1 ’E i teienei, tē parau atu nei au, ’o Nephi, nō ni’a i te mau tohura’a tā tō’u metua tāne i parau mai nō ni’a ia Iosepha, ’o tei hōpoihia i ’Aiphiti ra.

2 Inaha ho’i, ’ua tohu mau ’oia nō ni’a i tōna hua’ai tā’āto’a. ’E te mau tohura’a tāna i pāpa’i ra, ’aita ïa e mau tohura’a i hau atu i te rahi i teie. ’E ’ua tohu ’oia nō ni’a ia mātou ’e tō mātou ra mau u’i a muri a’e ; ’e ’ua pāpa’ihia te reira i ni’a i te mau ’api veo.

3 Nō reira, ’ia fa’aoti a’era tō’u metua tāne i tāna paraura’a nō ni’a i te mau tohura’a a Iosepha, ’ua pi’i atu ra ’oia i te mau tamari’i a Lamana, ’oia ho’i tāna mau tamari’i tamāroa ’e tāna mau tamari’i tamāhine, ’e ’ua parau atu ra ’oia ia rātou : Inaha, e tā’u mau tamari’i tamāroa, e tā’u mau tamari’i tamāhine, ’outou e te mau tamari’i tamāroa ’e te mau tamari’i tamāhine a tā’u ra matahiapo, ’ua hina’aro vau ’ia fa’aro’o mai tō ’outou tari’a i tā’u nei mau parau.

4 Nō te mea ’ua parau mai te Fatu te Atua ē : Mai te mea e ha’apa’o ’outou i tā’u nei mau fa’auera’a, e manuia ïa ’outou i ni’a i te fenua nei ; ’e ’ia ’ore ’outou e ha’apa’o i tā’u nei mau fa’auera’a, e tāpū-’ē-hia ïa ’outou mai mua atu i tō’u nei aro.

5 Inaha rā, e tā’u mau tamari’i tamāroa, e tā’u mau tamari’i tamāhine, ’aita roa e ti’a iā’u ’ia haere i raro i tō’u mēnema, maori rā ’ia vaiiho vau i te hō’ē ha’amaita’ira’a i ni’a iho ia ’outou ; inaha ho’i, ’ua ’ite au ē, mai te mea e ha’api’ihia ’outou i te ’ē’a e au ’ia haere ra, e ’ore roa ïa ’outou e fa’aru’e i te reira.

6 Nō reira, mai te mea e ’anatemahia ’outou, inaha, e vaiiho vau i tā’u ha’amaita’ira’a i ni’a ia ’outou, ’ia rave-’ē-hia taua ’anatema ra mai ni’a mai ia ’outou, ’e ’ia tāho’ohia i ni’a i te upo’o o tō ’outou ra mau metua.

7 Nō reira, nō tā’u ra ha’amaita’ira’a, e ’ore roa te Fatu te Atua e fa’ati’a ’ia mou ’outou ; nō reira, e aroha mai ’oia ia ’outou e tō ’outou hua’ai ē a muri noa atu.

8 ’E i muri a’era, ’ia fa’aoti a’era tō’u metua tāne i tāna paraura’a i te mau tamari’i tamāroa ’e te mau tamari’i tamāhine a Lamana ra, ’ua fa’aue atu ra ’oia ’ia arata’ihia mai te mau tamari’i tamāroa ’e te mau tamari’i tamāhine a Lemuela i mua iāna.

9 ’E ’ua parau atu ra ’oia ia rātou, i te nā-’ō-ra’a ē : Inaha, e tā’u mau tamari’i tamāroa ’e tā’u mau tamari’i tamāhine, ’outou e te mau tamari’i tamāroa ’e te mau tamari’i tamāhine nō tā’u ra tamaiti piti ; inaha, tē vaiiho nei au i te hō’ē ā ha’amaita’ira’a i ni’a ia ’outou mai tā’u i vaiiho i ni’a i te mau tamari’i tamāroa ’e te mau tamari’i tamāhine ho’i a Lamana ra ; nō reira, e ’ore ’outou e ha’amouhia ; i te hope’a rā e ha’amaita’ihia tō ’outou hua’ai.

10 ’E i muri a’era, ’ia fa’aoti a’era tō’u metua tāne i tāna paraura’a ia rātou, inaha, ’ua parau atu ra ’oia i te mau tamari’i tamāroa a Isema’ela, ’oia ïa, ’e i tōna ’utuāfare ato’a.

11 ’E ’ia fa’aoti a’era ’oia i te paraura’a ia rātou ra, ’ua parau atu ra ’oia ia Samu, nā ’ō atu ra : E ao tō ’oe ’e tō ’oe hua’ai ato’a, e fāri’i ho’i ’oe i te fenua mai tō ’oe ra taea’e ia Nephi. ’E e tai’ohia tō ’oe hua’ai i rotopū i tōna ra hua’ai ; ’e e riro tō ’oe huru mai tō tō ’oe ra taea’e, ’e tō ’oe hua’ai mai tōna hua’ai ; ’e e ha’amaita’ihia ’oe i tō ’oe ato’a ra mau mahana.

12 ’E i muri a’era, ’ia fa’aoti a’era tō’u metua tāne, ’o Lehi, i tāna paraura’a i tōna ’utuāfare pā’āto’a, mai te au i te hina’aro o tōna ’ā’au ’e tō te Vārua o te Fatu i roto iāna ; ’ua ruhiruhiā ihora ’oia. ’E i muri a’era, ’ua pohe ihora ’oia, ’e ’ua tanuhia ihora.

13 ’E i muri a’era, ’ia hope a’era nā mahana ri’i i muri a’e i tōna pohera’a, ’ua riri mai ra Lamana rāua ’o Lemuela ’e te mau tamari’i tamāroa a Isema’ela iā’u, nō te mau parau a’o a te Fatu.

14 Nō te mea ’ua tītauhia vau, ’o Nephi, ’ia parau atu ia rātou mai te au i tāna ra parau ; ’e i parau na ho’i au i te mau mea e rave rahi ia rātou, ’e i nā reira na ho’i tō’u metua tāne, hou tōna ra pohera’a ; ’e ’ua pāpa’ihia e rave rahi o teie nei mau parau i ni’a i te tahi atu o tā’u ra mau ’api ; e ’ā’amu ho’i te pae rahi o teie mau mea i pāpa’ihia i ni’a i te tahi atu o tā’u ra mau ’api.

15 ’E i ni’a iho i teie nei mau ’api tē pāpa’i nei au i te mau mea i roto i tō’u nei vārua, ’e te mau pāpa’ira’a mo’a e rave rahi i ’ō’otihia i ni’a i te mau ’api veo ra. Nō te mea tē ’oa’oa nei tō’u vārua i te mau pāpa’ira’a mo’a, ’e tē feruri hōhonu nei tō’u ’ā’au i te reira, ’e tē pāpa’i nei ho’i au i te reira ’ei ha’api’ira’a ’e ’ei faufa’a nā tā’u ra mau tamari’i.

16 Inaha, tē ’oa’oa nei tō’u vārua i te mau mea a te Fatu ; ’e tē feruri tāmau noa nei ā tō’u ’ā’au i te mau mea tā’u i hi’o ’e tā’u i fa’aro’o.

17 ’Āre’a rā, noa atu ā te maita’i rahi o te Fatu i te fa’a’itera’a mai iā’u i tāna mau ’ohipa rahi ’e te māere, ’ua fa’ahiti pūai atu tō’u ’ā’au i teie mau parau : ’Auē ho’i au ’o te ta’ata ’ati rahi ē ! ’Oia ïa, tē ’oto nei tō’u ’ā’au nō tō’u nei tino ; tē mihi nei ho’i tō’u vārua nō tā’u mau ’ohipa ’ī’ino.

18 ’Ua ha’a’ati-haere-hia vau, nā roto i te mau fa’ahemara’a ’e te mau hara ’o tē ha’afifi-’ōhie-nei iā’u.

19 ’E ’ia hina’aro vau ’ia ’oa’oa, tē autā ra tō’u ’ā’au nō tā’u mau hara ; ’āre’a rā, ’ua ’ite au iāna tā’u i ti’aturi.

20 ’O tō’u Atua tō’u tauturu ; ’ua arata’i mai ’oia iā’u nā roto i tō’u ra mau ’ati i roto i te mēdēbara ; ’e ’ua fa’aherehere ’oia iā’u i ni’a i te mau pape nō te moana hōhonu ra.

21 ’Ua fa’a’ī ’oia iā’u i tōna ra aroha, ē tae noa atu i te paruparura’a tō’u nei tino.

22 ’Ua fa’aha’amā ’oia i tō’u ra mau ’enemi, i rurutaina ai rātou i mua iā’u.

23 Inaha, ’ua fa’aro’o mai ’oia i tā’u ra ti’aorora’a i te ao, ’e ’ua hōro’a mai ’oia i te ’ite iā’u nā roto i te ’ōrama i te ru’i ra.

24 ’E i te ao ’ua ti’aoro ’ū’ana atu vau i te pure i mua iāna ; ’oia ïa, ’ua fa’ateitei atu vau i tō’u reo i ni’a ; ’e ’ua pou mai ra te mau melahi ’e ’ua poihere mai ra iā’u.

25 ’E ’ua ’āfa’i-’ē-hia atu ra tō’u tino nā ni’a i te mau pererau o tōna Vārua i ni’a i te mau mou’a teitei roa ra. ’E ’ua ’ite atu ra tō’u mata i te mau mea rahi ; ’oia ïa, rahi atu i tei ti’a i te ta’ata ’ia hi’o ; nō reira ’ua fa’auehia vau, ’eiaha vau e pāpa’i i te reira.

26 ’E i teienei, mai te mea ē ’ua ’ite au i te mau mea rarahi ; mai te mea ē i roto i tō te Fatu aroha rahi i te mau tamari’i a te ta’ata nei ’ua haere mai ’oia e tāmāhanahana i te ta’ata nei nā roto i tōna aroha rahi, nō te aha ïa tō’u ’ā’au e horuhoru ai, e tō’u vārua e pārahi noa ai i roto i te peho o te ’oto, ’e tō’u tino e ripā ai, ’e tō’u ho’i pūai e tō’aru’aru ai, nō tō’u ra mau ’ati ?

27 ’E nō te aha vau e hōro’a ai iā’u i te hara, nō tō’u nei tino ? ’Oia ïa, nō te aha vau e fa’ati’a ai iā’u ’ia topa i roto i te mau fa’ahemara’a, ’ia ti’a i te diabolo ’ia fāri’i i te hō’ē vāhi i roto i tō’u ’ā’au nō te fa’a’ore i tō’u hau, ’e nō te ha’ape’ape’a i tō’u vārua ? Nō te aha vau e riri ai i tō’u ’enemi ?

28 ’A ara, e tō’u vārua ! ’Eiaha e ha’aparuparu i roto i te hara. ’A ’oa’oa, e tō’u ’ā’au, ’e ’eiaha e hō atu i te vāhi nō te ’enemi o tō’u vārua.

29 ’Eiaha e riri fa’ahou nō tō’u ra mau ’enemi. ’Eiaha tō’u pūai e tō’aru’aru nō tō’u mau ’ati.

30 ’A ’oa’oa, e tō’u ’ā’au, ’e ’a ti’aoro atu i te Fatu, ’e ’a parau atu ē : E te Fatu, e ’ārue au ia ’oe ē a muri noa atu ; ’oia ïa, e ’oa’oa tō’u vārua ia ’oe, e tō’u Atua, ’e te papa nō tō’u ra fa’aorara’a.

31 E te Fatu, e fa’aora mai ānei ’oe i tō’u nei vārua ? E fa’aora mai ānei ’oe iā’u i te rima o tō’u ra mau ’enemi ? E fa’arurutaina mai ānei ’oe iā’u i te hi’ora’a atu i te hara ?

32 ’Ia ’ōpani-noa-hia te mau ’ūputa o hade i mua iā’u, nō te mea ’ua ’oto tō’u ’ā’au ’e ’ua tātarahapa tō’u vārua ! E te Fatu, ’eiaha ’oe e ’ōpani i te mau ’ūputa o tō ’oe ra parauti’a i mua iā’u nei, ’ia ti’a iā’u ’ia haere nā te ’ē’a o te peho ha’eha’a ra, ’e ’ia ti’a iā’u ’ia haere māite nā te arati’a pāpū !

33 E te Fatu, ’a ha’a’ati noa mai ’oe iā’u i te ’ahu o tō ’oe ra parauti’a ! E te Fatu, ’a fa’aineine ’oe i te rāve’a e ora ai au i mua i tō’u ra mau ’enemi ! ’A fa’atītī’aifaro ’oe i tō’u ’ē’a i mua iā’u ! ’Eiaha ’oe e tu’u i te ’ōfa’i turorira’a i ni’a i tō’u ’ē’a—’āre’a rā, ’ia ha’apāpū ’oe i tō’u ’ē’a i mua iā’u, ’eiaha ’oe e fa’aapiapi i tō’u ’ē’a, i te mau ’ē’a rā o tō’u ra ’enemi.

34 E te Fatu, ’ua ti’aturi au ia ’oe, ’e e ti’aturi au ia ’oe ē a muri noa atu. E ’ore au e tu’u i tō’u ti’aturira’a i roto i te rima tāhuti nei ; nō te mea ’ua ’ite au ē, e ’anatemahia ’oia ’o tē tu’u i tōna ti’aturira’a i roto i te rima tāhuti nei. ’Oia ïa, e ’anatemahia ’oia ’o tē tu’u i tōna ti’aturira’a i te ta’ata nei, ’e ’aore rā ’o tē fa’ariro i tō te tino nei ’ei rima nōna.

35 ’Oia ïa, ’ua ’ite au ē, e hōro’a noa mai te Atua i te ta’ata ’o tē ani atu. ’Oia ïa, e hōro’a mai tō’u Atua iā’u, ’ia ani au ma te hape ’ore ; nō reira, e fa’ateitei atu vau i tō’u reo ia ’oe ; ’oia ïa, e ti’aoro atu vau ia ’oe, e tō’u Atua, te papa nō tō’u ra parauti’a. Inaha, e tae atu tō’u reo i ni’a ia ’oe ē a muri noa atu, e tō’u papa e tō’u Atua mure ’ore. ’Āmene.