1 Thiab tau muaj tias nws tau txib lawv kom lawv yuav tsum sau tej lus uas Leej Txiv tau muab rau Malakhis, tej uas nws yuav tsum qhia rau lawv. Thiab tau muaj tias tom qab uas lawv raug muab sau cia lawm nws tau piav ntxaws txog lawv. Thiab cov no yog tej lus uas nws tau qhia rau lawv, hais tias: Li no Leej Txiv tau hais rau Malakhis tias—Saib seb, kuv yuav xa kuv tus tub xa xov, thiab nws yuav npaj txoj kev ua kuv ntej, thiab tus Tswv uas nej nrhiav yuav tawm plaws los rau hauv nws lub tuam tsev, twb yog tus tub xa xov ntawm txoj kev khi lus, uas nej zoo siab rau; saib seb, nws yuav los, Ib Tsoom Tub Rog tus Tswv hais li.

2 Tiam sis leej twg yuav tiv nyob rau hnub nws los, thiab leej twg yuav sawv tau thaum nws tshwm sim los? Vim nws yuav zoo ib yam li tus kws nchuav nyiaj lub qhov cub, thiab zoo ib yam li tus ntxhua khaub ncaws tej tshuaj.

3 Thiab nws yuav zaum yam li ib tug kws nchuav nyiaj thiab kws ua kom nyiaj dawb; thiab nws yuav ua kom Livais tej tub dawb huv, thiab nchuav kom lawv yuav zoo li kub thiab nyiaj, kom lawv yuav tau muab rau tus Tswv ib qho kev txi nyob hauv txoj kev ncaj ncees.

4 Thaum ntawd txoj kev txi ntawm Yudas thiab Yeluxalees yuav txaus siab rau tus Tswv, ib yam li nyob rau txheej thaum ub, thiab ib yam li tej xyoo tas los lawm.

5 Thiab kuv yuav los ze rau nej rau txoj kev txiav txim; thiab kuv yuav ua ib tug tim khawv nrawm nroos nkaug cov neeg txawj ua khawv koob, thiab nkaug tej neeg deev luag poj luag txiv, thiab nkaug tej neeg ua tim khawv tsis tseeb, thiab nkaug cov uas ua phem khoo nws tej tub dag tub zog tej nyiaj, ua phem khoo tej poj ntsuam thiab tej me nyuam tsis muaj txiv, thiab cov uas tsis kam txais qhua los tsev, thiab cov uas tsis ntshai kuv, Ib Tsoom Tub Rog tus Tswv hais li.

6 Vim kuv yog tus Tswv, kuv yeej tsis hloov; yog li ntawd nej cov tub ntawm Yakhauj yeej yuav tsis puas tsuaj tu noob nrho.

7 Txawm yog txij li lub caij ntawm nej tej yawg koob los los nej tau khiav deb ntawm kuv tej kab ke, thiab tsis tau coj lawv. Cia li tig rov los cuag kuv thiab kuv yuav tig rov los cuag nej, Ib Tsoom Tub Rog tus Tswv hais li. Tiam sis nej hais tias: Peb yuav rov qab tau li cas?

8 Ib tug tib neeg puas yuav nyiag Vajtswv? Tiam sis nej twb nyiag kuv lawm. Tiam sis nej hais tias: Peb tau nyiag koj li cas? Nyob hauv ib feem kaum thiab tej kev muab pub.

9 Nej raug foom nrog ib qho kev foom tsis zoo, vim nej tau nyiag kuv, twb tag nrho haiv neeg no.

10 Nej cia li coj tag nrho tej feem kaum tuaj rau hauv lub tsev cia khoom, xwv kom yuav muaj nqaij nyob hauv kuv lub tsev; thiab nim no cia li ua qhia rau kuv saib, Ib Tsoom Tub Rog tus Tswv hais li, yog kuv tseem yuav tsis qhib tej qhov rais ntuj ceeb tsheej rau nej, thiab nchuav ib qho koob hmoov rau nej xwv kom yuav tsis muaj chaw txaus txais nws.

11 Thiab kuv yuav tshem tus uas yuav rhuav nej tej qoob loos, thiab nws yuav tsis tau ua kom tej txiv hmab txiv ntoo ntawm nej tej av puas tsuaj; thiab nej tej txiv hmab los yuav tsis poob ua ntej lub sij hawm lawv siav, Ib Tsoom Tub Rog tus Tswv hais li.

12 Thiab txhua haiv neeg yuav hu nej ua cov neeg tau koob hmoov, vim nej yuav yog ib thaj av uas ntxim nyiam heev, Ib Tsoom Tub Rog tus Tswv hais li.

13 Nej tej lus tau nyaum tawm tsam kuv, tus Tswv hais li. Tiam sis nej hais tias: Peb tau hais yam dab tsi tawm tsam koj?

14 Nej tau hais tias: Nws tsis muaj nuj nqis dab tsi mus ua hauj lwm rau Vajtswv, thiab yuav muaj nuj nqis dab tsi kom peb coj nws tej kab ke thiab kom peb mus yam li txawj tu siab ua ntej Ib Tsoom Tub Rog tus Tswv?

15 Thiab nim no peb hu cov neeg khav theeb ua cov zoo siab; muaj tseeb tiag, lawv cov uas ua hauj lwm phem raug vam meej; muaj tseeb tiag, lawv cov uas sim Vajtswv raug tso dim dawb.

16 Thaum ntawd lawv cov uas ntshai tus Tswv ib leeg nquag nquag hais rau ib leeg, thiab tus Tswv tau mloog thiab tau hnov; thiab ib phau ntawv nco txog tau raug sau ua ntej nws rau lawv kom ntshai tus Tswv, thiab kom xav txog nws lub npe.

17 Thiab lawv yuav yog kuv li, Ib Tsoom Tub Rog tus Tswv hais li, nyob rau hnub ntawd thaum kuv ua kuv tej sawv nyiaj sawv kub; thiab kuv yuav tseg lawv ib yam li ib tug neeg tseg nws tus tub uas ua hauj lwm rau nws.

18 Thaum ntawd nej yuav tig rov qab thiab pom nruab nrab ntawm cov neeg ncaj ncees thiab cov neeg phem, nyob nruab nrab ntawm nws tus uas ua hauj lwm rau Vajtswv thiab nws tus uas tsis ua hauj lwm rau nws.