1 Iwe ennet ua apasa ngenikemi, ua ngenikemi ew esisin, pwe oupwe tongeni sinei ewe fansoun nupwen ekkei mettoch repwe arap ne fis—pwe upwe achufengenirenong, seni ar nangatamen toropas fetan, nei kewe aramas, O imwen Israel, me fori sefani neir ai Zion;

2 Iwe nengeni, iei ewe mettoch minne upwe ngenikemi pwe ew esisin—pun ennet ua apasa ngenikemi pwe nupwen ekkei mettoch minne ua affata ngenikemi, me minne upwe affata ngenikemi mwirin ei fansoun usui, me ren manamanen ewe Ngun mi Fel minne epwe kawor ngenikemi seni ewe Sam, epwe pwano ngeni ekkewe chon Gentile pwe repwe tongeni sinei usun ekkei aramas ir ekkewe nussun mwirimwirin ewe imwen Jacob, me usun ekkei aramas ekkewe repwe toropas fetan me rer;

3 Ennet, ennet ua apasa ngenikemi, nupwen ekkei mettoch repwe pwano ngeni ir me ren ewe Sam, me repwe feito me ren ewe Sam, seni ir ngenikemi;

4 Pun iei miritin ewe Sam pwe repwe winiposono non ei fonu, me repwe winipos pwe ew aramas ngaseno me ren manamanen ewe Sam, pwe ekkei mettoch repwe tongeni feito seni ir ngeni ew nussun mwirimwirimi, pwe ewe pwon mi pin an ewe Sam epwe tongeni pwonueta minne a fen fori ew pwon mi pin ngeni ekkei aramas, O imwen Israel;

5 Iei minne, nupwen ekkei angang me ekkewe angang minne repwe fis neimi mwirin ei fansoun repwe feito seni ekkewe chon Gentile, ngeni mwirimwirimi kewe minne repwe kukkununo non ar nuku pokiten angangangaw;

6 Pun iei mochenin ewe Sam pwe epwe feito seni ekkewe chon Gentile, pwe i epwe pwarano an manaman ngeni ekkewe chon Gentile, pun ei popun pwe ekkewe chon Gentile, ika pwe resap apochokunano netiper, pwe ika repwe aier me feito rei me papatais non itei me sinei usun ewe ennetin kinikinin ai nongonong mi ennet, pwe repwe anneanong nein nei kewe aramas, O imwen Israel.

7 Iwe nupwen ekkei mettoch repwe fisino pwe mwirimwirimi repwe poputa ne sinei usun ekkei mettoch—epwe ew esisin ngeni ir, pwe repwe tongeni sinei pwe ewe angangen ewe Sam a fen poputa pwe epwe pwonueta ewe pwon mi pin minne i a fen fori ngeni ekkewe aramas ekkewe ir seni ewe imwen Israel.

8 Iwe nupwen ena ran epwe feito, ewe fansoun epwe feito pwe king repwe kumi awer; pun met minne esamo affat ngeni ir repwene kuna; me met minne resamo ren rongorong repwene weweiti.

9 Pun non ena ran, fan asengesi ewe Sam epwe anganga ew angang, minne epwe ew auchea me ew amwararen angang me neir; iwe epwe wor neir ekkewe ir resap nuku, ina mwo emon mwan epwe afanafana ngeni ir.

10 Nge nengeni, manauen nei we chon angang epwe nom non pei; iei minne resap efeiengawa i, ina mwo i epwe ngaweno nikinikin pokiter. Nge upwe echikera i, pun upwe pwari ngeni ir pwe ai mirit a nap seni ewe nikatupotupen ewe tefin.

11 Iei minne ewe fansoun epwe feito pwe ion chok esap nuku non ai kewe kapas, ngang Jises Kraist, minne ewe Sam epwe efisi i pwe epwe feito ngeni ekkewe chon Gentile, me epwe ngeni i manaman pwe i epwe uweireno ngeni ekkewe chon Gentile, (epwe fis usun chok Moses a apasa) repwe pokupokuno seni me nein nei kewe aramas ekkewe ir seni ewe pwon mi pin.

12 Iwe nei kewe aramas ir ew nussun mwirimwirin Jacob repwe nonnom nein ekkewe chon Gentile, ewer, repwe nonnom neir usun emon naion me nein ekkewe man mwacho seni ewe petewen, usun emon kukkun naion nein ekkewe penen siip, ewe, ika epwe feino neir me ru epwe puriretiw me atatakisiretiw, iwe esap wor epwe angaser.

13 Pour repwe keitita won ekkewe chon koum ngeni ir, iwe ekkewe chon koum ngeni ir meinisin repwe pokupokuno.

14 Ewer, riaffou epwe ngeni ekkewe chon Gentile tiwenon chok ika repwe aier; pun ewe fansoun epwe feito non ena ran, anon ewe Sam, pwe upwe eimueno noumi kewe oris seni neimi, iwe upwe atano wami kewe chariot;

15 Me upwe pokueno ekkewe teninimwen fonuemi we, me aturatiw neniemi kewe mi pochokun meinisin;

16 Me upwe pokueno angangen pout seni fonuemi we, iwe esap chiwen wor noumi sou-pwe;

17 Noumi kewe niosun anu muan upwe pwan pokureno, me noumi kewe nios mi ukkuta me neimi, iwe ousap chiwen fen ngeni angangen poumi;

18 Iwe upwe uttata fatami punuken ira seni neimi; usun chok upwe atano ami kewe teninimw.

19 Iwe ewe fansoun epwe feito pwe chofona meinisin, me nikatupotup, me nonowo, me anini, me angangen pris, me nisou, repwe wesino.

20 Pun ewe fansoun epwe feito, anon ewe Sam, pwe atun ena ran ion chok esap aier me feito ngeni Nei mi Achengicheng, ir upwe pokureno seni nein nei kewe aramas, O imwen Israel;

21 Iwe upwe ngeni niwinir me ningeringer wor, usun chok won ekkewe rese nuku Kot, ew sokkun resamo fen rongorong usun.

22 Nge ika repwe aier me ausening ngeni ai kewe kapas, me resap apochokunano netiper, upwe forata ai we mwichefen me neir, iwe repwe tonong non ewe pwon mi pin me anneanong nein ekkei nussun mwirimwirin Jacob, ir ekkewe ua fen ngeni ir ei fonu pwe fonuer;

23 Iwe repwe anisi nei kewe aramas, ekkewe nussun mwirimwirin Jacob, me pwan meinisin ekkewe seni ewe imwen Israel repwe feito, pwe repwe tongeni aueta ew teninimw, minne epwe iteni ewe Minafon Jerusalem.

24 Iwe non na fansoun repwe anisi nei kewe aramas pwe repwe tongeni ioifengeninong, ekkewe ir mi toropas fetan won unusen unungen ewe fonu, non ewe Minafon Jerusalem.

25 Iwe non na fansoun ewe manamanen nang epwe feitiw nonnom neir; iwe upwe pwan nonnom neir.

26 Iwe non na fansoun ewe angangen ewe Sam epwe poputa non na ran, pwan mwo nupwen ei kapas allim epwe affateno nein nussun ekkei aramas. Ennet ua apasa ngenikemi, non na ran ewe angangen ewe Sam epwe poputa nein nei kewe aramas mi toropas fetan meinisin, ewer, pwan mwo ekkewe einang minne ir mi monucheno, minne ewe Sam a fen emmwenireno seni Jerusalem.

27 Ewer, ewe angang epwe poputa nein nei kewe aramas mi toropas fetan meinisin, fiti ewe Sam epwe amonnata ewe aan non minne repwe tongeni feito rei, pwe repwe tongeni kokkori ewe Sam non itei.

28 Ewer, iwe non na fansoun ewe angang epwe poputa, fiti ewe Sam nein ekkewe muu meinisin ne amonnata ewe aan non minne noun kewe aramas repwe tongeni ioifengen non nenier ngeni ewe fonuen ar kewe neuo.

29 Iwe repwe tou seni muu meinisin; iwe resap tou non atapwanapwan, are no ren ar nikasusu, pun upwe no me mwer, anon ewe Sam, me upwe nour chon tumun mwirir.