Ñembyaty 9
Nefi ombosakoʼi mokõi kuatiajehaipyre—Mokõivévape oñembohéra Nefi planchakuéra—Umi pláncha tuichavéva oguereko peteĩ tembiasakue imarangatuʼỹva rehegua; umi michĩvéva katu mbaʼe imarangatúvagui meme. 600–592 ary rupi Cristo mboyve.
1 Ha opaitéva koʼã mbaʼe che ru ohecha, ha ohendu, ha heʼi, oikove aja peteĩ ogaaópe, pe yvytypaʼũ Lemuel-pe, ha avei hetaitereive mbaʼe, ndaikatúiva ojehai koʼã pláncha ári.
2 Ha koʼág̃a, añeʼẽmarõ hína peẽme koʼã pláncha rehe, péina ápe ndahaʼéi umi pláncha ahai haguépe ñemombeʼu opaite che tavayguakuéra rembiasakue rehegua; ha umi amombeʼupaite haguépe che tavayguakuéra rehegua niko ambohéra Nefi; ha upéicha, héra Nefi planchakuéra, che réraicha; ha koʼãva koʼã pláncha héra avei Nefi planchakuéra.
3 Ha katu, oñemeʼẽ chéve peteĩ Ñandejára rembiapoukapy ajapo hag̃ua koʼã pláncha, ikatu hag̃uáicha ojehai pe ñemombeʼu che tavayguakuéra ministério rehegua.
4 Umi ambue pláncha ári ojehaivaʼerã ñemombeʼu rreikuéra rreinádo rehegua, ha umi ñorairõguasu ha joavy che tavayguakuéra rehegua; upévare hetave hendápe koʼã pláncha haʼe pe ministério rehegua, ha umi ambuéva haʼe rreikuéra rreinadorãnte ha umi ñorairõguasu ha joavy che tavayguakuéra rehegua.
5 Upévare, Ñandejára ojerure chéve ajapo hag̃ua koʼã pláncha peteĩ imbaʼe iñarandúvape g̃uarã, che ndaikuaáiva.
6 Ha katu Ñandejára oikuaapa opa mbaʼe iñepyrũmby guive; upévare, haʼe ombosakoʼi pe tape ojapo hag̃ua opaite hembiapo yvyporakuéra raʼy apytépe; ha péina ápe, haʼe oguereko opa puʼaka oñekumpli hag̃ua opaite iñeʼẽ. Ha upéicha. Amén.