1 Aua faauta, o le Alii, o le Alii o ’Au, na te aveese mai ia Ierusalema, ma mai ia Iuta, le puna ma le tausia, le tausia atoa o le areto, ma le puna atoa o le vai i le ola—

2 O le tagata malosi, ma le tagata o taua, o le faamasino, ma le perofeta, ma le tagata faautauta, ma lē ua faafualoa lona soifua;

3 O le kapeteni o le limagafulu, ma le tagata mamalu, ma le faipule, ma le tufuga tomai, ma le failauga poto.

4 Ma o le a Ou tuu atu tamaiti ia te i latou e fai ma o latou aloalii, ma o le a pule tamameamea i a i latou.

5 Ma o le a sauaina le nuu, o tagata taitoatasi e le isi, ma tagata taitoatasi e lona tuaoi; o le a amio faamaualuga le tamaitiiti e faasaga i le tagata matua, ma le amio mataga i lē ua faamamaluina.

6 Pe a tago atu se tagata i lona uso i le aiga o lona tamā, ma fai atu: Ua ia te oe ofu, ia fai oe ma o matou pule, ma aua le tuua lenei malaia ia oo ifo i lou lima—

7 I lena aso o le a tauto ai o ia, fai mai: O le a lē avea a’u ma se fofō; ona ua lē o i ai i lo’u fale se areto po o ni lavalava; aua le faia a’u ma se pule o le nuu.

8 Ona ua faatafunaina Ierusalema, ma ua pa’ū Iuta, ona o o latou laulaufaiva ma a latou mea na fai na tetee faasaga i le Alii, e faaonoono i fofoga o lona mamalu.

9 O le pupula o o latou mata ua molimau faasaga ia te i latou, ma ta’u mai ai o la latou agasala ua pei lava o Sotoma, ma ua lē mafai ona latou natiaina. Oi talofa i o latou agaga, ona ua latou tauia i latou lava i le leaga!

10 Fai atu i e amiotonu ua lelei lea ia te i latou; ona o le a latou a’ai le fua o a latou galuega.

11 Oi talofa i e amioleaga, ona o le a fano i latou; ona o le taui a o latou lima o le a i o latou luga!

12 Ma o lo’u nu’u, o tamaiti o o latou tagata sauā ia, ma ua pule fafine i a i latou. E, lo’u nuu e, o i latou o e ua taitaia oe ua latou faaseseina oe ma faaumatia le ala o ou auala.

13 Ua tulai le Alii e aioi, ma tulai e faamasino le nuu.

14 O le a ulu mai le Alii i le faamasinoga faatasi ma toeaina o lona nuu ma ona aloalii; ona ua outou ’aia uma le tovine ma le vete a lē ua mativa i o outou fale.

15 O le a lo outou faamoemoe? Ua outou faatigaina o’u tagata, ma olo mata o e matitiva, ua fetalai mai ai le Alii le Atua o Au.

16 E lē gata i lea, ua fetalai mai le Alii: Ona ua faasausili afafine o Siona, ma ua savavali ma ua falō ma mata faasiasia, ma savavali ma faatenetene a o latou o, ma faatagitagi o latou vae—

17 O le mea lea o le a taia ai e le Alii e faamamāina le tumua’i o le ulu o afafine o Siona, ma o le a faaalia e le Alii o latou itutino lilo.

18 I lena aso o le a aveese ai e le Alii le faaalialia o o latou tauvae tagitagi, ma taoulu faamatā’upega, ma asoa lapotopoto e pei o le masina;

19 O filifili, ma taulima, ma ufimata;

20 O pulou, ma tauvae, ma fusi-ulu, ma mea faamanogi, ma tautaliga;

21 O mama, atoa ma mama isu maa taua;

22 O suti o lavalava fesuia’i, ma ofu tetele, o ufiulu, ma pine vi’o lauulu;

23 O faata, ma ofu lino lelei, ma pulou, atoa ma veli.

24 Ma o le a oo mai foi, nai lo le manogi lelei o le a i ai le manogi leaga; ma nai lo le fusi puimanava, o le a i ai le masae; ma nai lo le lauulu ua teu lelei, o le ulutula; ma nai lo le fusi teuteu o le fatafata, o le fusi o le ofu talatala; o le mu nai lo le lalelei.

25 O le a feoti ou tama tane i le pelu ma ou tagata malolosi i le taua.

26 Ma o le a lauē ma faanoanoa ona faitotoa; ma o le a tuufua o ia, ma o le a nofo i luga o le eleele.