1 Iwe non na fansoun pwe minne mi makketiw epwe fis: Kon, O emon mi riit, en ewe kose tongeni nounou; puchoruu non kon, me puchor neuwomong, pwe kose riaffouni metekin nounou; pun a chommong ekkewe semiriten ewe ese wor noun nap seni ekkewe semiriten ewe fefin mi pupunu, anon ewe Samon.

2 Awatteno ewe nenien imwom mangaku, me mut ngeni ir repwe emeresano katenin nenimom kewe; kosap aukuku om pochokun, attamano om kewe san me apochokunano om kewe chunnan;

3 Pun oupwe mareseu won ewe peniemwan me won ewe peniefefin, iwe mwirimwirimi repwe angei pisekin ekkewe chon Gentile me fori ekkewe teninimw mi pon pwe repwe masow.

4 Kosap nuokus, pun kosap saw; kosap pwan kuf, pun kosap chiwen assaw; pun kopwe monukano assawen om serafo, me kosap chechemeni itengawen om serafo, me kosap chiwen chechemeni itengawen om emon mi mano punuom.

5 Pun noum we chon for, punuwom we, ewe Samonun Mwicheichen Aramas ina itan; me noum Chon Angasano, ewe Emon mi Fel seni Israel—ewe Koten ewe unusen fonufan epwe ina itan.

6 Pun ewe Samon a fen kokkoruk usun chok emon fefin mi nikitino me netipechou non ngun, me emon mi fefin serafo, nupwen kose ketiw, anon om Kot.

7 Pun ekis mwochomwochen fansoun ua fen nikitukono, nge ren umoumoch esap much upwe angeisefanuk.

8 Non ai ekis ningeringer ua opano mesei senuk ren ekis fansoun, nge ren kirekiroch esemuch epwe wor ai umoumoch wom, anon ewe Samon om Chon Angasano.

9 Pun ei, ekkewe konikin Noah ngeniei, pun usun ua fen akkaponu pwe ekkewe konikin Noah resap chiwen pwonano ewe fonufan, ina usun ua akkaponu pwe usap ningeringer reom.

10 Pun ekkewe chuk repwe no ekis me ekkewe chukuchukuta repwe mwokut, nge ai kirekiroch esap no senuk, ewe pwonen ai kinamwe esap pwan mwokut, anon ewe Samon ewe a wor an umoumoch wom.

11 O en mi riaffou, kemi nuwet fetan ren monumon, me kese kinamwe! Nengeni, upwe aueta om kewe foun fau mi saramaram enuwer, me forata om kewe nongonong ren foun fau auchea mi arawaraw.

12 Iwe upwe fori asamwachom seni foun fau mi ekis auchea, me om kewe tit seni foun fau auchea mi parapar, me om kewe kia meinisin seni foun fau mi auchea.

13 Me noum kewe semirit meinisin repwe kaeo seni ewe Samon; iwe fokkun watte ewe kinamwe an noum kewe semirit.

14 Non wenechar en kopwe foruta; kopwe towaw seni riaffou pun kosap nuokus, me towaw seni anuokus pun esap feito arap ngonuk.

15 Nengeni, repwe ennetin ioifengen ne ungonuk, esap seniei; ion chok epwe ionfengen ngonuk epwe turutiw pokitom.

16 Nengeni, ua fen forata ewe chon for mecha ewe a usi ekkewe moochen ekkei non ewe ekkei, me ewe a fori efoch pisekin angang seni an angang; me ua fen forata ewe chon atai mettoch pwe epwe ninni.

17 Ese wor pisekin efeiengaw a for pwe epwe ungonuk epwe fisioch; iwe channaw meinisin ekkewe repwe kapas mi ngaw ngonuk non kapung kopwe apungur. Iei ewe pung an ekkewe chon angang noun ewe Samon, me ar wenechar a feito seniei, anon ewe Samon.