1 Ekkewe kapasen Jacob, ewe pwin Nifai, minne a fen kapas ngeni ekkewe aramasen Nifai:

2 Nengeni, pwi achengicheng, ngang, Jacob, ua fen kokko me ren Kot, me seikita mwirin napanapen an tetten mi fel, me ua fen epinipinino me ren pwi we Nifai, ewe oua fen nenengeni pwe emon king ika emon chon tumun, me ewe oua anongonong won ren ami pekin eppet, nengeni oua sinei pwe ua fen kapas ngenikemi usun chommong mettoch.

3 Nge inamo, ua kapas sefan ngenikemi; pun ngang ua wesewesen mochen ewe tufichin ngunumi. Ewer, ai noninen a fokkun watte fan asengesimi; iwe ami aua fen pwisin sinei pwe a fen iei usun. Pun ua fen pesei ngenikemi fiti unusen nikitu; iwe ua fen aiti kemi ekkewe kapas an semei we; me ua fen kapas ngenikemi usun mettoch meinisin minne ra fen makketiw, seni ewe forutan ewe fonufan.

4 Iwe iei, nengeni, upwe kapas ngenikemi usun ekkewe mettoch minne ra fen fis, me repwe feito; ina minne, upwe anneani ngenikemi ekkewe kapasen Isaiah. Iwe ikkei ekkewe kapas minne pwi we a mochen pwe ngang upwe apasa ngenikemi. Iwe ua kapas ngenikemi fan asengesimi, pwe oupwe kaeo me mwareiti ewe iten ami we Kot.

5 Iwe iei, ekkewe kapas minne upwe anneani ikkei ekkewe kapas minne Isaiah a fen kapas usun meinisin chon ewe imwen Israel; ina minne, repwe wewe ngeni usun chok ami, pun ami chon ewe imwen Israel. Me ra chommong mettoch minne a fen kapas seni Isaiah minne repwe usun chok ami, pokiten ami oua chon ewe imwen Israel.

6 Iwe iei, ikkei ekkewe kapas: Iwe ewe Samon Kot a apasa: Nengeni, upwe wata pei ngeni ekkewe chon Gentile, me aueta ai esisin ngeni ekkewe aramas; iwe repwe wato noum anuon non pour, me noum fopun repwe ekireto won afarer.

7 Iwe ekkewe king repwene sememi chon tumun, me nour kewe finesamol repwene inemi chon tumun; repwe chappetiw ngonuk ren meser ngeni ewe puun, me channakaneta toputopun pecheom; iwe kopwe sinei pwe Ngang ewe Samon; pun resap saw ekkewe repwe witiei.

8 Iwe iei, ngang, Jacob, upwe kapas pwan usun ekkei kapas. Pun nengeni, ewe Samon a pwar ngeniei pwe ekkewe ra nom Jerusalem, seni ia sia feito me ie, ra fen ninnino me kekino non fotek.

9 Nge inamo, ewe Samon a pwar ngeniei pwe repwe niwin sefan. Iwe a pwan pwar ngeniei pwe ewe Samon Kot, ewe Emon mi Fel re Israel, epwe pwari pwisin inisin ngeni ir non pekin futuk; me mwirin an epwe pwari pwisin inisin repwe ninni i me irapengesi i, usun ekkewe kapasen ewe chon nang ewe a fen apasa ngeniei.

10 Iwe mwirin ar ra apochokunano netiper me akkumano uwer seni ewe Emon mi Fel re Israel, nengeni, ekkewe kapung an ewe Emon mi Fel re Israel epwe feito nonnom wor. Iwe ewe ran epwe feito pwe repwe kawet me riaffou.

11 Ina minne, mwirin ra susu fetan, pun ewe chon nang a apasa, chommong repwene riaffou non pekin aion, iwe resap riaffou ngeni mano, pokiten ekkewe iotek an ekkewe mi nukuchar; repwe toropas fetan, me kawet, me koput; nge inamo, ewe Samon epwe umoumoch ngeni ir, pwe nupwen repwe feito ngeni ewe mirit usun ar we Chon Angasano, repwene ioi fengen sefan ngeni ekkewe fonuen mwirimwirir kewe.

12 Iwe ra feioch ekkewe chon Gentile, ir ekkewe aramas ewe soufos a makkei usur; pun nengeni, ika pwe repwe aier me resap fiu ngeni Zion, me resap achufengenir ren enan watten me anieputen mwichefen, repwe manau; pun ewe Samon Kot epwe apwonueta an kewe pwon mi pin minne a fen forir ngeni noun semirit; iwe pokiten ei popun ewe soufos a makkei ekkei mettoch.

13 Ina minne, ir ekkewe repwe fiu ngeni Zion me ekkewe aramas pwon noun ewe Samon repwe channakaneta ewe toputopun pecher; me ekkewe aramasen ewe Samon resap saw. Pun ekkewe aramasen ewe Samon ir ekkewe ra witi i; pun ra chok witiwit ngeni feiton ewe Messiah.

14 Pun nengeni, usun ekkewe kapasen ewe soufos, ewe Messiah epwe aueta sefan inisin non ewe aruwen fansoun pun epwe apwakireta; ina minne, i epwe pwari pwisin inisin ngeni ir non manaman me ning mi napanap, tori ewe katanon ekkewe chon oput ir, nupwen ewe ran epwe feito repwene nuku non i; iwe esap wor emon epwe ataieno ena nuku non i.

15 Iwe ir ekkewe resap nuku non i repwe ninnino, ren ekkei, pwan pochokunen asepwan, pwan ren chechechin fonu, pwan ren assuku cha, pwan seni samau, me ren nengita. Iwe repwe pwan sinei pwe ewe Samon i Kot, ewe Emon mi Fel re Israel.

16 Pun ekkewe niapen maun repwe ono seni ewe mi napanap, ika ekkewe mi punguno pwe repwe fotek repwe ngaseno?

17 Nge iei ewe Samon a apasa: Pwan mwo ekkewe mi fotekin ewe mi napanap repwe uweireno, iwe ewe niapen maun epwe angei seni mi ngaw epwene musuno; pun ewe Kot Napanap epwene omusano noun aramas pwon. Pun ewe Samon a apasa: Ngang upwe anini ngeni ir ekkewe ra anini ngonuk—

18 Iwe upwe amwongonir ekkewe ra eriaffouk ren pwisin aioner; repwe sakaweno ren pwisin char epwe usun ita ren wain mi ngarangar; iwe meinisin aion repwe sinei pwe ngang, ewe Samon, ami Chon Amanau me ami Chon Angasano, ewe Emon mi Napanap noun Jacob.