1 Lisin long mi, yufala we i stap folem stret mo gud fasin. Luk long ston we oli bin katemaot yufala long hem, mo long dip hol ia we oli bin pulumaot yufala long hem.

2 Luk long Ebraham, papa blong yufala, mo long Sera, hem we i bin bonem yufala i kam long wol ia; from mi bin singaotem hemwan nomo, mo mi bin blesem hem.

3 From Lod bae i leftemap tingting blong Saeon, bae hem i leftemap tingting blong evri emti ples blong hem; mo bae hem i mekem waelples blong hem i kam olsem Iden, mo drae ples blong hem i kam olsem garen blong Lod. Bae oli faenem glad mo bigfala glad insaed long hem, wetem fasin blong talem tangkyu mo singsing blong pres.

4 Lisin gud long mi, ol pipol blong mi; mo givim sora blong yufala long mi, O kantri blong mi; from wan loa bae i kamaot long mi, mo bae mi mekem jajmen blong mi blong stap olsem wan laet blong ol pipol.

5 Stret mo gud fasin blong mi i stap kolosap; fasin blong mi blong sevem man i bin go aot, mo han blong mi bae i jajem ol pipol. Ol aelan bae oli gat hop long mi, mo bae oli gat tras long han blong mi.

6 Leftemap ol ae blong yufala i go long ol heven, mo lukluk long wol we i stap daon; from ol heven bae oli lus olsem smok, mo wol bae i kam olfala olsem wan klos; mo olgeta we oli stap long hem bae oli ded long sem fasin. Be fasin blong mi blong sevem man bae i stap long oltaem, mo stret mo gud fasin blong mi bae oli no save kanselem.

7 Lisin gud long mi, yufala we i save stret mo gud fasin, yufala ol pipol we mi bin raetem loa blong mi long hat blong yufala, no fraet long taem we ol pipol oli stap blemem yufala, mo tu, yufala i no fraet long ol rabis toktok blong olgeta.

8 From fatfat bataflae bae i kakae olgeta evriwan olsem wan klos, mo wom bae i kakae olgeta evriwan olsem wul. Be stret mo gud fasin blong mi bae i stap blong oltaem, mo fasin blong mi blong sevem man bae i stap long wan jeneresen i go long narafala jeneresen.

9 !Wekap, wekap! Putum paoa long yu, O han blong Lod; wekap olsem long ol dei blong bifo. ?I no yu we i bin katem Rahab, mo bin givim kil long dragon?

10 ?I no yu we i bin mekem solwota i drae, ol solwota ia we oli dip bigwan; we i bin mekem ol dip ples blong solwota i kam wan rod blong olgeta we hem i bin pemaot blong oli save pas tru long hem?

11 From hemia, ol pipol we Lod i bin pemaot bae oli kambak, mo kam wetem ol singsing long Saeon; mo glad ia we i no save finis mo tabu fasin bae i stap long ol hed blong olgeta; mo bae oli kasem glad mo hapines; bigfala harem nogud mo harem sore bae i ronwe.

12 Mi mi hem; yes, mi mi hem we i leftemap tingting blong yu. Luk. ?Yu yu huia, blong bae yu stap fraet long man, we bae i ded, mo long boe blong man, we bae i stap olsem gras?

13 ?Mo yu yu fogetem Lod, man we i mekem yu, we i bin stretemaot ol heven, mo i mekem fandesen blong wol, mo i bin fraet oltaem evri dei, from kros blong enemi, i olsem se hem i rere blong prapa spolem gud samting? ?Mo wehem kros blong enemi?

14 Wan prisena blong wan kantri we i stap farawe i hariap, blong mekem se bae hem i save kam fri, mo mekem se bae hem i no ded long hol, mo blong mekem se bae hem i no sot long bred blong hem.

15 Be mi mi Lod, God blong yu, we ol wef blong mi oli bin mekem bigfala noes; Lod blong Ol Pipol i nem blong mi.

16 Mo mi bin putum ol toktok blong mi long maot blong yu, mo mi bin kavremap yu wetem sado blong han blong mi, blong mekem se mi save planem ol heven mo mekem ol fandesen blong wol, mo talem long Saeon: Luk, yufala, yufala i ol pipol blong mi.

17 Wekap, wekap, stanap, O Jerusalem, we yu bin dring, long han blong Lod, kap ia blong kros blong hem—yu bin dring go kasem ol makas we oli bin skwisimaot blong kap we i mekem man i seksek from fraet,—

18 Mo i no gat wan aot long evri boe we hem i bin bonem blong lidim hem; mo tu, aot long evri boe we hem i bin resemap, i no gat wan we i tekem han blong hem.

19 Tufala boe ia i kam long yu, we bae tufala i sore long yu—long ded blong yu mo long wei we oli prapa spolem gud yu, mo hanggri mo naef blong faet—?mo tru long huia nao bae mi leftemap tingting blong yu?

20 Ol boe blong yu oli foldaon from ae blong olgeta i tudak, be tufala ia nomo i no bin foldaon; tufala i slip long kona blong evri rod; olsem wan wael buluk long wan net, oli fulap long kros blong Lod, long woning toktok blong God blong yu.

21 From hemia, harem samting ia naoia, yu we yu gat hadtaem, mo yu drong, mo i no wetem waen tu.

22 Olsem ia nao Lod blong yu i talem, Lod mo God blong yu i toktok blong difendem pipol blong hem; luk, mi bin tekemaot long han blong yu kap ia we i mekem man i seksek from fraet, makas blong kap blong kros blong mi; bae yu nomo dring bakegen.

23 Be bae mi putum hem long han blong olgeta we oli givim hadtaem long yu; we oli bin talem long sol blong yu se: Bodaon, blong mekem se mifala i save go ova—mo yu yu bin stretem bodi blong yu olsem graon mo olsem rod blong olgeta ia we oli bin go ova.

24 Wekap, wekap, putum paoa blong yu long yu, O Saeon; werem ol naes klos blong yu, O Jerusalem, tabu bigtaon; from stat long taem ia i go, olgeta we oli no sakomsaes mo olgeta we oli no klin, bae i no gat wan bae i kam insaed long yu.

25 Seksekemaot das long yuwan; girap, sidaon, O Jerusalem; tekemaot yuwan long ol rop long nek blong yu, O prisena gel blong Saeon.