1 Iwe iei ua kapas ngonuk, Joseph, nei we a uputiw fochofoch. En ka uputiw me non ewe fonu ponun ai kewe riaffou; ewer, non ekkewe ranin ai watten netipengaw inom we a aupuketiw.

2 Iwe amo ewe Samon epwe pwan epinano ngonuk ei fonu, minne a ew fonu mi fokkun auchea, ren om kopwe fonueni me pwan fonuen mwirimwirum fiti pwium kewe, ren om pekin tumun feinfeino chok, ika pwe kopwe aneasochisi ekkewe annuk an ewe Emon mi Fel re Israel.

3 Iwe iei Joseph, nei we a uputiw fochofoch, ewe ua wau me non ewe fonu ponun ai kewe riaffou, amo ewe Samon epwe efeiochuk feinfeino chok, pwe mwirimwirum resap fokkun ninnino.

4 Pun nengeni, en ka uwan nukanapei; iwe ngang emon mwirimwirin Joseph ewe a no fotek non Egypt. Iwe a auchea ekkewe pwon mi pin an ewe Samon minne a fori ngeni Joseph.

5 Ina minne, Joseph a ennetin kuna ranich kei. Iwe i a angei ew pwon seni ewe Samon, pwe seni ekkewe uwan nukanapan ewe Samon Kot epwe seikata ew mwicheichen aramas mi wenechar ngeni ewe imwen Israel; esap ewe Messiah, nge ew mwicheichen aramas minne a fen kaimu seni, nge inamo, ren an epwe achechem non ekkewe pwon mi pin an ewe Samon pwe ewe Messiah epwe pwano ngeni ir non ekkewe fansoun soponon, ren ewe ngunun manaman, tori katour seni ewe rochopwak ngeni saram—ewer, seni ewe rochopwak mi monono me seni fotek ngeni ngaseno.

6 Pun Joseph a ennetin pwarata, a apasa: Emon chon osini ewe Samon ai Kot epwe seikata, ewe epwe emon chon osini mi kefinita ngeni uwan nukanapei kewe.

7 Ewer, Joseph a ennetin apasa: Iei ewe Samon a apasa ngeniei: Emon chon osini a kefinita upwe seikata seni uwan nukanapom; iwe i epwe wesewesen sufon me nein uwan nukanapom kewe. Iwe ngeni i upwe ngeni annuk pwe i epwe fori ew angang fan iten uwan nukanapom kewe, pwin kewe, minne epwe watte auchean ngeni ir, pwan tori an epwe uwei ngeni ir tori ewe miritin ekkewe pwon mi pin minne ua fen fori ngeni semom kewe.

8 Iwe upwe ngeni i ew annuk pwe i esap fori pwan ew angang, tiwenon chok ewe angang minne upwe annuku ngeni. Iwe upwe fori i an epwe napanap me ne mesei; pun i epwe fori ai angang.

9 Iwe i epwe napanap usun Moses, ewe ua fen apasa upwe seikata ngenikemi, epwe angasano nei aramas, O imwen Israel.

10 Iwe Moses ngang upwe seikata, pwe epwe angasano noum kewe aramas seni ewe fonuen Egypt.

11 Nge emon chon osini upwe seikata seni uwan nukanapom; iwe ngeni i upwe ngeni pochokun pwe epwe wato ai kapas ngeni uwan mwirimwirin nukanapom kewe—me esap ren waton chok ai kapas, ewe Samon a apasa, nge epwe echimwer usun ai kapas, minne epwene fen feino neir.

12 Ina minne, ewe uwan nukanapom epwe makkei; iwe ewe uwan nukanapom Judah epwe makkei; iwe ewe epwe makkeno seni uwan nukanapom, me pwan ewe minne epwe makkeno seni ewe uwan nukanapan Judah, repwe mar fengen, tori apungun ekkewe nongonong mi muan me awesanon anini fengen, me forata kinamwe nein uwan nukanapom kewe, me uwei ngeni ir ewe miritin semer kewe non ekkewe fansoun soponon, me pwan ngeni ewe miritin ai kewe pwon mi pin, anon ewe Samon.

13 Iwe seni apwangapwang i epwene pochokun, non ena ran nupwen ai angang epwe poputa me nein meinisin nei kewe aramas, tori niwinsefanin en, O imwen Israel, anon ewe Samon.

14 Iwe iei Joseph a osini, a apasa: Nengeni, ewe chon osini ewe Samon epwe efeiochu; iwe ir ekkewe ra kukkuta ar repwe nieno i repwe ninnino; pun ei pwon, minne ua fen angei seni ewe Samon, usun uwan nukanapei, epwe pwonueta. Nengeni, ua fokkun sinei usun ewe pwonuetan ei pwon;

15 Iwe itan epwe eiteit mwirin itei; iwe epwe mwirin itan seman we. Iwe i epwe usun chok ngang; pun ewe mettoch, minne ewe Samon epwe wato seni poun, seni ewe manamanen ewe Samon epwe wato nei aramas ngeni amanau.

16 Ewer, iei Joseph a osini: Ua fokkun sinei usun ei mettoch, pwan usun ngang mi sinei usun ewe pwonen Moses; pun ewe Samon a apasa ngeniei, upwe tumunu mwirimwirum feinfeino chok.

17 Iwe ewe Samon a apasa: Upwe seikata emon Moses; iwe upwe ngeni pochokun ren efoch wok; iwe upwe ngeni i ewe tufich ne mak. Nge usap apwetetei channawan, pwe i epwe kapas chommong, pun usap fori i pwe i epwe sinenap non kapas. Nge upwe makkei ngeni ai annuk, ren autun pwisin pei; iwe upwe fori emon sou kapas fan itan.

18 Iwe ewe Samon a pwan apasa ngeniei: Upwe seikata ngeni ekkewe uwan nukanapom kewe; iwe upwe fori emon soun kapas fan itan. Iwe ngang, nengeni, upwe ngeni i pwe epwe makkei ewe makken uwan nukanapom kewe, ngeni uwan nukanapom kewe; iwe ewe sou kapasen uwan nukanapom kewe epwe affatano.

19 Iwe ekkewe kapas minne i epwe makkei repwe ekkewe kapas minne ra auchea non ai mirit pwe repwe feino ngeni uwan nukanapom kewe. Iwe epwe usun ita nge ewe uwan nukanapom kewe ra puchor ngeni ir seni ewe puun; pun ua sinei ar nuku.

20 Iwe repwe puchor seni ewe puun; ewer, pwan mwo aier ngeni pwir kewe, pwan mwo mwirin chommong tappin aramas repwe morono senir. Iwe ewe fansoun epwe feito pwe ar sio epwe feino, pwan mwo usun weweochun ar kewe kapas.

21 Pokiten ar nuku ar kewe kapas repwe feino tou seni awei ngeni pwir kewe ir ekkewe uwan nukanapom kewe; iwe ewe apwangapwangen ar kewe kapas upwe apochokunano pokiten ar nuku, tori ewe achechemen ai pwon mi pin minne ua fori ngeni semom kewe.

22 Iwe iei, nengeni, nei anuon Joseph, mwirin ei napanap semei nom a osini.

23 Ina minne, pokiten ei pwon mi pin ka feioch; pun mwirimwirum resap ninnino, pun repwe aneasochis ngeni ekkewe kapasen ewe puk.

24 Iwe epwe seikita emon epwe napanap me neir, i epwe fori chommong mettoch mi murino, non kapas me non foffor, i epwe emon chon pisekin angang non poun Kot, fiti nuku napanap, epwe anganga ekkewe amwarar mi napanap, me fori ewe mettoch minne a auchea me mwen mesen Kot, tori a esenipato watten niwinsefanito ngeni ewe imwen Israel, me ngeni ewe mwirimwirin pwium kewe.

25 Iwe iei, ka feioch en, Joseph. Nengeni, en ka kukkun ; ina minne aneasochis ngeni ekkewe kapasen pwium, Nifai, iwe epwe fis ngonuk pwan mwo usun ekkewe kapas minne ua fen apasa. Chechemeni ekkewe kapas an semom epwene mano. Amen.