1 Ma ona Ou pese atu ai lea i la’u pele-sili se pese a la’u pele, e uiga i lona tovine. Ua i ai i la’u pele-sili se tovine i se maupu’epu’e uluola tele.

2 Ma sa ia papuipuia, ma ao ese maa na i ai, ma totō ai i vine ua sili ona lelei, ma fausia se olo i lona totonugalemu, ma faia ai foi se soligavine i totonu; ma sa vaavaai e ia ina ia fua mai ai ni vine, ma ua fua mai ai vine vao.

3 Ma o lenei, o outou o e ua nonofo i Ierusalema, ma tama tane o Iuta, faamasino maia, Ou te aioi atu ia te outou, i le va o a’u ma lo’u tovine.

4 Se a ea se isi mea sili atu sa tatau ona Ou faia i lo’u tovine Ou te lei faia i ai? O le mea lea, ina ua Ou manatu ina ia fua mai ai ni vine, ua fua mai ai vine vao.

5 Ma o lenei, o atu ia; o le a Ou ta’u atu ia te outou le mea o le a Ou faia i lo’u tovine—o le a Ou aveesea lona pa laau, ma o le a aina atoa; ma o le a Ou soloia i lalo lona puipui, ma o le a soli i lalo;

6 Ma o le a Ou faama’umauina o ia; o le a lē teuteuina pe eliina; ae o le a tutupu mai ai laau tuitui ma laau talatala; o le a Ou faatonu foi i ao ia lē to ifo ni ūaga i ona luga.

7 Ona o le tovine o le Alii o ’Au o le aiga lea o Isaraelu, ma o tama tane o Iuta o ana laau totō ua fiafia i ai; ma sa ia faamoemoe mo le faamasinotonu, ae faauta, o le sauā; mo le amiotonu, ae faauta, o le uiō.

8 Oi talofa ia te i latou o e e soo fale i le fale, seia oo ina lē i ai se nofoaga, e mafai ona tuu ai nao i latou i le lotolotoi o le lalolagi!

9 Na fetalai mai le Alii o ’Au, i o’u taliga, o le mea moni, e tele fale o le a tuufua, ma aai tetele ma matagofie o le a aunoa ma se e nofo ai.

10 Ioe, e sefulu eka o le tovine o le a maua mai ai le paita e tasi, ma o le fua o le somera o le a maua mai ai le efa.

11 Oi talofa ia te i latou o e e ala usu i le taeao, ina ia mafai ona latou saili i le ’ava malosi, o e e faia lava seia oo i le po, ma latou onanā ai i le uaina!

12 Ma o le napeli, ma le kitara, ma le topa, ma le fagufagu, ma le uaina e i ai ia latou ’aiga; a ua latou lē manatu i le galuega a le Alii, pe mafaufau i le galuega a ona aao.

13 O le mea lea, ua o atu ai lo’u nuu e faatagataotauaina, ona ua leai so latou malamalama; ma ua matelaina o latou alii mamalu, ma ua galala lo latou motu o tagata i le fia feinu.

14 O le mea lea, ua faalauteleina ai e seoli o ia lava, ma tatala lona gutu e le faatapulaaina; ma o lo latou mamalu, ma lo latou motu o tagata, ma lo latou matagofie, ma ia o lē ua olioli, o le a alu ifo i totonu ia te ia.

15 Ma o le a tuuina ifo i lalo le tagata lautele, ma o le a faalotomaualaloina le tagata malosi, ma o le a faamaualaloina mata o lē ua faamaualuga;

16 Ae o le Alii o ’Au o le a faaeaina i le faamasinotonu, ma o le Atua ua paia o le a faapaiaina i le amiotonu.

17 Ona aai ai lea o tamai mamoe e tusa ma la latou ala e masani ai, ma o nofoaga tuufua o e pepeti o le a ’aia e tagata ese.

18 Oi talofa ia te i latou o e ua tosoina le amioletonu i maea o le fiasili, ma le agasala e pei o se maea toso fata taavalevale;

19 I e e fai mai: Ia tuu atu ia te ia ia faia faataalise, ia faavavevave lana galuega, ina ia mafai ona matou vaai i ai; ma ia tuu le lapataiga a le Paia e Toatasi o Isaraelu ia latalata mai ma oo mai, ina ia mafai ona matou iloaina.

20 Oi talofa i e latou te ta’u le leaga o le lelei, ma le lelei o le leaga, i e e fai le pouliuli ma malamalama, ma le malamalama ma pouliuli; i e e fai le mea oona ma mea suamalie, ma mea suamalie ma mea oona!

21 Oi talofa i e ua popoto i o latou lava mata ma atamamai i la latou lava vaai!

22 Oi talofa i e ua malolosi e inu le uaina, ma tagata malolosi e palua le ’ava malosi;

23 O e e ta’uamiotonuina le amioleaga mo le taui, ma aveeseina le amiotonu a le amiotonu mai ia te ia!

24 O le mea lea, e pei ona faatama’ia e le afi tagutugutu o saito, ma mu aputi o saito i le apeafi mumū, o le a pala o latou a’a, ma o le a lelea o latou fuga e pei o le efuefu; ona ua latou lafoai ese le tulafono a le Alii o ’Au, ma ua inoino i le afioga a le Paia e Toatasi o Isaraelu.

25 O le mea lea, ua faamumū ai le toasa o le Alii i lona nuu, ma ua faaloaloa mai e ia lona aao e faasaga ia te i latou, ma ia taiaina i latou; ma sa gatete maupu’epu’e, ma saeia o latou tino oti i le taulotoaiga o alatele. E ui i nei mea uma, ua lē liliuesea lava lona toasa, ae ua faaloaloa mai pea lona aao.

26 Ma o le a sii a’e i luga e ia se tagavai i atunuu mai mea mamao, ma o le a oo atu o ia ia te i latou mai tuluiga o le lalolagi; ma faauta, o le a faataalise le vave ona latou o mai; e leai se tasi e vaivai pe tautevateva i totonu o i latou.

27 E leai se tasi e tautulemoe pe moe; pe tatalaina le fusi o o latou sulugatiti, pe motusia nonoa o o latou seevae;

28 O e o le a maamaai a latou ufanafana, ma lolo’u a latou aufana uma, ma o le a faatusaina atigivae o a latou solofanua e pei o ni maa malō, ma o latou uili e pei o le asiosio, ma lo latou taalili e pei o se leona.

29 O le a latou tagi taalili e pei o leona taanoa; ioe, o le a latou tagi taalili, ma taofi i manu ua latou pueina, ma ave ma le filemu, ma e leai se e laveaiina.

30 Ma i lena aso o le a latou taalili atu ai faasaga ia te i latou e pei o le gogolo mai o le sami; ma a latou vaai atu i le laueleele, faauta, o le pogisa ma le faanoanoa, ma ua faapouliuligia le malamalama o lona lagi.