1 Ma sa oo ina malaga atu soo o Iesu ma a’o latou tala’i atu mea ia na latou faalogo ma vaaia, ma a o latou papatiso atu i le suafa o Iesu, sa oo ina faapotopoto faatasi le au soo ma aufaatasi i le tatalo faatauanau atu ma le anapogi.

2 Ma sa toe faaali mai e Iesu o ia lava ia te i latou, ona sa latou tatalo atu i le Tamā i lona suafa; ma sa afio mai Iesu ma tulai i totonu o i latou, ma fetalai mai ia te i latou: O le a se mea ua outou mananao ou te tuu atu ia te outou?

3 Ma sa latou fai mai ia te ia: Le Alii e, matou te mananao sei e ta’u mai ia te i matou le igoa matou te faaigoa ai lenei ekalesia; ona o loo i ai ni finauga i totonu o le nuu e faatatau i lenei mataupu.

4 Ma sa fetalai atu le Alii ia te i latou: E moni, e moni, ou te fai atu ia te outou, aisea ea ua tomumumu ma finau ai le nuu ona o lenei mea?

5 Latou te lei faitau ea i tusitusiga paia, ia ua fai mai e ao ina outou ave i o outou luga le suafa o Keriso, o lo’u igoa lea? Ona o le igoa lea o le a valaau ai outou i le aso gataaga;

6 Ma o soo se tasi na te ave i ona luga lo’u igoa, ma tumau seia oo i le iuga, o ia lava lea o le a faaolaina i le aso gataaga.

7 O lea, soo se mea tou te faia, ia outou faia i lo’u igoa; o lea ia outou faaigoa ai le ekalesia i lo’u igoa; ma ia outou valaau atu i le Tamā i lo’u igoa ia faamanuia mai o ia i le ekalesia ona o a’u.

8 Ma e faapefea ona avea ma a’u ekalesia vagana ai ua faaigoaina i lo’u igoa? Aua afai e faaigoaina se ekalesia i le igoa o Mose o lona uiga o le ekalesia lea a Mose; pe afai e faaigoaina i le igoa o se tagata o lona uiga o le ekalesia lea a le tagata; ae afai e faaigoaina i lo’u igoa o lona uiga o la’u ekalesia lea, pe afai ua atia’e i latou i luga o la’u talalelei.

9 E moni ou te fai atu ia te outou, ua atia’e outou i luga o la’u talalelei; o lea ia outou valaauina i lo’u igoa soo se mea tou te valaauina; o lea afai tou te valaau atu i le Tamā, mo le ekalesia, afai e faia i lo’u igoa o le a faafofoga mai le Tamā ia te outou.

10 Ma afai ua faapea ona atia’e o le ekalesia i luga o la’u talalelei ona faaali mai ai lea e le Tamā o ana lava galuega i totonu o ia mea.

11 Ae afai ua le atia’e i luga o la’u talalelei, ma ua atia’e i luga o galuega a tagata, po o luga o galuega a le tiapolo, e moni ou te fai atu ia te outou latou te maua le olioli i a latou galuega mo se vaitau, ma e toe itiiti ane oo mai le iuga, ma o le a taia i latou i lalo ma lafoaiina i le afi, lea ua leai se toe foi mai ai.

12 Aua e mulimuli atu a latou galuega ia te i latou, aua ona o a latou galuega ua taia ai i latou i lalo; o lea ia outou manatua ai mea ua ou ta’u atu ia te outou.

13 Faauta, ua ou tuu atu ia te outou la’u talalelei, ma o le talalelei lenei ua ou tuu atu ia te outou—e faapea, ua ou sau i le lalolagi e fai le finagalo o lo’u Tamā, aua na auina mai a’u e lo’u Tamā.

14 Ma na auina mai a’u e lo’u Tamā ina ia siitia a’e a’u i luga o le satauro; ma a mavae ona siitia a’e o a’u i luga o le satauro, ina ia mafai ona ou aumai o tagata uma ia te a’u, ina ia pei ona siitia a’e o a’u i luga e tagata ia faapea foi ona siitia a’e i luga o tagata e le Tamā, e tutulai i o’u luma, e faamasinoina i a latou galuega, pe ua lelei pe ua leaga—

15 Ma le pogai lenei na siitia a’e ai a’u i luga; o lea, e tusa ai ma le mana o le Tamā, o le a ou aumai ai tagata uma ia te au, ina ia faamasinoina i latou e tusa ma a latou galuega.

16 Ma o le a oo mai foi, o le a faatumuina soo se tasi e salamo ma papatiso i lo’u igoa; ma afai e tumau o ia seia oo i le iuga, faauta, o ia lea o le a ou le tausalaina i luma o lo’u Tamā i lena aso pe a ou tulai e faamasino i le lalolagi.

17 Ma o ia e le tumau seia oo i le iuga, o ia lava lea e tatuu foi i lalo ma lafo i le afi, o se mea e le mafai ona latou toe foi mai ai, ona o le faamasinotonu o le Tamā.

18 Ma o le afioga lenei ua ia tuuina mai i le fanauga a tagata. Ma o le pogai lenei ua ia faataunuuina ai afioga ia na ia tuuina mai, ma e le pepelo lava ia, ae na te faataunuuina ana afioga uma.

19 Ma e leai se mea le mama e mafai ona ulu atu i lona malo; o lea e leai se mea e ulu atu i lona malologa vagana ai i latou o e ua faamamaina o latou ofu i lo’u toto, ona o lo latou faatuatua, ma le salamo i a latou agasala uma, ma lo latou faamaoni e oo i le iuga.

20 O lenei o le poloaiga lenei: Ia salamo, outou tuluiga uma o le lalolagi, ma o mai ia te au ma ia papatiso i lo’u igoa, ina ia faapaiaina outou i le taliaina o le Agaga Paia, ina ia outou tutulai ma le le pona i o’u luma i le aso gataaga.

21 E moni, e moni, ou te fai atu ia te outou, o la’u talalelei lea; ma ua outou iloa mea e tatau ona outou faia i la’u ekalesia; ona o galuega na outou vaai na ou faia o mea ia tou te faia foi; aua o mea na outou vaai ua ou faia o mea lava ia ia outou faia;

22 O lea, afai tou te faia nei mea, amuia outou, ona o le a siitia a’e outou i luga i le aso gataaga.

23 Ia tusia mea na outou vaaia ma faalogoina, vagana ai mea ua faasaina.

24 Ia tusia galuega a lenei nuu, ia o le a faia, e pei lava ona tusia, e uiga i mea ua mavae.

25 Aua faauta, o tusi ua tusia, ma ia o le a tusia, o le a faamasinoina mai ai lenei nuu, ona o i latou o le a iloa ai e tagata a latou galuega.

26 Faauta foi, ua tusia mea uma e le Tamā; o lea o mea mai tusi o le a tusia o le a faamasino ai le lalolagi.

27 Ma ia outou iloa o le a avea outou ma faamasino o lenei nuu, e tusa ma le faamasinoga o le a ou tuu atu ia te outou, lea o le a tonu. O lea, o a ituaiga o tagata e tatau ona outou i ai? E moni ou te fai atu ia te outou, e pei lava o A’u nei.

28 Ma o lenei ou te alu atu i le Tamā. Ma e moni ou te fai atu ia te outou, soo se mea tou te ole atu ai i le Tamā i lo’u igoa o le a tuuina mai ia te outou.

29 O lea, ole atu, ma o le a outou maua; tu’itu’i atu, ma o le tatala mai ia te outou; aua o ia e ole atu, e maua e ia; ma o ia e tu’itu’i atu, o le a tatala mai i ai.

30 Ma o lenei, faauta, ua tele lo’u olioli, ua oo lava i le atoatoa, ona o outou, ma lenei foi tupulaga; ioe, ma e oo lava i le Tamā ua olioli, ma agelu paia uma foi, ona o outou ma lenei tupulaga, ona ua leai so latou ua se.

31 Faauta, ou te manao ia outou malamalama; aua e faatatau la’u tala ia te i latou o loo ola nei o le tupulaga lenei; ma ua leai so latou ua se; ma o i latou ia ua ou maua ai le atoatoa o le olioli.

32 Ae faauta, ua ou faanoanoa ona o le tupulaga lona fa mai le tupulaga lenei, ona e ta’ita’i ese faatagataotauaina i latou e ia e pei lava o le atalii o le malaia; ona o le a latou faatau atu a’u mo ario ma auro, ma mo mea na e faaleaga e mogamoga ma mea e mafai e tagata gaoi ona osofaia ma gaoi ai. Ma i lena aso o le a ou asiasi atu ai ia te i latou, e oo i le liliuina o a latou galuega i luga o o latou lava ulu.

33 Ma sa oo ina ua uma ona faaiuina e Iesu o ia fetalaiga sa ia fetalai atu ai i ona soo: Ia outou ulufale atu i le faitotoa vaapiapi; aua e vaapiapi le faitotoa, ma lauitiiti le ala e tau atu i le ola, ma e toaitiiti i latou o e latou te mauaina; ae ua vatele le faitotoa, ma lautele le ala e tau atu i le oti, ma e toatele i latou o ē e ui atu ai, seia oo mai le po, e le mafai e se tagata ona galue ai.