1 Iwe non ewe fansoun ra fen ngeni ewe Samon, iwe ra fitieino; iwe am aua angang ren ekkoch ira a fokkun murino fofforun. Iwe ewe Samon a pwar ngeniei seni fansoun ngeni fansoun met sokkun napanapan upwe fana ekkewe iran ewe sipw.

2 Iwe ngang, Nifai, use fana ekkewe ira an epwe usun napanapen met ua kaeo seni aramas, use pwan fori ewe sipw epwe usun ewe anapanap an aramas; nge ua fori anongonong won ewe anapanap minne ewe Samon a fen pwar ngeniei; ina minne, ese for anongonong won ewe anapanap an aramas.

3 Iwe ngang, Nifai, ua feita ngeni ewe chuk fan chommong, me ua iotek fan chommong ngeni ewe Samon; ina minne ewe Samon a pwar ngeniei mettoch mi auchea.

4 Iwe non ewe fansoun mwirin ua awesano ewe sipw, anongonong won ewe kapas an we Samon, pwi kewe ra kuna pwe a och, me ewe angangan a fokkun murino; ina minne, ra pwan etipetekisoner sefan me mwen ewe Samon.

5 Iwe non ewe fansoun ewe mongungun ewe Samon a feito ngeni semei we, pwe am aupwe uta me feitiw non ewe sipw.

6 Iwe non ewe fansoun non ewe soran, mwirin am aua amonnata mettoch meinisin, chommong foun ira me futuk seni ewe fonu pon, me chommong punech, me ekkoch pisekisekim usun met minne ewe Samon a annuku ngenikem, am aua feitiw non ewe sipw, fiti am kewe pisek me fatam kewe foun ira me mettoch ese pwan nifinifin am aua uwei ngenikem, meinisin anongonong won tettenin ierin; ina minne, am meinisin aua feitiw non ewe sipw, fiti punuwem kewe me nöum kewe semirit.

7 Iwe iei, semei we a nouni ruomon at me non ewe fonu pon; ewe watte a iteni Jacob me ewe kukkun Joseph.

8 Iwe non ewe fansoun mwirin am meinisin aua fen feitiw non ewe sipw, me am aua fen uwei ngenikem pisekim kewe meinisin me mettoch minne a fen annuku ngenikem, am aua feino non ewe sat me sai no me mwen ewe asepwan ngeni ewe fonuen pwon.

9 Iwe mwirin am aua fen paseno me mwen ewe asepwan ren ukukun chommong ran, nengeni, pwi kewe me ekkewe anuon noun Ishmael me pwan punuwer kewe ra poputa ne apwapwai inisir, ina minne ra poputa ne pworuk, me kön, me kapas fiti namanam tekia, ewer, ra pwan monnukano seni menni pochokun a fen uweireto ngeni ewe neni; ewer, ra fen seikireta non wachemuken namanam tekia.

10 Iwe ngang, Nifai, ua poputa ne napeno ai nuokus pwe ewe Samon epwene song rem, me aosukosuka kem pokiten am kewe angangangaw, pwe am aupwe ne mono non anonnonun ewe sat; ina minne, ngang, Nifai, ua poputa ne kapas ngeni ir ren unusen ai fatafatoch; nge nengeni ra song rei, ra apasa: Am ausap mut ngeni pwium kukkun epwe nemenem wom.

11 Iwe non ewe fansoun Leiman me Lemuel ra angeiei me fotiei ngeni san, me ra fori ar angangen turunufas ngeniei; nge inamo, ewe Samon a mutata pwe epwe pwari an manaman, tori an epwe ponueta an kapas minne i a fen apasa usun ekkewe aramas mi ngaw.

12 Iwe non ewe fansoun mwirin ar ra fotiei tori ai use chiwen tongeni mwokut, ewe kampas, minne a fen amonneta me ren ewe Samon, a kouno ne mwokutukut.

13 Ina minne, rese chiwen sinei ika ia repwe awenano ia ewe sipw, ina minne a poputa ew monumon watte, ewer, ew watten me anuokusun monumon, iwe am aua pasesefan won ekkewe matau ren ukukun unungat ran; iwe ra poputa ne nuokus chapur pwe repwene mono non ewe sat; nge inamo rese epichieino.

14 Iwe non ewe aruwanun ran, minne am aua fen pasesefan, ewe monumon a poputa ne napeno ariaffoun.

15 Iwe non ewe fansoun arap ngeni am aupwene mono non anonnonun ewe sat. Iwe mwirin am aua fen pasesefan won ekkewe matau ren ukukun ruanu ran, pwi kewe ra poputa ne kuna pwe ekkewe kapungun Kot a nonnom wor, me repwene mano tiwenon chok ika repwe aier seni ar kewe fofforungaw; ina minne, ra feito rei, me epichano ekkewe san minne ra nom won pei, iwe nengeni ra fokkun pwota; iwe pwan kurupun pechei ra pwan fokkun pwo, me metekin a fokkun napanap.

16 Nge inamo, ua kunungeni ai Kot, me ua mwareiti i unusen ewe ran seni nepoputan ngeni nesoponon; me use ngunungunu ewe Samon pokiten ai kewe riaffou.

17 Iei semei we, Liai, a fen apasa chommong mettoch ngeni ir, me pwan ngeni ekkewe anuon noun Ishmael; nge, nengeni, ra ngasepwichinau chommong kapasen efeiengaw ngeni ion epwe kapas fan itei; iwe semei we me inei we ra apwangapwang pokiten ar ierin chinnap, me ra ani weiresin ar netipechou chapur pokiten nour kewe, ra konetiw, ewer, pwan ngeni ar pettin samau.

18 Pokiten ar netipechou me netipengaw, me angangangawen pwi kewe, ra arap ngeni ar repwene tou seni ei fansoun ar repwe churi ar Kot; ewer, mokurer mi pwechepwech ra arap ngeni ar repwene konetiw non ewe puun; ewer, ra pwan arap ngeni ar repwene koturuno non riaffou non ewe nenien peias me matau.

19 Iwe pwan Jacob me Joseph, ir chok kukkun, a auchea an epwe watte tumunun aner mwongo, ra netipengaw pokiten riaffoun iner we; me pwan punuwei we fiti chonun mesan me an iotek, me pwan nei kewe semirit, rese ekinamweieno netipen pwi kewe ar repwe epichieino.

20 Iwe ese wor mettoch tiwenon chok ewe manamanen Kot, minne a anuokusur ren kiteter, epwe tongeni ekinamweieno netiper; ina minne, nupwen ra kuna pwe repwene mono non anonnonun ewe sat ra aier seni ekkewe mettoch minne ra fen fori, ina popun ra epichieino.

21 Iwe non ewe fansoun mwirin ar ra epichieino, nengeni, ua angei ewe kampas, iwe a mwokut usun ua mochen. Iwe non ewe fansoun ua iotek ngeni ewe Samon; iwe mwirin ai ua iotek ekkewe asepwan ra kouno, me ewe monumon a kouno, iwe a fis ew watten nua.

22 Iwe non ewe fansoun ngang, Nifai, ua emmweni ewe sipw, pwe am aua pwan sai sefan ngeni ewe fonuen pwon.

23 Iwe non ewe fansoun mwirin am aua sai ren ewe ukukun chommong ran am aua tori ewe fonuen pwon; iwe am aua feino won ewe fonu, iwe am aua aueta imwem kewe imw mangaku; iwe am aua eita ewe fonu ewe fonuen pwon.

24 Iwe non ewe fansoun am aua poputa ne anganga ewe puun, iwe am aua poputa ne fot foun ira; ewer, am aua fotiki meinisin fatam kewe foun ira non ewe puun, minne am aua fen uwei seni ewe fonuen Jerusalem. Iwe non ewe fansoun ra poputa ne fokkun mar; ina minne, am aua feioch ren chommongun anem mwongo.

25 Iwe non ewe fansoun am aua kuna won ewe fonuen pwon, nupwen am aua sai non ewe fonu pon, pwe mi wor meinisin sokkun watten man nein ekkewe petewen, ren ewe kou me ewe oks, me ewe tongki me ewe oris, me ewe sike me ewe sike mwacho, me meinisin sokkun man mwacho, minne ra öch ngeni atufichin aramas. Iwe am aua kuna meinisin sokopaten mecha, seni gold, me seni silver, me seni copper.