1 O lenei sa oo ina mavae atu le tausaga e ivasefulu ma le tasi ma o le ono selau lea o tausaga mai le taimi na tuua ai e Liae Ierusalema; ma o le tausaga lea sa avea ai Lakoneu ma faamasino sili ma kovana i le laueleele.

2 Ma o Nifae, le atalii o Helamana, ua alu ese atu mai le laueleele o Sara’emila, ma tuu atu ai i lona atalii o Nifae, o lona atalii matua ia, le tiute e faatatau i papatusi apamemea, ma talafaamaumau uma ia sa tausia, ma mea uma na tausia i le paia mai i le tuua ai e Liae o Ierusalema.

3 Ona alu ese atu ai lea o ia mai le laueleele, ma pe o fea na alu i ai o ia, e leai se tagata ua ia iloaina; ma sa tausia talafaamaumau e lona atalii o Nifae e suitulaga ia te ia, ioe, o talafaamaumau o lenei nuu.

4 Ma sa oo i le amataga o le tausaga e ivasefulu ma le lua, faauta, sa amata ona faataunuu i le atoatoa valoaga a perofeta; ona sa amata ona i ai o faailoga tetele ma vavega tetele na faailoa mai i totonu o le nuu.

5 Peitai sa i ai ni isi o e sa amata ona fai mai ua mavae le taimi mo le faataunuuina o upu, ia sa tautala i ai Samuelu, le sa Lamanā.

6 Ma sa amata ona latou olioli i o latou uso, fai mai: Faauta ua te’a atu le taimi, ma ua le faataunuuina upu a Samuelu; o lea, ua lē aoga lo outou olioli ma lo outou faatuatua i lenei mea.

7 Ma sa oo ina latou faatupu se vavaō tele i le laueleele atoa; ma o tagata o e sa talitonu na amata ona faanoanoa tele, nei i ai se ala atonu e le taunuu ai ia mea sa tautalagia.

8 Ae faauta, sa latou vaavaai ma le mausalī pea mo lena ao ma lena po ma lena ao lea e tatau ona avea e pei o se aso e tasi e peiseai ua leai se po, ina ia latou iloa ai ua lē aoga lo latou faatuatua.

9 O lenei sa oo ina sa i ai se aso sa tuupoina e e sa le talitonu e fasioti ai i latou uma o e na talitonu i ia uputuu, vagana ai ua taunuu le faailoga lea na tuu mai e Samuelu le perofeta.

10 O lenei sa oo ina ua vaai atu Nifae, le atalii o Nifae, i lenei amioleaga o lona nuu, sa faanoanoa tele lava lona loto.

11 Ma sa oo ina alu atu o ia ma punou ifo o ia lava i luga o le eleele, ma tagi faatauanau atu i lona Atua mo ona tagata, ioe, o i latou ia o e o le a faaumatiaina ona o lo latou faatuatua i uputuu a o latou tamā.

12 Ma sa oo ina tagi faatauanau atu o ia i le Alii i lena aso atoa; ma faauta, sa oo mai le siufofoga o le Alii ia te ia, ua fetalai mai:

13 Inā ea ia lou ulu ma ia olioli; aua faauta, ua oo mai lava le taimi, ma o le po nei o le a tuu atu ai le faailoga, ma o taeao ou te alu atu ai i le lalolagi, e faaali atu ai i le lalolagi o le a ou faataunuuina mea uma ia sa ou poloaiina ia tautalagia e fofoga o a’u perofeta paia.

14 Faauta, ou te alu atu i o’u lava, e faataunuu mea uma ia na ou faailoa atu i le fanauga a tagata mai le faavaega o le lalolagi, ma fai le finagalo uma o le Tamā ma le Atalii—o le Tamā ona o au, ma o le Atalii ona o lo’u tino. Ma faauta, ua oo mai lava le taimi, ma o le po nei o le a tuuina atu ai le faailoga.

15 Ma sa oo ina faataunuuina upu ia na oo mai ia Nifae, e pei lava ona fetalai i ai; aua faauta, i le alu ifo i lalo o le la, sa leai se pogisa; ma sa amata ona ofo o tagata ona sa leai se pogisa ina ua sau le po.

16 Ma sa i ai se toatele, o e sa le talitonu i upu a perofeta, sa pa’u’ū ifo i le eleele ma avea e peiseai ua feoti, ona sa latou iloa ua faaleaogaina le fuafuaga tele o le faafanoga lea sa latou faataatia mo i latou o e na talitonu i upu a perofeta; ona ua oo mai lava le faailoga lea sa tuuina mai.

17 Ma sa amata ona latou iloa, ua lata ona afio mai le Alo o le Atua; ioe, i se aotelega, i tagata uma sa i luga o le eleele atoa mai sisifo i sasae, i le laueleele uma i matu ma le laueleele i saute, sa matua ofo tele o lea sa latou pa’u’ū ifo ai i le eleele.

18 Ona sa latou iloa sa molimau mai perofeta e uiga i nei mea mo tausaga e tele, ma ua oo mai lava le faailoga lea na tuuina mai; ma sa amata ona latou matatau ona o lo latou amioletonu ma lo latou le talitonu.

19 Ma sa oo ina sa leai se pogisa i lena po atoa, ae sa malamalama e pei o le aoauli. Ma sa oo ina toe oso mai le la i le taeao, e tusa ma lona tulaga e tatau ai; ma sa latou iloa o le aso lea o le a fanau mai ai le Alii, ona o le faailoga lea na tuuina mai.

20 Ma ua faataunuuina, ioe, mea uma lava, o mea auiliili taitasi, e tusa ma upu a perofeta.

21 Ma sa oo foi ina oso mai se fetu fou, e tusa ma ana afioga.

22 Ma sa oo ina amata mai i le taimi nei ma le agai atu i luma ona auina atu o pepelo, e Satani, i tagata, e faamaaa ai o latou loto, i le faamoemoe ia latou le talitonu ai i faailoga ma mea ofoofogia ia na latou vaai i ai; peitai e ui i ia pepelo ma taufaasese, sa talitonu le vaega toatele o tagata, ma sa faaliliuina i latou i le Alii.

23 Ma sa oo ina alu atu Nifae, ma isi foi e toatele, i tagata, ma papatiso atu i le salamo, lea na oo mai ai se faamagaloga tele o agasala. Ma sa faapea ona amata ona toe maua ai e tagata le filemu i le laueleele.

24 Ma sa le i ai ni finauga, vagana ai i latou e toaitiiti sa amata ona latou tala’i atu, ua taumafai e faamaonia atu mai i tusitusiga paia ua le tatau ona toe tausia o le tulafono a Mose. O lenei, sa sese i latou i lenei mea, ona sa latou le malamalama i tusitusiga paia.

25 Peitai sa oo ina sa lei umi ae faaliliuina i latou, ma talitonu i le sese lea sa latou i ai, ona sa faailoa atu ia te i latou e lei oo ina faataunuuina le tulafono, ma o le a faataunuuina lava i auiliiliga taitasi; ioe, sa oo mai ia te i latou le afioga o le a faataunuuina lava; ioe, e le mavae atu se iota po o se mataitusi seia faataunuuina uma; o lea, o lenei lava tausaga na aumai ai i latou i le iloa o lo latou sese ma sa latou tautino mai o latou vaivaiga.

26 Ma sa faapea ona mavae atu o le tausaga e ivasefulu ma le lua, na aumai ai tala fiafia i tagata ona o faailoga ia na faataunuuina e tusa ma upu o valoaga a perofeta paia uma.

27 Ma sa oo ina mavae atu foi le tausaga e ivasefulu ma le tolu i le filemu, vagana ai le au faomea a Katianetona, o e sa nonofo i luga o mauga, o e sa lilofia ai le laueleele; ona sa matuā malolosi lava o latou ’olo ma o latou nofoaga lilo sa le mafai ai e le nuu ona faatoilalo i latou; o lea na latou fasioti ai tagata e toatele, ma faia sauaga e tele i totonu o tagata.

28 Ma sa oo i le tausaga e ivasefulu ma le fa, sa amata ona faatoateleina o i latou i se tulaga tele, ona sa i ai le toatele o tagata faatuiese o sa Nifaē o e sa sosola atu ia te i latou, o se mea sa oo ai le faanoanoa tele ia i latou o sa Nifaē o e sa nonofo pea i le laueleele.

29 Ma sa i ai foi se pogai na faanoanoa tele ai tagata sa Lamanā; aua faauta, sa i ai le toatele o a latou fanau sa tutupu ae ma faasolo malolosi i tausaga, sa latou fai mo i latou lava, ma sa ta’ita’i ese e ni isi o sa Soramā, ia latou pepelo ma a latou upu faaviivii, ia auai i le au faomea a Katianetona.

30 Ma sa faapea foi ona puapuagatia sa Lamanā, ma ua amata ona faaitiitia i lo latou faatuatua ma la latou amiotonu, ona o le amioleaga o le tupulaga fai a’e.