ບົດທີ 21
ຍາດວົງຂອງເຢຊີ (ພຣະຄຣິດ) ຈະຕັດສິນດ້ວຍຄວາມຊອບທຳ—ຄວາມຮູ້ຂອງພຣະເຈົ້າຈະປົກຄຸມແຜ່ນດິນໂລກພາຍໃນພັນປີ—ພຣະຜູ້ເປັນເຈົ້າຈະຍົກຫລັກສັນຍານຂຶ້ນ ແລະ ເຕົ້າໂຮມອິດສະຣາເອນ—ປຽບທຽບກັບເອຊາຢາ 11. ປະມານ 559–545 ປີ ກ່ອນ ຄ.ສ.
1 ແລະ ຈະມີ ກິ່ງໄມ້ອອກມາຈາກ ຍາດວົງຂອງ ເຢຊີ, ແລະ ຮຸ່ນໄມ້ຈະເກີດອອກມາຈາກຮາກຂອງເພິ່ນ.
2 ແລະ ພຣະວິນຍານຂອງພຣະຜູ້ເປັນເຈົ້າຈະສະຖິດຢູ່ເທິງເພິ່ນ, ວິນຍານແຫ່ງປັນຍາ ແລະ ຄວາມເຂົ້າໃຈ, ວິນຍານແຫ່ງການແນະນຳ ແລະ ພະລັງ, ວິນຍານແຫ່ງຄວາມຮູ້ ແລະ ແຫ່ງຄວາມຢຳເກງພຣະຜູ້ເປັນເຈົ້າ;
3 ແລະ ຈະເຮັດໃຫ້ເພິ່ນມີຄວາມເຂົ້າໃຈຢ່າງວ່ອງໄວໃນຄວາມຢ້ານກົວພຣະຜູ້ເປັນເຈົ້າ; ແລະ ເພິ່ນຈະບໍ່ ຕັດສິນຕາມສາຍຕາຂອງເພິ່ນ, ທັງຈະບໍ່ຕຳນິຕາມທີ່ຫູຂອງເພິ່ນ ໄດ້ຍິນ.
4 ແຕ່ເພິ່ນຈະຕັດສິນຄົນທຸກຍາກດ້ວຍ ຄວາມຊອບທຳ, ແລະ ຕຳນິດ້ວຍຄວາມທ່ຽງທຳ ເພື່ອ ຄົນໃຈອ່ອນໂຍນຂອງແຜ່ນດິນໂລກ; ແລະ ປ້ອງກັນສິດທິຂອງຜູ້ທີ່ຕ່ຳຕ້ອຍ, ແຜ່ນດິນໂລກຈະຖືກຕີດ້ວຍຄຳສັ່ງຂອງເພິ່ນ, ແລະ ຄົນຊົ່ວກໍຈະຕາຍດ້ວຍຄຳຕັດສິນຂອງເພິ່ນ.
5 ແລະ ຄວາມຊອບທຳຈະເປັນຜ້າຄຽນແອວຂອງເພິ່ນ, ແລະ ຄວາມຊື່ສັດຈະເປັນຜ້າຄຽນ ບັ້ນແອວຂອງເພິ່ນ.
6 ໝາປ່າຈະຢູ່ກັບລູກແກະ, ເສືອດາວຈະນອນຢູ່ນຳລູກແບ້, ແລະ ລູກງົວກັບສິງໜຸ່ມ ແລະ ລູກສັດອ້ວນ ຈະຢູ່ດ້ວຍກັນ; ແລະ ເດັກນ້ອຍຄົນໜຶ່ງຈະນຳພວກມັນໄປ.
7 ແລະ ງົວແມ່ກັບໝີຈະກິນນຳກັນ; ລູກຂອງພວກມັນກໍຈະນອນຢູ່ນຳກັນ; ແລະ ສິງຈະກິນເຟືອງເຂົ້າຄືກັນກັບງົວເຖິກ.
8 ແລະ ເດັກນ້ອຍກິນນົມຈະຫລິ້ນໃນຮູຂອງ ງູພິດ, ແລະ ເດັກນ້ອຍທີ່ເຊົານົມ ຈະວາງມືຂອງເຂົາໃນກົງ ງູຮ້າຍ.
9 ພວກມັນຈະ ບໍ່ທຳຮ້າຍ ຫລື ທຳລາຍໄປທົ່ວພູເຂົາອັນສັກສິດຂອງເຮົາ ເພາະແຜ່ນດິນໂລກຈະເຕັມໄປ ດ້ວຍຄວາມຮູ້ກ່ຽວກັບພຣະຜູ້ເປັນເຈົ້າເໝືອນດັ່ງທະເລທີ່ເຕັມໄປດ້ວຍນ້ຳ.
10 ແລະ ໃນ ມື້ນັ້ນກະສັດອົງໃໝ່ຈາກ ຍາດວົງຂອງເຢຊີຈະເປັນສັນຍາລັກຂອງຊົນຊາດທັງຫລາຍ; ຄົນຕ່າງຊາດຈະສະແຫວງຫາ ມັນ; ແລະ ການພັກຜ່ອນຂອງເພິ່ນຈະມີລັດສະໝີພາບ.
11 ແລະ ເຫດການຈະບັງເກີດຂຶ້ນໃນມື້ນັ້ນຄື ພຣະເຈົ້າຈະວາງພຣະຫັດລົງອີກເປັນເທື່ອ ທີສອງ ເພື່ອນຳເອົາຜູ້ຄົນຂອງພຣະອົງທີ່ຍັງເຫລືອຢູ່ກັບມາຈາກອັດຊີເຣຍ, ແລະ ຈາກເອຢິບ, ແລະ ຈາກປັດໂຣ, ແລະ ຈາກກູເຊ, ແລະ ຈາກເອລາມ, ແລະ ຈາກຊີນາ, ແລະ ຈາກຮາມັດ, ແລະ ຈາກເກາະໃນທະເລ.
12 ແລະ ພຣະອົງຈະຕັ້ງ ຫລັກສັນຍານຂຶ້ນໃຫ້ແກ່ປະຊາຊາດ ແລະ ຈະຊຸມນຸມອິດສະຣາເອນທີ່ ຖືກຂັບໄລ່ອອກໄປ ແລະ ເຕົ້າໂຮມຄົນຂອງຢູດາທີ່ກະຈັດກະຈາຍໄປເພື່ອເຂົ້າມາຈາກສີ່ທິດຂອງແຜ່ນດິນໂລກ.
13 ແລະ ຄວາມອິດສາຂອງເອຟະຣາອີມຈະໝົດໄປ, ແລະ ຜູ້ປໍລະປັກຂອງຢູດາຈະຖືກຕັດອອກ; ເອຟະຣາອີມຈະບໍ່ອິດສາ ຢູດາ, ແລະ ຢູດາຈະບໍ່ລົບກວນເອຟະຣາອີມ.
14 ແຕ່ພວກເຂົາຈະ ບິນລົງທີ່ບ່າຂອງຟີລິດສະຕິນທາງຕາເວັນຕົກ; ພວກເຂົາຈະຮ່ວມກັນປຸ້ນທາງຕາເວັນອອກ; ພວກເຂົາຈະຍຶດເອົາເອໂດມ ແລະໂມອາບ; ແລະ ລູກຫລານຂອງອຳໂມນຈະເຊື່ອຟັງພວກເຂົາ.
15 ແລະ ພຣະຜູ້ເປັນເຈົ້າຈະ ທຳລາຍລີ້ນຂອງທະເລເອຢິບໃຫ້ໝົດສິ້ນ; ແລະ ດ້ວຍລົມອັນມີລິດເດດຂອງພຣະອົງ, ພຣະອົງຈະຍົກພຣະຫັດເທິງແມ່ນ້ຳ ແລະ ຈະຕີມັນໃຫ້ເປັນຮ່ອງນ້ຳເຈັດສາຍ ແລະ ໃຫ້ຄົນຂ້າມໄປໄດ້ໂດຍຕີນບໍ່ປຽກ.
16 ແລະ ຈະມີ ທາງຫລວງຈາກອັດຊີເຣຍສຳລັບຜູ້ຄົນຂອງພຣະອົງທີ່ຍັງເຫລືອຢູ່ດັ່ງທີ່ມີຢູ່ສຳລັບອິດສະຣາເອນໃນວັນທີ່ພວກເຂົາຂຶ້ນມາຈາກແຜ່ນດິນເອຢິບ.