1 ’E i muri a’era, ’ua ho’i mai ra vau, ’o Nephi, i muri iho i te paraparaura’a i te Fatu, i te ti’ahapa o tō’u ra metua tāne.

2 ’E i muri a’era, ’ua parau mai ra ’oia iā’u, nā ’ō mai ra : Inaha, ’ua moemoeāhia vau i te hō’ē moemoeā, ’e i roto i te reira ’ua fa’aue mai te Fatu iā’u, ’ia ho’i atu ’oe ’e tō ’oe mau tua’ana i Ierusalema.

3 Inaha ho’i, tei ia Labana ra te pāpa’a parau nō te mau ’āti Iuda ’e te tuatāpapara’a ato’a nō tō’u ra mau hui tupuna, ’e ’ua ’ō’otihia te reira i ni’a i te mau ’api veo.

4 Nō reira, ’ua fa’aue mai ra te Fatu iā’u, ’ia haere atu ’oe ’e tō ’oe mau tua’ana i te fare o Labana, ’ia tītau i te mau pāpa’a parau, ’e ’ia ’āfa’i mai i te reira i’ō nei i te mēdēbara.

5 ’E i teienei, inaha, tē amuamu nei tō ’oe nā tua’ana, i te nā-’ō-ra’a ē, e mea rave ’atā te mea tā’u i ani ia rāua ; inaha rā ’aore au i ani i te reira ia rāua, ’āre’a rā, e fa’auera’a te reira nā te Fatu.

6 Nō reira, ’a haere, e tā’u tamaiti, ’e e fa’ahereherehia ’oe e te Fatu, nō te mea ’aore ’oe i amuamu mai.

7 ’E i muri a’era, ’ua parau atu ra vau, ’o Nephi, i tō’u metua tāne : E haere au e rave i te mau mea tā te Fatu i fa’aue mai, ’ua ’ite ho’i au ē, ’aore roa te Fatu e hōro’a mai i te mau fa’auera’a i te mau tamari’i a te ta’ata nei, maori rā e fa’aineine ’oia i te hō’ē rāve’a nō rātou, ’ia ti’a ia rātou ’ia rave fa’aoti i te mea tāna i fa’aue mai ia rātou ra.

8 ’E i muri a’era, i te fa’aro’ora’a tō’u metua tāne i teie nei mau parau, ’ua ’oa’oa roa ihora ’oia, nō te mea ’ua ’ite ’oia ē, ’ua ha’amaita’ihia vau e te Fatu.

9 ’E ’ua haere atu ra vau, ’o Nephi, ’e tō’u mau tua’ana i roto i te mēdēbara, ’e tō mātou mau ti’ahapa, nō te haere atu i ni’a i te fenua ra nō Ierusalema.

10 ’E i muri a’era, i tō mātou taera’a atu i ni’a i te fenua ra nō Ierusalema, ’ua paraparau ihora vau ’e tō’u mau tua’ana te tahi i te tahi.

11 ’E ’ua tufa kelero ihora mātou—’ia ’itea ē ’o vai tō mātou e haere atu i roto i te fare o Labana. ’E i muri a’era, ’ua riro atu ra te kelero ia Lamana ; ’e ’ua haere atu ra Lamana i roto i te fare o Labana, ’e ’ua paraparau atu ’oia iāna ’a pārahi ai ’oia i roto i tōna ra fare.

12 ’E ’ua tītau atu ra ’oia ia Labana i te mau pāpa’a parau i ’ō’otihia i ni’a i te mau ’api veo ra, ’e tei roto ho’i i te reira te tuatāpapara’a tupuna o tō’u ra metua tāne.

13 ’E inaha, i muri a’era, ’ua riri roa a’era o Labana, ’e ’ua ti’avaru ’ē atu ra iāna mai mua atu i tōna ra aro ; e ’aore ’oia i hina’aro ’ia noa’a te mau pāpa’a parau iāna. Nō reira, ’ua parau atu ra ’oia iāna : Inaha, e ta’ata ’eiā ’oe, ’e e taparahi au ia ’oe.

14 ’Āre’a rā ’ua horo ’ē atu ra ’o Lamana mai mua atu i tōna aro, ’e ’ua fa’a’ite mai ra ia mātou i te mau mea tā Labana i rave. ’E ’ua ’oto roa ihora mātou i reira, ’e ’ua fātata roa tō’u mau tua’ana i te ho’i atu i tō’u metua tāne i te mēdēbara.

15 Inaha rā, ’ua parau atu ra vau ia rātou : Mai te Fatu e ora ra, e mai ia tātou ho’i e ora nei, ’eiaha roa tātou e haere atu i raro i tō tātou metua tāne i te mēdēbara, ē tae noa atu ’ua rave fa’aoti tātou i te mea tā te Fatu i fa’aue mai ia tātou ra.

16 Nō reira, ’ia itoito tātou i te ha’apa’ora’a i te mau fa’auera’a a te Fatu ; ’e teienei, ’ia haere tātou i raro i te fenua ’āi’a o tō tātou metua tāne, inaha ho’i, ’ua fa’aru’e ’oia i te ’auro ’e te ’ārio, ’e te mau huru tao’a ato’a i reira. ’E ’ua nā reira ’oia nō te mau fa’auera’a a te Fatu.

17 ’Ua ’ite ho’i ’oia ē, e ha’amouhia Ierusalema, nō te mau ’ohipa parauti’a ’ore a te mau ta’ata.

18 Inaha ho’i, ’ua pāto’i rātou i te mau parau a te mau peropheta. Nō reira, ’āhiri tō’u metua tāne i pārahi noa i te fenua i muri a’e i tōna ra fa’auera’ahia mai ’ia haere ’ē atu i rāpae i te fenua, inaha, ’ua pohe ato’a ïa ’oia. Nō reira, e mea ti’a roa iāna ’ia haere ’ē atu i rāpae i te fenua.

19 ’E inaha, tei roto i te Atua te pa’ari ’ia noa’a teie nei mau pāpa’a parau ia tātou nei, ’ia ti’a ia tātou ’ia fa’aherehere i te reo o tō tātou mau metua nā tā tātou mau tamari’i.

20 ’E ’ia ti’a ho’i ia tātou ’ia fa’aherehere nā rātou te mau parau i parauhia mai e te vaha o te mau peropheta mo’a ato’a ra, ’o tei hōro’ahia mai ia rātou e te Vārua ’e te mana o te Atua, mai te ha’amatara’a o te ao nei ē tae roa mai i teie nei ’anotau.

21 ’E i muri a’era, i nā reira ho’i au i te a’o atu i tō’u ra mau tua’ana, ’ia itoito rātou i te ha’apa’o i te mau fa’auera’a a te Atua.

22 ’E i muri a’era, ’ua haere atu ra mātou i raro i tō mātou fenua ’āi’a, ’e ’ua ha’apu’e mai ra mātou i tā mātou ’auro, ’e tā mātou ’ārio, ’e tā mātou mau tao’a faufa’a rahi.

23 ’E oti a’era teie mau mea i te ha’apu’ehia e mātou, ’ua haere fa’ahou atu ra mātou i te fare o Labana.

24 ’E i muri a’era, ’ua haere atu ra mātou i roto e fārerei ia Labana, ’e ’ua tītau atu ra mātou iāna ’ia hōro’a mai ia mātou i te mau pāpa’a parau i ’ō’otihia i ni’a i te mau ’api veo ra, ’e ’ia nā reira ’oia, e hōro’a ïa mātou i tā mātou ’auro, ’e tā mātou ’ārio, ’e tā mātou mau tao’a faufa’a rahi ato’a nāna.

25 ’E i muri a’era, i tō Labana ’itera’a mai i tā mātou mau tao’a, ’oia ho’i, i te rahi nō te reira, ’ua nounou ihora ’oia i te reira, ’e ’ua ti’avaru ihora ’oia ia mātou i rāpae, ’e ’ua tono mai ra i tōna mau tāvini nō te taparahi ia mātou, ’ia noa’a tā mātou mau tao’a iāna ra.

26 ’E i muri a’era, ’ua horo ’ē atu ra mātou mai mua atu i te mau tāvini o Labana, ’e ’ua ti’a roa ia mātou ’ia fa’aru’e atu i tā mātou mau tao’a, ’e ’ua riro atu ra te reira i roto i te rima o Labana.

27 ’E i muri a’era, ’ua horo ’ē atu ra mātou i roto i te mēdēbara, ’e ’aore atu ra mātou i ro’ohia mai e te mau tāvini o Labana, ’e ’ua tāpuni ihora mātou i roto i te hō’ē ana mato.

28 ’E i muri a’era, ’ua riri mai ra Lamana iā’u, ’e i tō’u ato’a ho’i metua tāne ; ’e ’ua riri ato’a mai ’o Lemuela, nō te mea ’ua ha’apa’o ’oia i te parau a Lamana. Nō reira ’ua parau mai Lamana rāua ’o Lemuela e rave rahi mau parau fa’a’ino i ni’a ia māua, i tō rāua nā teina, ’oia ïa ’ua tā’iri rāua ia māua i te rā’au.

29 ’E i muri a’era, ’a tā’iri mai ai rāua ia māua i te rā’au, inaha, ’ua tae mai ra te hō’ē melahi a te Fatu e ti’a mai ra i mua ia rāua, ’e ’ua parau mai ra ’oia ia rāua, nā ’ō mai ra : Nō te aha ’ōrua i tā’iri ai i tō ’ōrua teina i te rā’au ? ’Aita ānei ’ōrua i ’ite ē, nō tā ’ōrua mau ’ohipa ’ī’ino ’ua mā’iti te Fatu iāna ’ia riro ’ei fa’atere nō ’ōrua ? Inaha, ’a haere fa’ahou atu ’outou i Ierusalema, ’e e tu’u mai te Fatu ia Labana i roto i tō ’outou rima.

30 ’E i muri iho i tō te melahi paraparaura’a mai ia mātou, ’ua reva ’ē atu ra ’oia.

31 ’E i muri iho i tō te melahi reva-’ē-ra’a atu, ’ua ha’amata fa’ahou ihora Lamana rāua ’o Lemuela i te amuamu, i te nā-’ō-ra’a ē : Nāhea e ti’a ai i te Fatu ’ia tu’u mai ia Labana i roto i tō tātou rima ? Inaha, e ta’ata mana ’oia, ’e e ti’a iāna ’ia fa’aue e pae ’ahuru ta’ata, ’oia ïa, e ti’a ho’i iāna ’ia taparahi e pae ’ahuru ta’ata ; e aha ïa e ’ore ai e ti’a iāna ’ia nā reira ia tātou ?