1 O lenei foi: Faalogo mai ia, outou e le aiga o Isaraelu, outou uma o e ua fa’iesea ma tutuliesea ona o le amioleaga o faifeau o lo’u nuu; ioe, outou uma o e ua fa’iesea, o e ua faataapeapeina solo, o e o lo’u nuu, le aiga e o Isaraelu. Faalogo mai ia, ia te a’u, outou e motu, ma faalogo mai ia outou e tagata mai nuu mamao; na valaauina a’u e le Alii ma ia ta’u lo’u igoa; ae oute lei fanau mai le manava o lo’u tinā.

2 Ma ua faia e ia lo’u gutu e pei o se pelu ma’ai; o le paolo o lona aao na natia ai e ia a’u, ma faia a’u o se ufanafana ua faaiilaina, ma natia a’u e ia i lana utu;

3 Ma sa fetalai mai ia te a’u: O la’u auauna oe, Isaraelu e, o lē o le a faamamaluina ai a’u.

4 Ona Ou fai atu lea, ua leai se aoga na Ou galue ai, ua Ou faaalu lo’u malosi mo meanoa ma mea lē aoga; e moni lava ua i ai i le Alii lo’u faamasinoga, ma o la’u galuega ua i ai i lo’u Atua.

5 Ma o lenei, ua fetalai mai le Alii—o lē na faia a’u mai le manava ina ia avea a’u ma ana auauna, e toe aumai Iakopo ia te ia—e ui ina lei faapotopotoina Isaraelu, ae o le a Ou mamalu i fofoga o le Alii, ma o lo’u Atua o le a avea ma o’u malosi.

6 Ma sa fetalai mai o ia: O se mea māmā le avea o oe ma a’u auauna e faatulai a’e i luga ituaiga o Iakopo, ma toefuatai le faasaoina mai o Isaraelu. O le a Ou tuu atu foi oe mo se malamalama i Nuuese, ina ia mafai ona avea oe ma a’u olataga i tuluiga o le lalolagi.

7 Ua faapea ona fetalai mai o le Alii, le Togiola o Isaraelu, lana Paia e Toatasi, ia te ia o lē ua itagia e tagata, ia te ia o lē ua inosia e atunuu, i le auauna a e ua pule: O le a vaai tupu ma tutulai, o le a ifo foi aloalii, ona o le Alii o lē ua faamaoni.

8 Ua faapea ona fetalai mai o le Alii: I se taimi sa tatau ai sa Ou faalogo atu ai ia te oe, motu e o le sami, ma i se aso o le olataga sa Ou fesoasoani atu ai ia te oe; ma o le a Ou faasaoina oe, ma tuu atu ia te oe la’u auauna mo se feagaiga a le nuu, e faatuina ai le eleele, e fai ia avea ma o latou tofi fanua tuufua;

9 Ina ia mafai ona e fai atu i pagota: O atu ia; ia i latou o e o nonofo i le pouliuli: Faaali atu outou lava. O le a latou aai i le ala, ma o o latou lotoā o le a i ai i mea maualuluga uma.

10 O le a latou lē fia aai pe fia feinu, pe taia foi i latou i le vevela po o le la; ona o ia o lē ua alofa mutimutivale ia te i latou o le a taitaia i latou, o tafatafa lava o puna o vai o le a taitai atu ai e ia i latou.

11 Ma o le a Ou faia o’u mauga uma o se auala, ma o le a faaleleia o’u ala tele.

12 Ona faapea lea, le aiga e o Isaraelu, faauta, o le a o mai i latou mai mea mamao; ma faauta, o i latou mai matu ma mai sisifo; ma i latou mai le laueleele o Sainima.

13 Ia pepese ia, le lagi e; ma olioli ia, le lalolagi e; ona o le a faatuina vae o i latou o e o i sasa’e; ma alalaga atu i pesega, mauga e, ona o le a lē toe taiaina i latou, ona ua faamafanafanaina e le Alii lona nuu, ma o le a alofa mutimutivale i luga o ona tagata puapuagatia.

14 Ae faauta, ua fai mai Siona: Ua tuulafoaiina a’u e le Alii, ma ua faagaloina a’u e lo’u Alii; peitai o le a faaali mai e ia sa lei faia e ia.

15 Aua pe mafai ea ona galo i se fafine lana tama o susu, ina ia lē alofa o ia i le tama a lona manava? Ioe, atonu e galo ia te i latou, ae o le a le galo ea ia te a’u oe, le aiga e o Isaraelu.

16 Faauta, ua Ou togitogia oe i luga o alofilima o o’u lima; o ou pa ua i ai pea i o’u luma.

17 O le a faataalise atu au fanau e faasaga i ē e faaumatia oe; ma o i latou na faatafunaina oe o le a o ese atu mai ia te oe.

18 Tepa a’e ia ou mata ma vaavaai solo ma faauta; ua faapotopoto faatasi uma i latou lava, ma o le a latou o mai ia te oe. Ma a o Ou ola, ua fetalai mai ai le Alii, o le a e faaofuina lava oe faatasi ma i latou uma, e pei o se mea teuteu, ma fusi i latou e pei lava o se faatoanofotane.

19 Ona o ou nofoaga faaleagaina ma tuufua, ma le laueleele o lou faafanoga, o le a lauitiiti tele lava i le taimi nei ona o e o nonofo ai; ma o le a mamao ese i latou na tofatumoanaina oe.

20 O fanau o e o le a e maua, ina ua mavae ona toesea mai ia te oe le fanau muamua, o le a toe fai atu i ou taliga: Ua lauitiiti tele le nofoaga mo a’u; tuu mai se nofoaga ia te a’u e mafai ona ou nofo ai.

21 Ona e faapea ifo lea i lou loto: O ai ea na fanauina i latou nei ia te a’u, talu ai ona ua le maua ni a’u fanau, ma ua ou pa, o se pagota, ma ua fesiitai solo mai lea mea i lea mea? Ma o ai ea na ia tausia i latou nei? Faauta, sa tu’ua toatasi a’u; o i latou nei, sa i fea ea i latou?

22 Ua faapea ona fetalai mai o le Alii le Atua: Faauta, o le a Ou sii a’e lo’u lima i Nuuese, ma faatu la’u tagavai i le nuu; ma o le a latou aumai ou atalii i o latou lima, ma o ou afafine o le a tauaveina i luga o o latou tau’au.

23 Ma o le a avea tupu ma ou tamā tausitama, ma a latou masiofo ma ou tinā faafailele; o le a latou ifo ia te oe ma o latou mata e faasaga i le eleele, ma etoeto ese le pefu o ou vae; ma o le a e iloa o A’u o le Alii; ona o le a lē maasiasi i latou o e e faatalitali ia te a’u.

24 Ona e faoa ea le vete mai lē ua malosi, pe laveaiina i latou ua faatagataotauaina tatau i le tulafono?

25 Peitai ua faapea ona fetalai mai o le Alii, e oo i e faatagataotauaina a lē ua malosi o le a aveesea, ma o le vete a lē ua mata’utia o le a lavea’ia; ona o le a Ou finau ma ia e finau ma oe, ma o le a Ou faaolaina au fanau.

26 Ma o le a Ou fafagaina i latou o e e faasaua ia te oe i o latou lava aano; o le a latou onanā i o latou lava toto e pei ona onanā i le uaina suamalie; ma o le a iloa e tagata uma o A’u, o le Alii, o lou Faaola ma lou Togiola, le Malosi e Toatasi o Iakopo.