1 Iwe iei, ngang, Nifai, ua kapas usun ekkewe osini semei we a fen kapas usur, usun Joseph, ewe ra wano non Egypt.

2 Pun nengeni, i a ennetin osini usun mwirimwirin meinisin. Me ekkewe osini minne a makketiw, rese pwan chommong met mi auchea nap seni ir. Me a osini usun am, me mwirimwirim repwap feito non ranin mwem; me ra pwan mak won ekkewe seleichen brass.

3 Ina minne, mwirin an semei we a osopwano an kapasen osini usun Joseph, a kori noun Leiman kewe, noun kewe at, pwan noun kewe nengin, iwe a apasa ngeni ir: Nengeni, ami nei at me nei nengin, ami ekkewe at me nengin noun nei we mwanichi, ua mochen pwe oupwe ausening ngeni ai kapas.

4 Pun ewe Samon Kot a apasa: Ika pwe oua aneasochisi ai kewe annuk meinisin oupwe feiochuno me won ewe fonu; nge are pwe ousap aneasochisi ai kewe annuk oupwe pokupok seniei.

5 Nge nengeni, ami nei at me nei nengin, use tongeni feitiw non peiasei are pwe usap nikitatiw remi ew efeiochumi; pun nengeni, ua sinei pwe are oua mamarita won ewe aan mi pung oupwe nom won ousap su seni.

6 Ina minne, are oua anumamau, nengeni, upwe nikitatiw ai efeioch ngenikemi, pwe ewe anumamau epwe su seni kemi me epwe feino won mokuran sememi me inemi pwe repwe wisen ponueni.

7 Ina minne, pokiten ai we efeioch ewe Samon Kot esap muti ngenikemi pwe oupwe mano non ngun; ina minne, epwe kirokiroch ngenikemi me ngeni mwirimwirimi meinisin feinfeino chok.

8 Iwe non ewe fansoun mwirin semei we a osopwano an kapas ngeni noun Leiman kewe at me nengin, iwe a pwan kokkori noun Lemuel kewe at me nengin pwe repwe feito mwen mesan.

9 Iwe a kapas ngeni ir, a apasa: Nengeni, nei at me nei nengin, ami ekkewe at me nengin noun nei we mwan nampa ru; nengeni pwe ua nikitatiw ngenikemi ewe chok efeioch ua ngeni noun Leiman kewe at me nengin; ina minne, ami ousap tongeni ninnino; nge non fansoun nesoponon mwirimwirimi repwe feioch.

10 Iwe non ewe fansoun nupwen semei we a osopwano an kapas ngeni ir, nengeni, a pwan kapas ngeni noun Ishmael kewe at, ewer, pwan ngeni meinisin chon non imwen we.

11 Iwe mwirin an osopwano an kapas ngeni ir, a kapas ngeni Sam, a apasa: En ka feioch, me pwan mwirimwirum kewe; pwe en kopwe fonueni ewe fonu pwan usun chok pwium we Nifai. Iwe mwirimwirum kewe repwe pwan anneanong nein mwirimwirin kewe; iwe, en kopwe pwan usun chok pwium we, me mwirimwirum kewe repwe pwan usun chok mwirimwirin kewe; iwe kopwe feioch non ranum meinisin.

12 Iwe non ewe fansoun mwirin semei we, Liai, a kapas ngeni meinisin chon non imwan we, usun met a mefi non netipan me pwan amefien Ngunun ewe Samon a nom non netipan, iwe, a chinnapeno. Iwe non ewe fansoun a mano, me a peiaseno.

13 Iwe non ewe fansoun esap mwo chommong ran me mwirin chok an we mano, Leiman me Lemuel me noun Ishmael kewe anuon ra song rei pokiten an ewe Samon kapasen fon.

14 Pun ngang, Nifai, ua pesepes ai upwe kapas ngeni ir, anongonong won an kapas; pun ua kapas ngeni ir ren chommong mettoch, pwan semei we a pwan kapas ngeni ir me mwen an epwe mano; mi chommong me nein ekkewe mettoch aua kapas ngeni ir ra makketiw won nei kewe ekkoch chön seleich; pwan ekkoch porausen uruo ra pwan mak won nei kewe ekkoch chön seleich.

15 Iwe, won ekkei ua makkei ekkewe mettochun nguni, me pwan chommong ekkewe pukefel ra pwan makketiw won ekkewe seleichen brass. Pokiten nguni a pwapwaiti ekkewe pukefel, me netipei a ekipwichir, ra pwan makketiw pwe pisekin kaeo me tufich fan iten mwirimwiri meinisin.

16 Nengeni, nguni a pwapwa ren ekkewe mettochun ewe Samon; me netipei a soposopono ne ekipwichi ekkei mettoch ua kuner me rongorong usur.

17 Nge inamo, me nukun watten kirokirochun ewe Samon, ren an pwar ngeniei an kewe angang mi napanap me amwarar, iwe netipei a puchor: O ngang emon aramas netipengaw! Ewer, netipei a uren netipengaw pokiten aionei; nguni a riaffou pokiten ai fofforungaw.

18 Ngang ua ono, pokiten ekkewe sossot me tipis minne ra mecheres ne sotuni ei.

19 Iwe nupwen ua mochen pwapwa, netipei a weires pokiten ai tipis; nge inamo, ngang mi sinei ion ua ani apinukunuk.

20 Ai Kot ai chon aninis; i a emmwen ngeniei ai upwe tou seni ai kewe riaffou me non ewe fonu pon; me a amanaua ei won ekkewe konikin matau mi fokkun anonnon.

21 A ourano netipei ren an tong, pwan tori an oromano inisi.

22 A osukosuka ekkewe chon oput ngang, tori a forir pwe repwe pouk me fan mesei.

23 Nengeni, i a rongorong ngeni ai sio neran, me a ngeniei mirit ren nemasepwi nepwin.

24 Iwe neran ua fokkun anapano ai achocho ne iotek fan mesan; ewer, ua neuwomong non ai iotekita won nang; iwe chon nang ra feitiw me ra afanafanaei.

25 Iwe won poun Ngunun we a wano inisi won ekkewe chuk mi fokkun tekia. Iwe mesei a kuna chommong mettoch mi auchea, ewer, ra fokkun napanap iwe aramas rese tufichin nengeni ir; iei minne a annuku ei pwe usap makker.

26 O iwe, nge ika ua fen kuna ekkei sokkun mettoch mi auchea, ika ewe Samon ren an atekisona pwisin inisin ngeni ekkewe noun aramas tori an a pwisin churi fetanei aramas non an umoumoch, pwata netipei epwe kechiw me nguni epwe nonnomeno non ewe nemonun chukun netipengaw, iwe aionei a apwangapwangeno, me ai pochokun a kukkunutiw pokiten ai kewe riaffou?

27 Iwe pwata upwe tup ren tipis, pokiten chok ren aionei? Ewer, pwata upwe tup ren sossot, pwe ewe emon mi ngaw epwe awora nenian non netipei pwe epwe ataieno ai kinamwe me eriaffou nguni? Pwata upwe song pokiten ewe mi chon oput ngang?

28 Nenneno, nguni! Kosap chiwen amwochumoch non tipis. Kopwe pwapwa, O netipei, me kosap chiwen enenia ewe chon oput nguni.

29 Kosap chiwen song pokiten ekkewe chon oput ngang. Kosap akukkunatiw ai pochokun pokiten ai kewe riaffou.

30 Kopwe pwapwa, O netipei, me sio ngeni ewe Samon, me apasa: O Samon, upwe mwareituk feinfeino chok; ewer, nguni epwe pwapwa non en, ai Kot, ewe foun ai amanau.

31 O Samon, kose mochen kopwe angasano nguni? Kose mochen kopwe angasaeiu seni ne poun ekkewe chon oput ngang? Kose mochen kopwe foriei pwe upwe chechech ren ai niweiti feiton tipis?

32 Amo ita ekkewe asamen hell repwe kopung fochofoch me mwei, pokiten netipei a netipechou me nguni a niemam! O Samon, kose mochen kosap apungu asamen om wenechar me mwei, pwe upwe fetan non ewe aan non ewe nemonun ewe chuk, pwe upwe wenechar won ewe aan mi fatoch!

33 O Samon, kose mochen kopwe finitieino non ufom na ufoufen wenechar! O Samon, kose mochen kopwe awenecharano aanen ai su seni ekkewe chon oput ngang! Kose mochen fori ai we aan epwe wenechar me mwei! Kose mochen kosap wanong foun chepetek epwe eppeti ai aan—nge kopwe nimeti ai aan me mwei, me kosap eppeti aanei, nge eppeti aanen ekkewe chon oput ngang.

34 O Samon, ua fen apinukunuk non en, iwe upwe wanong ai apinukunuk non en tori feinfeino chok. Usap tongeni pungutiw ai we apinukunuk non poun futuk; pun ua sinei pwe anumamau ngeni ion mi anonga an apinukunuk non poun futuk. Ewer, a anumamau ion a wanong an apinukunuk non aramas ika fori aion pwe poun.

35 Ewer, ua sinei pwe Kot mi kisasou ngeni ion mi tingorei. Ewer, ai Kot epwe ngeniei, ika ua tungor non ew napanap ese ngaw; ina minne upwe neuwomongeta reom; ewer, upwe sio ngonuk, ai Kot, en foun ai wenechar. Nengeni, neuei epwe feita reom feinfeino, ai fau me ai Kot Esemuch. Amen.