1 ’E i muri a’era, ’ua fa’aue atu ra ’oia i te mau ta’ata ’ia fa’aea i te pure, ’e ’ua nā reira ato’a atu ’oia i tāna mau pipi. ’E ’ua fa’aue atu ’oia ia rātou ’eiaha rātou e fa’aea i te pure i roto i tō rātou ’ā’au.

2 ’E ’ua fa’aue atu ra ’oia ia rātou ’ia ti’a mai i ni’a i tō rātou ’āvae. ’E ’ua ti’a a’era rātou i ni’a i tō rātou ’āvae.

3 ’E i muri a’era, ’ua vāvāhi fa’ahou ihora ’oia i te pāne ’e ’ua ha’amaita’i ihora i te reira, ’e ’ua hōro’a atu ra i te mau pipi ’ia ’amu rātou.

4 ’E ’ia oti a’era rātou i te ’amu, ’ua fa’aue atu ra ’oia ia rātou ’ia vāvāhi rātou i te pāne, ’e ’ia hōro’a atu nā te mau ta’ata.

5 ’E ’ia oti a’era ia rātou i te hōro’a atu nā te mau ta’ata, ’ua hōro’a ato’a atu ’oia i te uaina ia rātou ’ia inu, ’e ’ua fa’aue atu ra ia rātou ’ia hōro’a rātou i te reira nā te mau ta’ata.

6 I teienei, ’aita e pāne, ’aita ato’a e uaina i hōpoihia mai e te mau pipi, ’aita ato’a te mau ta’ata i hōpoi mai.

7 ’Āre’a rā ’ua hōro’a mau atu ’oia i te pāne ia rātou ’ia ’amu ’e te uaina ato’a ’ia inu.

8 ’E ’ua nā ’ō atu ra ’oia ia rātou : ’O ’oia ’o tē ’amu i teie nei pāne, ’ua ’amu ïa i tō’u nei tino nā tōna vārua ; ’e ’o ’oia ’o tē inu i teie nei uaina, ’ua inu ïa i tō’u nei toto nā tōna vārua, ’e e ’ore roa tōna vārua e po’ia ’e e po’ihā, e vai ’ī noa rā ïa.

9 I teienei, ’ia fa’aoti a’era te mau ta’ata i te ’amu ’e i te inu, inaha, ’ua ’ī a’era rātou i te Vārua ; ’e ’ua pi’i māite mai ra rātou ma te reo hō’ē, ’e ’ua fa’ahanahana mai ra ia Iesu, ’o tā rātou i hi’o ’e i fa’aro’o ato’a ho’i.

10 ’E i muri a’era, ’ia hope roa a’era rātou i te fa’ahanahana atu ia Iesu, ’ua nā ’ō atu ra ’oia ia rātou : Inaha, i teienei ’ua oti iā’u te fa’auera’a tā te Metua i fa’aue mai iā’u nō ni’a i teie nei feiā, ’o te hō’ē toe’a ïa rātou nō te ’utuāfare o ’Īserā’ela.

11 Tē ha’amana’o na ’outou ē, i parau na vau ia ’outou nō te fa’atupura’ahia te mau parau a Isaia—inaha, ’ua pāpa’ihia te reira, ’e tei mua te reira ia ’outou na, nō reira ’a ’imi i te reira.

12 ’E ’oia mau, ’oia mau, tē parau atu nei au ia ’outou na, ’ia tupu te reira ’ei reira ato’a e tupu ai te fafaura’a tā te Metua i fafau atu i tōna ra mau ta’ata, i te ’utuāfare o ’Īserā’ela.

13 ’Ei reira te mau toe’a ’o tei ha’apurara-’ē-hia i te ātea i ni’a i te fenua nei, e ha’aputuputuhia ai mai te hiti’a o te rā mai ’e mai te tō’o’a o te rā mai, ’e mai te pae apato’a mai ’e mai te pae apato’erau mai ; ’e e fa’ataehia rātou i te ’ite i te Fatu tō rātou Atua, ’o tei fa’aora ia rātou.

14 ’E ’ua fa’aue mai te Metua iā’u ’ia hōro’a atu vau i teie nei fenua nō ’outou, ’ei ’āi’a nō ’outou.

15 ’E tē parau atu nei au ia ’outou na, ’ia ’ore te mau ’Ētene e tātarahapa i muri a’e i te fāri’ira’a i te ha’amaita’ira’a e tae mai ia rātou ra, ’e i muri a’e ho’i i tō rātou ha’apurara-’ē-ra’a i tō’u mau ta’ata—

16 ’Ei reira ’outou, e te toe’a nō te ’utuāfare o Iakoba, e haere atu ai i rotopū ia rātou ; e tae ’outou i rotopū ia rātou, ’e e mea rahi ho’i rātou ; ’e e riro’outou i rotopū ia rātou mai te liona i rotopū i te mau ’ānimara ’ōviri o te uru rā’au ra, ’e mai te liona ’āpī i rotopū i te mau nana māmoe, ’e ’ia haere ana’e ’oia nā roto ra ’ua ta’ata’ahi noa ïa ’e ’ua hahae hu’ahu’a noa ïa, ’e ’aore roa e ta’ata nō te fa’aora mai.

17 E fa’ataehia atu tō ’outou rima i ni’a i tō ’outou mau ’enemi, ’e e hope roa tō ’outou mau ’enemi i te tāpū-’ē-hia.

18 ’E e ha’aputuputu ’āmui au i tō’u mau ta’ata mai te ta’ata e ha’aputuputu i te ruru sītona i ni’a i te tahua papa’ira’a.

19 E fa’ariro ho’i au i tō’u mau ta’ata ’o tā te Metua i fafau atu, ’oia ïa, e fa’ariro vau i tō ’outou ra tara ’ei ’āuri, ’e e fa’ariro vau i tō ’outou ra mau mai’u’u ’āvae ’ei veo. ’E e fa’ahu’ahu’a ’outou i te mau ta’ata e rave rahi ; ’e e ha’amo’a atu vau i tā rātou faufa’a nā te Fatu, ’e tā rātou mau tao’a nā te Fatu o te mau fenua ato’a ra. ’E inaha, ’o vau nei ïa te rave i te reira.

20 ’E a muri a’era, tē nā ’ō mai ra te Metua, e tautau mai te ’o’e nō tā’u ra parauti’a i ni’a a’e ia rātou i taua mahana ra ; ’e ’ia ’ore rātou ’ia tātarahapa, e ma’iri ïa te reira i ni’a iho ia rātou, tē nā reira mai ra te Metua, ’oia ïa, i ni’a iho i te mau nūna’a ato’a o te mau ’Ētene.

21 ’E a muri a’era, e riro vau i te ha’amau i tō’u ra mau ta’ata, e te ’utuāfare o ’Īserā’ela ē.

22 ’E inaha, e ha’amau vau i teie nei feiā i ni’a i teie nei fenua, ’ia fa’atupuhia te fafaura’a tā’u i fafau atu i tō ’outou ra metua tāne ia Iakoba ; ’e e riro ïa ’ei Ierusalema ’Āpī. ’E e tae mai te mau mana nō te ra’i mai i rotopū i teie nei feiā ; ’oia ïa, e tae mai au i rotopū ia ’outou na.

23 Inaha, ’o vau teie tā Mose i parau na, i te nā-’ō-ra’a ē : E fa’ati’a mai te Fatu tō ’outou Atua i te hō’ē peropheta ia ’outou na, nō roto mai i tō ’outou nā mau taea’e, mai iā’u nei te huru ; ’o ’oia tā ’outou e fa’aro’o atu i te mau parau ato’a tāna e parau mai ia ’outou na. ’E a muri a’era, te ta’ata ato’a ’o tē ’ore e fa’aro’o i taua peropheta ra, e tāpū-’ē-hia atu ïa mai rotopū atu i te mau ta’ata.

24 ’Oia mau tē parau atu nei au ia ’outou na, ’oia ïa, te mau peropheta pā’āto’a i parau mai mai ia Samuela mai ē tae roa mai i tō muri iho, ’ua fa’a’ite pāpū mai na ïa i te parau nō ni’a iā’u nei.

25 ’E inaha, ’o ’outou ho’i te mau tamari’i a te mau peropheta ; ’e nō te ’utuāfare o ’Īserā’ela ho’i ’outou ; ’e nō roto mai ho’i ’outou i te fafaura’a tā te Metua i fafau atu i tō ’outou ra mau metua, ’a nā ’ō tu ai ’oia ia Aberahama : E nā roto i tō ’oe ra hua’ai e ha’amaita’ihia ai te mau ’ōpū ato’a o te ao nei.

26 ’Ua fa’ati’ahia vau i ni’a ’e ’ua tonohia mai na ho’i e te Metua ia ’outou na nā mua, ’e ’ua tonohia mai au nō te ha’amaita’i ia ’outou i te fa’afāriu-’ē-ra’a atu ia ’outou tāta’itahi i tā ’outou mau ’ohipa ’ī’ino ; ’e te tumu nō te reira nō te mea e mau tamari’i ’outou nō te fafaura’a.

27 ’E ’ia ha’amaita’ihia ’outou ra, ’ei reira te Metua e fa’atupu ai i te fafaura’a tāna i fafau atu ia Aberahama, i te nā-’ō-ra’a ē : Nā roto i tō ’oe ra hua’ai e ha’amaita’ihia ai te mau ’ōpū ato’a o te ao nei—ē tae noa atu i te nīni’ira’a mai i te Vārua Maita’i nā roto iā’u nei i ni’a i te mau ’Ētene, ’e nā taua ha’amaita’ira’a ra i ni’a iho i te mau ’Ētene e fa’ariro ia rātou ’ei mea pūai i ni’a a’e i te mau ta’ata ato’a, ē tae noa atu i te ha’apurarara’a i tō’u ra mau ta’ata, ’e te ’utuāfare o ’Īserā’ela e.

28 ’E e riro rātou ’ei tā’iri nō te mau ta’ata o teie nei fenua. ’Āre’a rā ’ia fāri’i rātou i te ’īra’a nō tā’u ’evanelia, ’e i muri iho mai te mea e fa’a’eta’eta rātou i tō rātou ’ā’au iā’u nei, e fa’aho’i atu vau i tā rātou mau ’ohipa ’ī’ino i ni’a iho i tō rātou ra mau upo’o, tē nā reira mai ra te Metua.

29 ’E i reira e ha’amana’o ai au i te fafaura’a tā’u i fafau i tō’u ra mau ta’ata ; ’e ’ua fafau atu ho’i au ia rātou ē, e ha’aputuputu ’āmui mai au ia rātou i tō’u ihora tau mau ; ’e e hōro’a fa’ahou atu vau ia rātou te fenua o tō rātou ra mau metua ’ei ’āi’a nō rātou, ’oia ho’i te fenua ra nō Ierusalema, te fenua i fafauhia ra nō rātou ē a muri noa atu, tē nā reira mai ra te Metua.

30 ’E a muri a’era, e tae mai te tau e porohia ai te ’īra’a nō tā’u ra ’evanelia ia rātou.

31 ’E e ti’aturi rātou iā’u nei, ’e ’o vau ’o Iesu Mesia, te Tamaiti a te Atua, ’e e pure atu ho’i i te Metua i tō’u ra i’oa.

32 I reira e fa’ateitei tō rātou mau tīa’i i tō rātou reo, ’e e ’āmui tāhō’ē tō rātou reo i te hīmenera’a ; ’e e ’ite rātou te mata ’e te mata.

33 I reira e ha’aputuputu ’āmui fa’ahou mai ai te Metua ia rātou, ’e e hōro’a atu ai ia Ierusalema ’ei fenua ’āi’a nō rātou.

34 I reira e puroro noa atu ai te ’oa’oa—’A hīmene ’āmui mai, e te mau vāhi ano nō Ierusalema ; ’ua ha’amāhanahana ho’i te Metua i tōna mau ta’ata, ’e ’ua fa’aora ’oia ia Ierusalema.

35 ’Ua fa’a’ite te Metua i tōna rima mo’a i mua i te mata o te mau nūna’a ato’a ; ’e e ’ite te mau hope’a ato’a o te fenua nei i te fa’aorara’a a te Metua ; ’e te Metua ’e ’o vau nei hō’ē ïa.

36 ’E i reira e tupu ai tei pāpa’ihia, ’o tei nā ’ō mai ē : ’A ara, ’a ara, ’e ’a ’ahu na i tō pūai, e Ziona ; ’a ’ahu na i tō mau ’ahu nehenehe, e Ierusalema, ’e te ’oire mo’a ē ; ’e mai teie taime atu ’eiaha roa te feiā peritome ’ore ’e te vi’ivi’i e tomo mai i roto ia ’oe na.

37 ’A ueue na ia ’oe i te repo ra ; ’a ti’a i ni’a ; ’a pārahi i raro, e Ierusalema ; e tātara na ia ’oe i te mau tā’amu i ni’a i tō ’a’ī na, e te tamāhine fa’atītīhia nō Ziona ē.

38 Tē nā ’ō mai ra ho’i te Fatu : ’ua ho’o ’outou ia ’outou iho i te aore ; ’e e ho’o-fa’ahou-hia mai ho’i ’outou ma te moni ’ore.

39 ’Oia mau, ’oia mau, tē parau atu nei au ia ’outou na, e ’ite tō’u ra mau ta’ata i tō’u nei i’oa ; ’oia ïa, i taua mahana ra e ’ite rātou ē ’o vau ïa te parau nei.

40 ’E i reira, e parau atu ai rātou ē : ’Auē te nehenehe o te ’āvae o te ve’a i ni’a i te mau mou’a, ’o tei hōpoi mai i te mau parau maita’i ia rātou, ’o tei fa’a’ite mai i te parau hau ; ’o tei hōpoi mai i te mau parau maita’i ia rātou ’o tei maita’i, ’o tei fa’a’ite mai i te fa’aorara’a ; ’o tei parau mai ia Ziona : Tē fa’atere ari’i nei tō ’oe Atua !

41 ’E i reira e puroro noa atu ai te reo, i te nā-’ō-ra’a atu ē : ’A haere atu ’outou, ’a haere atu ’outou, ’a haere atu ’outou i rāpae mai reira atu ; ’eiaha roa e tāpe’a noa atu i te mea vi’ivi’i ; ’a haere atu ’outou i rāpae mai rotopū mai iāna ra ; ’ia mā ’outou ’o tē amo nei i te mau fāri’i a te Fatu ra.

42 ’Eiaha roa ho’i ’outou e haere rū noa i rāpae ’e ’eiaha ho’i e horo ’ē atu ; e haere atu ho’i te Fatu nā mua ia ’outou, ’e nā te Atua nō ’Īserā’ela ’outou e pāruru i muri.

43 Inaha, e fa’atere ’aravihi maita’i tō’u tāvini ; e fa’ateiteihia ’oia ’e e fa’ahanahanahia ’e e teitei roa ho’i.

44 E rave rahi feiā tei māere ia ’oe—’ua fa’a’ino-roa-hia tōna hōho’a mata hau atu i tō te mau ta’ata ato’a ra, ’e tōna huru i te huru o te mau tamari’i tamāroa a te ta’ata ato’a nei—

45 ’Oia ato’a te mau nūna’a e rave rahi, e pīpīhia ïa e ana ; e māmū noa ho’i te vaha o te mau ari’i i mua iāna ; ’e e ’ite atu ho’i rātou i tei ’ore i fa’a’itehia atu ia rātou ra ; ’e e māramarama ho’i rātou i tei ’ore i fa’aro’ohia e rātou ra.

46 ’Oia mau, ’oia mau, tē parau atu nei au ia ’outou na, e tupu mau teie mau mea ato’a, mai tā te Metua i fa’aue mai iā’u. ’E i reira, e fa’atupuhia ai teie fafaura’a ’o tā te Metua i fafau atu i tōna ra mau ta’ata ; ’e i reira Ierusalema e pārahi-fa’ahou-hia ai e tō’u ra mau ta’ata, ’e e riro te reira ’ei fenua ’āi’a nō rātou.