Te Buka Mātāmua a Nephi
Tāna fa’aterera’a hau ’e tāna ’ohipa mo’a
E fa’ati’ara’a nō te ’ā’amu nō Lehi ’e nō tāna ra vahine, ’o Saria, ’e nō tāna mau tamari’i tamāroa to’omaha, i ma’irihia tō rātou ra i’oa, (ma te ha’amata i te matahiapo) Lamana, Lemuela, Samu, ’e Nephi. ’Ua fa’aara te Fatu ia Lehi ’ia reva ’ē atu i rāpae i te fenua ra nō Ierusalema, nō te mea ’ua tohu atu ’oia i te mau ta’ata nō ni’a i tā rātou mau ’ohipa ’ī’ino ’e ’ua tītau rātou ’ia ha’apohe iāna. ’Ua haere atu ’oia ’e tōna ’utuāfare nō nā mahana e toru i roto i te mēdēbara. ’Ua rave Nephi i tōna mau taea’e ’e ’ua ho’i atu i te fenua ra nō Ierusalema nō te rave mai i te pāpa’a parau a te mau ’āti Iuda. Te ’ā’amu nō tō rātou mau ’ati. ’Ua rave rātou i te mau tamāhine a Isema’ela ’ei vahine nā rātou. ’Ua rave rātou i tō rātou mau ’utuāfare ’e ’ua reva atu ra i roto i te mēdēbara. Tō rātou mau ’oto ’e tō rātou mau ’ati i roto i te mēdēbara. Te tupura’a tō rātou tere. ’Ua tae rātou i te mau pape rarahi. ’Ua mārō te mau tua’ana o Nephi iāna. ’Ua ha’amāmū ’oia ia rātou, ’e ’ua hāmani ’oia i te hō’ē pahī. ’Ua ma’iri rātou i te i’oa o taua vāhi ra ’o ’Auhune. ’Ua tere atu rātou nā ni’a i te mau pape rarahi i te fenua i fafauhia ra, ’e te vai atu ra. ’Ua au ho’i teie i te ’ā’amu a Nephi ; ’oia ho’i, ’ua pāpa’i au, ’o Nephi, i teie nei pāpa’a parau.
Pene 1
’Ua ha’amata Nephi i te pāpa’a parau o tōna mau ta’ata—’Ua ’ite ’o Lehi i roto i te hō’ē ’ōrama i te hō’ē pou auahi ’e ’ua tai’o ’oia mai roto mai i te hō’ē buka nō te tohu—’Ua ’ārue ’oia i te Atua, ’ua fa’a’ite ātea ’oia i te taera’a mai o te Mesia, ’e ’ua tohu ’oia nō ni’a i te ha’amoura’a o Ierusalema—’Ua hāmani-’ino-hia ’oia e te mau ’āti Iuda. Fātata 600 H.M.
1 ’Ua fānauhia vau, ’o Nephi, e nā metua maitata’i, nō reira ’ua ha’api’ihia vau i te tahi tufa’a nō te ’ite pā’āto’a o tō’u ra metua tāne ; ’e ’ua ’ite au i te mau ’ati e rave rahi i tō’u ra pu’e mahana, ’āre’a rā ’ua fa’ahereherehia vau e te Fatu i tō’u mau mahana ato’a ; ’oia ïa, ’ua noa’a iā’u te ’ite rahi i te maita’i ’e te mau parau ’aro a te Atua ra, nō reira e pāpa’i au i te hō’ē pāpa’a parau nō te mau mea tā’u i rave i tō’u ra mau mahana.
2 ’Oia ïa, tē pāpa’i nei au i te hō’ē pāpa’a parau i te reo o tō’u ra metua tāne, ’e nō ni’a te reira i te ’ite o te mau ’āti Iuda ’e te reo o tō ’Aiphiti.
3 ’E ’ua ’ite au ē, e pāpa’a parau mau teie tā’u e pāpa’i nei ; ’e tē pāpa’i nei au i te reira i tō’u iho rima ; ’e tē pāpa’i nei au i te reira mai te au i tō’u iho ’ite.
4 I te mea ē, i muri a’era, i te ha’amatara’a nō te matahiti mātāmua nō te fa’aterera’a a Zedekia, te ari’i nō Iuda, (i noho tō’u ra metua tāne, ’o Lehi, i Ierusalema i tōna ra pu’e mahana ato’a) ; ’e i taua matahiti ihora i haere mai ai te mau peropheta e rave rahi, i te tohura’a i te mau ta’ata ē, ’ia tātarahapa rātou e ti’a ai, ’e ’aore rā e ha’amouhia te ’oire rahi ra o Ierusalema.
5 Nō reira, i muri a’era, ’ua haere atu ra tō’u metua tāne, ’o Lehi, pure atu ra i te Fatu, ’oia ïa, ma tōna ’ā’au ato’a, nō tōna ra mau ta’ata.
6 ’E i muri a’era, ’a pure atu ai ’oia i te Fatu, ’ua tae mai ra te hō’ē pou auahi e pārahi a’era i ni’a iho i te hō’ē mato i mua iāna ra ; e rave rahi te mea tāna i hi’o ’e i fa’aro’o ; ’e nō te mau mea tāna i hi’o ’e i fa’aro’o ra, ’ua ’āueue ihora ’oia ma te rurutaina rahi.
7 ’E i muri a’era, ’ua ho’i atu ra ’oia i tōna iho fare i Ierusalema ; ’e ’ua ta’oto ihora ’oia i ni’a i tōna ra ro’i, nō te mea i paruparu ’oia i te Vārua ’e i te mau mea tāna i hi’o ra.
8 ’E nō te mea ho’i i paruparu ’oia i te Vārua, ’ua ’āfa’i-’ē-hia atu ’oia i roto i te hō’ē ’ōrama, ’oia ïa ’ua ’ite a’era ho’i ’oia i te mau ra’i i te vēteara’a, ’e ’ua mana’o ihora ’oia ē, ’ua ’ite atu ’oia i te Atua i te pārahira’a i ni’a iho i tōna ra terōno, ma te ha’a’atihia e te mau pupu melahi e’ita e hope ’ia tai’o, i te hīmenera’a ’e te ’āruera’a i tō rātou ra Atua.
9 ’E i muri a’era, ’ua ’ite atu ra ’oia i te Hō’ē i te poura’a mai mai rōpū mai i te ra’i, ’e ’ua ’ite atu ra ’oia ē ’ua hau atu tōna ’ana’ana i tō te mahana i te avatea ra.
10 ’E ’ua ’ite ato’a atu ra ’oia hō’ē ’ahuru ’e ma piti atu ā mau ta’ata i te pe’era’a mai iāna ra, ’e ’ua hau atu tō rātou ’ana’ana i tō te mau feti’a i te ra’i ra.
11 ’E ’ua pou mai ra rātou i raro ’e ’ua haere atu ra nā ni’a i te fenua nei ; ’e ’ua haere mai ra te ta’ata mātāmua ’e ’ua ti’a mai ra i mua i tō’u metua tāne, ’e ’ua hōro’a mai ra i te hō’ē buka iāna, ’e ’ua fa’aue mai ra iāna ’ia tai’o.
12 ’E i muri a’era, ’a tai’o ai ’oia, ’ua ’ī a’era ’oia i te Vārua o te Fatu.
13 ’E ’ua tai’o ’oia, i te nā-’ō-ra’a ē : ’Auē ho’i ē, ’auē ho’i ē, e Ierusalema ē, ’ua ’ite ho’i au i tā ’oe ra mau ’ohipa vi’ivi’i ! ’Oia ïa, e rave rahi te mau mea tā tō’u metua tāne i tai’o nō ni’a ia Ierusalema—e ha’amouhia ïa ’e tae noa atu i te mau ta’ata ato’a i reira ; e rave rahi tē pohe i te ’o’e, ’e e rave rahi tē hōpoi-tītī-hia i Babulonia ra.
14 ’E i muri a’era, ’ia tai’o ’e ’ia hi’o ho’i tō’u metua tāne i te mau mea faufa’a rahi e rave rahi ’e te māere ho’i, ’ua fa’ahiti pūai atu ra ’oia i te mau mea e rave rahi i te Fatu, mai teie te huru : E mea faufa’a rahi ’e te māere tā ’oe ra mau ’ohipa, ’e te Fatu te Atua Manahope ! E mea teitei tō ’oe terōno i roto i te mau ra’i, ’e tei ni’a i te mau ta’ata ato’a o te fenua nei tō ’oe mana, ’e tō ’oe maita’i, ’e tō ’oe aroha ; ē, nō tō ’oe aroha, e’ita roa ’oe e fa’ati’a ’ia pohe rātou ’o tē haere mai ia ’oe na !
15 E mai teie te huru o te reo o tō’u metua tāne i te ’āruera’a i tōna Atua ; ’e ’ua ’oa’oa ho’i tōna vārua, ’e ’ua fa’a’īhia tōna ’ā’au ato’a, nō te mau mea tāna i hi’o, ’oia ïa, nō tā te Fatu i fa’a’ite mai iāna ra.
16 ’E i teienei, e’ita vau, ’o Nephi, e pāpa’i i te tā’āto’ara’a o te ’ā’amu o te mau mea tā tō’u metua tāne i pāpa’i, ’ua pāpa’i ho’i ’oia i te mau mea e rave rahi tāna i ’ite i roto i te mau ’ōrama ’e i roto i te mau moemoeā ; ’e ’ua pāpa’i ato’a ho’i ’oia i te mau mea e rave rahi tāna i tohu ’e tāna i parau atu i tāna ra mau tamari’i, ’e ’aita ho’i au e pāpa’i i te tā’āto’ara’a o te ’ā’amu.
17 E pāpa’i rā vau i te hō’ē ’ā’amu nō te mau mea tā’u i rave i tō’u ra pu’e mahana. Inaha, e ha’apoto vau i te pāpa’a parau a tō’u ra metua tāne i ni’a i te mau ’api tā tō’u iho nā rima i hāmani ; nō reira, i muri iho i tō’u ha’apotora’a i te pāpa’a parau a tō’u ra metua tāne, ’ei reira vau e pāpa’i ai i te hō’ē ’ā’amu nō tō’u iho orara’a.
18 Nō reira, ’ua hina’aro vau ’ia ’ite ’outou ē, i muri iho i tō te Fatu fa’a’itera’a i te mau mea māere e rave rahi i tō’u ra metua tāne, ia Lehi, ’oia ïa, nō ni’a i te ha’amoura’a o Ierusalema, inaha, ’ua haere atu ra ’oia i rotopū i te mau ta’ata, ’e ’ua ha’amata ihora i te tohu ’e i te fa’a’ite ia rātou nō ni’a i te mau mea tāna i ’ite ’e i fa’aro’o.
19 ’E i muri a’era, ’ua tāhitohito mai ra te mau ’āti Iuda iāna nō te mau mea tāna i fa’a’ite atu nō ni’a ia rātou ra ; i fa’a’ite pāpū atu ho’i ’oia nō ni’a i tā rātou mau ’ohipa parauti’a ’ore e tā rātou mau ’ohipa vi’ivi’i ; ’e ’ua fa’a’ite atu ho’i ’oia ē, ’ua fa’a’ite pāpū mai te mau mea tāna i ’ite ’e i fa’aro’o, ’e te mau mea ho’i tāna i tai’o i roto i taua buka ra, i te taera’a mai o te hō’ē Mesia, ’e te fa’aorara’a ho’i o tō te ao nei.
20 ’E i te fa’aro’ora’a te mau ’āti Iuda i teie nei mau mea, ’ua riri ihora rātou iāna ; ’oia ïa, mai te mau peropheta i tahito ra, ’o tā rātou i ti’avaru ’ē atu, ’e i pēhi i te ’ōfa’i, ’e i taparahi ; ’e ’ua tītau ato’a ho’i rātou i tōna ora, ’ia ti’a ia rātou ’ia rave ’ē atu i te reira. Inaha rā, e fa’a’ite atu vau, ’o Nephi, ’ia ’outou ē, tei ni’a iho tō te Fatu aroha ia rātou ato’a ’o tāna i mā’iti, nō tō rātou fa’aro’o, ’ia ha’apūai ia rātou i te mana nō te fa’aorara’a.