1 Iwe non ewe fansoun ewe Samon a annuku ngeniei, ina minne ua for seleich seni mecha pwe upwe tongeni makkei wor ewe uruon nei kewe aramas. Iwe won ekkewe seleich minne ua forir ua fen makkei ewe uruon semei we, me pwan am kewe sai non ewe fonu pon, me ekkewe osini an semei we; me pwan chommong seni ai kewe pwisin osini ua makkei wor.

2 Iwe use sinei non ewe fansoun nupwen ua forir pwe ewe Samon epwe annuk ngeniei pwe upwe fori ekkei seleich; ina minne, ewe uruon semei we, me ewe uruon saman kewe, me ewe watten kinikinin meinisin am kewe foffor non ewe fonu pon ra makketiw won ekkewe aewin seleich minne ua fen kapas usun; ina minne, ekkewe mettoch minne ra fen fis me mwen ai fori ekkei seleich, ra ennet, nap ngeni ra makketiw won ekkewe aewin seleich.

3 Iwe mwirin ua fori ekkei seleich pokiten ai angei annuk, ngang, Nifai, ua angei ew annuk pwe ewe angangen afanafan me ekkewe osini, nap ngeni ekkewe fatafatochun me auchean kinikinir, repwe mak won ekkei seleich; me ekkewe mettoch minne ra mak repwe isois pwe minen kaeo ren nei kewe aramas, ekkewe repwe fonueni ewe fonu, me pwan ren ekkoch popun mi murino, minne ekkewe popun ra fat ngeni ewe Samon.

4 Ina minne, ngang, Nifai, ua fori ew uruo won ekkewe ekkoch seleich, minne a masoweni ew uruo, ika minne a masoweni ew unusochun uruon ekkewe maun me anini fengen me kiteterinon nei kewe aramas. Iwe ei ua fori, me annuku ngeni nei kewe aramas met repwe fori mwirin ua mano; iwe ekkei seleich repwe keititiw seni ew tappin aramas ngeni pwan ew, ika seni emon soufos ngeni pwan emon, tori ra angei pwan ekkoch annuk seni ewe Samon.

5 Iwe ew uruon ai fori ekkei seleich repwe kawor mwirin ei; iwe mwirin, nengeni, ua soposopono anongonong won met minne ua fen apasa; iwe ei ua fori pwe ekkewe mettoch mi unusen pin repwe isois fan iten miritin nei kewe aramas.

6 Nge inamo, use makkei och mettoch meinisin won ekkei seleich tiwenon chok met ua ekieki pwe mi pin. Iwe iei, ika ua fori mi mwan, usun ra fen fori me nom; esap ren ai upwe etiwau inisi pokiten ekkoch aramas, nge pokiten ewe apwangapwang minne a nom rei, usun ewe aion, upwe etiwau inisi.

7 Ren ekkewe mettoch minne ekkoch aramas ra ekieki pwe mi napanap auchear, ngeni ewe inis me pwan ngun, ekkoch ra ekiekin etiwau pwe ese wor auchean me puratiw fan pecher. Ewer, pwan ewe wesen Koten Israel aramas ra puratiw fan pecher; ua apasa, puratiw fan pecher nge upwe kapas non ekkoch kapas—ra ekieki pwe ese wor auchean, iwe rese aneasochis ngeni mongungun an kewe aurour.

8 Iwe nengeni a feito, anongonong won ekkewe kapas an ewe chon nang, non wonepuku ier seni ewe fansoun semei we a tou seni Jerusalem.

9 Iwe ewe fonufan, pokiten ar angangangaw, repwe apungu i pwe ew mettoch ese wor auchean; ina minne repwe wichi i, iwe i epwe nikitu ngeni; me repwe ninni i, me i epwe nikitu ngeni. Ewer, ra ottufeta won, me i a nikitu ngeni, pokiten an kirekiroch me tong me an engino ngeni ekkewe noun aramas.

10 Iwe ewe Koten semach kewe, ekkewe ra emmweniu seni Egypt, seni fotek, me ir mi pwan tumun me non ewe fonu pon seni i, ewer, ewe Koten Abraham, me Isaac, me ewe Koten Jacob, a fangeno inisin, anongonong won ekkewe kapas an ewe chon nang, usun emon mwan, ngeni ne poun ekkewe aramas mi ngaw, pwe epwe kakita won irapenges, anongonong won ekkewe kapas an Zenock, me epwe irapengesino, anongonong won ekkewe kapas an Niam, me epwe peiaseno non ew nenien peias, anongonong won ekkewe kapas an Sinos, minne i a apasa usun ekkewe unungat ranin rochopwak, minne epwe ew esisinen an mano ngeni ekkewe repwe nonnom won ekkewe fonuen neset, a pwarano akkaewin ngeni ekkewe ir seni ewe imwen Israel.

11 Pun iei ewe soufos a apasa: Ewe Samon Kot epwe ennetin churi meinisin ekkewe imwen Israel non na ran, ekkoch ren mongungun, pokiten ar wenechar, ngeni ar pwapwa chapur me amanau, me ekkoch ren ekkewe chopunap me ekkewe inefin an manaman, ren monumon, ren ekkei, me ren otuot, me otuotun rochopwak, me ren sukkunon ewe puun, me seni ekkewe chuk minne repwe kekita.

12 Iwe meinisin ekkei mettoch mi auchea repwe ennetin feito, ewe soufos Sinos a apasa. Iwe ekkewe achawen ewe puun repwe mokkufesen; iwe pokiten ekkewe akurangen ewe fonufan, ewe Ngunun Kot epwe angang won chommong ekkewe kingen ekkewe fonuen neset, epwe puchor: Ewe Koten fonufan a riaffou.

13 Iwe ren ekkewe ir mi nom Jerusalem, ewe soufos a apasa, repwe ninni me ren aramas meinisin, pokiten ra irapengesi ewe Koten Israel, me akunnano netiper, rese etiwa ekkewe esisin me umoumoch, me ewe manaman me ningen ewe Koten Israel.

14 Iwe pokiten ar akunnano netiper, ewe soufos a apasa, me ra oput ewe Emon mi Fel re Israel, repwe fein fetan non pekin aion, me mano, me winiti ew eisis me ew minen atakirikir, iwe repwe koput me nein muu meinisin.

15 Nge inamo, nupwen ena ran epwe feito, ewe soufos a apasa, pwe resap chiwen akunnano netiper seni ewe Emon mi Fel re Israel, non na fansoun i epwe chechemeni ekkewe pwon mi pin minne i a fori ngeni semer kewe.

16 Ewer, mwirin na fansoun i epwe chechemeni ekkewe fonuen neset; ewer, me aramas meinisin ekkewe ir chon ewe Imwen Israel, upwe ochufengenirenong, ewe Samon a apasa, anongonong won ekkewe kapas an ewe soufos Sinos, seni ekkewe ruanu kinikinin ewe fonufan.

17 Ewer, iwe meinisin chon ewe fonufan repwe kuna ewe amanauen ewe Samon, ewe soufos a apasa; muu meinisin, einang, sokopaten kapas me aramas meinisin repwe feioch.

18 Iwe ngang, Nifai, ua fen makkei ekkei mettoch ngeni nei kewe aramas, pwe ita upwe tongeni peser pwe repwe chechemeni ewe Samon ar Chon Angasano.

19 Ina minne, ua kapas ngeni meinisin chon ewe imwen Israel, ika pwe repwe angei ekkei mettoch.

20 Pun nengeni, a wor ai memef non ewe ngun, minne a apekusueino tori nekafon chuui meinisin ra apwangapwangeno, ren ekkewe ra nom Jerusalem; pun ika ewe Samon ese umoumoch, ne pwar ngeniei usur, usun a fen pwar ngeni ekkewe soufosun nom, upwe pwan mano.

21 Iwe a ennetin pwar ngeni ekkewe soufosun nom mettoch meinisin usun ir; me a pwan pwar ngeni chommong usun kich; ina minne, mi auchea pwe sipwe sinei usun ir pun ra makketiw won ekkewe seleichen brass.

22 Iei non ewe fansoun ngang, Nifai, ua aiti pwi kewe ekkei mettoch; iwe non ewe fansoun ua anneani chommong mettoch ngeni ir, minne ra mak won ekkewe seleichen brass, pwe repwe tongeni sinei usun ekkewe foffor an ewe Samon non ekkoch fonu, me nein aramasen nom.

23 Iwe ua anneani chommong mettoch ngeni ir minne ra mak non ekkewe puken Moses; nge ren ai upwe tongeni unusochun peser pwe repwe nuku non ewe Samon ar Chon Angasano ua anneani ngeni ir met mi mak seni ewe soufos Isaiah; pun ua awewei ekkewe pukefel meinisin ngenikem, pwe epwe tongeni am pisekin tufich me kaeo.

24 Ina minne ua kapas ngeni ir, ua apasa: Rongorong ngeni ekkewe kapas an ewe soufos, ami ekkewe oua ew tappin ewe imwen Israel, ew panen ira ewe a kaimuno; rongorong ngeni ekkewe kapas an ewe soufos, minne ra mak ngeni meinisin ewe imwen Israel, me awewer ngenikemi pwisin, pwe epwe wor ami apinukunuk usun chok pwimi kewe ekkewe oua fen kaimuno senir; pun mwirin ei napanap ewe soufos a fen mak.