1 Te mau parau a Iakoba, te teina o Nephi, ’o tāna i parau atu i te mau ta’ata o Nephi :

2 Inaha, e tō’u mau taea’e here, i pi’ihia na vau, ’o Iakoba, e te Atua, ’e i fa’atōro’ahia na ho’i au mai te au i tāna ra fa’anahora’a mo’a, ’e i fa’atōro’ahia na ho’i e tō’u ra taea’e, ’o Nephi, ’o tā ’outou i ti’aturi ’ei ari’i ’e ’aore rā ’ei pāruru, ’e ’o tā ’outou ho’i i ti’aturi ’ei ha’apūra’a nō ’outou, inaha, ’ua ’ite ’outou ē, ’ua parau atu vau i te mau mea e rave rahi ia ’outou na.

3 ’Āre’a rā, e parau fa’ahou atu vau ia ’outou ; nō te mea ’ua hina’aro vau ’ia maita’i tō ’outou vārua. ’Oia ïa, ’ua tapitapi roa vau ia ’outou ; ’e ’ua ’ite ’outou ē, ’ua nā-reira-hia mai te mātāmua mai ā. ’Ua a’o atu ho’i au ia ’outou ma te itoito rahi ; ’e ’ua ha’api’i atu ho’i au ia ’outou i te mau parau a tō’u ra metua tāne ; ’e ’ua parau ato’a atu vau ia ’outou nō ni’a i te mau mea ato’a i pāpa’ihia, mai te hāmanira’ahia mai ā o te ao nei.

4 ’E i teienei, inaha, ’ua hina’aro vau i te parau atu ia ’outou nō ni’a i te mau mea e vai nei, ’e i te mau mea e tupu a muri a’e ; nō reira, e tai’o atu vau i te mau parau a Isaia ia ’outou na. ’E ’o te mau parau ho’i ïa tā tō’u taea’e i hina’aro ’ia parau atu vau ia ’outou na. ’E nō tō ’outou iho maita’i e parau atu ai au, ’ia ’ite ’e ’ia fa’ahanahana ho’i ’outou i te i’oa o tō ’outou ra Atua.

5 ’E i teienei, te mau parau tā’u e tai’o atu, ’o te parau ïa tā Isaia i parau nō ni’a i te ’utuāfare pā’āto’a nō ’Īserā’ela ; nō reira, ’ua fa’aauhia ho’i te reira ia ’outou, nō te mea, nō te ’utuāfare ato’a ’outou o ’Īserā’ela. ’E tē vai nei e rave rahi mau mea i parauhia e Isaia ’o tē ti’a ’ia fa’aauhia i ni’a ia ’outou, nō te mea nō te ’utuāfare o ’Īserā’ela ’outou.

6 ’E i teienei, ’o teie ïa taua mau parau ra : Tē nā ’ō mai ra te Fatu te Atua : Inaha, e fa’atoro atu vau i tō’u nei rima i te mau ’Ētene ra, ’e e fa’ati’a ho’i i tō’u reva i te mau ta’ata ; ’e e hōpoi mai rātou i tā ’oe mau tamari’i tamāroa i roto i tō rātou rima, ’e tā ’oe mau tamari’i tamāhine ra ’ia amohia mai ïa i ni’a iho i tō rātou ra mau tapono.

7 E riro te mau ari’i tāne ’ei mau metua tāne fa’a’amu nō ’oe, e tā rātou mau ari’i vahine ’ei metua vahine fa’a’amu nō ’oe ; e tīpapa rātou i raro i mua ia ’oe, ma tō rātou aro i raro i te repo ra, ’e e mitimiti ho’i rātou i te repo i tō ’outou ra ’āvae ; ’e e ’ite ho’i ’oe ē, ’o te Fatu vau ; nō te mea e ’ore ho’i rātou ’o tē tīa’i mai iā’u e ha’amā.

8 ’E i teienei, e parau ri’i au, ’o Iakoba, nō ni’a i teie nei mau parau : Inaha ho’i, ’ua fa’a’ite mai te Fatu iā’u ē, ’ua taparahihia ’e ’ua hōpoi-tītī-hia ho’i te feiā i pārahi i Ierusalema, i te vāhi nō reira mai tātou.

9 ’Āre’a rā, ’ua fa’a’ite mai te Fatu iā’u ē, e ho’i fa’ahou atu rātou. ’E ’ua fa’a’ite ato’a mai ’oia iā’u ē, e fa’a’ite tino mai te Fatu te Atua, Tei Mo’a i ’Īserā’ela, iāna iho ia rātou ra ; ’e i muri iho i tōna fa’a’itera’a mai iāna iho, e taparahi ’e e fa’asātauro rātou iāna, mai tā te melahi i parau mai iā’u ra.

10 ’E i muri iho i tō rātou fa’a’eta’etara’a i tō rātou ’ā’au ’e te ha’apa’arira’a ia rātou iho i Tei Mo’a i ’Īserā’ela, inaha, e tae mai te mau ha’avāra’a a Tei Mo’a i ’Īserā’ela i ni’a ia rātou. ’E tē vai ra te mahana e tā’irihia ai ’e e ’atihia ai ho’i rātou.

11 Nō reira, i muri iho i tō rātou tīahira’ahia i terā vāhi ’e i terā vāhi, tē nā reira mai ra te melahi, e ’ati roa te tahi pae rahi i te tino ra, ’e nō te pure a te feiā parauti’a ra, e ’ore rātou e vaiihohia ’ia pohe ; e ha’apurarahia rātou, e tā’irihia, ’e e ’ino’inohia ho’i ; ’āre’a rā e aroha mai te Fatu ia rātou, ’e ’ia tae rātou i te ’ite i tō rātou Tāra’ehara ; ’ei reira e ha’aputuputu-fa’ahou-hia mai ai rātou i tō rātou fenua ’āi’a.

12 E ao tō te mau ’Ētene ra, rātou ’o tei pāpa’ihia e te peropheta ra ; inaha ho’i, mai te mea e tātarahapa rātou, ’e e’ita rātou e tama’i i tō Ziona, ’e e’ita ho’i e ’āmui atu i taua ’ēkālesia rahi ’e te vi’ivi’i ra, e fa’aorahia ïa rātou ; nō te mea e fa’atupu te Fatu te Atua i tāna mau fafaura’a o tāna i fafau atu i tāna ra mau tamari’i ; ’e nō te reira ho’i te peropheta i pāpa’i ai i teie mau mea.

13 Nō reira, ’o rātou ’o tē tama’i mai i tō Ziona ’e i te feiā i fafau atu i te Fatu ra, e mitimiti ïa rātou i te repo i tō rātou ra ’āvae ; ’e e ’ore roa ho’i te feiā o te Fatu ra e ha’amā. ’O te mau ta’ata ho’i o te Fatu ra ’o tē tīa’i iāna ; ’e e tīa’i noa ho’i rātou i te taera’a mai o te Mesia ra.

14 ’E inaha, mai te au i te mau parau a te peropheta ra, e ha’amata fa’ahou te Mesia i te fa’aora ia rātou i te piti o te taime ; nō reira, ’ia tae i te mahana e ti’aturi ai rātou iāna ra, e fa’a’ite mai ’oia iāna iho ia rātou ma te mana ’e te hanahana rahi, ē tae atu i te ha’amoura’a i tō rātou ra mau ’enemi ; ’e ’aita roa ho’i ’oia e ha’amou i te feiā e ti’aturi iāna.

15 ’E ’o tē ’ore e ti’aturi iāna ra, e ha’amouhia ïa rātou i te auahi, ’e te vero, ’e te mau ’āueuera’a fenua, ’e te ha’amani’ira’a toto, ’e te ma’i rahi, ’e te o’e. ’E e ’ite rātou ē, ’o te Fatu, ’o te Atua ïa, Tei Mo’a i ’Īserā’ela.

16 E noa’a mai ānei ho’i te tao’a pau i riro na i te ta’ata pūai, ’e te feiā parauti’a i haruhia ra, e noa’a mai ānei ’ia haru ?

17 ’E tē nā ’ō mai ra te Fatu : E haru-fa’ahou-hia te feiā tītī i riro i te ta’ata pūai, ’e te tao’a pau i noa’a i te ta’ata ri’ari’a ra, e noa’a fa’ahou mai ïa ; nā te Atua Mana ho’i e fa’aora i tōna feiā i fafau atu iāna. Tē nā ’ō mai ra ho’i te Fatu : E ’aro atu vau ia rātou ’o tē aro mai ia ’oe ra—

18 ’E nā’u e fa’a’amu ia rātou ’o tei hāmani ’ino mai ia ’oe ra i tō rātou iho ’i’o ; e ta’ero ho’i rātou i tō rātou iho toto mai te ta’ero uaina monamona ra ; ’e e ’ite ho’i te mau ta’ata ato’a ē, ’o vau, ’o te Fatu, tō ’oe Fa’aora ’e tō ’oe Tāra’ehara, Tei Pūai i Iakoba nei.