1 ’E i teienei, inaha, e tō’u mau taea’e, ’ua parau atu vau ia ’outou mai tā te Vārua i tītau mai iā’u ; nō reira, ’ua ’ite au ē, e tupu mau te reira e ti’a ai.

2 ’E te mau mea e pāpa’ihia nō roto mai i taua buka ra, e riro ïa ’ei mea faufa’a rahi roa i te mau tamari’i a te ta’ata nei, i tō tātou iho ā rā hua’ai, ’oia ho’i i te toe’a nō te ’utuāfare o ’Īserā’ela.

3 I te mea ho’i ē a muri a’era, ’ia tae i taua mahana ra e riro te mau ’ēkālesia ’o tei ’ore i fa’ati’ahia i te Fatu ra, i te parau atu i te tahi ’e te tahi : Inaha, nō te Fatu au ; ’e e parau mai ho’i te tahi atu ē : Nō te Fatu au ; ’e e nā reira noa rātou ato’a i te parau, rātou ’o tei fa’ati’a i tā rātou iho mau ’ēkālesia, ’eiaha rā i tō te Fatu—

4 ’E e mārō rātou te tahi i te tahi ; ’e e mārō ho’i tō rātou mau tahu’a te tahi i te tahi, ’e e ha’api’i rātou ma tō rātou iho ’ite, ’e e huna ho’i i te Vārua Maita’i, ’o tē hōro’a mai i te mana ’ia parau.

5 ’E e huna rātou i te mana o te Atua, ’o Tei Mo’a i ’Īserā’ela ; ’e e parau atu rātou i te mau ta’ata ē : ’A fa’aro’o mai na ia mātou nei, ’e ’a fa’aro’o mai i tā mātou parau ; inaha, ’aore ho’i e Atua i teie nei mahana, nō te mea ’ua oti i te ravehia e te Fatu ra te Tāra’ehara tāna ra ’ohipa, ’e ’ua hōro’a ’oia i tōna mana i te ta’ata nei.

6 Inaha, ’a fa’aro’o mai na ’outou i tā’u parau ; mai te mea e parau rātou ē, ’ua ravehia te hō’ē semeio e te rima o te Fatu, ’eiaha roa e ti’aturi i te reira ; nō te mea i teie nei mahana, e ’ere ’oia i te Atua nō te mau semeio ; ’ua fa’aoti ’oia i tāna ’ohipa.

7 ’Oia ïa, e rave rahi mau ta’ata ’o tē parau ē : ’A ’amu, ’a inu, ’e ’ia ’oa’oa, ananahi ho’i e pohe ai tātou ; ’e e maita’i tō tātou i reira.

8 ’E e rave rahi ato’a ’o tē parau ē : ’A ’amu, ’a inu, ’e ’ia ’oa’oa ; ’āre’a rā, ’a mata’u i te Atua—e fa’ati’a ho’i ’oia ia ’oe ’ia rave i te hara iti ; ’oia ïa, ’a ha’avare ri’i, ’a fa’ahapa i te tahi nō tāna mau parau, ’a ’ō i te ’āpo’o nō tō ’oe ta’ata tupu ; ’aore e ’ino i roto i te reira ; ’a rave i teie mau mea ato’a, ananahi ho’i e pohe ai tātou ; ’e mai te mea e hara tā tātou, e fa’aiti noa mai te Atua i tāna mau tā’irira’a ia tātou, ’e i te hope’a e fa’aorahia tātou i roto i te bāsileia o te Atua.

9 ’Oia ïa, e nā reira ho’i e rave rahi ta’ata i te ha’api’i i te mau ha’api’ira’a ha’avare ’e te faufa’a ’ore, ’e te ma’ama’a ho’i ; ’e e fa’aahaaha rātou i roto i tō rātou ’ā’au, ’e e ’imi māite rātou ’ia huna i tā rātou mau ’ōpuara’a i te Fatu ; ’e tei roto ho’i tā rātou ra mau ’ohipa i te pōiri.

10 ’E e pi’i mai te toto o te feiā mo’a mai raro mai i te repo ia rātou.

11 ’Oia ïa, ’ua fa’aru’e pā’āto’a rātou i te ’ē’a ; ’ua vi’ivi’i rātou.

12 Nō te te’ote’o, ’e nō te mau ’orometua ha’avare, ’e te ha’api’ira’a ha’avare ho’i, i vi’ivi’i ai tā rātou mau ’ēkālesia, ’e i fa’ateitei ai rātou i tā rātou mau ’ēkālesia ; nō te te’ote’o ho’i i fa’aahaaha ai rātou ia rātou iho.

13 ’Ua haru rātou i tā te feiā veve nō tō rātou mau fare purera’a nehenehe ; ’ua haru ho’i rātou i tā te feiā veve nō tō rātou mau ’ahu nehenehe ; ’e ’ua hāmani ’ino rātou i te feiā marū e te feiā ha’eha’a i te ’ā’au, ’e nō tō rātou te’ote’o i fa’aahaaha ai rātou ia rātou ihora.

14 ’E ’ua ’eta’eta tō rātou ’a’ī ’e ’ua teitei tō rātou upo’o ; ’oia ïa, nō te te’ote’o, ’e te mau ’ohipa ’ī’ino, ’e te mau ’ohipa vi’ivi’i, ’e te mau ’ohipa tai’ata, i tāiva ai rātou ato’a, maori rā te tahi pae iti noa, te mau ta’ata ha’eha’a i pe’e i te Mesia ; ’āre’a rā ’ua arata’i-’ē-hia rātou, ’e i te rahira’a o te taime ’ua hape rātou, nō te mea ’ua ha’api’ihia rātou i te mau parau a te ta’ata nei.

15 E te feiā ’aravihi, e te feiā ’ite, e te feiā tao’a rahi, ’o tei fa’aahaaha ia rātou iho i te te’ote’o o tō rātou iho ’ā’au, ’e rātou ato’a ’o tē ha’api’i i te mau ha’api’ira’a ha’avare, ’e rātou ato’a tei rave i te mau ’ohipa tai’ata ’e tei ha’api’o i te ’ē’a ti’a o te Fatu, ’auē ho’i ē, ’auē ho’i ē, ’auē ho’i rātou ē, tē nā reira mai ra te Fatu te Atua Manahope, nō te mea e hurihia rātou i raro i hade.

16 ’Auē ho’i rātou ’o tei fa’afāriu ’ē i te mea ti’a nō te mea faufa’a ’ore ’e tei fa’a’ino i te mea maita’i, ’e tei nā ’ō mai ē, e mea faufa’a ’ore ïa ! Nō te mea e tae mai te mahana e fa’autu’a vave mai ai te Fatu te Atua i te mau ta’ata o te ao nei ; ’e i taua mahana ra ’a ’ī roa ai rātou i te mau ’ohipa ’ī’ino, e pohe ai rātou.

17 Inaha rā, mai te mea e tātarahapa te mau ta’ata o te ao nei i tā rātou mau ’ohipa ’ī’ino ’e tā rātou mau ’ohipa vi’ivi’i, e’ita ïa rātou e ha’amouhia, tē nā reira mai ra te Fatu Sabaota.

18 Inaha rā, e riro taua ’ēkālesia rahi ’e te vi’ivi’i, ’oia te vahine tai’ata o te ao ato’a nei, i te ma’iri i raro i te repo ; ’e e ma’irira’a rahi tō taua ’ēkālesia ra.

19 ’E ’ia ’āueue ho’i te bāsileia o te diabolo e ti’a ai, ’e ’ia fa’ati’arepuhia tō reira feiā i te tātarahapa e ti’a ai ; ’ia ’ore rā e mau rātou i te diabolo i tāna ra mau fifi mure ’ore, ’e e fa’ati’arepuhia rātou ’ia riri, e pohe ihora.

20 Inaha ho’i, i taua mahana ra e fa’atupu ’oia i te ’ārepurepu i roto i te ’ā’au o te mau tamari’i a te ta’ata nei, ’e e fa’ati’arepu ho’i ia rātou ’ia riri i te mea maita’i.

21 ’E te tahi pae, e fa’ahau ’oia ia rātou, ’e e fa’ata’oto ho’i ia rātou i te ta’oto hau roa, ’e e parau mai rātou ē : E mea maita’i i Ziona ; ’oia ïa, ’ua manuia Ziona, e mea maita’i te mau mea ato’a—e nā reira ho’i te diabolo i te ha’avare i tō rātou vārua, ’e i te arata’i māite atu ho’i ia rātou i raro i hade.

22 ’E inaha, ’ua tāvaimanino ’oia i te tahi pae, ’e ’ua parau atu ia rātou ē, ’aita e hade ; ’e ’ua nā ’ō atu ’oia ia rātou ē : E ’ere au i te diabolo, ’aita roa ho’i e diabolo—’e ’ua nā reira ’oia i te parau marū atu i tō rātou tari’a, ē tae roa atu ’ua mau rātou iāna i tāna mau fifi ri’ari’a, ’e ’aita roa e ora i te reira.

23 ’Oia ïa, ’ua mau rātou i te pohe, ’e i hade ; ’e ’ia ti’a te pohe, ’e hade, ’e te diabolo ’e tei tāpe’ahia i te reira ra, i mua i te terōno o te Atua e ti’a ai, ’e ’ia ha’avāhia mai te au i tā rātou mau ’ohipa e ti’a ai ; ’e ’ia haere atu rātou mai reira atu i roto i te vāhi i ha’apa’ohia nō rātou ra e ti’a ai ; i roto i te roto auahi ’e te gopheri, ’oia ho’i te māuiui hope ’ore ra.

24 Nō reira, ’auē ho’i te ta’ata tē pārahi hau noa ra i Ziona !

25 ’Auē ho’i ’oia ’o tē pi’i ra ē : E mea maita’i te mau mea ato’a !

26 ’Oia ïa, ’auē ho’i ’oia ’o tei fa’aro’o atu i te parau a te ta’ata nei, ’e tei huna i te mana o te Atua, ’e i te hōro’a nō te Vārua Maita’i !

27 ’Oia ïa, ’auē ho’i ’oia ’o tē parau ē : ’Ua fāri’i mātou, ’e ’aita mātou e hina’aro fa’ahou i te hō’ē mea !

28 ’Oia ïa, ’auē ho’i rātou ato’a ’o tē rurutaina ra ’e ’o tē riri ra nō te parau mau a te Atua ra ! Inaha ho’i, ’o tei patuhia i ni’a i te papa ra, tē fāri’i ra ’oia ma te ’oa’oa ; ’e ’o tei patuhia i ni’a i te one ra, tē rurutaina ra ’oia, ’o te hi’a ’oia.

29 ’Auē ho’i ’oia ’o tē parau ē : ’Ua fāri’i mātou i te parau a te Atua, ’e ’aita mātou e hina’aro fa’ahou i te parau a te Atua, ’ua nava’i ho’i tā mātou !

30 Inaha ho’i, tē nā ’ō mai ra te Fatu te Atua : E hōro’a vau i te mau tamari’i a te ta’ata nei i te fa’aue nā ni’a iho i te fa’aue, i te a’o nā ni’a iho i te a’o, te tahi vāhi iti i’ō nei ’e te tahi vāhi iti i ’ō atu ; ’e e ao tō rātou ’o tē fa’aro’o mai i tā’u mau parau, ’e ’o tē hōro’a mai i te tari’a i tā’u a’o ; e ha’api’i ho’i rātou i te parau pa’ari, nō te mea ’o ’oia ’o tē fāri’i mai e hōro’a fa’ahou atu ā vau ; ’e ’ia rātou ’o tē parau mai ē, ’Ua nava’i tā mātou, e rave-’ē-hia tei fāri’ihia e rātou.

31 E ’anatemahia ’oia ’o tei tu’u i tōna ti’aturira’a i te ta’ata nei, ’e ’aore rā ’o tei rave i te tino nei ’ei tauturu nōna, ’e ’aore rā ’o tei fa’aro’o i te mau parau a te ta’ata nei, maori rā ’ua hōro’ahia mai tā rātou mau parau nā roto i te mana o te Vārua Maita’i.

32 ’Auē ho’i te mau ’Ētene, tē nā reira mai ra te Fatu te Atua Sabaota ! Noa atu e fa’atoro atu vau i tō’u rima ia rātou i terā mahana ’e terā mahana, e huna atu rātou iā’u ; ’āre’a rā e aroha vau ia rātou, tē nā reira mai ra te Fatu te Atua, mai te mea e tātarahapa rātou ’e e haere mai iā’u nei ; nō te mea ’ua fa’atorohia tō’u rima i te tā’āto’ara’a nō te mahana, tē nā reira mai ra te Fatu te Atua Sabaota.