1 Jó, dóó kʼad, ánáánihidishní, díí diyinkʼehgo haneʼígíí deínóhłtaʼ. Aooʼ, beehazʼáanii átʼéego nihichʼįʼ kóshłééh tsʼídá tʼáá aaníí ádaahtʼį́įgo deínóhłtaʼ; háálá Isaiah baa haneʼ éí ayóó átʼéii átʼé.

2 Háálá éí tsʼídá ałtso shidineʼé Israel bighandóó danilínígíí haneʼ bídadéétʼiʼígíí yaa nahasneʼ; éí bąą Gentile dineʼé ałdóʼ yichʼįʼ haadzííʼ.

3 Dóó tsʼídá ałtso yaa hoolneʼę́ę éí bidaʼalyaa dóó bidaʼdoolnííł, saad yee haadzíʼę́ę bikʼehgo ndi.

4 Éí bąą shizaad deísínóołtsʼą́ą́ʼ, bee nihichʼįʼ haasdzíʼígíí bikááʼ óhłééh, dóó aTaaʼ kʼad baa hoolzhiizhgo dóó niizį́įʼgo bikʼehgo díí haneʼígíí Gentile dineʼé bichʼįʼ kódoolnííł.

5 Dóó háíshį́į́ shizaad yidiiztsʼą́ʼígíí dóó bąąhági átʼéii yóó iidííʼánígíí dóó tó bee biʼdoolzį́ʼígíí, éí yisdádoogááł. Diyin God yá dahalneʼii yaa dahoolneʼę́ę ndaałkaah, háálá tʼóó ahayóí éí díí tʼáá aaníí átʼéego yaa dahoolneʼ.

6 Áádóó kʼad díí Jesus saad yee hachʼįʼ haadzíiʼgo ánááhodiʼní, díí Diyin God bizaad ndajijaahą́ą ałtso hachʼįʼ nááyíltaʼgo, kóyidííniid: Jó, Diyin God bizaad nááná łaʼ, doo ndaajaahígíí, éí ałdóʼ bikááʼ ádoohłííł nisin.

7 Áádóó Nephi yichʼįʼ haadzííʼ: Haneʼ náníjáhígíí deʼ níjááh yidííniid.

8 Dóó Nephi haneʼ néijááhą́ą hayínilgo dóó yidáahgi niinínilgo, yinééłʼį́į́ʼ dóó ání:

9 Tʼáá aaníí ánihidishní, shá naalnishii Samuel, Laman bidineʼé nilíinii, díí kótʼéego diné bichʼįʼ hadíídzih bidííniid ní, éí aTaaʼ shiníká góneʼ bízhiʼ baa hashniihgo tʼóó ahayóí diné daʼoosdląądgo daneeznánę́ę náádidoojah, dóó tʼóó ahayóí diné yichʼįʼ ííshjání ádadiʼdoolnííł, dóó ndadíʼnóotįįł. Dóó ánááhodiʼní: Tʼáásh aaníí ákódzaa?

10 Dóó bikééʼ naazíinii yichʼįʼ haadzííʼ dóó kódaaní: Aooʼ, Bóhólníihii, Samuel éí saad bee háínídzíʼígíí átʼéego náásgóó kódoonííł níigo yaa hoolneʼ, dóó éí ałtso beʼelyaa.

11 Dóó Jesus áháłní: Ákoshąʼ haitʼéego díí tʼáadoo bikááʼ óohłaa da, tʼóó ahayóí éí diné daʼoosdląądgo daneeznánę́ę náádiijééʼ dóó tʼóó ahayóí diné yichʼįʼ ííshjání ádaʼdiilyaa dóó ndaʼneeztą́ą́ʼ?

12 Áádóó Nephi díí tʼah doo bikááʼ álnéhígíí yénáálniiʼ.

13 Áádóó Jesus díí bikááʼ óhłééh dííniid; éí bąą éí bikʼehgo díí bikááʼ ályaa.

14 Áádóó kʼad Jesus díí Diyin God bizaad, ńdajiidzoh yę́ę, ałtso hoł nááyiiłtahgo, naakitsʼáadahí díí nihił yíltaʼígíí bíndaʼnołtin dooleeł yidííniid.