, efoch foun nikappich; ina minne, ua episeki inisi ren efoch nikappich me efoch foun nikappich, fiti efoch aunun me fiti ekkoch foun fau. Iwe ua kapas ngeni semei we: Ian ngang upwe no kut mwongo me ia?

24 Iwe non ewe fansoun a eisini ewe Samon, pun ra atipetekisoner pokiten ai kewe kapas; pun ua apasa chommong mettoch ngeni ir non ewe pochokunen ngunui.

25 Iwe non ewe fansoun ewe mongungun ewe Samon a feito ngeni semei we; iwe a ennetin fonou pokiten an we ngunungunu ewe Samon, ina minne a turutiw non anonnonun netipengaw.

26 Iwe non ewe fansoun ewe mongungun ewe Samon a apasa ngeni i: Nengeni won ewe foun por, me nengeni ekkewe mettoch minne ra makketiw won.

27 Iwe non ewe fansoun nupwen semei we a kuna ekkewe mettoch minne ra makketiw won ewe foun pwor, a fokkun nuokus me chechech chapur, me pwan pwi kewe me noun Ishmael kewe anuon me punuwem kewe.

28 Iwe non ewe fansoun ngang, Nifai, ua kuna ekkewe autun minne ra nom non ewe foun pwor, pwe ra mwokutukut anongonong ngeni ewe nuku me nikitu me aneasochis minne am mi ngenir.

29 Iwe a pwan wor ew minafon mak a mak wor, minne a fatoch ne annea, minne a ngenikem mirit usun eerenien ewe Samon; iwe a mak me siwin seni fansoun ngeni fansoun, anongonong won ewe nuku me nikitu minne am aua ngeni. Iwe iei am aua kuna pwe ren kukkun mettoch ewe Samon a tongeni wato mettoch mi napanap.

30 Iwe non ewe fansoun ngang, Nifai, ua feita won ungen ewe chuk, anongonong won ekkewe aurour minne ra kawor won ewe foun pwor.

31 Iwe non ewe fansoun ua nieno ekkoch man mwacho, ina minne ua uwou mwongo fan iten am kewe famini.

32 Iwe non ewe fansoun ua niwin sefan ngeni imwen kewe imw mangaku, ua uwei ekkewe man mwacho minne ua fen nireno; iwe iei nupwen ra kuna pwe ua wou mwongo, ifa usun watten ar pwapwa! Iwe non ewe fansoun ra etipetekisoner me mwen ewe Samon, me ra ngeni i ar kinisou.

33 Iwe non ewe fansoun am aua sai sefan, am aua sai arap ngeni ewe pwan chok aan usun me akom; iwe mwirin am aua sai ren ewe ukukun chommong ran am aua aueta sefani imwem kewe imw mangaku, pwe am aupwe tongeni nonnom ren ukukun ekkoch fansoun.

34 Iwe non ewe fansoun Ishmael a mano, me peiaseno non ewe neni minne a iteni Neiom.

35 Iwe non ewe fansoun noun Ishmael kewe fopun ra fokkun netipeta, pokiten manon semer we, me pokiten ar kewe riaffou me non ewe fonu pon; iwe ra ngunungunu semei we, pokiten i a uweireu seni ewe fonuen Jerusalem, ra apasa: Semem we a mano; ewer, iwe am aua fen mwanech fetan non ewe fonu pon, iwe aua fen riaffouni watten weires, echik, kaka, me apwangapwang; iwe mwirin meinisin ekkei riaffoun aupwene mano non ewe fonu pon ren echik.

36 Iwe iei ra ngunungunu semei we, me pwan ngang; iwe ra mochen pwe repwe niwin sefan ngeni Jerusalem.

37 Iwe Leiman a ereni Lemuel me pwan noun Ishmael kewe anuon: Nengeni, sipwene nieno semach we, me pwan pwich we Nifai, ewe a pwisin finata pwe i epwe nouch chon nemenem me sense, kich pwin watte.

38 Iei, a apasa pwe ewe Samon a kapas ngeni, me pwan chon nang ra afanafan ngeni i. Nge nengeni, sia sinei pwe a mwaken ngenikich; me a ereni kich ekkei mettoch meinisin, iwe i a anganga chommong mettoch seni an kewe angangen nikatupotup, pwe i epwe atupano mesach, ach ekiek, meni, pwe i epwe emmweni kicheno ngeni ekkoch fonu pon sise sisinei; iwe mwirin an emmweni kicheno, a ekieki pwe epwe pwisin finata pwe i emon king me emon chon nemeni kich, pwe epwe fori ngenikich met an mochen me met epwe fich ngeni netipan. Iwe mwirin ei napanap pwi we Leiman a amwasanga netiper pwe repwe song.

39 Iwe non ewe fansoun ewe Samon a nonnom rem, ewer, pwan mongungun ewe Samon a feitiw me a apasa chommong kapas ngeni ir, me fokkun fonor; iwe mwirin ar fon seni ewe mongungun ewe Samon ra kun seni ar song, iwe ra aier seni ar kewe tipis, ina minne ewe Samon a efeiochu sefani kem ren mwongo, pwe am ausap mano.