1 ’E i muri a’era, ’ua parau atu ra vau i tō’u mau tua’ana, nā ’ō atu ra : Mai e haere fa’ahou tātou i ni’a, i Ierusalema ra, ’e ’ia itoito ho’i tātou i te ha’apa’ora’a i te mau fa’auera’a a te Fatu ; inaha ho’i, ’ua hau atu tōna pūai i tō te ao ato’a nei, ’e nō te aha ho’i tōna pūai i ’ore ai i hau atu i tō Labana ’e i tō tōna mau ta’ata e pae ’ahuru, ’oia ïa, ’e i tō tōna mau ’ahurura’a ho’i i te tauatini ?

2 Nō reira e haere tātou i ni’a ; ’e ’ia itoito tātou mai ia Mose ra ; ’oia mau, nāna ho’i i parau atu i te mau pape nō te miti ’Ute’ute, ’e ’ua ta’a ’ē atu ra rātou i terā pae ’e i terā pae, ’e ’ua haere mai ra tō tātou mau metua nā roto mai, mai te tītīra’a mai, nā ni’a i te repo marō ra, ’e ’ua pe’e mai ra te mau nu’u fa’ehau o Phara’o ia rātou ’e ’ua paremo ihora rātou i roto i te mau pape nō te miti ’Ute’ute ra.

3 I teienei inaha, ’ua ’ite ’ōrua ē, e parau mau ana’e te reira ; ’e ’ua ’ite ato’a ho’i ’ōrua ē, ’ua paraparau mai te hō’ē melahi ia ’ōrua na ; nō reira e ti’a ānei ia ’ōrua ’ia fē’a’a ? Mai e haere tātou i ni’a ; e ti’a ho’i i te Fatu ’ia fa’aora ia tātou, mai tāna i fa’aora i tō tātou mau metua, ’e ’ia ha’amou ho’i ia Labana, mai tāna i ha’amou i tō ’Aiphiti ra.

4 I teienei, i muri iho i tō’u paraura’a atu i teie mau parau, tē riri noa ra ā rāua, ’e ’ua amuamu noa mai ā ; ’ua pe’e mai rā rāua iā’u ē tae noa atu i rāpae’au i te ’āua i Ierusalema ra.

5 E ru’i ihora ; ’e ’ua fa’aue atu ra vau ’ia fa’atāpuni rātou ia rātou iho i rāpae’au i te ’āua. E i muri iho i tō rātou fa’atāpunira’a ia rātou iho, ’ua haere huna atu ra vau, ’o Nephi, i roto i te ’oire, e haere ti’a atu ra i te fare o Labana ra.

6 ’E ’ua arata’ihia vau e te Vārua, ’e ’aore au i ’ite nā mua roa i te mau mea tā’u e ti’a ’ia rave.

7 ’Āre’a rā ’ua haere atu vau, ’e ’ia fātata atu vau i te fare o Labana, ’ua ’ite ihora vau i te hō’ē ta’ata, ’e i ma’iri ’oia i raro i te repo i mua iho iā’u ra, nō te mea ’ua ta’ero ’oia i te uaina.

8 ’E ’ia tae atu vau iāna ra, ’ua ’ite ihora vau ē, ’o Labana ïa.

9 ’E ’ua hi’o ihora vau i tāna ’o’e, ’e ’ua unuhi a’era vau i te reira mai tōna vaira’a ; e ’auro mau te tāpe’ara’a o taua ’o’e ra, ’e e mea maita’i roa ho’i te hāmanira’a, ’e ’ua ’ite ihora ho’i au i te tipi o taua ’o’e ra, e mea hāmanihia ïa i te ’āuri tao’a rahi.

10 ’E i muri a’era, ’ua fa’ahepo mai ra te Vārua iā’u ’ia taparahi ia Labana ; ’ua parau ihora rā vau i roto i tō’u ’ā’au ē : ’aore roa ā vau i ha’amani’i i te toto o te ta’ata. ’E ’ua ’ōtohe ihora vau ’e ’aore ho’i au i hina’aro i te taparahi iāna.

11 ’E ’ua parau fa’ahou mai ra te Vārua iā’u : Inaha, ’ua tu’u mai te Fatu iāna i roto i tō ’oe nā rima. ’Oia ïa, ’ua ’ite ato’a ho’i au ē, ’e ’ua tītau ’oia ’ia rave ’ē atu i tō’u nei ora ; ’oia ïa, ’e ’aore ’oia i hina’aro ’ia fa’aro’o i te mau fa’auera’a a te Fatu ; ’e ’ua haru ato’a ho’i ’oia i tā mātou tao’a.

12 ’E i muri a’era, ’ua parau fa’ahou mai ra te Vārua iā’u : ’A taparahi iāna, ’ua tu’u mai ho’i te Fatu iāna i roto i tō ’oe nā rima ;

13 Inaha, e ha’apohe te Fatu i te feiā parauti’a ’ore nō te fa’atupu i tāna ra mau ’ōpuara’a parauti’a. E mea maita’i a’e ’ia pohe te hō’ē ta’ata, ’eiaha rā te hō’ē nūna’a ’ia haere paruparu ’e ’ia pohe i roto i te ti’aturi ’ore.

14 ’E i teienei, ’ia fa’aro’o a’era vau, ’o Nephi, i taua mau parau ra, ’ua ha’amana’o ihora vau i te mau parau tā te Fatu i parau mai iā’u i roto i te mēdēbara, i te nā-’ō-ra’a mai ē : Mai te mea e ha’apa’o tō ’oe ra hua’ai i tā’u mau fa’auera’a, e manuia rātou i ni’a i te fenua i fafauhia ra.

15 ’Oia ïa, ’e ’ua mana’o ato’a ihora ho’i au ē, e’ita e ti’a ia rātou ’ia ha’apa’o i te mau fa’auera’a a te Fatu mai te au i te ture a Mose ra, maori rā ’ua roa’a ia rātou te ture.

16 ’E ’ua ’ite ato’a ho’i au ē, ’ua ’ō’otihia te ture i ni’a i te mau ’api veo.

17 ’E ’oia ato’a, ’ua ’ite au ē ’o teie te tumu te Fatu i tu’u mai ai ia Labana i roto i tō’u rima—’ia roa’a mai iā’u te mau pāpa’a parau mai te au i tāna ra mau fa’auera’a.

18 Nō reira, ’ua ha’apa’o vau i te reo o te Vārua, ’e ’ua rave ihora vau ia Labana nā te rouru o te upo’o ra, ’e ’ua tāpū ’ē atu ra vau i tōna upo’o i tāna ihora ’o’e.

19 ’E oti a’era tōna upo’o i te tāpū-’ē-hia atu e au i tāna ihora ’o’e, ’ua rave ihora vau i te mau ’ahu o Labana ’e ’ua tu’u ihora i te reira i ni’a i tō’u iho tino ; ’oia ïa i te tā’āto’ara’a o te ’ahu ; ’e ’ua tātua ihora ho’i au i tōna ’ahu tama’i i tō’u tau’upu.

20 ’E oti a’era te reira i te ravehia e au, ’ua haere atu ra vau i te fare vaira’a tao’a a Labana. ’E i tō’u haerera’a atu i te fare vaira’a tao’a a Labana ra, inaha, ’ua ’ite atu ra vau i te tāvini o Labana e tei iāna ra te mau tāviri nō te fare vaira’a tao’a. ’E ’ua fa’aue atu ra vau iāna ma te reo o Labana, ’ia haere māua i roto i te fare vaira’a tao’a.

21 ’E ’ua mana’o ihora ’oia ē, ’o vau tōna fatu ra, ’o Labana, nō te mea ’ua ’ite mai ’oia i te mau ’ahu ’e te ’o’e ho’i tei tātuahia i tō’u ra tau’upu.

22 ’E ’ua parau mai ra ’oia iā’u nō ni’a i te feiā pa’ari o te ’āti Iuda, nō te mea ’ua ’ite ’oia ē, i haere nā tōna fatu ra, ’o Labana, i rotopū ia rātou i te ru’i.

23 ’E ’ua parau atu ra vau iāna mai te mea ra ē ’o Labana iho.

24 ’E ’ua parau ato’a atu ra ho’i au iāna, e hōpoi atu vau i te mau parau i ’ō’otihia i ni’a i te mau ’api veo i tō’u mau tua’ana i rāpae’au mai i te ’āua.

25 ’E ’ua fa’aue ato’a atu ho’i au iāna ’ia pe’e mai iā’u.

26 ’E nō te mea ’ua mana’o ’oia ē tē parau ra vau nō ni’a i te mau taea’e o te ’ēkālesia, ’e ’o vau iho ā ’o Labana ’o tā’u i taparahi ra, nō reira ’ua pe’e mai ’oia iā’u.

27 ’E ’ua parau pinepine mai ’oia iā’u nō ni’a i te feiā pa’ari o te ’āti Iuda ra, ’a haere atu ai au i tō’u ra mau tua’ana i rāpae’au mai i te ’āua ra.

28 ’E i muri a’era, i tō Lamana ’itera’a mai iā’u, ’ua mata’u roa ihora ’oia, ’e ’o Lemuela, ’e ’o Samu ato’a ho’i. ’E ’ua horo ’ē atu ra rātou mai mua atu iā’u ra ; i mana’o ho’i rātou ē, ’o Labana ïa, ’e ’ua taparahi ’oia iā’u, ’e tē tītau ato’a ra ’oia ’ia rave ’ē atu i tō rātou ato’a ra ora.

29 ’E i muri a’era, ’ua pi’i atu ra vau ia rātou, ’e ’ua fa’aro’o mai ra rātou iā’u ; nō reira ’ua fa’aea rātou i te horo ’ē atu mai mua atu i tō’u aro.

30 ’E i muri a’era, ’ia ’ite atu te tāvini o Labana i tō’u ra mau tua’ana, ’ua ha’amata ihora ’oia i te rurutaina, ’e ’ua fātata ho’i ’oia i te horo ’ē atu mai mua atu iā’u, ’e ’ia ho’i atu i te ’oire ra nō Ierusalema.

31 ’E i teienei, e ta’ata tino rahi ho’i au, ’o Nephi, ’e ’ua roa’a ato’a ho’i iā’u te pūai rahi o te Fatu, nō reira ’ua haru vau i te tāvini o Labana, ’e ’ua tāpe’a ihora iāna, ’ia ’ore ’oia ’ia horo ’ē atu.

32 ’E i muri a’era, ’ua parau atu ra vau iāna, mai te mea e ha’apa’o maita’i ’oia i tā’u mau parau, mai te Fatu e ora nei, ’e mai iā’u ho’i e ora nei, e fa’aora ïa mātou iāna mai te mea e ha’apa’o ’oia i tā mātou mau parau.

33 ’E ’ua parau atu ra vau iāna ma te tapu ē, ’eiaha ’oia e mata’u ; ’e e riro ho’i ’oia ’ei ta’ata ti’amā mai ia mātou ato’a te huru, mai te mea e haere atu ’oia i raro i te mēdēbara nā muri ia mātou.

34 ’E ’ua parau ato’a atu ra vau iāna, nā ’ō atu ra : ’Oia mau, ’ua fa’aue mai te Atua ia mātou ’ia rave i teie nei ’ohipa ; ’e e’ita ānei i te mea ti’a ia tātou ’ia fa’aitoito i te ha’apa’ora’a i te mau fa’auera’a a te Fatu ? Nō reira, mai te mea e haere ato’a mai ’oe i raro, i te mēdēbara i tō’u ra metua tāne, e vāhi ïa tō ’oe i pīha’i iho ia mātou ra.

35 ’E i muri a’era, ’ua itoito mai Zorama nō te fāri’i i te mau parau tā’u i parau. ’O Zorama ho’i te i’oa o taua tāvini ra ; ’e ’ua fafau mai ’oia ē e haere ato’a mai ’oia i raro i te mēdēbara i tō mātou ra metua tāne. ’Oia ïa, ’e ’ua parau mai ra ’oia ma te tapu ia mātou ē, e pārahi ’oia i pīha’i iho ia mātou mai te reira atu taime.

36 I teienei, ’ua hina’aro mātou ’ia pārahi mai ’oia i pīha’i iho ia mātou nō teie tumu, ’ia ’ore te ’āti Iuda ’ia ’ite i tō mātou haerera’a i te mēdēbara ra, ’o te a’ua’u mai rātou ia mātou nō te ha’amou roa ia mātou.

37 ’E i muri a’era, ’ia oti a’era tō Zorama tapura’a ia mātou ra, ’ua ’ore ihora tō mātou horuhoru iāna.

38 ’E i muri a’era, ’ua rave ihora mātou i te mau ’api veo ’e te tāvini o Labana, e haere atu ra i te mēdēbara, ’e tae atu ra i te ti’ahapa o tō mātou ra metua tāne.