1 ’E ’oia mau, tē parau atu nei au ia ’outou na, e hōro’a atu vau i te hō’ē tāpa’o ia ’outou, ’ia ’ite ’outou i te taime e fātata ai teie mau mea i te tupu—’ia ha’aputuputu mai au i tō’u ra mau ta’ata ’o tei ha’apurara-maoro-hia, e te ’utuāfare o ’Īserā’ela ē, ’e ’ia fa’ati’afa’ahou vau i tō’u ra Ziona i rotopū ia rātou.

2 ’E inaha, teie te mea tā’u e hōro’a atu ia ’outou ’ei tāpa’o—nō te mea ’oia mau tē parau atu nei au ia ’outou na, ’ia tae i te tau e fa’a’itehia ai teie mau mea tā’u e fa’a’ite nei ia ’outou na, e tā’u iho e fa’a’ite atu ia ’outou a muri atu, i te mau ’Ētene, nā roto i te mana o te Vārua Maita’i tā te Metua e hōro’a atu ia ’outou na, ’ia ’ite rātou i te parau nō ni’a i teie nei feiā, ’oia ho’i te hō’ē toe’a nō te ’utuāfare o Iakoba, ’oia tō’u mau ta’ata tei ha’apurarahia e rātou ra.

3 ’Oia mau, ’oia mau, tē parau atu nei au ia ’outou na, ’ia tae i te tau e fa’a’itehia ai teie mau mea e te Metua ia rātou ra, ’e ’ia tae i te tau e hōpoi mai ai te Metua i te reira mai roto mai ia rātou ia ’outou ra.

4 ’Ua au ho’i i tō te Metua ra pa’ari, e mea ti’a roa ia rātou ’ia fa’anahonahohia i ni’a i teie nei fenua, ’e ’ia riro rātou ’ei feiā ti’amā nā roto i te mana o te Metua ra, ’e ’ia tae mai teie mau mea mai ia rātou mai i te toe’a o tō ’outou hua’ai, ’ia tupu te fafaura’a a te Metua o tāna i fafau atu i tōna ra mau ta’ata, ’e te ’utuāfare o ’Īserā’ela e.

5 Nō reira, ’ia tae mai teie mau ’ohipa, ’e te mau ’ohipa ho’i ’o tē ravehia i rotopū ia ’outou a muri atu, mai roto mai i te mau ’Ētene i tō ’outou hua’ai ’o tē paruparu ra tō rātou fa’aro’o nō tā rātou mau ’ohipa ’ī’ino.

6 Nō te mea ’ua ti’a roa i te Metua ’ia hōpoihia mai te reira mai roto mai i te mau ’Ētene, ’ia ti’a iāna ’ia fa’a’ite atu i tōna mana i te mau ’Ētene, ’e ’o teie ho’i te tumu, mai te mea ē ’aita te mau ’Ētene e fa’a’eta’eta i tō rātou ’ā’au, ’ia tātarahapa rā, ’e ’ia haere mai iā’u, ’e ’ia bāpetizohia i tō’u ra i’oa, ’e ’ia ’ite i te parau mau nō ni’a i te mau tufa’a nō tā’u mau ha’api’ira’a tumu, ’e ’ia tai’ohia i rotopū i tō’u ra mau ta’ata, ’e te ’utuāfare o ’Īserā’ela ē.

7 ’E ’ia tupu mau teie mau mea, ’ia ’ite tō ’outou hua’ai i teie mau mea—e riro ïa te reira ’ei tāpa’o ia rātou, ’ia ’ite rātou ē, ’ua ha’amatahia nā te ’ohipa a te Metua ’ia fa’atupuhia te fafaura’a tāna i fafau atu i te feiā nō te ’utuāfare o ’Īserā’ela.

8 ’E ’ia tae i taua mahana ra, ’e a muri a’era, e māmū noa ho’i te vaha o te mau ari’i ; ’e e ’ite atu ho’i rātou i tei ’ore i fa’a’itehia atu ia rātou ra ; ’e e māramarama ho’i rātou i tei ’ore i fa’aro’ohia e rātou ra.

9 Nō te mea i taua mahana ra, e ’ohipa ai te Metua i te hō’ē ’ohipa nō’u nei, ’e e riro te reira ’ei ’ohipa rahi ’e te māere i rotopū ia rātou ; ’e tē vai ra te tahi pae i rotopū ia rātou ’o tē ’ore e ti’aturi i te reira, noa atu ā e parau-noa-hia atu te reira ia rātou e te hō’ē ta’ata.

10 Inaha rā, te ora o tō’u nei tāvini tei roto ïa i tō’u nei rima ; nō reira e ’ore roa e ti’a ia rātou ’ia ha’amāuiui atu iāna, ’e noa atu e ha’aputahia ’oia nō rātou. Nā’u ra e fa’aora atu iāna, ’e e fa’a’ite atu ho’i au ia rātou ē, e mea rahi atu ā tō’u pa’ari i te rāve’a ’ino a te diabolo.

11 Nō reira, ’e a muri a’era, ’o ’oia ’o tē ’ore e ti’aturi i tā’u nei, ’oia ’o Iesu Mesia, mau parau, ’o tā te Metua e fa’a’ite atu nā roto iāna i te mau ’Ētene, ’e ’o tāna e hōro’a atu i te mana iāna nō te fa’a’ite atu i te reira i te mau ’Ētene, (e nā-reira-hia ïa mai tā Mose i parau ra) e tāpū-’ē-hia ïa rātou mai rotopū atu i tō’u ra mau ta’ata nō te fafaura’a.

12 ’E tō’u ra mau ta’ata, ’oia ho’i te toe’a nō te ’utuāfare o Iakoba, e tae ïa rātou i rotopū i te mau ’Ētene, ’oia ïa, i rotopū ia rātou mai te liona i rotopū i te mau ’ānimara o te uru rā’au ra, ’e mai te liona ’āpī i rotopū i te mau nana māmoe ; ’e ’ia haere ana’e ’oia nā roto ra, ’ua ta’ata’ahi ïa, ’e ’ua hahae, e hu’ahu’a noa a’e, ’e ’aore roa e ta’ata nō te fa’aora mai.

13 E fa’ataehia atu tō rātou rima i ni’a i tō rātou mau ’enemi, ’e e hope roa tō rātou mau ’enemi i te tāpū-’ē-hia.

14 ’Oia ïa, ’auē ho’i te mau ’Ētene ē, maori rā ’ia tātarahapa rātou ; ē a muri a’era, ’ia tae i taua mahana ra, tē nā reira mai ra te Metua, e tu’u ai au i tā ’outou mau pua’ahorofenua i rotopū ia ’outou na, ’e e ha’amou vau i tā ’outou mau pere’o’o pua’ahorofenua.

15 ’E e tāpū ’ē atu vau i te mau ’oire o tō ’outou fenua ; ’e e huri i te mau ha’apūra’a pa’ari i raro.

16 ’E e tāpū ’ē atu vau i te mau ’ohipa diabolo mai roto mai i tō ’outou na fenua, ’e ’eiaha roa ’outou e rave i te feiā tahutahu.

17 E tāpū ’ē ato’a atu vau i tā ’outou mau hōho’a ’oti’otihia ra, ’e tā ’outou ho’i mau hōho’a i fa’ati’ahia i ni’a i rotopū ia ’outou ra ; ’e e ’ore roa ’outou e ha’amori fa’ahou i tei hāmanihia e tō ’outou ra rima.

18 ’E e huti au i tā ’outou mau uru rā’au mai rotopū mai ia ’outou na ; nā reira ato’a e ha’amou vau i tō ’outou mau ’oire.

19 ’E a muri a’era, e fa’a’orehia te mau ha’avare pā’āto’a, ’e te mau fa’ahemara’a, ’e te mau fe’i’ira’a, ’e te mau mārōra’a, ’e te mau ’ohipa ha’avare a te mau tahu’a, ’e te mau ’ohipa tai’ata.

20 I te mea ho’i ē a muri a’era, tē nā ’ō mai ra te Metua, i taua mahana ra, ’o rātou ’o tē ’ore e tātarahapa ’e ’o tē ’ore e haere atu i tā’u ra Tamaiti here, ’o rātou ïa tā’u e tāpū ’ē atu mai rotopū i tō’u ra mau ta’ata, ’e te ’utuāfare o ’Īserā’ela e.

21 ’E e fa’atae vau i te tāho’o ’e te riri ’ū’ana i ni’a ia rātou, ’e i ni’a ato’a i te feiā ’ētene mai tei ’ore ā i fa’aro’ohia e rātou.

22 ’Ia tātarahapa rā rātou ’e ’ia fa’aro’o ho’i i tā’u ra mau parau, ma te fa’a’eta’eta ’ore i tō rātou ’ā’au, e fa’ati’a ïa vau i tā’u ’ēkālesia i rotopū ia rātou, ’e e haere mai rātou i roto i te fafaura’a ’e e tai’ohia i rotopū i te toe’a nō Iakoba, ’o tā’u i hōro’a atu i teie nei fenua ’ei ’āi’a nō rātou.

23 ’E nā rātou e tauturu i tō’u ra mau ta’ata, te toe’a nō Iakoba, ’e ’oia ato’a i te mau ta’ata e rave rahi nō te ’utuāfare o ’Īserā’ela ’o tē haere mai, ’ia patu rātou i te hō’ē ’oire, ’o tē parauhia, te Ierusalema ’Āpī.

24 ’E i reira rātou e tauturu ai i tō’u ra mau ta’ata i ha’apurarahia i ni’a i te fenua ē ’ati noa a’era, ’ia ha’aputuputuhia rātou i roto i te Ierusalema ’Āpī.

25 ’E i reira te mana nō te ra’i e tae mai ai i rotopū ia rātou ; ’e e tae ato’a mai au i rotopū ia rātou.

26 ’E i reira e ha’amatahia ai te ’ohipa a te Metua i taua mahana ra, ’e i taua ato’a ra mahana e porohia ai teie ’evanelia i rotopū i te toe’a o teie nei feiā. ’Oia mau tē parau atu nei au ia ’outou na, i taua mahana ra e ha’amatahia ai te ’ohipa a te Metua i rotopū i tō’u ra mau ta’ata ato’a i ha’apurarahia ; ’oia ïa, ē tae noa atu i te mau ’ōpū ato’a i mo’e na, ’o tā te Metua i arata’i ’ē atu i rāpae ia Ierusalema.

27 ’Oia ïa, e ha’amatahia te ’ohipa i rotopū i tō’u ra mau ta’ata ato’a i ha’apurarahia, ’e nā te Metua e fa’aineine i te ’ē’a e ti’a ai ia rātou ’ia haere mai iā’u nei, ’e ’ia ti’aoro atu rātou i te Metua nā roto i tō’u nei i’oa.

28 ’Oia ïa, ’e i reira e ha’amatahia ai te ’ohipa i rotopū i te mau nūna’a ato’a ra, ’e nā te Metua e fa’aineine i te ’ē’a e ti’a ai i tōna mau ta’ata ato’a ’ia ha’aputuputuhia mai i te fenua nō tō rātou ra ’āi’a.

29 ’E e haere atu rātou i rāpae i te mau nūna’a ato’a ra ; ’e ’aore rātou e haere rū noa i rāpae ; ’e ’aore ho’i rātou e horo ’ē atu, ’e e haere au nā mua ia rātou, tē nā reira mai ra te Metua, ’e nā’u ho’i e pāruru ia rātou i muri.