1 Ma o lenei, faauta, o’u uso e, ua ou tautala atu ia te outou e tusa e pei ona uunaia ai a’u e le Agaga; o le mea lea, ua ou iloa ai o le a faamaoni lava ona oo mai o nei mea.

2 Ma o mea o le a tusia i fafo mai o le tusi o le a taua tele i le fanauga a tagata, ma aemaise lava i a tatou fanau, o se vaega lea o totoe o le aiga o Isaraelu.

3 Aua o le a oo mai i lena aso o ekalesia ua atia’e a ua lē i le Alii, pe a fai ane le tasi i le isi: Faauta mai ia, o a’u, o a’u ua a le Alii; ma o le a fai mai isi: o a’u, o a’u ua a le Alii; ma o le a faapea ona fai mai o tagata uma taitoatasi o e ua atia’e ekalesia, a ua lē atia’ea i le Alii—

4 Ma o le a latou fefinaua’i o le tasi ma le isi; ma o le a fefinauai a latou faitaulaga o le tasi ma le isi, ma o le a latou aoao atu e tusa ma lo latou poto, ma teena le Agaga Paia, o lē na te tuuina mai upu e tautala ai.

5 Ma ua latou teena le mana o le Atua, le Paia e Toatasi o Isaraelu; ma ua latou fai atu i tagata: Faalogo mai ia te i matou, ma ia outou faalogo mai ia matou mataupu; aua faauta, ua leai se Atua i aso nei, ona ua uma ona faia e le Alii ma le Togiola lana galuega, ma ua ia tuuina mai lona mana i tagata;

6 Faauta, ia outou faalogo mai i la’u mataupu; afai latou te fai mai ua i ai se vavega ua faia e le aao o le Alii, aua tou te talitonu i ai; aua o aso nei ua lē o ia o se Atua o vavega; ua uma ona faia e ia o lana galuega.

7 Ioe, ma e toatele i latou o le a fai mai: Aai, feinu, ma fiafia, aua o taeao tatou feoti, ma o le a tatou lelei.

8 Ma e toatele foi i latou o le a fai mai: Aai, feinu, ma fiafia; ae ui i lea, matata’u i le Atua—o le a ta’uamiotonuina e ia le faia o se agasala itiiti; ioe, pepelo laitiiti, faaaoga se tasi i ana upu, eli se lua mo lou tuaoi; ua leai se afaina i lena mea; ma ia fai nei mea uma, ona o taeao tatou feoti; ma afai foi ua tatou agasala, o le a sasa i tatou e le Atua i nai ta itiiti, ae o le a faaolaina lava i tatou i le malo o le Atua mulimuli.

9 Ioe, ma e toatele o le a i ai o le a latou aoao atu i lenei ala mataupu faavae sese ma lē aoga ma valea, ma o le a faafefeteina i o latou loto, ma o le a latou saili loloto e nanā mai le Alii a latou taupulepulega; ma o a latou galuega o le a faia i le pouliuli.

10 Ma o le a tagi a’e mai i le eleele le toto o le au paia e faasaga ia te i latou.

11 Ioe, ua latou o ese uma atu i fafo mai le ala; ua avea i latou ma tagata leaga.

12 Ona o le faamaualuga, ma ona o faiaoga sese, ma mataupu faavae sese, ua leaga ai a latou ekalesia, ma ua faasausili a latou ekalesia; ona o le faamaualuga ua faafefeteina ai i latou.

13 Ua latou gaoia mea a e matitiva ona o o latou fale tapuai matagofie; ua latou gaoia mea a e matitiva ona o o latou ofu mananaia; ma ua latou sauaina e agamalu ma e matitiva i le loto, ona o lo latou faamaualuluga ua latou faafefeteina ai.

14 Ua latou oofu i ua ua malō ma ulu ua maualuluga; ioe, ma ona o le faamaualuga, ma le amioleaga, ma mea inosia, ma le faitaaga, ua latou se ese uma ai vagana ai se toaitiiti, o e o soo lotomaualalalo o Keriso; ae ui i lea, ua taitaiina i latou, i le tele o taimi ua latou sese ona ua aoaoina i latou i mataupu a tagata.

15 E, le au popoto e, ma le ’au aoaoina, ma le ’au mauoa, o e ua faafefeteina i le faamaualuluga o o latou loto, ma i latou uma o e ua latou aoao atu aoaoga faavae sese, ma i latou uma o e ua faia le faitaaga, ma faapi’opi’o le ala sa’o o le Alii, oi talofa, oi talofa, oi talofa ia te i latou, ua fetalai mai ai le Alii le Atua Malosi Aoao, ona o le a lafoina i latou i lalo i seoli!

16 Oi talofa ia i latou o e ua latou tetee ese lē ua amiotonu e pei o se meanoa ma faifai e faasaga i mea lelei, ma fai mai ua leai se aoga! Aua e oo mai le aso o le a faataalise ona asiasi mai ai o le Alii le Atua i tagata o le lalolagi; ma i lena aso latou te matua atoatoa ai i le amioletonu o le a fano ai i latou.

17 Ae faauta, afai e salamo e o nonofo i le lalolagi ia latou amioleaga ma mea inosia o le a lē faaumatiaina i latou, ua fetalai mai ai le Alii o ’Au.

18 Ae faauta, o lena ekalesia tele ma le inosia, le fafine talitane lea o le lalolagi uma, o le a pa’ū i le eleele, ma o le a matuā tele lava lona pa’ū.

19 Aua o le a lūlūina lava le malo o le tiapolo, ma o i latou o e ua auai e tatau ona faaoso a’e ia salamo, pe o le a umia i latou e le tiapolo i ana filifili tumau e faavavau, ma faaoso i latou i le ita, ma fano ai;

20 Aua faauta, i lena aso o le a faateleina ai o ia i loto o le fanauga a tagata, ma faaoso i latou ia feita e faasaga i mea lelei.

21 Ma o isi o le a faaōleōle e ia, ma faamoemoe malie ese atu i latou i le saogalemu faaletino, o le a latou fai mai: Ua lelei mea uma i Siona; ioe, ua manuia Siona, ua lelei mea uma—ma e faapea ona olegia e le tiapolo o latou agaga, ma taitai lemu ese atu i latou i lalo i seoli.

22 Ma faauta, o isi foi e faasee ese e ia ma fai atu ia te i latou, e leai se seoli; ma e fai atu o ia ia te i latou: E lē o a’u o se tiapolo, ona e leai lea—ma e faapena ona musumusu o ia i o latou taliga, sei oo ina ia umia i latou i ana filifili leaga mata’utia, e leai se laveaiina mai ai.

23 Ioe, ua maua i latou i le oti, ma seoli; ma o le oti, ma seoli, ma le tiapolo, ma i latou uma ua maua ai, e ao ona laulaututū i luma o le nofoalii o le Atua, ma faamasinoina e tusa ma a latou galuega, seia o latou o atu i le nofoaga ua saunia mo i latou, o le lepa afi lea ma le teiō, o le mafatia lea e lē gata.

24 O le mea lea, oi talofa ia te ia e nofonofo filemu i Siona!

25 Oi talofa ia te ia o le e faapea ane: Ua lelei mea uma!

26 Ioe, oi talofa ia te ia o lē e faalogo i mataupu a tagata, ma teena le mana o le Atua, ma le meaalofa a le Agaga Paia!

27 Ioe, oi talofa ia te ia o lē e fai mai: Ua matou mauaina, ma e matou te lē manaomia ni isi mea.

28 Ma i se aotelega, oi talofa ia te i latou uma o e e gatete, ma ua feita ona o le upumoni a le Atua! Aua faauta, o ia o lē ua atia’e i luga o le papa, e talia e ia ma le fiafia le upumoni; a’o ia o lē ua atia’e i luga o se faavae oneone, e gatete ne’i pa’ū o ia.

29 Oi talofa ia te ia e fai mai: Ua matou mauaina le afioga a le Atua, ma e matou te lē mananaomia ni isi afioga a le Atua, ona ua lava ua matou maua!

30 Aua faauta, ua faapea ona fetalai mai o le Alii le Atua: Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o; ma e manuia lava i latou o e e faalogo i a’u mataupu, ma ua’i mai o latou taliga i la’u fautuaga, ona o le a latou aoaoina le poto; ona o ia o lē na te taliaina o le a Ou tuu atu atili i ai; ae o i latou o e e fai mai, Ua lava mea ua matou maua, o le a aveesea mai ia te i latou e oo lava i mea ua latou maua.

31 E fetuuina lava o ia o lē e faalagolago i le tagata, pe na te fai le tagata ma ona lima, pe faalogo i mataupu a tagata, vagana ai o a latou mataupu ua tuuina mai i le mana o le Agaga Paia.

32 Oi talofa i Nuuese, ua fetalai mai ai le Alii le Atua o Au! Ona e ui o le a Ou faaloaloa umi atu lo’u lima ia te i latou mai lea aso i lea aso, o le a latou faafitia a’u; ae ui i lea, o le a Ou alofa mutimutivale ia te i latou, ua fetalai mai ai le Alii le Atua, pe afai latou te salamo ma o mai ia te a’u; ona ua faaloaloa atu pea lo’u lima i le umi o le aso atoa, ua fetalai mai ai le Alii le Atua o Au.