1 Ma o lenei, faauta, ou te fai atu ia te outou, e tatau ona outou suesue i nei mea. Ioe, ou te tuu atu ia te outou se poloaiga ia outou suesue ma le filiga i nei mea; ona ua silisili lava upu a Isaia.

2 Aua e moni ua ia tautala mai e uiga i mea uma e faatatau i o’u tagata o ē o le aiga o Isaraelu; o lea ua tatau ai foi ona ia tautala mai i Nuuese.

3 Ma o mea uma na ia tautala mai ai ua faataunuuina ma o le a faataunuuina, e tusa lava ma upu na ia tautala mai ai.

4 O lea ia outou uai mai i a’u upu; ia tusia mea ia na ou ta’u atu ia te outou; ma e tusa ai ma le taimi ma le finagalo o le Tamā o le a oo atu ai ia mea i Nuuese.

5 Ma o soo se tasi e faalogo i a’u upu ma salamo ma papatisoina, o ia lava lea o le a faaolaina. Suesue i perofeta, aua e toatele o i ai ua molimau mai e uiga i nei mea.

6 Ma o lenei sa oo ina ua uma ona fetalai mai Iesu i nei upu sa ia toe fetalai mai ia te i latou, ina ua uma ona ia faamamalamalama atoatoa mai ia te i latou tusitusiga paia uma sa ia te i latou, sa ia fetalai mai ia te i latou: Faauta, e i ai isi tusitusiga paia e le o ia te outou, ou te manao e tatau ona outou tusia.

7 Ma sa oo ina fetalai atu o ia ia Nifae: Ia aumai le talafaamaumau lea ua outou tausia.

8 Ma ina ua uma ona aumai talafaamaumau e Nifae, ma tuu i latou i ona luma, sa silasila atu o ia i ai ma fetalai atu:

9 E moni ou te fai atu ia te outou, sa ou poloaiina lau auauna o Samuelu, le sa Lamanā, e tatau ona molimau atu o ia i lenei nuu, e faapea, i lena aso lea o le a faamamaluina ai e le Tamā lona suafa ia te au, e i ai le toatele o le au paia o le a tutulai mai nai e ua oti, ma o le a faaali atu i le toatele, ma o le a auauna atu ia te i latou. Ma sa ia fetalai mai ia te i latou: Pe sa lei faapea ea?

10 Ma sa tali atu ona soo ia te ia ua fai atu: Ioe, le Alii e, sa vavalo lava Samuelu e tusa ma au fetalaiga, ma sa faataunuuina uma lava i latou.

11 Ma sa fetalai atu Iesu ia te i latou: Ua faapefea la ona outou le tusia o lenei mea, o lea sa faapea ona toatele le au paia na toetutu mai ma faaali atu i le toatele ma auauna atu ia te i latou?

12 Ma sa oo ina manatua e Nifae sa lei tusiaina lenei mea.

13 Ma sa oo ina poloaiina e Iesu ina ia tusia; o lea lava na tusia ai e pei ona ia poloaiina.

14 Ma lenei sa oo ina ua uma ona auiliili e Iesu tusitusiga paia uma ia tasi, ia sa latou tusia, sa ia poloaiina i latou e tatau ona latou a’oa’o atu mea ia sa ia auiliili mai ia te i latou.