1 Faauta, o lenei sa oo ina ua uma ona fetalai mai e Iesu o nei upu sa ia toe silasila solo faataamilo i le motu o tagata, ma sa ia fetalai mai ia te i latou: Faauta, ua oo mai lo’u taimi.

2 Ua ou iloa ua outou vaivai, ua le mafai ona outou malamalama i a’u upu uma ia na poloaiina ai a’u e le Tamā e tautala atu ia te outou i le taimi nei.

3 O lea, ia outou o atu i o outou fale, ma mafaufau i mea ia na ou fai atu ai, ma ole atu i le Tamā, i lo’u igoa, ina ia outou malamalama, ma saunia o outou mafaufau mo a taeao, ma ou te toe sau ai ia te outou.

4 Ae o le a ou alu atu nei i le Tamā, ma e faaali atu foi a’u lava i ituaiga ua leiloloa o Isaraelu, aua ua le o leiloloa i latou i le Tamā, ona ua silafia e ia le mea ua ia ave i ai i latou.

5 Ma sa oo ina ua uma ona fetalai atu faapea o Iesu, sa toe silasila solo faataamilo ona fofoga i luga o le motu o tagata, ma silasila atu ua maligi o latou loimata, ma ua latou pulatoa mai ia te ia e peiseai ua latou mananao e ole mai ia te ia ia afio pea o ia faatasi ma i latou mo sina taimi umi teisi atu.

6 Ma sa ia fetalai mai ia te i latou: Faauta, ua faatumuina o’u lagona i le agaalofa ia te outou.

7 E i ai ea ni isi o ia te outou ua mamai? Ia aumai i latou iinei. E i ai ea ni isi o outou ua pipili, pe ua tauaso, pe ua setu, pe ua manua, pe ua lepela, pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua faatumuina o’u lagona i le alofa mutimutivale.

8 Aua ua ou iloa ua outou mananao ia ou faaali atu ia te outou mea na ou faia i o outou uso i Ierusalema, aua ua ou iloa ua lava lo outou faatuatua ou te faamaloloina ai outou.

9 Ma sa oo ina ua uma ona fetalai mai o ia faapea, sa o atu faatasi uma le motu o tagata, ma o latou tagata mamai ma o latou tagata puapuagatia, ma o latou pipili, ma o latou tauaso, ma o latou gugu, ma i latou uma o e na puapuagatia i soo se ala; ma sa ia faamaloloina i latou uma taitoatasi ina ua aumaia i latou ia te ia.

10 Ma o i latou uma, i latou uma o e na faamaloloina ma i latou o e na malolosi, sa latou punonou ifo i lalo i ona vae, ma tapuai atu ia te ia; ma o le toatele o i latou o le motu o tagata o e na mafai ona o atu sa sogi i ona vae, sa oo ina latou faataeleina ona vae i o latou loimata.

11 Ma sa oo ina poloai mai o ia ia avatu a latou fanau laiti.

12 O lea na latou aumai ai a latou fanau laiti ma ua faanonofo i latou i lalo i luga o le eleele faataamilo ia te ia, ma sa tulai Iesu i le totonugalemu; ma sa soso ese le motu o tagata seia oo ina aumai i latou uma ia te ia.

13 Ma sa oo ina ua uma ona aumai o i latou uma, ma sa tulai Iesu i le totonugalemu, sa ia poloaiina le motu o tagata ia latou tootutuli i lalo i luga o le eleele.

14 Ma sa oo ina ua uma ona latou tootutuli i luga o le eleele, sa oi Iesu i totonu ia te ia lava, ma fetalai: Le Tamā e, ua ou ātu lava ona o le amioleaga o tagata o le aiga o Isaraelu.

15 Ma ina ua uma ona ia fetalai i nei upu, sa tootuli foi o ia lava i luga o le eleele; ma faauta, sa tatalo atu o ia i le Tamā, ma o mea sa ia tatalo atu ai ua le mafai ona tusia, ma sa molimau le motu o tagata o ē na faalogo ia te ia.

16 Ma ua faapenei le ala ua latou molimau mai ai: E lei vaaia lava e le mata, pe na faalogoina foi muamua e le taliga, le tetele ma le ofoofogia naua o mea e pei ona matou vaai ma faalogo o fetalai ai Iesu i le Tamā.

17 Ma e le mafai e se laulaufaiva ona tautala ai, pe mafai foi e se tagata ona tusia, pe mafai foi e loto o tagata ona malamalama i mea e faapea ona tetele ma le ofoofogia naua e pei ona matou vaai ma faalogo o fetalai i ai Iesu; ma e leai se tagata e mafai ona malamalama i le olioli lea na faatumuina ai o matou loto i le taimi na matou faalogo ai ia te ia o tatalo atu i le Tamā mo i matou.

18 Ma sa oo ina ua uma ona faaiu e Iesu le tatalo atu i le Tamā, sa tulai o ia; ae sa matua tele naua le olioli o le motu o tagata sa lofituina i latou.

19 Ma sa oo ina fetalai mai Iesu ia te i latou, ma poloai mai ia latou tutulai.

20 Ma sa latou tutulai mai le eleele, ma sa ia fetalai mai ia te i latou: Amuia lava outou ona o lo outou faatuatua. Ma o lenei faauta, ua atoatoa lo’u olioli.

21 Ma ina ua uma ona ia fetalai mai o nei upu, sa tutulu o ia, ma sa molimauina e le motu o tagata lenei mea, ma sa ia ave a latou fanau laiti, taitoatasi, ma faamanuia i latou, ma tatalo atu i le Tamā mo i latou.

22 Ma ina ua uma ona ia faia o lenei mea sa toe tutulu o ia;

23 Ma sa ia fetalai mai i le motu o tagata, ma fofoga mai ia te i latou: Faauta i o outou tamaiti.

24 Ma a o latou vaai atu sa tetepa ae o latou mata e faasaga i le lagi, ma sa latou vaai ua avanoa le lagi, ma sa latou vaai i agelu ua afifio ifo mai le lagi e peiseai ua i ai i le totonugalemu o se afi; ma sa latou afifio ifo i lalo ma li’o faataamilo ia tamaiti laiti, ma sa li’o faataamilo i latou i se afi; ma sa auauna atu agelu ia te i latou.

25 Ma sa vaai ma faalogo ma molimau le motu o tagata; ma ua latou iloa ua moni la latou molimau ona sa latou vaai ma faalogo uma, o tagata taitoatasi mo ia lava; ma o lo latou aofai pe tusa o le lua afe ma le lima selau tagata; ma sa aofia ai i latou o tane, fafine, ma tamaiti.