1 Iwe non ewe fansoun ngang, Nifai, ua niwinto seni ai aporous ngeni ewe Samon, ngeni ewe imw mangaku an semei we.

2 Iwe non ewe fansoun a kapas ngeniei, a apasa: Nengeni ua tana ew tan, non minne ewe Samon a kapas annuk ngeniei pwe en me pwium kewe oupwe niwiniti Jerusalem.

3 Pun nengeni, Laban a annomu ewe uruon ekkewe chon Jew me pwan ew uruon ai kewe neuo, iwe ra makketiw won ekkewe seleichen brass.

4 Ina minne, ewe Samon a annuku ngeniei pwe en me pwium kewe oupwe feino ngeni ewe imwen Laban, me kutta ekkewe uruo, me uweiretiw ikei ngeni ewe fonu pon.

5 Iwe iei, nengeni pwium kewe ra ngunungun, ra apasa pwe ew mettoch mi weires minne ua ani echimw ngenir; nge nengeni use mwo echimwa ir, nge pwe a ew annuk an ewe Samon.

6 Iei minne feino, nei anuon, me en kopwe aninis seni ewe Samon, pokiten kose ngunungunu.

7 Iwe non ewe fansoun ngang, Nifai, ua apasa ngeni semei we: Ngang upwe feino me fori ekkewe mettoch minne ewe Samon a annuku, pwe ngang mi sinei pwe ewe Samon esap awora ekkewe annuk ngeni kewe noun aramas, tiwenon chok ika a amonnata ew an ngenir ar repwe apwonueta ewe mettoch minne i a annuku ngenir.

8 Iwe non ewe fansoun pwe nupwen semei we a rongorong ekkei kapas a fokkun pwapwa, pwe a sinei pwe ua fen feioch me ren ewe Samon.

9 Iwe ngang, Nifai, me pwi kewe aua sai non ewe fonu pon, fiti imwem kewe imw mangaku, aua feita ngeni ewe fonuen Jerusalem.

10 Iwe non ewe fansoun pwe nupwen aua fen feita ngeni ewe fonuen Jerusalem, ngang me pwi kewe aua apungupung fengen.

11 Iwe aua uttut—io neim epwe wisen feino non ewe imwen Laban. Iwe non ewe fansoun pwe ewe pungun a no ngeni Leiman; me Leiman a feino tonong non ewe imwen Laban me a kapas ngeni i nupwen an momot non imwan we.

12 Iwe a tingor seni Laban ekkewe uruo minne ra makketiw won ekkewe seleichen brass, minne ra masoweni ewe tettenin uruon neuon semei we.

13 Iwe nengeni, non ewe fansoun Laban a fokkun song, iwe a tinau seni mwen mesan; me i esap mut ngeni an epwe angei ekkewe uruo. Ina minne, a apasa ngeni: Nengeni en emon chon sona, me ngang upwe niukeno.

14 Nge Leiman a suno seni mwen mesan, iwe a aporousa ekkewe mettoch minne Laban a fen fori, ngenikem. Iwe am aua poputa ne fokkun netipengaw, iwe ita akkarap pwi kewe repwene niwin ngeni semem we non ewe fonu pon.

15 Nge nengeni ua apasa ngenir: Usun ewe Samon mi manau, me usun kich mi manau, sisap feitiw ngeni samach we non ewe fonu pon tori ach sipwe apwonueta ekkewe mettoch minne ewe Samon a annuku ngenikich.

16 Ina minne, sipwe nikitu ne aneasochisi ekkewe annuk an ewe Samon; iei minne sipwe chok feitiw ngeni ewe fonuen an samach kewe neuo, pwe nengeni a nikitano gold me silver, me sokopaten pisekisekin meinisin. Me ekkei meinisin a fis pokiten ekkewe annuk an ewe Samon.

17 Pun i a sinei pwe Jerusalem epwe tano, pokiten ewe fofforungaw an ekkewe aramas.

18 Pun nengeni, rese etiwa ekkewe kapas an ekkewe soufos. Ina minne, ika semei we epwe nonnom non ewe fonu mwirin a fen annuk pwe epwe su seni ewe fonu, nengeni, i epwe pwan mano. Ina minne, mi auchea an epwe su seni ewe fonu.

19 Iwe nengeni, iei miritin Kot pwe am aupwe angei ekkei uruo, pwe am aupwe isonir ngeni mwirimwirim ewe kapasen ach kewe neuo;

20 Iwe am aupwe pwan isoni ngenir ekkewe kapas minne ra fen pin kapas seni awan meinisin ekkewe soufos mi pin, minne a fen kawor ngenir seni ewe Ngun me manamanen Kot, seni nepoputan fonufan, pwan feito ngeni ei fansoun.

21 Iwe non ewe fansoun mwirin ei napanapen kapas ua pesei pwi kewe, pwe repwe tongeni nikitu ne aneasochisi ekkewe annukun Kot.

22 Iwe non ewe fansoun am aua feitiw ngeni ewe fonuen am kewe neuo, me am aua ion fengeni nöum kewe gold, me silver, me pisekim mi auchea.

23 Iwe mwirin am aua ioifengeni ekkei mettoch, am aua feita sefan ngeni ewe imwen Laban.

24 Iwe non ewe fansoun am aua tonong ren Laban, iwe am aua tingor ngeni i pwe i epwe ngenikem ekkewe uruo minne ra makketiw won ekkewe seleichen brass, nge am aupwe ekkesiwinin ngeni nöum kewe gold, me nöum silver, me meinisin pisekim mi auchea.

25 Iwe non ewe fansoun nupwen Laban a kuna pisekim kewe, iwe a kuna pwe ra fokkun chommong, a mocheniatir, ina popun a aturukemeu, me a tiini noun kewe chon angang repwe nikemino, pwe epwe tongeni angei pisekim kewe.

26 Iwe non ewe fansoun am aua su me mwen ekkewe chon angangen Laban, me am aua echimw am aupwe nikitatiw pisekim kewe, me ra no ngeni ne poun Laban.

27 Iwe non ewe fansoun am aua suno ngeni ewe fonu pon, me ekkewe chon angang noun Laban rese chiwen tori kem, me am aua opakemino non pwangen ew achaw.

28 Iwe non ewe fansoun pwe Leiman a song rei, pwan ren semei we; Lemuel a pwan song, pun a ausening ngeni ekkewe kapas an Leiman. Ina minne Leiman me Lemuel ra apasa chommong kapas pochokun ngenikem, pwir kukkun, me ra wichi kem ren efoch ira.

29 Iwe non ewe fansoun nupwen ra wichi kem ngeni efoch ira, nengeni, emon chon nangin ewe Samon a feito me uta mwen meser, me a kapas ngenir, a apasa: Pwata oua wichi pwimi kukkun ren efoch ira? Ouse mo sinei pwe ewe Samon a finata i pwe epwe wisen chon nemeni kemi, me ei pokiten ami fofforungaw? Nengeni ami oupwe feita sefan ngeni Jerusalem, me ewe Samon epwe fangonong Laban non poumi.

30 Iwe mwirin an ewe chon nang kakapas ngenikem, a feino.

31 Iwe mwirin an ewe chon nang a feino, Leiman me Lemuel ra pwan popueta ne ngunungun, ra apasa: Pwata epwe tufich an ewe Samon epwe fangonong Laban non pouch? Nengeni, i emon mwan pochokun, me a tongeni emmweni nime aramas, ewer, a pwan tongeni nieno nime aramas; iwe pwata esap tongeni nikicheno?