1 Ma e moni, e moni, ou te fai atu ia te outou, ua i ai ia te au ni isi mamoe, e lē o i lenei laueleele, pe o i le laueleele o Ierusalema, pe o i soo se vaega o lena laueleele faataamilo ia sa ou auauna atu ai.

2 Ona o i latou ua ou tautala atu ai, o i latou ia o ē e lei faalogo lava i lo’u leo; pe na ou faaali atu i ai o a’u lava i soo se taimi.

3 Ae ua ou maua se poloaiga mai le Tamā ia ou alu atu ia te i latou, ma o le a faalogo i latou i lo’u leo, ma o le a faitauina faatasi ma a’u mamoe, ina ia tasi le lafu ma tasi le leoleo mamoe; o lea ou te alu atu ai e faaali atu a’u lava ia te i latou.

4 Ma ou te poloai atu ia te outou ia outou tusia nei upu pe a mavae ona ou alu, ina afai e le ole atu ai i le Tamā i lo’u igoa o’u tagata o i Ierusalema, i latou ia o ē na vaai ia te a’u ma faatasi ma a’u i la’u galuega, ina ia latou maua se malamalama e uiga ia te outou e ala i le Agaga Paia, ma e uiga foi i isi ituaiga latou te lē o iloa, o le a tausia nei upu o le a outou tusia ma o le a faaali atu i Nuuese, ina ia mafai, e ala i le atoatoaga o Nuuese, ona aumai i totonu, le vaega o totoe o a latou fanau, o ē o le a faataapeapeina i luga o le fogaeleele ona o lo latou lē talitonu, pe aumai i latou i se malamalama e uiga ia te a’u, lo latou Togiola.

5 Ma ona ou faapotopoto lea o i latou mai itu e fa o le lalolagi; ona ou faataunuuina lea o le feagaiga lea na faia e le Tamā i tagata uma o le aiga o Isaraelu.

6 Ma amuia lava Nuuese, ona o lo latou talitonu ia te au, e ala mai i le Agaga Paia, o lē e molimau ia te i latou e uiga ia te au ma e uiga i le Tamā.

7 Faauta, ona o lo latou talitonu ia te au, ua fetalai mai ai le Tamā, ma ona o le lē talitonu o outou, le aiga e, o Isaraelu, o aso e gata ai o le a oo atu ai le upumoni i Nuuese, ina ia faaali atu ia te i latou le atoatoa o nei mea.

8 Ae oi talofa, ua fetalai mai ai le Tamā, i ē o Nuuese e le talitonu—ona e ui ina ua latou o mai i lenei laueleele, ma faataapeape o’u tagata o ē o le aiga o Isaraelu; ma o o’u tagata o ē o le aiga o Isaraelu ua tutuli ese mai totonu ia te i latou, ma ua soli i lalo o vae e i latou;

9 Ma ona o le alofa mutimutivale o le Tamā i Nuuese, ma faamasinoga foi a le Tamā i luga o o’u tagata o ē o le aiga o Isaraelu, e moni, e moni, ou te fai atu ia te outou, e ui i nei mea uma, ma ua ou faia ia taia o’u tagata o ē o le aiga o Isaraelu, ma ia faapuapuagtiaina, ma ia fasia, ma ia tutuli ese mai totonu ia te i latou, ma ia inosiaina e i latou, ma ia avea ma e amusia ma faalumaina i totonu ia te i latou—

10 Ma ua faapea ona poloai mai o le Tamā ia ou fai atu ia te outou: I lena aso e agasala ai Nuuese e faasaga i la’u talalelei, ma tetee le atoatoaga o la’u talalelei, ma faafefeteina i le faamaualuluga o o latou loto i luga o atunuu uma, ma luga o tagata uma o le lalolagi atoa, ma faatumuina i ituaiga o pepelo eseese uma, ma taufaasese, ma ulavalega, ma ituaiga uma o molimau pepelo, ma fasioti tagata, ma faitaulaga pepelo, ma faitaaga, ma mea inosia faalilolilo; ma afai latou te faia na mea uma, ma latou teena le atoatoaga o la’u talalelei, faauta, ua fetalai mai le Tamā, o le a ou ave le atoatoaga o la’u talalelei mai totonu ia te i latou.

11 Ma ona ou manatua lea o la’u feagaiga na ou faia i lo’u nuu, le aiga e, o Isaraelu, ma o le a ou aumaia la’u talalelei ia te i latou.

12 Ma o le a ou faaali atu ia te oe, le aiga e, o Isaraelu, o le a lē maua e Nuuese se mana i luga o oe; ae o le a ou manatua la’u feagaiga ia te outou, le aiga e, o Isaraelu, ma o le a outou o mai i le malamalama o le atoatoaga o la’u talalelei.

13 Ae afai e salamo Nuuese ma liliu mai ia te au, ua fetalai mai ai le Tamā, faauta o le a faitauina i latou i totonu o lo’u nuu, o le aiga o Isaraelu.

14 Ma o le a ou le tuua o’u tagata, o ē o le aiga o Isaraelu, e o atu i totonu ia te i latou, ma solia i latou i lalo, ua fetalai mai ai le Tamā.

15 Ae afai o le a latou le liliu mai ia te au, ma faalogo mai i lo’u leo, o le a ou tuuina i latou, ioe, o le a ou tuuina o’u tagata, o le aiga o Isaraelu, ina ia latou o atu i totonu ia te i latou, ma soli i latou i lalo, ma o le a avea i latou e pei o le masima ua leai sona tofo, ma e mai lena taimi ua leai sona aoga ae na’o le lafoaiina i fafo, ma solia i lalo o vae o o’u tagata, o le aiga o Isaraelu.

16 E moni, e moni, ou te fai atu ia te outou, ua faapea ona poloaiina a’u e le Tamā—e tatau ona ou tuuina atu i lenei nuu lenei laueleele e avea mo o latou tofi.

17 Ma ona faataunuuina ai lea o upu a le perofeta o Isaia, ua fai mai:

18 O le a sii ae e ou leoleo le leo; ma o le a latou pepese faatasi i le leo, ona o le a latou vaai i latou lava pe a toe aumai Siona e le Alii.

19 Alalaga ia i le olioli, ia pepese faatasi, outou nofoaga tuufua o Ierusalema, ona ua faamafanafanaina e le Alii lona nuu, ua ia togiolaina Ierusalema.

20 Ua faaali e le Alii lona aao paia i mata o atunuu uma; ma o le a vaai tuluiga uma o le lalolagi i le faaolataga a le Atua.