1 Áádóó Malachi saad yee yichʼįʼ haadzíʼę́ę bikááʼ ádoohłííł yidííniid, éí yee yił ahoʼniilneʼ. Áádóó éí ałtso bikááʼ ályaa dóó índa tsʼídá nizhónígo hoł nááyiiłtah. Dóó díí éí saad yee yił nahasneʼ, kóníigo: ATaaʼ Malachi kóyidííniid—Jó, shinaalʼaʼí deeshʼaał, éí shilą́ąjįʼ hashtʼehodoolííł, dóó Bóhólníihii hádasídóoʼį́ʼę́ę tʼáá hooshchʼįʼ Diyin bighanjįʼ doogááł; éí éí bee ałhaʼdeetʼą́ yaa haneʼii ndi, baa nihił dahózhóonii; jó, éí doogááł, ní Tʼáá ałtsoní biBóhólníihii.

2 Ndi háíshąʼ níyá bijį́įdi doodzih, dóó háíshąʼ tʼahdii sizį́į dooleeł níyáago? Háálá kǫʼ doo yáʼátʼéehii nahjįʼ kwííłʼíinii nahalin, dóó táláwosh bee tʼáá ágisígíí nahalin dooleeł.

3 Dóó béésh łigai doo nidzinii yąąh haidiyiłkaahii dóó tsʼídá tʼáá ałtso chin nahjįʼ kwííłʼíinii nahalingo dah sidá; dóó Levi dabiyeʼ doo yáʼátʼéehii bąąh ádingo íidoolííł, dóó béésh óola dóó béésh łigai nahalingo íidoolííł, áko Bóhólníihii yáʼátʼéehii yichʼįʼ nádaʼíídóołnih.

4 Índa Judah dóó Jerusalem nááʼiisniiʼgo Bóhólníihii bił nizhóní dooleeł, tʼáá ałkʼidą́ą́ʼ átʼéhę́ęgi átʼéego, dóó áłtséhę́ędą́ą́ʼ átʼéhę́ęgi átʼéego.

5 Dóó ánihwiitʼaah biniiyé nihitah deeshááł; dóó tʼóó nichxǫ́ǫ́ʼígo éédahósinii, dóó daʼdiléí, dóó aseezį́ ádeiłʼíinii, dóó naalnishí yikʼé naʼanishígíí yee yichʼįʼ nahwiiłnáanii, dóó asdzání bąąh ádahasdįįdii, dóó áłchíní bizhéʼé ádaadinii, dóó diné doo yaa dajoobaʼii, dóó doo shéédaaldzidii bá ndahwiidiyeeshʼááł, ní Tʼáá ałtsoní biBóhólníihii.

6 Háálá shí éí Bóhólníihii nishłį́, dóó doo éí shinahatʼaʼ łahgo ánááshdlíił da; éí bąą Jacob biyeʼ nohłíinii doo nahjįʼ kónihidiʼdoolníił da.

7 Tʼáá nihizhéʼé yę́ędą́ą́ʼ doo wóshdę́ę́ʼ ndi shibeehazʼáanii bikʼehgo oʼoolʼįįłę́ę bitsʼáhisoohkai, dóó doo bikʼeh dahonołʼį́į da. Shaa nánóhkááh áko shídóʼ nihaa ńdeeshdááł, ní Tʼáá ałtsoní biBóhólníihii. Ndi ádadohní: Haʼátʼéegoshąʼ tʼą́ą́ʼ nínááhidiikah?

8 Dinésh Diyin God yee adínóoʼį́į́ł? Ákondi shee dasiʼnooʼį́į́ʼ. Ndi ádadohní: Haashąʼ yitʼéego nee daʼneetʼį́į́ʼ? Tʼááłáʼí dootłʼizh bíighahgo nihee nahodleełii Diyin God baa nahidoohʼaahą́ą dóó naaʼiiniihę́ę bee.

9 Hóyéeʼgo ahaʼiidziihii bee nihá haʼoodzííʼ, háálá nihí tʼáá kéédahohtʼíí ńtʼę́ę́ʼ shee dasiʼnooʼį́į́ʼ.

10 Nihee ndahoodleełii tʼááłáʼí dootłʼizh bíighahgo shinaalyeʼé bá hooghan góneʼ yah adaohjááh, áko shighan góneʼ atsįʼ hólǫ́ǫ doo; dóó kʼad shínóhtááh, ní tsʼídá Tʼáá ałtsoní biBóhólníihii, tʼáá daatsʼí aaníí yáʼąąshdę́ę́ʼ tsésǫʼ nihá ąą ádadeeshłííł, dóó nihikʼijįʼ akʼihojídlí kódeeshłííł áko wónáásdóó nihighan góneʼ doo hwiidooʼaał da.

11 Dóó naʼałtseedii níwohádi nahá bidideeshniił, dóó niʼ bikááʼ kʼidoołáhígíí doo yidoołchxǫǫł da; doo ndóʼ dáʼákʼehdi kʼidoołáhígíí bineestʼąʼ tʼah doo áajįʼ ahalzhííshdą́ą́ʼ dínóotʼį́įł da, ní Tʼáá ałtsoní biBóhólníihii.

12 Dóó ałʼąą dineʼé bił nahazʼą́ą́dę́ę́ʼ bikʼihojídlí daniłníi doo, háálá kéyah hózhóón daniłníi doo, ní Tʼáá ałtsoní biBóhólníihii.

13 Nihizaad shikʼijįʼ bidziilgo bee hadasoohdzííʼ, ní Bóhólníihii. Ákondi ádadohní: Haʼátʼíísh dadiiʼníigo bee nikʼijįʼ hadasiidzííʼ?

14 Kódoohniid: Tʼáadoo biniiyéhégóó Diyin God bá ndeiilʼaʼ, dóó haʼátʼíísh éí bee ndadidiilyéełgo bibee oʼoolʼįįł bidaʼííníilzin dóó Tʼáá ałtsoní biBóhólníihii binááł yínííł neiidáa doo?

15 Dóó kʼad ádaa hodzódlíi bił dahózhǫ́ dadiiʼní; aooʼ; bąąhági átʼéii yindaalnishii éí hashtʼedaalyaa tʼéí bikʼidahojídlí; aooʼ Diyin God yídaneeztą́ʼą́ą ndi tʼáadoo ádabiʼdiilyaaí da.

16 Índa Bóhólníihii yéédaaldzidii áłahjįʼ ałchʼįʼ hadaadziih, dóó Bóhólníihii íistsʼą́ąʼgo adiiztsʼą́ą́ʼ; dóó Bóhólníihii yéédaaldzidii dóó bízhiʼ yaa ntsídaakeesii naaltsoos bee ééhaniihii bá nááháasdzo.

17 Dóó éí shí dooleeł, ní Tʼáá ałtsoní biBóhólníihii, shitséghádiʼnídíinii áshłéehdi; dóó diné léiʼ biyeʼ bíká análwoʼii yaa joobaʼígi átʼéego baa jiideeshbaał.

18 Índa nínááhidoohkah dóó yáʼátʼéehgo dahinánígíí dóó bąąhági átʼéego dahinánígíí bee ałʼąą ádaatʼéhígíí nihił bééhodoozįįł, índa Diyin God yá naalnishii dóó doo yá naalnishii bee ałʼąą átʼéhígíí nihił bééhodoozįįł.