Isahluko 9
UNefi wenza amaqoqo amabili emibhalo—Ngalinye libizwa ngokuthi yizingcwephe zikaNefi—Izingcwephe ezinkulu ziqukethe umlando wezwe; ezincane zona ziphathelene ikakhulukazi nezinto ezingcwele. Cishe ngonyaka wama 600 kuya kowama 592 ngaphambi kokuzalwa kukaKristu.
1 Futhi zonke lezi zinto ubaba wazibona, futhi wazizwa, futhi wazikhuluma, ngesikhathi ehlezi etendeni, esigodini sikaLemuweli, futhi ngokunjalo nezinye izinto eziningi kakhulu, ezingenakubhalwa kulezi zingcwephe.
2 Manje, njengoba sengikhulumile maqondana nalezi zingcwephe, bheka akusizona izingcwephe engibhale kuzona indaba egcwele ngomlando wabantu bami; ngokuba izingcwephe engibhale kuzo ngendaba egcwele yabantu bami zona ngizinike igama likaNefi; ngalokho-ke, zibizwa ngokuthi yizingcwephe zikaNefi, ngegama lami; futhi lezi zingcwephe nazo zibizwa ngokuthi yizingcwephe zikaNefi.
3 Nokho, ngithole umyalelo eNkosini wokuthi kufanele ngizenze lezi zingcwephe, ngizenzele isizathu esibalulekile ukuze kube khona indaba eqoshiwe ngobufundisi babantu bami.
4 Kwezinye izingcwephe kufanele kuqoshwe indaba ngokubusa kwamakhosi, kanye nezimpi nemibango yabantu bami; ngalokho-ke lezi zingcwephe ziphathelene nenxenye enkulu yobufundisi; futhi ezinye izingcwephe ziphathelene nenxenye enkulu yokubusa kwamakhosi kanye nezimpi kanye nemibango yabantu bami.
5 Ngalokho-ke, iNkosi ingiyalile ukuthi ngenze lezi zingcwephe ngokwe nhloso yayo enokuhlakanipha, inhloso leyo engingayazi.
6 Kepha iNkosi yazi izinto zonke kusukela ekuqaleni; ngalokho-ke, ilungisa indlela ukuze kufezeke yonke imisebenzi yayo phakathi kwabantwana babantu; ngokuba bheka, inawo wonke amandla ngokwanele ukuba igcwalise wonke amazwi ayo. Futhi kunjalo-nje. Amen.