1 ’E i teienei, inaha, i muri a’era, ’ua fa’aro’o te mau ta’ata ato’a o te fenua i teie mau parau, ’e ’ua riro rātou ’ei ’ite nō te reira. ’E i muri a’e i teie mau paraura’a, ’ua vai te māniania ’ore i ni’a i te fenua nō te ārea e rave rahi hora te maoro.

2 Nō te māere rahi ho’i o te mau ta’ata, ’ua fa’aea ihora rātou i te ’oto ’e te ’auē nō te pohe o tō rātou mau fēti’i ’o tei taparahihia ; nō reira ’ua vai noa te māniania ’ore i ni’a i te fenua nō te ārea e rave rahi hora te maoro.

3 ’E i muri a’era, ’ua tae fa’ahou mai ra te hō’ē reo i te mau ta’ata, ’e ’ua fa’aro’o te mau ta’ata ato’a i te reira, ’e ’ua riro rātou ’ei ’ite nō te reira, i te nā-’ō-ra’a ē :

4 E te mau ta’ata nō teie mau ’oire rarahi i ha’amouhia ra, ’oia te mau hua’ai nō Iakoba, ’oia ïa, nō te ’utuāfare o ’Īserā’ela, e rave rahi ho’i tō’u ha’aputuputura’a ia ’outou mai te moa e ha’aputuputu i tōna mau fanau’a i raro a’e i tōna nā pererau, ’e e rave rahi ho’i tō’u fa’a’amura’a ia ’outou na.

5 ’E ’oia fa’ahou, e rave rahi tō’u ha’aputuputura’a ia ’outou mai te moa i ha’aputuputu i tōna mau fanau’a i raro a’e i tōna nā pererau, ’oia ïa, ’e te mau ta’ata nō te ’utuāfare o ’Īserā’ela ’o tei topa ; ’oia ïa, ’e te mau ta’ata nō te ’utuāfare o ’Īserā’ela tei pārahi i Ierusalema, ’e ’ia ’outou ato’a ’o tei topa ; ’oia ïa, e rave rahi tō’u ha’aputuputura’a ia ’outou mai te moa i ha’aputuputu i tōna mau fanau’a, ’e ’aita ’outou i nā reira.

6 ’O ’outou te ’utuāfare o ’Īserā’ela ē, ’o tā’u i fa’aherehere, e rave rahi tō’u ha’aputuputura’a ia ’outou mai te moa e ha’aputuputu i tōna mau fanau’a i raro a’e i tōna nā pererau, mai te mea e tātarahapa ’outou ’e e fāriu mai iā’u nei ma te ’ā’au hina’aro mau.

7 ’Ia ’ore rā ’outou e nā reira, e te ’utuāfare o ’Īserā’ela, e fa’aanohia tō ’outou mau vāhi fa’aeara’a, ē tae noa atu i te taime e tupu ai te fafaura’a i fafauhia atu i tō ’outou ra mau metua.

8 ’E i teienei, i muri iho i tō te mau ta’ata fa’aro’ora’a i taua mau parau ra, inaha, ’ua ha’amata fa’ahou a’era rātou i te ’oto ’e i te ’auē nō te pohe o tō rātou mau fēti’i ’e tō rātou mau hoa.

9 ’E i muri a’era, ’ua hope ihora nā mahana e toru. E po’ipo’i a’era, ’ua pe’e ’ē atu ra te pōiri mai ni’a atu i te fenua, ’e ’ua fa’aea te ’āueuera’a o te fenua, ’e ’ua fa’aea te mau mato i te ’āfāfā, ’e ’ua fa’aea te mau autā ri’ari’a, ’e ’ua ’ore te mau haruru rahi roa ra.

10 ’E ’ua piri fa’ahou ihora te fenua, ’e ’ua fa’aea noa ihora ; ’e ’ua ’ore a’era te autā, ’e te oto, ’e te ’auē a te feiā i fa’aorahia ra ; ’e ’ua riro a’era tā rātou autāra’a ’ei ’oa’oara’a, ’e tā rātou auēra’a ’ei ’āruera’a ’e ’ei ha’amaita’ira’a ho’i i te Fatu ra ’o Iesu Mesia, tō rātou Tāra’ehara.

11 Ē tae roa mai i teienei, ’ua tupu iho ā te mau mea i pāpa’ihia i roto i te mau pāpa’ira’a mo’a ’o tei parauhia e te mau peropheta.

12 ’E ’o te tufa’a parauti’a roa o te mau ta’ata tei fa’aorahia, ’e ’o rātou ato’a ’o tei fāri’i i te mau peropheta ’e ’aore i pēhi ia rātou i te ’ōfa’i ; ’e ’o rātou ho’i ’o tei ’ore i ha’amani’i i te toto o te feiā mo’a tei fa’ahereherehia—

13 ’E ’ua fa’ahereherehia rātou ’e ’aita rātou i fa’atomohia ’e i hunahia i raro a’e i te fenua ; ’e ’aita rātou i ha’aparemohia i raro i te hōhonura’a o te miti ; ’e ’aita rātou i pa’apa’a i te auahi, ’e ’aita ato’a rātou i ha’aperehuhia ē pohe roa atu ; ’e ’aita ato’a i ’āfa’ihia atu e te pūāhiohio ; ’e ’aita ato’a ho’i rātou i pohe i te māhu au auahi ’e te pōiri.

14 ’E i teienei, ’o ’oia ’o tē tai’o i teie nei parau, ’ia māramarama ïa ’oia ; ’o ’oia tei iāna te mau pāpa’ira’a mo’a, ’ia ’imi ïa ’oia i te reira, ’ia ’ite ’e ’ia hi’o i taua mau pohe nei, ’e te mau pau i te auahi, ’e i te au auahi, ’e i te mau vero, ’e i te mau pūāhiohio, ’e i te ’āfāfāra’a o te fenua nō te fāri’i ia rātou, ’e taua mau mea ato’a ra, e ’ere ānei ïa nō te fa’atupu-mau-ra’a i te mau parau tohu a te mau peropheta mo’a e rave rahi.

15 Inaha, tē parau atu nei au ia ’outou na : ’Oia roa ïa, e rave rahi tei fa’a’ite pāpū mai i teie mau mea nō te taera’a mai o te Mesia, ’e ’ua taparahihia rātou nō tō rātou fa’a’ite-pāpū-ra’a mai i teie mau mea.

16 ’Oia mau, ’ua fa’a’ite pāpū mai te peropheta Zenosa i teie mau mea, ’e ’ua parau ato’a mai Zenoke nō ni’a i teie mau mea, nā rāua ho’i i fa’a’ite pāpū mai i te parau nō ni’a ia tātou, ’oia ho’i te hō’ē toe’a nō tō rāua hua’ai.

17 Inaha, ’ua fa’a’ite pāpū ato’a tō tātou metua tāne o Iakoba i te parau nō te hō’ē toe’a o te hua’ai o Iosepha. ’E inaha, e ’ere ānei tātou i te hō’ē toe’a nō te hua’ai o Iosepha ? ’E teie mau mea ’o tei fa’a’ite pāpū mai i te parau nō ni’a ia tātou nei, ’aita ānei te reira i pāpa’ihia i ni’a iho i te mau ’api veo i hōpoihia mai e tō tātou metua tāne ra o Lehi mai Ierusalema mai ?

18 ’E i muri a’era, i te hope’a nō te toru ’ahuru ’e ma maha o te matahiti, inaha, e fa’a’ite atu vau ia ’outou e te mau ta’ata o Nephi ’o tei fa’ahereherehia, ’e ’ia rātou ato’a ’o tei parauhia e mau ’āti Lamana ’e ’o tei fa’ahereherehia, ’ua ha’amaita’i-rahi-hia ïa rātou, ’e ’ua nīni’ihia mai te mau mea maitata’i i ni’a iho i tō rātou upo’o, ’e nō reira ho’i, i muri noa iho i tō te Mesia haerera’a i ni’a i te ra’i, ’ua fa’a’ite mau ’oia iāna iho ia rātou—

19 ’Ua fa’a’ite mai ’oia i tōna tino ia rātou, ’e ’ua tāvini ’oia ia rātou ; ’e e pāpa’ihia te ’ā’amu nō tāna ra tāvinira’a ia rātou i muri nei. Nō reira tē fa’aoti nei au i tā’u mau parau i teie nei taime.