1 Inaha, i muri a’era, ’ua ti’aoro rahi atu ra vau, ’o Nephi, i te Fatu ra i tō’u Atua, nō te riri o tō’u ra nā tua’ana iā’u.

2 Inaha rā, ’ua tupu rahi roa a’era tō rāua riri iā’u, ’e ’ua tītau ihora rāua ’ia taparahi iā’u.

3 ’Oia ïa, ’ua amuamu rāua iā’u, i te nā-’ō-ra’a ē : Tē mana’o nei tō taua teina ’ia fa’atere ia taua ; ’e ’ua fāri’i tātou i te mau ’ati rahi nā roto iāna ; nō reira, e taparahi taua iāna, ’ia ’ore tātou e ’ati-fa’ahou-hia i tāna ra mau parau. Inaha ho’i, ’eiaha roa taua e fa’ati’a iāna ’ia riro ’ei fa’atere i ni’a ia taua ; nō te mea tei ia taua, nā tua’ana, te fa’atere i teie nei mau ta’ata.

4 I teienei, e’ita vau e pāpa’i i ni’a i teie nei mau ’api i te mau parau ato’a tā rāua i amuamu mai iā’u. ’Āre’a rā, ’ua ti’a roa ho’i iā’u ’ia parau ē, ’ua tītau rāua ’ia taparahi iā’u.

5 ’E i muri a’era, ’ua fa’aara mai ra te Fatu iā’u, ’ia fa’aru’e mai au, ’o Nephi, ’ia rātou ’e ’ia haere atu i roto i te mēdēbara ’e ’o rātou ato’a ’o tē pe’e mai iā’u ra.

6 Nō reira, i muri a’era, ’ua rave mai au, ’o Nephi, i tō’u ’utuāfare, ’e ’ia Zorama ato’a ’e tōna ’utuāfare, ’e ’ia Samu, tō’u ra tua’ana, ’e tōna ’utuāfare, ’e ia Iakoba ’e Iosepha, tō’u nā teina, ’e tō’u ato’a mau tuahine, ’e ’ia rātou ato’a ’o tei hina’aro ’ia pe’e mai iā’u ra. ’E ’o rātou ato’a ho’i ’o tei pe’e mai iā’u ra, ’o te mau ta’ata ïa ’o tei ti’aturi i te mau parau fa’aara ’e te mau heheura’a a te Atua ; nō reira, ’ua fa’aro’o mai rātou i tā’u ra mau parau.

7 ’E ’ua rave ihora mātou i tō mātou mau ti’ahapa ’e te mau mea tei mara’a ia mātou, ’e ’ua haere atu ra mātou i roto i te mēdēbara nō te ārea e rave rahi mahana te maoro. ’E i muri iho i tō mātou terera’a nō te ārea e rave rahi mahana te maoro, ’ua fa’ati’a ihora mātou i tō mātou mau ti’ahapa.

8 ’E ’ua hina’aro tō’u ra mau ta’ata ’ia ma’iri mātou i te i’oa o taua vāhi ra ia Nephi ; nō reira, ’ua ma’iri ihora mātou i te i’oa o te reira ’o Nephi.

9 ’E ’o rātou ato’a tei pe’e mai iā’u ra, ’ua ’ōpua ihora rātou ’ia ma’iri i tō rātou i’oa, te mau ta’ata o Nephi.

10 ’E ’ua ha’apa’o ihora mātou i te mau parau, ’e te mau ture, ’e te mau fa’auera’a a te Fatu i roto i te mau mea ato’a, mai te au i te ture a Mose ra.

11 ’E tei pīha’i iho te Fatu ia mātou ; ’e ’ua manuia roa mātou ; ’e ’ua ueue ihora mātou i te huero, ’e ’ua ’ō’oti atu ra ma te ’auhune rahi. ’E ’ua ha’amata atu ra mātou i te fa’a’amu i te mau nana māmoe, ’e te mau nana pua’atoro, ’e te mau huru ’ānimara ato’a.

12 ’E ’ua ’āfa’i ho’i au, ’o Nephi, i te mau pāpa’a parau i ’ō’otihia i ni’a i te mau ’api veo ra, ’e te pōpō ato’a, ’oia ho’i, te ’avei’a i hāmanihia e te rima o te Fatu nā tō’u ra metua tāne, mai te au i tei pāpa’ihia ra.

13 ’E i muri a’era, ’ua ha’amata mātou i te manuia rahi, ’e i te tupu rahi i ni’a i te fenua.

14 ’E ’ua rave ihora vau, ’o Nephi, i te ’o’e a Labana ra, ’e ’ua hāmani ihora i te tahi atu ā mau ’o’e mai taua ’o’e ra te huru, penei a’e ’o te haere mai te mau ta’ata i parauhia te mau ’āti Lamana nō te ha’amou ia mātou ; nō te mea ’ua ’ite au i tō rātou ’ino’ino iā’u ’e i tā’u mau tamari’i, ’e ’ia rātou ato’a tei parauhia e mau ta’ata nō’u ra.

15 ’E ’ua ha’api’i au i tō’u mau ta’ata ’ia hāmani i te mau fare, ’e ’ia rave ho’i i te mau huru ’ohipa ato’a i te rā’au, ’e i te ’āuri, ’e i te kapa, ’e i te veo, ’e i te ’āuri pa’ari, ’e i te ’auro, ’e i te ’ārio, ’e i te mau huru ’ōfa’i metalo faufa’a roa e rave rahi i ’itea i taua fenua ra.

16 ’E ’ua patu ihora vau, ’o Nephi, i te hō’ē hiero ; ’e ’ua patu vau i te reira mai te au i te hōho’a o te hiero o Solomona ra, ’aita rā te reira i hāmanihia i te mau mea tao’a rahi ; nō te mea ’aita te reira mau mea i ’itea i ni’a i te fenua, nō reira, ’aita te reira e ti’a ’ia hāmanihia mai te hiero o Solomona ra. ’Āre’a rā te huru nō te hāmanira’a ’ua au ïa i te hiero o Solomona ; ’e te huru ’ohipa i ravehia, e mea nehenehe roa ïa.

17 ’E i muri a’era, ’ua fa’aitoito ihora vau, ’o Nephi, i tō’u ra mau ta’ata ’ia rave pūai i te ’ohipa, ’e ’ia fa’a’ohipa i tō rātou rima.

18 ’E i muri a’era, ’ua hina’aro ihora rātou ’ia riro vau ’ei ari’i nō rātou. ’Aita rā vau, ’o Nephi, i hina’aro ’ia roa’a tō rātou ari’i ; ’ua rave itoito rā vau i te ’ohipa nō rātou mai te au i tō’u mana.

19 ’E inaha, ’ua tupu mau atu ra tā te Fatu i parau mai i tō’u ra mau tua’ana, ’o te parau nō rātou ’o tē nā ’ō ra ē, e riro vau ’ei fa’atere ’e ’ei ’orometua nō rātou. Nō reira, i riro na vau ’ei fa’atere ’e ’ei ’orometua nō rātou, mai te au i te mau fa’auera’a a te Fatu, ē tae roa mai i te tau i tītau mai ai rātou ’ia taparahi iā’u.

20 Nō reira, ’ua tupu mau atu ra tā te Fatu i parau mai iā’u, i te nā-’ō-ra’a mai ē : ’ia ’ore rātou e fa’aro’o i tā ’oe ra mau parau, e tāpū-’ē-hia ïa rātou mai mua atu i te aro o te Fatu. ’E inaha, ’ua tāpū-’ē-hia rātou mai mua atu i tōna ra aro.

21 ’E ’ua fa’atae mai ’oia i te ’anatemara’a i ni’a iho ia rātou, ’oia ïa, i te ’anatemara’a rahi, nō tā rātou mau ’ohipa ’ī’ino. Inaha ho’i, ’ua fa’a’eta’eta rātou i tō rātou ’ā’au iāna, i riro ai rātou mai te ’ōfa’i ’arā i te pa’ari ; ’e nō te mea ho’i, e ’iri ’uo’uo tō rātou, e mau ta’ata nehenehe maita’i ’e te au-maita’i-hia, nō reira ’ua fa’ariro te Fatu te Atua i tō rātou ’iri ’ei mea ’ere’ere ’ia ’ore rātou ’ia hina’arohia e tō’u ra mau ta’ata.

22 ’E tē nā ’ō mai ra te Fatu te Atua : E fa’ariro vau ia rātou ’ei mau ta’ata hā’iri’iri i tō ’oe ra mau ta’ata, maori rā ’ia tātarahapa rātou i tā rātou mau ’ohipa ’ī’ino.

23 E ’anatemahia te hua’ai o te ta’ata e ’āmui atu i tō rātou hua’ai ; ’e e ’anatemahia rātou i taua ato’a ra ’anatemara’a. ’E nā te Fatu te reira i parau mai, ’e ’ua nā-reira-hia ïa.

24 ’E nō te ’anatemara’a i tu’uhia i ni’a iho ia rātou ’ua riro rātou ’ei mau ta’ata fa’atau, ’e ’ua ’ī ho’i rātou i te peu ’ino ’e te peu ha’avarevare, ’e ’ua ’imi haere noa rātou i te mau ’ānimara ’ōviri i roto i te mēdēbara.

25 ’E ’ua parau mai ra te Fatu te Atua iā’u : E riro rātou ’ei tā’iri i tō ’oe ra hua’ai, nō te fa’aitoito ia rātou ’ia ha’amana’o iā’u ; ’e ’ia ’ore rātou e ha’amana’o iā’u, ’e ’ia ’ore ho’i e ha’apa’o i tā’u ra mau parau, e tā’irihia ïa rātou ē tae atu i te ha’amoura’a.

26 ’E i muri a’era, ’ua fa’atōro’a ihora vau, ’o Nephi, ia Iakoba rāua ’o Iosepha ’ei tahu’a ’e ’ei ’orometua i te fenua o tō’u ra mau ta’ata.

27 ’E i muri a’era, ’ua ora noa ihora mātou ma te ’oa’oa.

28 ’E ’ua ma’iri e toru ’ahuru matahiti mai te tau i fa’aru’e ai mātou ia Ierusalema ra.

29 ’E ’ua ’ō’oti māite ho’i au i te pāpa’a parau o tō’u ra mau ta’ata i ni’a i te mau ’api ’o tā’u i hāmani.

30 ’E i muri a’era, ’ua parau mai ra te Fatu te Atua iā’u : ’A hāmani na i te tahi atu ā mau ’api ; ’e ’a ’ō’oti na ’oe i te mau mea e rave rahi i ni’a i te reira, ’o tei riro ’ei mea maita’i i tō’u hi’ora’a, ’ei faufa’a nō tō ’oe ra mau ta’ata.

31 Nō reira, nō te ha’apa’o i te mau fa’auera’a a te Fatu, ’ua hāmani ihora vau, ’o Nephi, i teie nei mau ’api, ’e i ni’a iho i te reira ’ua ’ō’oti au i teie nei mau mea.

32 ’E ’ua ’ō’oti ihora vau i tei maita’i i te Atua ra. ’E mai te mea ē ’ua māuruuru tō’u ra mau ta’ata i te mau mea a te Atua ra, ’ua māuruuru ïa rātou i tā’u i ’ō’oti i ni’a iho i teie nei mau ’api.

33 ’E mai te mea ē ’ua hina’aro tō’u ra mau ta’ata ’ia ’ite i te tahi atu ā mau tufa’a rahi nō ni’a i te ’ā’amu o tō’u ra mau ta’ata, e mea ti’a ïa ia rātou ’ia ’imi māite i te tahi atu o tā’u ra mau ’api.

34 ’E ’ua ti’a roa ho’i iā’u ’ia parau ē, ’ua ma’iri e maha ’ahuru matahiti, ’e ’ua tupu tā mātou mau tama’ira’a ’e te mau mārōra’a i tō mātou mau taea’e.