1 Iwe meinisin ekkei mettoch semei we a kuna, me rongorong, me apasa, nupwen a nonnom non ew imw mangaku, non ewe nemonun chukun Lemuel, me pwan fokkun chommong mettoch, minne rese tongeni makketiw won ekkei seleich.

2 Iwe iei, nupwen ua fen kapas usun ekkei seleich, nengeni esap ir ekkewe seleich minne ua makkei wor ew unusen uruon porousen nei kewe aramas; pun ekkewe seleich minne ua makkei wor ew unusen uruon nei kewe aramas ua fen eita ngeni ewe it Nifai; ina minne, ra iteni ekkewe seleichen Nifai, mwirin pwisin itei we; iwe ekkei seleich ra pwan iteni ekkewe seleichen Nifai.

3 Nge inamo, ua fen angei ew annuk an ewe Samon pwe upwe fori ekkei seleich, ren ewe auchean popun pwe epwe wor ew uruo epwe mak usun ewe angangen afanafan an nei kewe aramas.

4 Won ekkewe ekkoch seleich epwe mak ew uruon muun ekkewe king, me ekkewe maun me ekkewe anini fengen an nei kewe aramas; ina minne ekkei seleich ra masoweni napengeni porousen ewe angangen afanafan; me ekkewe ekkoch seleich ra masoweni napengeni porousen ewe muun ekkewe king me ekkewe maun me anini fengenin nei aramas.

5 Ina minne, ewe Samon a annuk ngeniei pwe upwe fori ekkei seleich ren ew popun mi auchea non i, minne ewe popun ngang use sinei.

6 Nge ewe Samon a sinei mettoch meinisin seni nepoputan; ina minne, i a amonnata ew aanen ponueta meinisin an angang nein ekkewe noun aramas; pun nengeni, a wor an pochokun meinisin ngeni apwonuetan an kewe kapas meinisin. Iwe a iei usun. Amen.