1 Ma o lenei faauta, o’u uso pele e, ou te fia tautala atu ia te outou; ona o a’u, o Nifae, ou te lē tuua outou ia outou manatu ua sili atu lo outou amiotonu nai lo le tulaga o le a i ai Nuuese. Aua faauta, vagana ai o le a outou tausia poloaiga a le Atua o le a faapea foi ona outou fano uma; ma e lē tatau ona outou manatu o le a matuā faaumatia lava Nuuese ona o upu ua fetalaia.

2 Aua faauta, ou te fai atu ia te outou, o le toatele o Nuuese o e e salamo o i latou o tagata o le feagaiga a le Alii; ma o le toatele o tagata Iutaia e lē salamo o le a tutuli ese i fafo; ona e lē osifeagaiga le Alii ma se tasi vagana ai ma i latou o e ua salamo ma talitonu i lona Alo, o lē o le Paia e Toatasi o Isaraelu.

3 Ma o lenei, e ao ona ou vavalo atu lava e uiga i tagata Iutaia ma Nuuese. Aua pe a uma ona oo mai o le tusi sa ou tautala atu ai, ma tusia atu i Nuuese, ma toe faamauina lava i le Alii, o le a toatele o le a talitonu i upu ua tusia; ma o le a latou tuuina atu ia upu i le vaega o totoe o a tatou fanau.

4 Ma ona iloa ai lea e le vaega o totoe o a tatou fanau e uiga ia te i tatou, le ala na tatou o ese ai mai Ierusalema, ma o i latou e tupuga mai i tagata Iutaia.

5 Ma o le a folafola i totonu o i latou le talalelei a Iesu Keriso; o le mea lea, o le a toefuata’ia i latou i le malamalama e uiga i o latou tamā, ma i le malamalama foi e uiga ia Iesu Keriso, sa i ai i totonu o o latou tamā.

6 Ma ona latou olioli ai lea; ona o le a latou iloa o se faamanuiaga lena mo i latou mai le aao o le Atua; ma o le a amata ona pa’u’ū ese una o le pogisa mai o latou mata; ma e le mavae atu ni tupulaga e tele mai totonu ia te i latou, ae o le a avea i latou ma ni tagata mamā ma moomia.

7 Ma o le a oo mai foi o tagata Iutaia o e ua faataapeapeina, o le a amata foi ona talitonu ia Keriso; ma o le a amata ona latou faapotopoto faatasi mai i luga o le laueleele; ma o le toatele o i latou e talitonu ia Keriso, o le a avea foi ma ni tagata moomia.

8 Ma o le a oo mai foi o le a amata e le Alii le Atua lana galuega i totonu o atunuu uma, ituaiga, gagana, ma nuu, e faataunuu ai le toefuataiga o ona tagata i luga o le lalolagi.

9 Ma o le a faamasino e le Alii le Atua ma le amiotonu e matitiva, ma a’oa’i atu ma le tonu mo e agamalu o le lalolagi. Ma o le a taia e ia le lalolagi i le tootoo o lona fofoga; ma o le mānava mai o ona laufofoga o le a faaumatia ai e amioleaga.

10 Ona ua vave ona oo mai o le taimi o le a faia ai e le Alii le Atua se vaevaega tele i totonu o tagata, ma o le a faaumatiaina e ia e amioleaga; ma o le a faasao e ia ona tagata, ioe, e tusa lava pe a tatau ai e ao ona faaumatia e ia e amioleaga i le afi.

11 Ma o le a avea le amiotonu ma fusi o ona sulugatiti, ma le faamaoni ma fusi o ona suilapalapa.

12 Ma ona mau faatasi ai lea o le luko ma le tamai mamoe; ma o le a taooto faatasi le nameri ma le tamai oti, ma o le tamai povi, ma le leona taanoa, ma le manu peti, o le a taooto faatasi; ma o le a taitaiina i latou e le tamaitiiti.

13 Ma o le a aai faatasi le povi ma le urosa; o le a taooto faatasi a laua tama; ma o le a ’ai e le leona ’au o saito e pei o le povi.

14 Ma o le a taalo le tama e lei te’a ma le susu i le lua o le asipi, ma o le a tuu e le tama ua tea ma le susu lona lima i le lua o le gata uogo.

15 O le a latou lē faamanu’a pe faaumatia i se mea i lo’u mauga paia atoa; ona o le a tumu le lalolagi i le malamalama o le Alii e pei ona ufitia le sami i vai.

16 O le mea lea, o le a faailoa mai mea o atunuu uma; ioe, o le a faailoa mai mea uma i le fanauga a tagata.

17 E leai se mea lilo o le a lē faaalia; e leai se galuega o le pogisa o le a lē faaalia i le malamalama; ma e leai se mea ua faamauina i luga o le lalolagi o le a lē tatalaina.

18 O le mea lea, o mea uma na faaali mai i le fanauga a tagata o le a faaali mai i lena aso; ma o le a lē toe i ai se mana o Satani i luga o loto o le fanauga a tagata, mo se taimi umi lava. Ma o lenei, o’u uso pele e, ua ou faaiu a’u upu.