ບົດທີ 24
ທູດຂອງພຣະຜູ້ເປັນເຈົ້າຈະຈັດຕຽມທາງສຳລັບການສະເດັດມາຄັ້ງທີສອງ—ພຣະຄຣິດຈະປະທັບນັ່ງເປັນຜູ້ພິພາກສາ—ຊາວອິດສະຣາເອນຖືກບັນຊາໃຫ້ຈ່າຍສ່ວນສິບ ແລະ ຖວາຍເຄື່ອງບູຊາ—ປຶ້ມແຫ່ງຄວາມຊົງຈຳຖືກຮັກສາໄວ້—ປຽບທຽບກັບ ມາລາກີ 3. ປະມານ ຄ.ສ. 34.
1 ແລະ ເຫດການໄດ້ບັງເກີດຂຶ້ນຄື ພຣະອົງບັນຊາໃຫ້ພວກເພິ່ນຂຽນຖ້ອຍຄຳຊຶ່ງພຣະບິດາໄດ້ປະທານໃຫ້ແກ່ມາລາກີ ຊຶ່ງພຣະອົງຈະບອກແກ່ພວກເພິ່ນ. ແລະ ເຫດການໄດ້ບັງເກີດຂຶ້ນຄື ຫລັງຈາກທີ່ພວກເພິ່ນໄດ້ຂຽນຂໍ້ຄວາມເຫລົ່ານີ້ແລ້ວ ພຣະອົງໄດ້ຊີ້ແຈງກັບພວກເພິ່ນ. ແລະ ນີ້ຄືຂໍ້ຄວາມທີ່ພຣະອົງໄດ້ບອກແກ່ພວກເພິ່ນ, ມີຄວາມວ່າ: ພຣະບິດາກ່າວກັບມາລາກີດັ່ງນີ້—ຈົ່ງເບິ່ງ, ເຮົາຈະສົ່ງ ທູດຂອງເຮົາໄປຈັດຕຽມທາງໄວ້ສຳລັບເຮົາ, ແລ້ວ ໃນທັນໃດນັ້ນ ພຣະຜູ້ເປັນເຈົ້າອົງທີ່ພວກເຈົ້າສະແຫວງຫາກໍຈະສະເດັດມາທີ່ພຣະວິຫານຂອງພຣະອົງ, ເຖິງແມ່ນທູດແຫ່ງພັນທະສັນຍາຊຶ່ງພວກເຈົ້າເບີກບານໃນພຣະອົງ; ຈົ່ງເບິ່ງ, ພຣະອົງຈະມາ, ຈອມໂຍທາໄດ້ກ່າວ.
2 ແຕ່ໃຜຈະ ຢູ່ໃນວັນທີ່ພຣະອົງສະເດັດມາ? ໃຜຈະຢືນຢູ່ເມື່ອພຣະອົງສະເດັດມາປະກົດ? ເພາະວ່າພຣະອົງເປັນເໝືອນດັ່ງໄຟທີ່ ຫລອມໂລຫະ, ແລະ ເປັນເໝືອນດັ່ງສະບູທີ່ມີພະລັງແຮງຂອງຄົນຊັກຜ້າ.
3 ແລະ ພຣະອົງຈະປະທັບນັ່ງດັ່ງຜູ້ຫລອມເງິນໃຫ້ບໍລິສຸດ; ແລະ ພຣະອົງຈະຊຳລະ ພວກລູກຊາຍຂອງເລວີ, ແລະ ເຮັດໃຫ້ພວກເຂົາບໍລິສຸດ ດັ່ງດຽວກັນກັບຄຳ ແລະ ເງິນທີ່ຫລອມແລ້ວ, ເພື່ອພວກເຂົາຈະນຳເຄື່ອງຖວາຍບູຊາທີ່ຖືກຕ້ອງມາ ຖວາຍແດ່ພຣະຜູ້ເປັນເຈົ້າ.
4 ເມື່ອນັ້ນເຄື່ອງຖວາຍຂອງຢູດາ ແລະ ເຢຣູຊາເລັມຈະເປັນທີ່ພໍພຣະໄທຕໍ່ພຣະຜູ້ເປັນເຈົ້າດັ່ງໃນສະໄໝບູຮານ ແລະ ດັ່ງປີກ່ອນໆ.
5 ແລະ ເຮົາຈະມາໃກ້ເຈົ້າເພື່ອພິພາກສາ; ແລະ ເຮົາຈະເປັນພະຍານຕໍ່ສູ້ພວກໝໍເວດມົນຄາຖາໃນທັນທີ, ແລະ ຕໍ່ສູ້ພວກທີ່ຫລິ້ນຊູ້ສູ່ຜົວເມຍ, ແລະ ຕໍ່ສູ້ພວກທີ່ເປັນພະຍານເທັດ, ແລະ ຕໍ່ສູ້ພວກທີ່ສໍ້ໂກງຄ່າແຮງງານຂອງລູກຈ້າງ, ຕໍ່ສູ້ພວກທີ່ເອົາປຽບແມ່ໝ້າຍ ແລະ ເດັກກຳພ້າ, ແລະ ຄົນຕ່າງດ້າວ, ແລະ ຕໍ່ສູ້ພວກທີ່ບໍ່ຢຳເກງເຮົາ, ຈອມໂຍທາໄດ້ກ່າວ.
6 ເພາະເຮົາຄືພຣະຜູ້ເປັນເຈົ້າ, ເຮົາບໍ່ປ່ຽນແປງ; ສະນັ້ນ ພວກເຈົ້າຜູ້ເປັນເຊື້ອສາຍຂອງຢາໂຄບຍັງບໍ່ສູນສິ້ນໄປເທື່ອ.
7 ເຖິງແມ່ນຕັ້ງແຕ່ວັນເວລາຂອງບັນພະບຸລຸດຂອງພວກເຈົ້າ, ພວກເຈົ້າໄດ້ ໄປຈາກພິທີການຂອງເຮົາ, ແລະ ບໍ່ໄດ້ຮັກສາມັນ. ຈົ່ງ ກັບມາຫາເຮົາ ແລະ ເຮົາຈະກັບໄປຫາພວກເຈົ້າ, ຈອມໂຍທາໄດ້ກ່າວ. ແຕ່ພວກເຈົ້າຖາມວ່າ: ພວກຂ້າພຣະອົງຈະເຮັດຢ່າງໃດຈຶ່ງຈະສາມາດກັບໄປຫາພຣະອົງໄດ້?
8 ມັນເປັນການຖືກຕ້ອງບໍທີ່ມະນຸດສໍ້ໂກງພຣະເຈົ້າ? ແຕ່ເຈົ້າໄດ້ສໍ້ໂກງເຮົາ. ແຕ່ພວກເຈົ້າຖາມວ່າ: ສໍ້ໂກງຢ່າງໃດ? ກໍສໍ້ໂກງໃນເລື່ອງໜຶ່ງ ສ່ວນສິບ ແລະ ເຄື່ອງຖວາຍຕ່າງໆນັ້ນແຫລະ.
9 ພວກເຈົ້າຖືກສາບແຊ່ງດ້ວຍຄຳສາບແຊ່ງ, ກໍເພາະວ່າຄົນທັງຊາດສໍ້ໂກງເຮົາ.
10 ຈົ່ງນຳເງິນເຕັມຈຳນວນໜຶ່ງ ສ່ວນສິບມາຍັງຄັງ ເພື່ອວ່າຈະມີອາຫານໃນບ້ານຂອງເຮົາ; ຈົ່ງລອງເຮັດຢ່າງນັ້ນກັບເຮົາເບິ່ງ, ຈອມໂຍທາໄດ້ກ່າວ, ແລະ ພວກເຈົ້າຈະເຫັນວ່າ ເຮົາຈະໄຂປະຕູສະຫວັນ ແລະ ຖອກເທ ພຣະພອນລົງມາຍັງພວກເຈົ້າ ຈົນວ່າບໍ່ມີບ່ອນໃສ່ມັນໄວ້.
11 ແລະ ເຮົາຈະຕິຕຽນຜູ້ທີ່ກືນກິນ ເພາະເຫັນແກ່ພວກເຈົ້າ, ແລະ ມັນຈະບໍ່ທຳຮ້າຍຜົນຈາກດິນຂອງພວກເຈົ້າ; ທັງຕົ້ນອະງຸ່ນຂອງພວກເຈົ້າກໍຈະມີໝາກຫລາຍກ່ອນເວລາ, ຈອມໂຍທາໄດ້ກ່າວ.
12 ແລະ ທຸກປະຊາຊາດຈະເອີ້ນພວກເຈົ້າວ່າຜູ້ມີຄວາມສຸກ, ເພາະດິນແດນຂອງພວກເຈົ້າຈະເປັນທີ່ຢູ່ອາໄສຢ່າງຜາສຸກ, ຈອມໂຍທາໄດ້ກ່າວ.
13 ພວກເຈົ້າໄດ້ເວົ້າຈາໃສ່ຮ້າຍເຮົາ, ພຣະຜູ້ເປັນເຈົ້າໄດ້ກ່າວ. ແຕ່ພວກເຈົ້າຖາມວ່າ: ພວກຂ້າພຣະອົງໄດ້ເວົ້າຈາໃສ່ຮ້າຍຫຍັງແດ່ແກ່ພຣະອົງ?
14 ພວກເຈົ້າໄດ້ເວົ້າວ່າ: ຮັບໃຊ້ພຣະເຈົ້ານັ້ນບໍ່ມີປະໂຫຍດ, ແລະ ມີປະໂຫຍດຫຍັງທີ່ຈະປະຕິບັດຕາມ ພິທີການຕ່າງໆຂອງພຣະອົງ ແລະ ເສຍໃຈຕໍ່ສິ່ງທີ່ພວກເຮົາໄດ້ເຮັດມາຕໍ່ພຣະພັກຂອງຈອມໂຍທາ?
15 ແລະ ບັດນີ້ພວກເຮົາເອີ້ນຄົນອວດດີວ່າຄົນມີຄວາມສຸກ; ແທ້ຈິງແລ້ວ, ຄົນທີ່ເຮັດຄວາມຊົ່ວຮ້າຍວ່າສູງສົ່ງ; ແທ້ຈິງແລ້ວ, ວ່າແຕ່ຄົນທົດລອງພຣະເຈົ້າກໍບໍ່ໄດ້ຮັບໂທດຫຍັງເລີຍ.
16 ແລ້ວຄົນທີ່ຢຳເກງພຣະຜູ້ເປັນເຈົ້າໄດ້ ເວົ້າກັນເລື້ອຍໆ, ແລະ ພຣະຜູ້ເປັນເຈົ້າໄດ້ຮັບຟັງ ແລະ ໄດ້ຍິນ; ແລະ ຢູ່ຕໍ່ພຣະພັກຂອງພຣະອົງ ມີ ໜັງສືແຫ່ງຄວາມຊົງຈຳເຫລັ້ມໜຶ່ງທີ່ບັນທຶກລາຍຊື່ຂອງຄົນທີ່ຢຳເກງພຣະຜູ້ເປັນເຈົ້າໄວ້, ແລະ ເຄົາລົບພຣະນາມຂອງພຣະອົງ.
17 ພວກເຂົາຈະເປັນຜູ້ຄົນຂອງເຮົາ, ຈອມໂຍທາໄດ້ກ່າວ, ໃນມື້ນັ້ນເມື່ອເຮົາ ຮວບຮວມເຄື່ອງເພັດຂອງເຮົາ; ແລະ ເຮົາຈະລະເວັ້ນມັນ ດັ່ງມະນຸດລະເວັ້ນບຸດຂອງຕົນ ທີ່ຮັບໃຊ້ຕົນ.
18 ເມື່ອນັ້ນເຈົ້າຈະກັບມາ ແລະ ຫລິງເຫັນຄວາມແຕກຕ່າງລະຫວ່າງຄົນຊອບທຳ ແລະ ຄົນຊົ່ວ, ລະຫວ່າງຜູ້ຮັບໃຊ້ພຣະເຈົ້າ ແລະ ຜູ້ທີ່ບໍ່ຮັບໃຊ້ພຣະອົງ.