1 Iei non ewe fansoun pwe ewe tiwe me ewin ier a wesino iwe a wone puku ier seni ewe fansoun Liai a su seni Jerusalem; iwe a non ewe ier Lakonias a ewe sou apung mi nap me we kepina won ewe fonu.

2 Iwe Nifai, ewe noun Ilaman, a fen tou seni ewe fonuen Saraemla, a wano nemenem ngeni noun we Nifai, i ewe noun mwanichi, usun ekkewe seleichen brass, me ekkewe uruo meinisin minne ra fen mak non, me ekkewe mettoch meinisin minne ra fen tumun non monomon nupwen ewe tou an Liai seni Jerusalem.

3 Mwirin a tou seni ewe fonu, iwe ian a feino ie, ese wor emon mi sinei; iwe noun we Nifai a sopweno ne makkei ekkewe uruo non nenian we, ewer, ewe uruon ekkei aramas.

4 Iwe non ewe fansoun pwe non nepoputan ewe tiwe me ruen ier, nengeni, ekkewe osini an ekkewe soufos ra poputa ne pwonueta non unusoch; pun a poputa ne wor amwararen esisin me amwararen manaman a fis me nein ekkewe aramas.

5 Nge mi wor ekkoch ekkewe ra poputa ne apasa pwe ewe fansoun a wesino ren an ekkewe kapas repwe pwonueta, minne ra fen affateno me ren Samuel, ewe chon Leiman.

6 Iwe ra poputa ne pwapwaiti pwir kewe, ra apasa: Nengeni ewe fansoun a wesino, iwe ekkewe kapas an Samuel rese pwonueta; iei minne, ami pwapwa me ami nuku usun ei mettoch a fen namotmwan.

7 Iwe non ewe fansoun pwe ra efisi ew ennetin afitikoko non unusen ewe fonu; iwe ekkewe aramas mi nuku ra poputa ne ennetin netipechou, ren nuokusun ika ren och popun ekkewe mettoch minne ra fen affateno resap fisino.

8 Nge nengeni, ra tipepos ne mammasa usun ena ran me ena pwinin me ena ran minne epwe ew chok ran usun ita esap wor pwin, pwe repwe tongeni sinei pwe ar nuku ese fen namotmwan.

9 Iei non ewe fansoun pwe mi wor ew ran a keimuno me ren ekkewe rese nuku, pwe meinisin ekkewe ra nuku non ekkewe eereni repwe ninnino tiwenon chok ika ewe esisin epwe fisino, minne a fen kawor me ren Samuel ewe soufos.

10 Iei non ewe fansoun pwe nupwen Nifai, ewe noun Nifai, a kuna ei fofforungaw an noun kewe aramas, netipan a fokkun netipechou.

11 Iwe non ewe fansoun pwe a feiniuu me pwisin chappetiw won ewe puun, me a ennetin sio ngeni an Kot fan asengesin noun kewe aramas, ewer, ekkewe ita repwene ninnino pokiten ar nuku non eerenien semer kewe.

12 Iwe non ewe fansoun pwe a ennetin sio ngeni ewe Samon unusen ena ran; iwe nengeni, mongungun ewe Samon a feito ngeni i, a apasa:

13 Sachetai mokurom me kopwe apinukunuk; pun nengeni, ewe fansoun a arapeto, iwe non ei pwinin ewe esisin epwe kawor, me non ewe soran Ngang upwe feito ngeni ewe fonufan, pwe upwe pwarano ngeni ewe fonufan pwe Ngang upwe apwonueta mettoch meinisin minne Ua fen efisi pwe repwe affateno me ren awen nei kewe soufos mi fel.

14 Nengeni, Ngang upwe pwisin feito ngeni nei, pwe upwe apwonueta mettoch meinisin minne Ua fen pwarano ngeni ekkewe noun aramas seni nepoputan ewe fonufan, me upwe fori ewe mochen, an ewe Samon me pwan an ewe Nau—mochenin ewe Sam pokiten ngang, me mochenin ewe Nau pokiten aionei. Iwe nengeni, ewe fansoun a arapeto, iwe ei pwinin ewe esisin epwe kawor.

15 Iwe non ewe fansoun pwe ekkewe kapas minne ra feito ngeni Nifai ra pwonueta, anongonong won usun ra fen affateno; pun nengeni, atun feitiwen ewe akkar ese wor rochopwak; iwe ekkewe aramas ra poputa ne ingeno pokiten ese wor rochopwak nupwen ewe pwinin a feito.

16 Iwe mi chommong, ekkewe rese nuku ekkewe kapas an ekkewe soufos, ekkewe ra turuno ngeni ewe puun me winiti usun ita ir mi mano, pun ra sinei pwe ewe watten kokkotun kiteter minne a fen foruta fan asengesin ekkewe ra nuku non ekkewe kapas an ekkewe soufos a fen kouno; pun ewe esisin minne a fen kawor a fen fisino.

17 Iwe ra poputa ne sinei pwe ewe Noun Kot epwe fokkun mwitir pwato; ewer, iwe amuchunon, ekkewe aramas meinisin won unungen unusen ewe fonufan seni notou ngeni otiw, me non ewe fonu ennefen me pwan non ewe fonu eor, ra fokkun ingeno iwe ra turuno ngeni ewe puun.

18 Pun ra sinei pwe ekkewe soufos ra fen pwarata usun ekkei mettoch ren chommong ier, me pwe ewe esisin minne a fen a fen kawor a fen fisino; iwe ra poputa ne nuokus pokiten ar angangangaw me ar nukunukumang.

19 Iwe non ewe fansoun pwe ese wor rochopwak non unusen ena pwinin, nge a saram usun ita neanowas. Iwe non ewe fansoun pwe ewe akkar a tota sefan non ewe soran, anongonong won pwisin kokkotan; iwe ra sinei pwe ina ewe ran ewe Samon epwene uputiw, pokiten ewe esisin minne a fen kawor.

20 Iwe a fen wesino ewe fansoun, ewer, mettoch meinisin, ew me ew kukkunun kinikinin, anongonong won ekkewe kapas an ekkewe soufos.

21 Iwe non ewe pwan fansoun pwe efou fu sofo a pwato, anongonong won ewe kapas.

22 Iwe non ewe fansoun pwe seni ei fansoun feino a poputa ne wor chofona ra cheewno me nein ekkewe aramas, me ren Setan, ne apochokunano netiper, ren ewe popun pwe resap tongeni nuku non ekkewe esisin me amwarar minne ra fen kuna; nge inamo ekkei chofona me nikatupotup napengeni kinikinin ekkewe aramas ra nuku, iwe ra siwin ngeni ewe Samon.

23 Iwe non ewe fansoun pwe Nifai a feino nein ekkewe aramas, me pwan chommong ekkoch, a papataiser ngeni aier, non minne a wor ew ennetin omusomusen tipis. Iwe iei ekkewe aramas ra poputa sefan ne wor ar kinamwe non ewe fonu.

24 Iwe ese wor anini fengen, tiwenon chok ekkoch ekkewe ra poputa ne afanafan, ra achocho ne pwarata me ren ekkewe pukefel pwe ese kon auchea ar repwe aneasochisi ewe annukun Moses. Iei non ei mettoch ra muan, rese weweiti ekkewe pukefel.

25 Nge non ewe fansoun pwe ra mwitir siwin, iwe ra pesepes usun ewe muan minne ra nom non, pun a affateno ngeni ir pwe ewe annuk esemo pwonueta, me pwe epwe fokkun pwonueta non kukkunun kinikinin meinisin; ewer, ewe kapas a feito ngeni ir pwe epwe fokkun pwonueta; ewer, pwe emas mesen mak are tichikin esap wesino tori an epwe pwonueta; iei minne non ei chok pwan ier ra emmwen ngeni ew mirit usun ar muan me ra pwarata ar kewe mwan.

26 Iwe iei ewe tiwe me ruwen ier a wesino, a awora porousen pwapwa ngeni ekkewe aramas pokiten ekkewe esisin minne ra fen fisino, anongonong won ekkewe kapasen ewe osini an ekkewe soufos mi fel meinisin.

27 Iwe non ewe fansoun pwe ewe tiwe me unungatin ier a pwan wesino non kinamwe, tiwenon chok ekkewe chon sonan Katianton, ekkewe ra nonnom won ekkewe chuk, ekkewe ra chommong non ewe fonu; pun a fokkun pochokun nenier kewe me ar kewe nenien monomon pwe ekkewe aramas rese tongeni akkufur; iei minne ra fori chommong nii manau, me fori wachemuken ninnino me nein ekkewe aramas.

28 Iwe non ewe fansoun pwe non ewe tiwe me ruanu ier ra poputa ne napeno non ew watten ukukun pokiten mi wor chommong chon rikino seni ekkewe chon Nifai ekkewe ra suno ngeni ir, minne ra efisi netipechou ngeni ekkewe chon Nifai ekkewe ir mi nomwetiw non ewe fonu.

29 Iwe mi pwan wor ew popun watten netipechou me nein ekkewe chon Leiman; pun nengeni, a wor chommong nour semirit ekkewe ra marita me poputa ne pochokununo non ierir, pwe ra pwisin pochokuno won inisir, me ra emmwenino me ren ekkoch ekkewe ir chon Soram, ren ar chofona me ar kapas eingeing, pwe repwe choni ekkewe chon sonan Katianton.

30 Iwe iei ekkewe chon Leiman ra pwan riaffou, me poputa ne kisino usun ar nuku me wenechar, pokiten fofforungawen ekkewe maritan tappin aramas.