1 Ma ona taunuu ai lea o le mea ua tusia: Ina pese ia, oe ua pa, oe sa e le fanau; ina alaga ia i pesega, ma alaga leotele atu, oe sa le faatiga i se tamaitiiti; ona e sili ona toatele o le fanau a lē ua nofofua nai lo le fanau a le ava faaipoipo, ua fetalai mai ai le Alii.

2 Ia faatele le nofoaga o lou faleie, ma ia tuu atu ia te i latou e falo atu puipui o ou nofoaga; aua le taofiofia, ia faauumi ou maea ma faamalolosi ou siteki;

3 Ona o le a outou salalau atu i le itu taumatau ma le itu tauagavale, ma o le a fai ma tofi o lau fanau Nuuese ma latou faia aai tuufua ia ‘ainā.

4 Aua e te fefe, ona o le a e le maasiasi; pe faafememeaiina oe, ona o le a le faamaasiasia oe; aua o le a galo ia te oe le maasiasi o lou talavou, ma o le a e le toe manatuaina le luma o lou talavou, ma o le a e le toe manatuaina le luma o lou nofo o sē ua oti le tane.

5 Aua o Lē na faia oe, o lau tane, o le Alii o ’Au, o lona igoa lea; ma o lou Togiola, o le Paia e Toatasi o Isaraelu—o le a ta’ua o le Atua o le lalolagi uma.

6 Ona ua ta’ua oe e le Alii o se fafine ua lafoaiina ma ua faanoanoa i le agaga, ma o se ava o le talavou, ina ua le talia oe, ua fetalai mai ai lou Atua.

7 Sa ou lafoaiina oe mo sina taimi itiiti, ae o le a ou faapotopoto mai oe ma le alofa mutimutivale tele.

8 I se ita itiiti sa ou natia o’u mata mai ia te oe mo sina taimi, ae faatasi ma le agalelei tumau e faavavau o le a ou alofa mutimutivale ia te oe, ua fetalai mai ai le Alii, lou Togiola.

9 Ona o lenei mea, ua pei o le lolovai o Noa ia te au, auā e pei ona ou tauto e le toe lofia le lalolagi i le lolovai o Noa, ua faapea lava ona ou tauto o le a ou le toe ita ia te oe.

10 Ona o le a o ese mauga ma sii ese maupu’epu’e, ae o le a le alu ese lava lo’u agalelei mai ia te oe, pe o le a aveesea foi le feagaiga o lo’u filemu, ua fetalai mai ai le Alii o lē ua alofa mutimutivale ia te oe.

11 E, oe lē ua puapuagatia, ua felafoai i afa, ma ua le faamafanafanaina! Faauta, o le a ou faataooto ou maa i lanu matagofie, ma faataatitia ou faavae i safaira.

12 Ma o le a ou faia ou faamalama i maa mūmū, ma ou faitotoa i maa tioata, ma ou tuaoi uma i maa matagofie.

13 Ma o le a aoaoina au fanau uma e le Alii; ma o le a tele lava le filemu o lau fanau.

14 I le amiotonu o le a faatuina ai oe; ia e taumamao mai sauaga ma ia aua nei e fefe, ma mai le mata’u ona o le a lē oo latalata mai ai ia te oe.

15 Faauta, o le a latou faapotopoto faatasi lava e faasaga mai ia te oe, ae le ona o a’u; soo se isi e faapotopoto faatasi e faasaga ia te oe o le a pa’u’ū ifo ona o oe.

16 Faauta, ua ou faia le gaosi uamea ua tapilia malala i le afi, ua ia gaosi mai ai se meafaigaluega mo lana galuega; ma ua ou faia le faamaumau mea e faaumatiaina.

17 E leai se auupega ua gaosia e faasaga ia te oe e faamanuiaina; ma o laulaufaiva taitasi uma e upuleaga faasaga ia te oe i le faamasinoga ia e tausalaina. O le tofi lea o auauna a le Alii, ma o lo latou amiotonu ua mai ia te a’u, ua fetalai mai ai le Alii.